1 Áádóó baa hoolzhiizh Diyin Bóhólníihii áshidííniid, ákohgo tsé bee béésh tʼą́hí ádeishłáígíí bikááʼ shidineʼé baa haneʼgo náhídéesoh. Dóó béésh tʼą́hí iishłáígíí bikááʼ shizhéʼé baa haneʼ náhídéesoh, dóó diné doo kééhatʼínígi yiiʼnéłígíí ałdóʼ, dóó shizhéʼé náásjįʼ kódahodoonííł nínée; dóó tʼáá shí ląʼí da náásjįʼ kódahodoonííł dishnínée bikááʼ náháaszoh.

2 Áádóó ádaashłaayę́ędą́ą́ Diyin Bóhólníihii díidí béésh tʼą́hí ádiilííł shididooniiłígíí doo baa ákonisin da ńtʼę́ę́ʼ; ákohgo, shizhéʼé baa haneʼ, dóó dabizhéʼé dabizázíyę́ę ałkééʼ naháasdzooígíí, dóó diné doo kééhatʼíní biyiʼ ádeilyaaígíí ałtso bee yéiłtiʼę́ę áłtsé béésh tʼą́hí bikááʼ hahaasdzoh; ákohgo, tʼáadoo leʼé tʼah doo díidí béésh tʼą́hí ádaashłéehgo bitsijįʼ ádahóótʼįįdyę́ę, tʼáá aaníí, áłtsé béésh tʼą́híyę́ę dabikááʼgóó baa dahaneʼ.

3 Áádóó áshiʼdiʼníigo díidí béésh tʼą́hí ádeishłaa dóó bikʼijįʼ, shí, Nephi, ánaashiʼdooʼniidgo naʼnitin dóó ádahoonííł, doo nanitłʼahgóó dóó daʼílį́įgo ádáátʼįįdígíí, tsʼídá díidí béésh tʼą́hí bikááʼ náhidoodzoh; dóó díí ndáhaasdzoígíí shidineʼé bee nanitin doo biniinaa baa áháyą́ą doo, éí kéyahgi kéédahatʼínígíí, dóó nááná łaʼ da hódzánígíí baa téʼátʼínígíí ałdóʼ biniyé, éí éí Diyin Bóhólníihii biniyéhígíí bił bééhózin.

4 Ákohgo, shí, Nephi, nááná łaʼ béésh tʼą́hí bikááʼ naʼiisóóh, éí yaa halneʼígíí, éí doodago shidineʼé daʼahigą́ dóó ałchʼįʼ ńdaʼditsih dóó nidaʼahiltseedgo tʼáá íiyisíí yaa halneʼ. Dóó shí díí íishłaa, dóó shidineʼé dahnídiisdzáádóó bikʼijįʼ tsʼídá kódadoohnííł bidishní; dóó tʼáá oochííł bikʼeh díidí béésh tʼą́hí ałkeeʼ oochííł deiyóʼaah doo, éí doodago Diyin yá yáłtiʼii ałkééʼ deiyóʼaah doo, Diyin Bóhólníihii nááná łaʼ bibee hazʼáanii yił chʼííníʼą́ąjįʼ índa.

5 Áádóó díidí béésh tʼą́hí áshłehígíí kʼad baa hodeeshnih; dóó áádi, jó ákon, bee haasdzíʼę́ę bikʼehgo áshłééh; dóó díí tʼáadoo leʼé baa dahastiʼgo áshłéhígíí shidineʼé bił béédahózingo náás yijih dooleeł.

6 Ákótʼée ndi, doo béésh tʼą́hí bikááʼ tʼáadoo leʼé tʼóó yihsóh da tʼáá hazhóʼó baa hastiʼ nísinígíí tʼéiyá. Dóó kʼad, asésihígíí, ałkʼidą́ą́ʼ daʼasihę́ęgi átʼéego; diné asiihgo doo bee bikʼíháshʼaah da, ndi tsʼísee kʼehgo, doo bíneeshʼánígíí biniinaa, tʼáadoo shikʼíhóʼáhí.

7 Háálá diné łaʼ tʼáadoo leʼé bił danilínígíí, tʼáá áłah atsʼíís dóó iiʼ sizíiniijí, łaʼ éí doo bił danilį́į da dóó tʼóó yikʼi naakai. Aooʼ, Israel biDiyin God ayóó doo bił danilį́į da dóó tʼóó yikʼi naakai; kódishní, tʼóó yikʼi naakai ákondi saad kótʼáo ááhdishní—doo bił danilį́į da, dóó biinééʼ yinahaʼá doo dayíistsʼą́ą́ʼ da.

8 Áádóó áko shooh, shizhéʼé hastą́ądi neeznádiin nááhaidą́ą́ʼ Jerusalemdóó dah diiyáago doogááł, Diyin yá naalʼaʼí bizaad bikʼehgo.

9 Áádóó nihokááʼ dineʼé, tsiʼ naakaigo biniinaa, doo ílį́į́góó yaa ntsídadookos; ákohgo atídeiłʼį́, ndi tʼóó yił átʼé; dóó atídabíiłʼįįd, ndi tʼóó yił átʼé. Aooʼ, bikʼídahidizheeh, ndi tʼóó yił átʼé, bee ayóóʼóʼóʼní yee nihaa joobaʼ dóó nihokááʼ dineʼé baʼáłchíní nízaadgóó yee haʼólníi doo.

10 Áádóó danihizhéʼé yę́ę biDiyin God, Egyptdóó chʼíbiníʼeezh, ąąh shijééʼdóó, dóó diné doo kééhatʼínígi ałdóʼ baa áhályą́, aooʼ, Abraham biDiyin God, dóó Isaac biDiyin God, dóó Jacob biDiyin God, tʼáá bí yaa ádeetʼą́ Diyin God yá naalʼaʼí bizaadkʼehgo, dinégi átʼáo, diné tsiʼnaakaii yilákʼeejįʼ, dahbidiʼdooltééł biniyé, Zenock bizaadkʼehgo, dóó tsin ałnáozʼá bikʼijįʼ bił iʼdoolkáł, Neum bizaadkʼehgo, dóó tsé niiʼ ootséél góneʼ nidooltééł, Zenos bizaadkʼehgo, tááʼ yiską́ąjįʼ éiyá chahodoołhił yaa yááłtiʼę́ę, tónteel yikááʼ kéédahatʼínígíí daaztsą́ągi bee bichʼįʼ ééhózin ályaa, tʼáá íiyisíí Israel yighandóó háájéʼígíí bichʼįʼ kólyaa.

11 Háálá Diyin yá yáłtiʼii yee haadzííʼ: Bóhólníihii Diyin God éí jį́įdi tʼáá ałtso Israel yighandóó háájéʼígíí yaa doogááł, Diyin God yikʼehgo yiikahgo biniinaa, ńléí ayóó bił dahózhǫ́ dóó yee yisdáádookah, dóó beʼadziil bee daʼdiʼní dóó ándaʼdidlaʼ, náhałtin, dóó kǫʼ, dóó łíd bee, dóó chahałheeł yildóh, dóó nahasdzáán ąą ádzaago bee, dóó nahasdzáán nidahaazdláád dóó dził yáádahniisą́.

12 Áádóó díidí tʼáá ałtsoní tsʼídá áhodoonííł, níiniʼ Zenos Diyin yá yáłtiʼii. Dóó niʼgi tséhę́ę ndaheezdláád; dóó niʼdiʼninígíí biniinaa, tónteelgóó tʼóó ahayóí aláahgo naatʼáanii Diyin God biʼIiʼ Sizį́ Diyinii yikʼidahooleʼgo, kódáání: naaldeehii biDiyin God tiʼhoonííh.

13 Áádóó tʼahdii Jerusalemdi nidaakaiígíí, Diyin yá yáłtiʼii níineʼ, dineʼé ałtso atídabiłʼį́į dooleeł, Israel biDiyin God tsin ałnáozʼá bikʼijįʼ yił adaʼaskaalgo biniinaa, dóó bijéí yee yitsʼą́ąjįʼ náhááskai, ádahodooníłígíí dóó álíleekʼehgo ił ahayóigo yóó adeideezʼą, dóó Israel biDiyin God beʼadziil dóó beʼayóó átʼéii ałdóʼ.

14 Áádóó bijéí yee nahjįʼ kódaadzaaígíí biniinaa, Diyin yá yáłtiʼii áníineʼ, dóó Israel biDiyin Ayóó Átʼéii dayiiʼįįd, tsʼíseekʼehgo ił ahayóigo yiiʼ naanáákah, dóó dínóonééł, dóó tłehee yéiʼ dóó yáádiish, dóó tʼáá ałtso dineʼé dabijoodláa dooleeł.

15 Ákótʼée ndi, éí bijį́įdi, Diyin yá yáłtiʼii níineʼ, doo Israel biDiyin Ayóó Átʼéii bijéí nahjįʼ kódeiłʼį́į da doo, áadi índa dabizhéʼéyę́ę yee yił ahaʼdeestʼánée yéédoolníh.

16 Aooʼ, áadi tónteel yikááʼgóó kéédahatʼínígíí yéédoolnih; aooʼ, dineʼé ałtso Israel yighandóó haajéʼígíí, áłhąʼádeeshłííł, ní Diyin Bóhólníihii, Zenos shá yáłtiʼii bizaadkʼehgo, nahasdzáán dį́į́ʼ ałhidadiiʼáádę́ę́ʼ.

17 Aooʼ, dóó nahasdzáán tʼáá ałtso Diyin Bóhólníihii bibee yisdáʼiildéehii deizdoołtsééł, ní Diyin yá yáłtiʼii, tʼáá átʼé dineʼé, kʼé deiłnínígíí, bizaadjí, dóó diné bikʼihojidoodliił.

18 Áádóó shí, Nephi, shidineʼé díí bichʼįʼ íishłaa, yee lą́ dah dínóozįįł áko Diyin Bóhólníihii báNináʼnídláii yéédadoolnih.

19 Ákohgo, tʼáá ałtso Israel bighandóóígíí bichʼįʼ yáshtiʼ, díí tʼáadoo leʼé dah shódayoostʼeʼgo.

20 Háálá áko shooh, iiʼ sizíinii shiiʼ naalnishgo, éí bąąh niishááh tʼáá ałtso shiʼahadaʼditʼą́ą́góó doo dabidziil da, éí tʼahdii Jerusalemdi nidaakaiígíí bá; háálá Diyin Bóhólníihii éí ayóó shaa joobaʼ, éí doo shił ííshjání áyiilaagóó, ałkʼidą́ą́ʼ Diyin yá yádaałtiʼii áyiilaaígi átʼáo, shí shį́į́ ałdóʼ dahsétsą́ą ńtʼę́ę́ʼ.

21 Áádóó Diyin yá yádaałtiʼii ałkʼidą́ą́ʼ tʼáá ałtsoní ałkʼidą́ą́ʼ yaa ííshjání ádayiilaa; dóó nihí ádaniitʼéhígíí ałdóʼ tʼóó ahayóí ííshjání ádayiilaa; ákohgo, nihí tsʼídá éédahodiilzįįłígíí biniinaa béésh łitsoii tʼą́hí bikááʼ bikʼedaʼáshchį́.

22 Áádóó áko baa hoolzhiizh shí, Nephi, díidí tʼáadoo leʼé shikʼiské bee nanétą́ą́ʼ; áádóó baa hoolzhiizh éí tʼáadoo leʼé tʼóó ahayóí bichʼįʼ yíłtaʼ, béésh łitsoii tʼą́hí bikááʼ náháásdzooígíí, áko Diyin Bóhólníihii kédaayah biyiʼgóó áyoolíłígíí bił béédahodoozįįł, ałkʼidą́ą́ dineʼé yę́ę yitahgóógi átʼáo.

23 Áádóó Moses binaaltsoos biiʼ tʼáadoo leʼé tʼóó ahayóí bikʼeʼéshchinígíí bichʼįʼ yíłtaʼ; ndi Diyin Bóhólníihii báNináʼnídláii hazhóʼó yiwóhgo dayoodláadoo éí bąą Isaiah Diyin yá yáłtiʼii yee akʼeʼeshchinée bichʼįʼ yíłtaʼ; háálá Diyin bizaad bee akʼedaʼashchínígíí tʼáá ałtso beniiltʼé dooleełgo íishłaa, áko dah bee nidiʼdiilyééł dóó íhwiidiilʼááł.

24 Ákohgo, bichʼįʼ yéiiłtiʼ, kódíshníigo: Diyin yá yáłtiʼii bizaad deísóołtsą́ą́ʼ, Israel bighandóó chʼídasóhdziʼígíí, atsʼáozʼá kʼínihideetiʼígíí; Diyin yá yáłtiʼii bizaad deísóołtsą́ą́ʼ, tʼáá ałtso Israel bighandóó háájéʼígíí bichʼįʼ ályaa, dóó tʼáá nihí binołtʼéego ádaʼdołnééh, áko nihikʼiské bąąh danihiʼdiistiʼígi átʼáo hadaʼíínółníi doo; Diyin yá yáłtiʼii díigi átʼáo akʼeʼáshchį́.