1 Áádóó baa hoolzhiizh Diyin Bóhólníihii áshidííniid, ákohgo tsé bee béésh tʼąhí ádeishłáígíí bikááʼ shidineʼé baahaneʼgo náhidéésoh. Dóó béésh tʼąhí iishłáígíí bikááʼ shizhéʼé baahaneʼ náhidéésoh, dóó diné doo kééhatʼinígi yiiʼnéłígíí ałdóʼ, dóó shizhéʼé náásjįʼ kódahodoonííł nínée; dóó tʼáá shí ląʼída náásjįʼ kódahodoonííł dishnínée bikááʼ náháaszoh.

2 Áádóó ádaashlaa yę́ędę́ę́ Diyin Bóhólníihii díidí béésh tʼąhí ádiilííł shididooniiłígíí doo baa ákonisinda ńtʼę́ę́ʼ; ákohgo, shizhéʼé baahaneʼ, dóó dabizhéʼé dabizázíyę́ę ałkééʼ naháasdzooígíí, dóó diné doo kééhatʼiní biyiʼ ádeilyaaígíí ałtso bee yéiłtiʼę́ę áłtsé béésh tʼąhí bikááʼ hahaszoh; ákohgo, tʼáadoo leʼé tʼah doo díidí béésh tʼąhí ádaashłééhgóó bitsijįʼ ádahóótʼįįdyę́ę, tʼáá aaníí, áłtsé béésh tʼąhíyę́ę dabikááʼgóó baa dahaneʼ.

3 Áádóó áshiʼdiʼníigo díidí béésh tʼąhí ádeishłaa dóó bikʼijįʼ, shí, Nephi, ánaashiʼdooʼníidgo naʼnitin dóó ádahoonííł, doo nantłʼahgóó dóó daʼílíigo ádáátʼįįdígíí, tsʼídá díidí béésh tʼąhí bikááʼ náhídoodzoh; dóó díí ndáhaasdzoígíí shidineʼé bee nanitin biniinaa baa áhayą́ą doo, éí kéyahgi kéédahatʼínígíí, dóó nááná łaʼ da hódzánígíí baa téʼátʼínígíí ałdóʼ biniyé, éí éí Diyin Bóhólníihii biniyéhígíí bił bééhózin.

4 Ákohgo, shí, Nephi, nááná łaʼ béésh tʼąhí bikááʼ naʼiisóóh, éí yaa halneʼígíí, doodágoʼ shidineʼé daʼahigąh dóó ałchʼįʼ daʼdeezsih dóó ádaʼahisdį́į́d tʼáá íiyisíí yaa halneʼ. Dóó shí díí ííshłaa, dóó shidineʼé dahnídiisdzáádóó bikʼijįʼ tsʼídá kódadoohnííł bidishní; dóó tʼáá oochííł bikʼeh díidí béésh tʼąhí ałkeeʼ oochííł deiyóʼaah doo, doodágoʼ Diyin yá yáłtiʼii ałkééʼ deiyóʼaah doo, Diyin Bóhólníihii nááná łaʼ bibee hazʼáanii yił chʼííníʼą́ąjįʼ índa.

5 Áádóó díidí béésh tʼąhí áshłehígíí kʼad baa hodeeshnih; dóó áádi, jó ákon, bee haasdziʼę́ę bikʼehgo áshłééh; dóó díí tʼáadoo leʼé baa dahastiʼgo ashłehígíí shidineʼé bił béédahózingo náás yijih dooleeł.

6 Ákótʼée ndi, doo béésh tʼąhí bikááʼ tʼáadoo leʼé tʼóó yihsóh da tʼáá hazhóʼó baa hastiʼ nísinígíí tʼéiyá. Dóó kʼad, asésihígíí, ałkʼidą́ą́ʼ daʼásihę́ę́giʼ átʼéego; diné asihgo doo bee bikʼeh háshʼáah da, ndi atsʼíseekʼehgo, doo bíneeshʼánígíí biniinaa, tʼáadoo shikʼíhóʼáhí.

7 Háálá diné łaʼ tʼáadoo leʼé bił daʼílígíí, tʼáá áłah atsʼíís dóó iiʼ sizíiniijí, łaʼ éí doo bił danilį́į da dóó tʼóó yikʼi naakái. Aóóʼ, Israel biDiyin God ayóó doo bił danilį́į da dóó tʼóó yikʼi naakái; kódishní, tʼóó yikʼi naakai ákondi saad kótʼáo ááłdishní—doo bił danilį́į da, dóó biinééʼ yinahaʼá doo dayíistsʼą́ą́ʼ da.

8 Áádóó áko shooh, shizhéʼé hastą́ądi neeznádiin nááhaidą́ą́ʼ Jerusalemdóó dah diiyáago doogááł, Diyin yá naalʼaʼí bizaad bikʼehgo.

9 Áádóó nihokááʼ dineʼé, tsiʼ naakáigo biniinaa, doo ílį́įgóó yaa ntsídadookos; ákohgo atídeiłį́, ndi tʼóó yił átʼé; dóó atídabíiłʼįįd, ndi tʼóó yił átʼé. Aóóʼ, bikʼídahidizééh, ndi tʼóó yił átʼé, bee ayóóʼóʼóʼní yéé nihaa joobaʼ dóó nihokááʼ dineʼé baʼáłchíní nízaadgóó yee haʼólníi doo.

10 Áádóó danhizhéʼé yę́ę biDiyin God, Egyptdóó chʼíbiníʼeezh, ąąh shijééʼdóó, dóó diné doo kééhatʼinígi ałdóʼ baa áhalyą́, aooʼ, Abraham biDiyin God, dóó Isaac biDiyin God, dóó Jacob biDiyin God, tʼáá bí yaa ádeetʼą́ Diyin God yá naalʼaʼí bizaadkʼehgo, dinégi átʼáo, diné tsiʼnaakáii yilákʼeejįʼ, dahbidiʼdooltʼééł biniyé, Zenock bizaadkʼehgo, dóó tsin ałnáozʼá bikʼijįʼ bił iʼdoolkáł, Neum bizaadkʼehgo, dóó tsé niiʼ ootséél góneʼ nidooltééł, Zenos bizaadkʼehgo, tááʼ yiską́ąjįʼ éiyá chahódoołhił yaa yáałtiʼę́ę, tónteel yikáá kéédahatʼínígíí daaztsą́ągi bee bichʼįʼ ééhózin ályaa, tʼáá íiyisíí Israel yighandóó háájeʼígíí bichʼįʼ kólyaa.

11 Háálá Diyin yá yáłtiʼii yee haadzííʼ: Bóhólníihii Diyin God éí jį́įdi tʼáá ałtso Israel yighandóó haajeʼígíí yaadoogááł, Diyin God yikʼehgo yiikahgo biniinaa, nléi ayóó bił dahózhǫ́ dóó yee yisdáádookah, dóó beʼádziil bee daʼdiʼní dóó ándaʼdidlaʼ, náhałtin, dóó kǫʼ, dóó łíd bee, dóó chahałheeł yildóh, dóó nahasdzáán ąą ádzaago bee, dóó nahasdzáán nidahaazdláád dóó dził yáádahniisą́.

12 Áádóó díidí tʼáá ałtsoní tsʼídá áhodoonííł, níiniʼ Zenos Diyin yá yáłtiʼii. Dóó niʼgi tséhę́ę ndaheezdláád; dóó niʼdiʼninígíí biniinaa, tónteelgóó tʼóó ahayói aláahgo naatʼáanii Diyin God biʼIiʼ Sizį́ Diyinii yikʼidahooleʼgo, kódáání: naaldeehii biDiyin God tiʼhoonííh.

13 Áádóó tʼahdii Jerusalemdi ndaakaiígíí, Diyin yá yáłtiʼii níineʼ, dineʼé ałtso atídabiłʼį́į dooleeł, Israel biDiyin God tsin ałnáozʼá bikʼijįʼ yił adaʼaskaalgo biniinaa, dóó bijéí yee yitsʼą́ąjįʼ náhááskai, ádahodooníłígíí dóó álíleekʼehgo ił ahayóigo yóó adeideezʼą, dóó Israel biDiyin God beʼádziil dóó beʼayóó átʼéii ałdóʼ.

14 Áádóó bijéí yee nahjįʼ kódaadzaaígíí biniinaa, Diyin yá yáłtiʼii áníineʼ, dóó Israel biDiyin Ayóó Átʼéii dayiiʼįįd, atsʼíseekʼehgo ił ahayóigo yiiʼ naanáákah, dóó dinoonééł, dóó tłehee yéiʼ dóó yáádiish, dóó tʼáá ałtso dineʼé dabijoodlá dooleeł.

15 Ákótʼée ndi, éí bijį́į́di, Diyin yá yáłtiʼii níineʼ, doo Israel biDiyin Ayóó Átʼéii bijéí nahjįʼ kódeiłʼį́į da doo, áadi índa dabizhéʼéyę́ę yee yił ahaʼdeestʼánée yéédoolníh.

16 Aooʼ, áadi tónteel yikááhgóó kéédahatʼinígíí yéédoolnih; aooʼ, dineʼé ałtso Israel yighandóó haajéʼígíí, áłhąʼádeeshłííł, ní Diyin Bóhólníihii, Zenos shá yáłtiʼii bizaadkʼehgo, nahasdzáán dį́į́ʼ ałhidadiiʼáádę́ę́ʼ.

17 Aooʼ, dóó nahasdzáán tʼáá ałtso Diyin Bóhólníihii biyisdááʼiildééh deidoołtsééł, ní Diyin yá yáłtiʼii, tʼáá átʼé dineʼé, kʼé deiłnínígíí, bizaadjí, dóó diné bikʼihojidoodlííł.

18 Áádóó shí, Nephi, shidineʼé díí bichʼįʼ ííshłaa, yee lą́ dah dínóozįįł áko Diyin Bóhólníihii báNináʼnídláii yéédadoolnih.

19 Ákohgo, tʼáá ałtso Israel bighandóóígíí bichʼįʼ yáshtiʼ, díí tʼáadoo leʼé dah shódayoostʼeʼgo.

20 Háálá áko shooh, iiʼ sizíinii shiiʼ náalnishgo, éí bąą niishááh tʼáá ałtso shihadaʼditʼą́ą́góó doo dabidziil da, tʼahdii Jerusalemdi ndaakáígíí bá; Diyin Bóhólníihii doo shaa joobaʼgóóʼ, éí doo shił ííshjání áyiilaagóó, ałkʼidą́ą́ʼ Diyin yá yádaałtiʼii áyiilaaígi átʼáo, shí shį́į́ ałdóʼdah setsą́ą ńtʼę́ę́ʼ.

21 Áádóó Diyin yá yádaałtiʼii ałkʼidą́ą́ʼ tʼáá ałtsoní ałkʼidą́ą́ʼ yaa ííshjaní ádayiilaa; dóó nihí ádaniitʼéhígíí ałdóʼ tʼóó ahayói ííshjání ádayiilaa; ákohgo, nihí tsʼídá éédahodiilzįįłígíí biniinaa béésh łitsoii tʼą́hí bikááʼ bikʼedaʼáshchį́.

22 Áádóó áko baa hoolzhiizh shí, Nephi, díidí tʼáadoo leʼé shikʼiské bee nanétą́ą́ʼ; áádóó baa hoolzhiizh éí tʼáadoo leʼé tʼóó ahayóí bichʼįʼ yíłtaʼ, béésh łitsoii tʼą́hí bikááʼ náháásdzooígíí, áko Diyin Bóhólníihii kédaayah biyiʼgóó áyoolíłígíí bił béédahódoozįįł, ałkʼidą́ą́ dineʼéyę́ę yitahgóógiʼ átʼáo.

23 Áádóó Moses bináaltsoos biiʼ tʼáadoo leʼé tʼóó ahayói bikʼeʼéshchinígíí bichʼįʼ yíłtaʼ; ndi Diyin Bóhólníihii báNináʼnídláii hazhoʼó yiwóhgo dayoodláadoo éí bąą Isaiah Diyin yá yáłtiʼii yee akʼeʼeshchinée bichʼįʼ yíłtaʼ; háálá Diyin bizaad bee akʼedaʼashchínígíí tʼáá ałtso beniiltʼé dooleełgo ííshłaa, áko dah bee nidiʼdiilyééł dóó íhwiidiilʼááł.

24 Ákohgo, bichʼįʼ yéiiłtiʼ, kódishníigo: Diyin yá yáłtiʼii bizaad déisółtsą́ą́ʼ, Israel bighandóó chʼídasóhdziʼígíí, atsáozʼaʼ kʼínihideetiʼígíí; Diyin yá yáłtiʼii bizaad déisółtsą́ą́ʼ, tʼáá ałtso Israel bighandóó háájéʼígíí bichʼįʼ ályaa, dóó tʼáá nihí binołtʼéego ádáʼdołnééh, áko nihikʼiské bąąh danhiʼdiistiʼígiʼ átʼáo chánah danóhłį́; Diyin yá yáłtiʼii díígiʼ átʼáo akʼeʼáshchį́.