1 Áádóó baa hoolzhiizh diné doo kééhatʼíní góneʼ dah náádiikai; dóó haʼaʼaahjígo dahnáádiikai. Dóó tʼáá íiyisíí tiʼdahwiiʼníihgo diné doo kééhatʼin biyiʼ yiiʼnééł; dóó nihichʼooní éí diné doo kééhatʼinígi yiiʼnéełgo baʼáłchíni dahazlį́į́ʼ.

2 Áádóó Diyin Bóhólníihii tʼáá íiyisíí nihikʼijísdlíʼ, diné doo kééhatʼį́įgi atsįʼ tʼáá łichį́iʼgo bee dahiniiʼnáago, nihizáanii baʼáłchíní deidoołtółígíí ląʼída bá dahólǫ́, dóó dabidziil, aooʼ, tʼáá diné nahálingo; dóó doo saad dahółǫ́ǫ́góó dabidziilgo atah dahdiiná.

3 Áádóó ákótʼéego Diyin God bibee hazʼáanii tsʼídá bedaʼdoolnííł lá. Dóó nihokááʼ dineʼé baʼáłchíní Diyin God bibee hazʼáanii yikʼeh dahółʼį́įgo bí ayóó yidaʼiisą́, dóó bídziil ádayósin, dóó tʼáadoo leʼé íídííniidígíí yee yíká adoolwółgo ádeidoolííł; ákohgo, diné doo kééhatʼíidi yiiʼnéełgo nihiká eelwod.

4 Áádóó yiiʼnéełgo tʼóó ahayóí nihinááhai, aooʼ, doo kééhojitʼíníditseebíí nááhai.

5 Áádóó kéyah baa niiʼnánígíí Bountiful bee deiíníijiʼ, tsin bineestʼąʼ dóó tsísʼná bitłʼizh ląʼída dahólónígíí biniinaa; dóó Diyin Bóhólníihii doo dadíníiʼnééł da biniyé díidí tʼáadoo leʼé tʼáá ałtso nihá hashtʼeh dayiilaa. dóó tónteel deiiltsą́, Irreantum bee deiíníijiʼ, díí éí, tó tʼóó ahayóigo, óolyé.

6 Áádóó baa hoolzhiizh tónteel bibąąhgi nihiníbaal ndaniiʼnil; dóó azhááneeʼ tʼóó ahayóidi tiʼdahwiisiiʼniiʼ dóó yéego nihichʼįʼ ndahwiisnááʼ, aooʼ, índa tsʼídá doo ałtso ndáhidiidzóh átʼée da, tónteel baa niiʼnáago ayóó átʼáo nihił dahóózhǫǫd; dóó kéyah Bountiful bee deinííjiʼ, tsin bineestʼąʼ ląʼída hólónígíí biniinaa.

7 Áádóó baa hoolzhiizh shí, Nephi, kéyah Bountiful di tʼóó ahayóí shiishką́ dóó bikʼijįʼ, Diyin Bóhólníihii biinééʼ yee shichʼįʼ haadzííʼ, kóníigo: ńdiiʼnééh dóó dził yiʼgóó dínááh. Áádóó baa hoolzhiizh ńdiishʼnaʼ dóó dził yiʼgódei niyá, dóó Diyin Bóhólníihii bichʼįʼ sodeeszin.

8 Áádóó baa hoolzhiizh Diyin Bóhólníihii shichʼįʼ haadzííʼ, kóníigo: Tsinaaʼeeł łaʼ ádíílííł, nił ííshją́ ádeeshłíłígíí binahjįʼ, nidineʼé díí tónteel bitséʼnaa ndeeshʼish.

9 Áádóó kodííniid: Diyin Bóhólníihii, haagóósh deesháałgo tsé beesh bee hadideeshxįhígíí bikʼideeshááł, áko bee naʼanishí ádeeshłííł dóó tsinaaʼeeł shił ííshją́ą́ íinilaaígíí bee ádeeshłííł?

10 Áádóó baa hoolzhiizh Diyin Bóhólníihii tsé bikʼideeshálígíí yee shił hoolneʼ, áko bee naʼanishí ádadeeshłííł.

11 Áádóó baa hoolzhiizh shí, Nephi, kǫʼ bee alzołí naaldlooshii daʼałchiní bikágí bee íishłaa; dóó kǫʼ bee yilzolí íishłaa dóó bikʼijįʼ, kǫʼ bee yisółígíí hazlį́įgo tsé naaki ahídéniłgo bee didííłjééʼ.

12 Háálá Diyin Bóhólníihii bílaʼ ashdlaʼii doo kééhatʼíígi yiiʼnéełgo nigháídę́ę́ʼ, tʼáadoo ląʼígo danihikǫʼí nihidííniid; kodííniid: Nihichʼíiyąʼ nihá łikango ádeeshłííł, áko éí doo ńdaʼołtʼis da dooleeł.

13 Áádóó diné doo kééhatʼinígi niheʼ adinídíín nishłį́į doo; dóó nihilą́ąjįʼ hashtʼehwideeshłííł, tʼáá ákóneehii éí shibee hazʼáanii bikʼeh dahonołʼį́; ákohgo, shibee hazʼáanii bikʼeh dahonołʼį́įgo kéyah bee ahaʼdeetʼánígíí bichʼįʼ nihideeshʼish; dóó tʼáá aaníí tʼáá shí nihiníʼeezhígíí nihił béédahodoozįįł.

14 Aooʼ, dóó Diyin Bóhólníihii ałdóʼ ádííniid: Kéyah bee ahaʼdeetʼą́ baa nohkaigo, nihí shí, Diyin Bóhólníihii, Diyin God nishłį́įgo nihił béédahodoozįįł; dóó shí, Diyin Bóhólníihii, hóóchxǫʼdę́ę́ʼ hánihishéʼeezh; aooʼ, áko Jerusalem bikéyahdóó chʼínihiníʼeezh.

15 Ákohgo, shí, Nephi, Diyin Bóhólníihii bibee náhazʼáanii bikʼe honishʼį́įgo beiʼiishlaa, dóó shikʼiské éí tsʼídá iinóhdlą́ dóó yéego bidoołkaal bidííniid.

16 Áádóó baa hoolzhiizh tsé bitsʼą́ądóó béésh hahídishhį́į́hgo bee naʼanishí ádeeshłaa.

17 Áádóó shínaaíké tsinaaʼeeł ábiʼniishłaaígíí yiyiiłtsą́ągo, shikʼijįʼ ayánááʼniiłtiʼ, kóníigo: Nihikʼis doo áhályą́ą da, tsinaaʼeeł łaʼ ádeeshłííł nízin; aooʼ, dóó díí tónteel ałdóʼ tséʼnaa bee ndeeshááł nízin.

18 Áádóó shínaaí kótʼéego shikʼijįʼ saad hółǫ́, dóó doo ndiilnish da nízin, akǫ́ǫ́ tsinaaʼeeł ádeeshłíłígíí doo dayoodląą da; doondóʼ Diyin Bóhólníihii áshidííniidígíí yoodląą da.

19 Áádóó kʼad baa hoolzhiizh shí, Nephi, shínaaíké bijéí yineestłʼisígíí biniinaa tʼáá íiyisíí baa yínííł niizį́į́ʼ; dóó yínííł nisinígíí yaa ákoniizį́įʼgo bijéí yiyiʼdi bił hóózhǫǫd, hónáásííʼ agháago shaa bił hózhǫ́, kóníigo: Tsinaaʼeeł doo ádíílíiłgo éí nihił bééhózin, háálá doo hazhóʼó ntsíníkeesígíí tʼáá íídą́ą́ʼ nihił bééhózin, ákohgo, naanish ákóníłtsooígíí doo ádíílííł da.

20 Áádóó nihizhéʼégi ánítʼé, tʼáá ádzaagóó kóshiʼdooʼniid níigo nabilóóz; aooʼ, Jerusalem bikéyahdę́ę́ʼ chʼínihiníʼeezh, dóó diné doo kééhatʼinígi tádiikáahgo ląʼí nihee dááhai; dóó niheʼesdzáán yéego ndaashnish, awééʼ bídahiʼnáahgo; dóó diné doo kééhatʼinígi ndaʼiishchį́, dóó tʼáá ałtsoní yíkʼee tiʼdahooʼníihgo, tʼáá hazhóʼó tʼáadoo náádabiʼdiilyáa da; dóó tʼáá Jerusalemdi daneeznáago bá yáʼátʼéeh ńtʼę́ę́ʼ áko doo tiʼhooʼnííh yiiʼnaskai da ńtʼę́ę́ʼ.

21 Áko shooh, díidí diné doo kééhatʼinígi tiʼdahwiiʼníihgo ląʼída nááhai, áko nihinaalyehé dóó kéyah nihaayitʼánée bee ádeeńdaʼiildįįh ńtʼę́ę́ʼ; aooʼ, áko baa nihił dahózhǫ́ǫ doo ńtʼę́ę́ʼ.

22 Áádóó nihił béédahózingo diné Jerusalemdi kéédahatʼínée diyinkʼehgo dahiináá ńtʼę́ę́ʼ; háálá Diyin Bóhólníihii yee nihwiizʼánéé deidóhsin, dóó bibee hazʼáanii tʼáá ałtso, Moses bibee hazʼáanii bikʼehgo; ákohgo, dineʼé tʼáá ákogi átʼáo dahináago nihił béédahózin; dóó nihizhéʼé éí yee yá nihoníʼą́, dóó bizaad deiyísíiltsʼąʼígíí biniinaa yitsʼą́ąjigo dah nihidiiʼeezh; aooʼ, dóó nihikʼis éí tʼáá beełtʼé. Dóó díigi átʼáo shínaaíké yáłti dóó saad yee nihikʼijįʼ haadzííʼ.

23 Áádóó baa hoolzhiizh shí, Nephi, bichʼįʼ haasdzííʼ, kódíshníigo: Daʼ yinohdląąsh danihizází, éí Israel baʼáłchíní daniliigo, Diyin Bóhólníihii doo deiyóstsʼą́ą́ʼgóó Egypt dineʼé bílákʼeedóó doo hááyootʼeezhda ńtʼę́ę́ʼ?

24 Aooʼ, daʼ ákoósh ąąshijééʼdę́ę́ʼ chʼíbiʼdootʼish ńtʼę́ę́ʼ, Diyin Bóhólníihii Moses doo ńléí ąąshijééʼdę́ę́ʼ chʼídiiʼish yidííniidgóó?

25 Kʼad nihił bééhózin Israel baʼáłchíní yisná dajílį́į́ ńtʼę́ę́ʼ; dóó nihił bééhózin tsʼídá binaanish dandaaz ńtʼę́ę́ʼ, tʼáá íiyisíí yikʼee tiʼdahoozniiʼ; ákohgo, nihił bééhózin yisná danílínée chʼéédootʼishgo tʼéiyá bá yáʼátʼééh.

26 Kʼad nihił bééhózin Moses Diyin Bóhólníihii naanish ayóóʼátʼéii íidoolíiłgo beidiníʼą́; dóó nihił bééhózin bizaad binahjįʼ Tónteel Łichííʼ kódóó dóó ńláiijįʼ ałtsʼą́ą́ʼ kwíyiilaa, dóó łeezh yíłtseii yikááʼ chʼékai.

27 Ákondi nihił bééhózin Egypt dineʼé Tónteel Łichííʼ bííghą́ą́ʼ, éí Pharaoh yá ndaabaahí danilį́įgo.

28 Áádóó ałdóʼ nihił bééhózin diné doo kééhatʼinígi máana ńdeidį́įhgo yíkai.

29 Aooʼ, dóó nihił ałdóʼ béédahózin Moses, Diyin God bibee ádziil bee hólǫ́ yinahjįʼ haadzíiʼgo, tsé néidííłhaal, dóó áádę́ę́ʼ tó háánaʼgo, Israel baʼáłchíní dibááʼ danízingo daʼoodlą́ą́ʼ.

30 Áádóó Bóhólníihii biDiyin God, báNináʼnídláii, booʼish ndi, bilą́ąjįʼ yigáał ndi, jį́įgo booʼish, dóó tłʼéeʼgo bá adiníłdíín, dóó tʼáá ałtsoní deinízinígíí yee yíká análwoʼ ndi, bijéí deineestłʼis dóó bíniʼ doo yee daʼooʼį́į da daazlį́į́ʼ, dóó Moses dóó Diyin God tʼáá aaníinii dóó hinánígíí yikʼijįʼ hadahaasdzííʼ.

31 Áádóó baa hoolzhiizh bizaad bikʼehgo neistseed; dóó bizaad bikʼehgo yiniʼeezh; dóó bizaad bikʼehgo tʼáá ałtsoní yee yíká eelwod; dóó tʼáá ałtso ádaalyaaígíí éí tʼáá hazhóʼó bizaad binahjįʼ tʼéiyá ádaalyaa.

32 Áádóó Jordan tooh nilʼį́ tséʼnaa niikai doo bikʼijįʼ ayóó dabidziil áyiiláago ákwii diné kéédahatʼinígíí chʼídeineeskaad, aooʼ, daʼníłtsʼą́ąjigo adeineeskaadgo ádeisdįįd.

33 Áádóó kʼad, daʼ ákoósh díí kéyahgi ałchiní kéédahatʼínée, kéyah bee ahaʼdeetʼą́ądóó, danhizhéʼé yę́ę chʼídeineeskaadíísh, daʼ Diyinkʼehgo dahináá ńtʼę́ę́ʼ nohsin? Jó ákon, ánhidishní, ndagaʼ.

34 Daʼ ákoósh danhizhéʼé yę́ę bił nilį́įdoo ńtʼę́ę́ʼ áájí tʼáá ákogi átʼáo dahináago? Ánhidishní, ndagaʼ.

35 Háálá áko shooh, Diyin Bóhólníihii atsʼíís tʼáá ałtso aheełtʼéego yaa ntsékees; tʼáá ákogi átʼáo hinánígíí Diyin God bił nilį́. Ákondi shooh, díí dineʼé tsʼídá tʼáá ałtso Diyin God bizaad yóó adeideezʼą́, dóó bąąhági átʼéii yee daneestʼą́; dóó Diyin God tsʼídá doo yaa bił hózhǫ́ǫ da; dóó Diyin Bóhólníihii kéyah hóyééʼjí hatsʼą́ą́ʼ yá haadzííʼ, dóó danhizhéʼé yę́ę yá yikʼijisdliʼ; aooʼ, éí hóyééʼjí hahaadziihgo áhodoołdííł, dóó danihizází yá yikʼijisdliʼgo yikʼi dabídziil daazlį́į́ʼ.

36 Áko shooh, Diyin Bóhólníihii nahasdzáán yikááʼ hójilǫ́ǫ doogo áyiilaa; dóó baʼáłchíní tsʼídá daabí dooleełgo yá áyiilaa.

37 Áádóó dineʼé tʼáá ákogi ádaatʼéii łaʼ yinisé, dóó dineʼé bąąhá yaa naakaiígíí ííłdįįh.

38 Áádóó tʼáá ákogi ádaatʼéii kéyah daʼílínii yichʼįʼ ayiiʼéésh, dóó bąąhági átʼéii yaa naakaíí áyiiłdįįh, dóó kéyah yá hóyééjí háhadziih.

39 Bí yáʼąąsh biyiʼ bóhólnííh, éí yikááʼ dah sidá, dóó díí nahasdzáán éí yikááʼ dah déésʼeezí átʼé.

40 Áádóó tʼáá háiida shiDiyin God doo nízinígíí ayóó áyóʼní. Áko shooh, danhizhéʼéyę́ę ayóó áyóʼní, dóó yił ahadaʼdeetʼą́, aooʼ, azhą́ Abraham, Isaac, dóó Jacob; dóó yił ahadaʼdeestʼánée yénáálniiʼ; ákohgo, bí Egypt bikéyahdóó chʼíiníʼeezh.

41 Áádóó diné doo kééhatʼinígi gish bikʼijįʼ sitą́ągo áyiilaa; háálá bijéí deistłʼis, nihigi átʼáo; dóó bąąhá yaa naakaiígíí biniinaa Diyin Bóhólníihii nahonitłʼah há áyiilaa. Tłʼiish báá dahadzid kǫʼ yee dahididzihgo ndaatʼaʼígíí yitahgóó yiʼníłniiʼ; dóó dabishhash dóó bikʼijįʼ yee ndadoozihígíí yá hashtʼeyiilaa; dóó hóhónaanish éí tʼóó dazhdínóółʼįįłgo há áyiilaa; dóó doo nanitłʼahgóó biniinaa, éí doodágo tʼáá bééhózinígíí biniinaa, tʼóó ahayóí dazhneezná.

42 Áádóó bitaʼnáhootʼaahgo bijéí ńdeiiłtłʼis, dóó Moses dóó Diyin God yikʼijįʼ yádaałtiʼ; ákótʼée ndi, nihił béédahózingo tsʼídá aláahgo beʼádziil yinahjįʼ kéyah bee ahaʼdeetʼanígóó bichʼįʼ ábiʼdootʼeezh.

43 Áádóó kʼad, díidi ałtso kódahotʼįįd dóó bikʼijįʼ, bąąhá yaa ndiikaiígíí béiiníłką́; aooʼ, kʼadę́ę yee danitʼą́, dóó kʼadę́ę ndadootsxiłjįʼ baa hoolzhíísh nisin; háálá ndadootsxiłjįʼ éí baa hodoolzhish, tʼáá hazhóʼó tʼaazh dikwíhígo tʼéiyá, dahoʼdisnáhígíí ádahoʼdiyootʼish.

44 Ákohgo, Diyin Bóhólníihii shizhéʼé diné doo kééhatʼinígóó dah didíínééł yidííniid; dóó Jew dineʼé dahodiyoołhéełgo há ndahazʼą́; aooʼ, dóó nihí ałdóʼ diyiilyééł nohsin, Ákogo, nihijéí biyiʼdi naʼałtseedii nohłį́ dóó nihí éí benołtʼé.

45 Bąąhą́gi átʼéii tsxį́įłgo óołʼįįh ndi Bóhólníihii nihiDiyin God doo hah béénółnííh da. Diyin bá naalʼaʼí woołtsą́, dóó nihichʼįʼ haadzííʼ; aooʼ, bitaʼ náhooʼáahgo biinééʼ nidóóhtsʼį́į́h; dóó iinééʼ hazhoʼó áłtsʼíísígo yee nihichʼįʼ hanádzih, áko doo nanihiiłnáa da soolį́į́ʼ; bizaad doo baa ákonóhsin da; ákohgo, iinééʼ adiʼní nahalingo nihichʼįʼ haadzííʼ, nahasdzáán ałtsʼáʼdadooltǫǫłgi átʼao nayiisnááʼ.

46 Áádóó ałdóʼ nihił bééhózin ayóóʼábóodziilii bizaad yee nahasdzáán nahjįʼ kwíidoolííłgo átʼé; aooʼ, dóó nihił bééhózingo bizaad binahjįʼ dahonoojíígóó dahodilkǫǫhgo íidoolííł, dóó dahodilkǫǫgóó ndaʼiistʼǫʼgo íidoolííł. O, índa, haʼátʼíísh biniyé, nihijéí biyiʼ yéego sołtłʼis?

47 Áko shooh, nihiniinaa shiiʼ sizíinii íiyisíí yínííł nilį́, dóó shijéí neezgai; ahoolʼáágóó nahjįʼ kónihidoolííł nihá binásdzid. Jó ákon, Diyin God biʼIiʼ Sizį́ Diyinii shił hólǫ́, hónáásííʼ shitsʼíís doo bídziil da.

48 Áádóó kʼad baa hoolzhiizh díídí saad bee haasdzíiʼgo shichʼįʼ bá hoochįįd, dóó tónteel biiʼ táłtłʼááhdi biih hidiilghąął niizį́į́ʼ; dóó bilaʼ yee shiisiłgo bichʼįʼ haasdzííʼ, kódishníigo: Diyin God Ayóóʼábóodziilii bízhiʼ binahjįʼ, shidoołchíídlágo nihidishní, háálá Diyin God bibee ádziil tʼáá átʼé shiiʼ hólǫ́, kʼadę́ę tʼáá íiyisíí shitsʼíís yidiiłtłáád nahalin; dóó háiida bilaʼ yee shiiłtsóódgo lókʼaaʼ sigan nahalingo dínóołnah; dóó Diyin God bibee ádziil yidááhgi doo honílǫ́ǫ da dooleeł, háálá Diyin God atíhodoolííł.

49 Áádóó baa hoolzhiizh shí, Nephi, tʼáadoo nihizhéʼé bikʼijįʼ yáłtiʼí bidííniid; dóó tʼáadoo nidoołnishígíí shitsʼąąjįʼ kwiinóhsiní, háálá Diyin God éí tsʼídá tsinaaʼeeł ádíílííł shidííniid.

50 Áádóó ábidííniid: Diyin God tʼáá ałtsoní ádíílííł shidííniidgo ádeeshłííłgoʼ átʼé. Díí tó siyínígíí, nahasdzáán nileeh bidííniidgo, nahasdzáán dooleeł; dóó shí ádííniidgo, éí bikʼeh áhodoonííł.

51 Áádóó kʼad, Diyin Bóhólníihii bibee ádziil ayóóʼatʼéego yaʼ, dóó ląʼída álíleekʼehjí nihokááʼ dineʼé baʼáłchíní yee yíká eelwod, haitʼáosh doo yínashidínóołtįįł da, tsinaaʼeeł ádeeshłíłígíí?

52 Áádóó baa hoolzhiizh shí, Nephi, łąʼída tʼáadoo leʼé shikʼis bee bichʼįʼ haasdzííʼ, wónáásdóó dadiiłheel dóó doo shikʼijįʼ yáłtiʼ da sizlį́į́ʼ; dóó bilaʼ yee shiidoołtsółgo shichʼįʼ yisteeʼ, índa bílazhoozh doo yee shideelchidgóó, ląʼída yiską́. Kʼad shidáahgi doogą́łígíí bąą doo shichʼįʼ ákoneeh da, Diyin God biʼIiʼ Sizį́ Diyinii ayóó átʼáo bidziil silį́į́ʼ; dóó ákótʼáo bikʼih hazlííʼ.

53 Áádóó baa hoolzhiizh Diyin Bóhólníihii éí áshidííniid: Nikʼiské bichʼįʼ nilaʼ bee dah náádiilnííh, doo nidáahgi nídooltsíh da, ndi tʼóó deeshtąsh, dííniid Diyin Bóhólníihii, dóó díí ádeeshnííł, áko shí Bóhólníihii hoDiyin God nishłinígíí hoł bééhodoozįįł.

54 Áádóó baa hoolzhiizh shikʼis shilaʼ bee bichʼįʼ dah deeshniiʼ, dóó tʼáadoo shidááhgi sigan da; ndi Diyin Bóhólníihii tʼóó nayiisxan, tʼáá saad yee haadzíʼę́ę bikéhgo.

55 Áádóó kʼad, ádadííniid: Tʼáá aaníí Diyin Bóhólníihii nił hólǫ́ǫgo éí nihił bééhózin, háálá Diyin Bóhólníihii bibee ádziil nanihiisxanígíí nihił bééhózin. Dóó shidáahjįʼ ntsidinígoʼ, dóó kʼasdą́ą́ʼ shichʼįʼ sodiʼniilzin, ndi tʼáadoo biniʼyiiłʼaʼ da, kódishníigo: nihikʼis nishłį́, aooʼ, nihitsitsilí nishłį́; ákohgo, Bóhólníihii nihiDiyin God bichʼįʼ sodołzin, dóó nihizhéʼé dóó nihimá baa hohniih, áko Bóhólníihii nihiDiyin God kéyah nihainíʼanígíí bikááʼ nízaadgóó hinohnáa dooleeł.