1 Áádóó kʼad baa hoolzhiizh shí, Nephi, shikʼiské ałtso bichʼįʼ yéiiłtiʼ dóó bikʼijįʼ, áko shooh kóshidííniid: Tʼáadoo leʼé daniłdzilígíí bee nihił hwíínilneʼ, nihilááhgo doo bííniigáh da.

2 Áádóó baa hoolzhiizh kóbidííniid diné tsiʼnaakaíígíí tʼáá aaníinii bikʼehgo, bá daniłdzilígíí bee bikʼijįʼ yááłtiʼgo shił bééhoozin; dóó tʼáá ákogi ádaatʼéii bá haasdzííʼ, dóó Diyin God nihwiiʼaah bijį́įdi tʼáá aaníí yisdáńdookah dishníigo nabinétą́ą́ʼ; ákohgo, ádidahodiiltʼiʼgo tʼáá aaníinii bá daniłdzil, háálá biyiʼałniiʼjįʼ ndabiiłgéésh nahalin.

3 Áádóó kʼad shikʼiské, tʼáá ákogi ánóhtʼéego dóó tʼáá aaníinii yísínółtsʼą́ą́ʼgo, dóó éí bikʼeh honołʼį́įgo, áko Diyin God binááł yáʼátʼéehii bee wóhʼashgo, dóó tʼáá aaníínii biniinaa doo akʼijįʼ yáłtiʼgóó, doo kódidoohniił da: tʼáadoo leʼé ndanitłʼaaígíí bee nihikʼijįʼ yáníłtiʼ.

4 Áádóó baa hoolzhiizh shí, Nephi, shikʼiské tʼááshǫǫdí, tʼáá íiyisíí, Diyin Bóhólníihii bibee hazʼáanii bikʼe dahonółʼį́ bidííniid.

5 Áádóó baa hoolzhiizh Diyin Bóhólníihii yidááhdóó hojoobaʼ ádaʼdiilyaa; hónáásdóó baa shił hózhǫ dóó ayóó baa hásih niizį́į́ʼ, áko tʼáá ákogi átʼé beʼátiinjí yiʼáshdoo niizį́į́ʼ.

6 Kʼad, shizhéʼé chʼíbíkooh Lemuel yee yiyíízhiʼgi biníbaal yiyiʼ bighandi díidí ałtso áhodooʼniid dóó baa naʼasdeeʼ.

7 Áádóó baa hoolzhiizh shí, Nephi, Ishmael bitsiʼ łaʼ sheʼesdzáán ííshłaa; dóó ałdóʼ, shínaaí lá Ishmael bitsiʼké beʼesdzáá ádayiilaa; dóó Zoram ałdóʼ Ishmael bitsiʼ alą́ąjįʼígíí beʼesdzáá áyiilaa.

8 Áádóó shizhéʼé kotʼáo Diyin Bóhólníihii bibee hazʼáanii beiiyiʼnilígíí ałtso yédaʼiilaa. Dóó ałdóʼ, shí, Nephi, Diyin Bóhólníihii tʼáá íiyisíí shikʼijisdliʼ.

9 Áádóó baa hoolzhiizh Diyin Bóhólníihii tłʼéeʼgo biinééʼ yee shizhéʼé yichʼįʼ haadzííʼ, dóó yiską́ągo tsʼídá diné doo kééhatʼiní góneʼ dah didiinééł bidííniid.

10 Áádóó baa hoolzhiizh shizhéʼé abínígo nídiiʼnaʼ, dóó níbaal bichʼéʼétiinjįʼ niníyá, íiyisíí biyaa hodeesyiz łeeshtahgóó jooł łahgiʼ átʼáo binaʼaznish léíʼ nímazgo siʼáago yiyiłtsa; dóó béésh łitsoii nizhónígíí bee ályaa. Dóó jooł nahalinígíí biyiʼdi naaki dahatsihí sinil; dóó łaʼ dah atsíhígíí tsʼídá háajigo diné doo kééhatʼiní biyiʼ dah didiikáhígíí yaa halneʼ.

11 Áádóó baa hoolzhiizh tʼáadoo leʼé diné doo kééhatʼiní góneʼ dah dadidiijíhígíí ahándahaajaaʼ, dóó bee dahiniiʼnáá dooleełígíí Diyin Bóhólníihii ałtso nihaa yiznil; Dóó álástsiiʼ ałʼąą ádaatʼéhígíí diné doo kééhatʼiní góneʼ dah dadiijaaʼ.

12 Áádóó baa hoolzhiizh Laman tooh nilinígíí bitséʼnaa, nihiníbaal dah dadiijááʼ dóó diné doo kééhatʼiní góneʼ dah diikai.

13 Áádóó baa hoolzhiizh yiiʼnéełgo dį́į́ʼ yiską́, shádiʼááh kʼasdááʼ haʼaʼaahjígo, dóó nihiníbaal nináádasiiʼnil; dóó niniiʼnánígi Shazer bee deiyíníijiʼ.

14 Áádóó baa hoolzhiizh niheʼałtį́į́ʼ dóó nihikʼaaʼ dah dadiijaaʼ, dóó nihaʼáłchíní deidooyį́į́ł diné doo kééhatʼinídi biká hadashiilzheeʼ; dóó nihaʼáłchíní bá chʼiyáán shódeisiiltʼeʼgo diné doo kééhatʼinígóó nihaʼáłchíní baa nániikai, Shazer hoolyéejįʼ. Dóó diné doo kééhatʼiní góneʼ dah náádiikai, tʼáá yiikáhą́ąjígo, diné doo kééhatʼiní góneʼ yéego dahóotsogóó yiikah, Tónteel Łichííʼ éiyá bibąąhgóó.

15 Áádóó baa hoolzhiizh yiiʼnéełgo tʼóó ahayóí danihiiską́, yiikáhgo, niheʼałtį́į́ʼ dóó nihikʼaaʼ dóó nihitseʼ dóó nihibee aditłʼį́hí bee ndashiilzheeʼ.

16 Áádóó jooł nahalinígíí bikáʼígíí bikʼehgo yiikah, diné doo kééhatʼiní góneʼ yéego dahóotsogóó nihiníʼeezh.

17 Áádóó tʼáá yiiʼnééłgo tʼóó ahayóí danihiiską́, tʼáá nízaadgóó nihiníbaal ndaniiʼnil, áko hanináádadiilyįh dóó nihaʼáłchíní deidooyį́łígíí bá shódeidiiltʼeeł biniyé.

18 Áádóó baa hoolzhiizh shí, Nephi, dadiidįłígíí ndeestxił, jó áko, sheʼałtį́į́ʼ kʼínítiʼ, éí béésh ntłʼiz bee ályaa ńtʼę́ę́; dóó sheʼałtį́į́ʼ kʼínítiʼ dóó bikʼijįʼ, jó áko, sheʼałtį́į́ʼ ádinígíí biniinaa shínaaíké shichʼįʼ bá hóóchįįd, dadiidįłígíí tʼáadoo shódeisiiltʼeʼ da.

19 Áádóó baa hoolzhiizh nihaʼáłchíní deidooyįlígíí tʼáágééd baa nániikai, dóó yéego chʼééh deeskai, deiyínéłígíí biniinaa, daʼdiidį́į́ł danízinígíí yikʼée yéego tiʼdahoozniiʼ.

20 Áádóó baa hoolzhiizh Laman dóó Lemuel dóó Ishmael biyeʼké tʼáá íiyisíí akʼijįʼ ayádaʼniiłtiʼ, diné doo kééhatʼinígi yikʼee tiʼdahooníhígíí dóó bichʼįʼ ndahwiiʼnánígíí biniinaa; dóó shizhéʼé ałdóʼ Bóhólníihii biDiyin God yikʼijįʼ ayáʼniiłtiʼ; aooʼ, dóó tʼáá ałtso tʼáá íiyisíí yinííł naakai, áko Diyin Bóhólníihii yikʼijįʼ yádaałtiʼ.

21 Áádóó áhoodzaa shí, Nephi, yeeʼ sheʼałtį́į́ʼ ádinígíí biniinaa shínaaíké shichʼįʼ nahwiisnááʼ, dóó beʼałtį́į́ʼ bitłʼóól dah daniitłʼóóʼgo, tʼáá íiyisíí nihá nahonitłʼah silį́įʼ, aooʼ, hónaasiiʼ dadiidįłígíí ndi tʼáadoo shódeidiiltʼeʼ da.

22 Áádóó baa hoolzhiizh shí, Nephi, łą́ągo shikʼiské bichʼįʼ yéiiłtiʼ, bijéí nááyineestłʼisígíí biniinaa, Bóhólníihii biDiyin God ndi yikʼijįʼ saad dahólǫ́ǫgo.

23 Áádóó baa hoolzhiizh shí, Nephi, yeeʼ tsin bee ałtį́į́ʼ íishłaa, dóó tsin kʼézdonígíí bee kʼaaʼ íishłaa; ákohgo, ałtį́į́ʼ dóó kʼaaʼ, dóó bee atłʼįhí, dóó tsé yeeʼ bił dah diijaaʼ. Dóó shizhéʼé kóbidííniid: Háágóóshąʼ deesháałgo dadiidįłígíí shóideeshtʼeeł?

24 Áádóó baa hoolzhiizh Diyin Bóhólníihii neiyízhdééłkid, háálá shizaad biniinaa hójoobaʼ ádaʼdiilyaa; áko shiiʼ sizíinii bidzíilgo tʼáadoo leʼé tʼóó ahayói bee bichʼįʼ yéiiłtiʼ.

25 Áádóó baa hoolzhiizh shizhéʼé Diyin Bóhólníihii biinééʼ yidiiztsʼą́ą́ʼ; dóó Diyin Bóhólníihii yikʼijįʼ yááłtiʼ ę́ę biniinaa tʼáá aaníí bichʼahóóshkeed, hónaasiiʼ yinííł biyiʼ góyaa abiʼdooltį́.

26 Áádóó baa hoolzhiizh Diyin Bóhólníihii biinééʼ yee kóbidííniid: Jooł nahalinígíí níníłʼį́, áádóó áko shooh tʼáadoo leʼé náháasdzooígíí niníłʼį́.

27 Áádóó baa hoolzhiizh shizhéʼé jooł tʼáadoo leʼé bikááʼ náháasdzogo yinééłʼį́į́ʼ, yinásdzííd dóó tʼáá íiyisíí ditłid silį́į́ʼ, dóó shínaaíké dóó Ishmael biyeʼké dóó niheʼdaʼasdzáán ałdóʼ.

28 Áádóó baa hoolzhiizh shí, Nephi, jooł biyiʼ dah atsihígíí yinééłʼį́įʼgo, niheʼoodląʼ dóó yéego ádeiitʼį́ dóó haitʼáo bikʼeh dahoniilʼínígíí yikʼehgo náalnish lá.

29 Áádóó bikʼeʼashchinígi ałdóʼ ániidígíí bikááʼ náháasdzo, doo nantłʼahgóó wóltaʼgo, bikʼehgo Diyin Bóhólníihii ííłʼínígíí bikʼidaʼdiyiitįįh; dóó bitaʼnáhootʼaahgo bikʼeʼelchį́ łahgo álʼį́į́h, niheʼoodląʼ dóó nihí yéego ádeitʼínígíí éí bikʼeh dahoniilʼį́įgo. Áko baa ákódaniidzį́į́ʼ Diyin Bóhólníihii áłtsʼíísígo éʼélį́įgo tʼáadoo leʼé ayóó ádaatʼéii áyiiłʼįįh.

30 Áádóó baa hoolzhiizh shí, Nephi, dził bighą́ą́ʼ hadeeshááłgóó dah diiyá, jooł bikáaʼgi bee akʼeʼeshchį́ bikʼehgo.

31 Áádóó baa hoolzhiizh naaldlooshii daʼałchinígíí niséłtseed, nihaʼáłchíní deidooyįłígíí bá shóíséłtʼeʼ.

32 Áádóó baa hoolzhiizh nihiníbaal siniljįʼ nanisdzá, naaldlooshii daʼałchinii niséłtseedígíí nináháłjid; dóó deidooyį́łígíí shóiséłtʼeʼ dayiiłtsą́ągo, tʼáá íiyisíí bił dahóózhǫǫd! Áádóó baa hoolzhiizh tʼáá bí Diyin Bóhólníihii yidááhdóó hójoobaʼ ádaʼdiilyaa, dóó yichʼįʼ ahéheeʼ dadííniid.

33 Áádóó baa hoolzhiizh nihí dah náádiikai, tʼáá áłtséédą́ą́ʼ yiiʼnéłę́ęjígo; dóó tʼáá yiiʼnéełgo tʼóó ahayói danihiiską́ bikʼijįʼ nihiníbaal nínáádasiiʼnil, áko tʼáá nizaadgóó nihee dahodídoonááł biniyé.

34 Áádóó baa hoolzhiizh Ishmael náádiilyá, dóó łeeh yiltinígi Nahom bee yéézhiʼ.

35 Áádóó baa hoolzhiizh Ishmael bitsiʼké tʼáá íiyisíí yínííł daazlį́į́ʼ, bizhéʼé ádin silį́ʼígíí biniinaa, dóó diné doo kééhatʼinígi tiʼdahoozniiʼígíí biniinaa; dóó shizhéʼé yikʼijįʼ yádááłtiʼ, Jerusalem bikéyahdę́ę́ʼ chʼíbiníʼeezhígíí biniinaa, kódaaníigo: Nihizhéʼé náádiilyá; aooʼ, dóó diné doo kééhatʼinígi nízaa niníikai, dóó ląʼída bikʼee tiʼdahwisiiʼniiʼ, dichin, dibááʼ, dóó chʼééh adidááh, dóó díidí ałtso bikʼee tiʼdahosiiʼníiʼgo diné doo kééhatʼinígi dichin nihidooghą́ą́ł.

36 Áádóó kótʼáo shizhéʼé yikʼijįʼ yádááłtiʼ, dóó shídóʼ shikʼijįʼ; dóó Jerusalemgóó nátʼą́ą́ʼ nídiikah danízin.

37 Áádóó Laman Lemuel yichʼįʼ kodííniid dóó Ishmael biyeʼké ałdóʼ yichʼįʼ: Áko shooh, tį́ʼ nihizhéʼé dadiyiilyééł, dóó nihikʼis Nephi ałdóʼ, tʼáá bí nihinaatʼáanii dóó nanhinitiní íʼdiilyaa, nihí bínaaí niidlį́įgo.

38 Kʼad, Diyin Bóhólníihii shichʼįʼ yaáłtiʼ ní, dóó Diyin yá ndaalʼaʼí ałdóʼ shíká ahéeswod ní. Ákondi shooh, nihichʼįʼ biyoochʼíidgo nihił béédahózin; dóó díidí tʼáadoo leʼé yee nihił halneʼ, dóó tʼáadoo leʼé łąʼída yee binaʼadloʼígíí ííłʼį́, áko yee nihininááʼ doodloh, yaa nitséékosgo, daatsʼí, áko háádishį́į́ diné doo kééhatʼiníjįʼ yaa nihidooʼishgo; dóó dah nihidiiʼéézh bikʼijįʼ, tʼáá bí nihinantʼaʼí dóó nihá nahaʼáhí ádiʼdoolnííł nízin, áko kónééh dóó íínizinígíí bikʼehgo ádeitʼį́į doo nihóʼní. Dóó shínaaí Laman díigi átʼáo bijéí yiyiʼ háhoniiłcháadgo bá dahóóchįįd.

39 Áádóó baa hoolzhiizh Diyin Bóhólníihii éí nihił hólǫ́, aooʼ, Diyin Bóhólníihii biinééʼ ndi hazlį́į́ʼ dóó ląʼída saad yee yichʼįʼ yááłtiʼ, dóó tʼáá íiyisíí yichʼahóóshkeed; dóó Diyin Bóhólníihii biinééʼ yee bichʼahóóshkeed dóó bikʼijįʼ doo bá dahachįʼ da daazlį́į́ʼ, dóó bibąąhági ádaatʼéii yaa ńdaʼooskan, Diyin Bóhólníihii hónaasiiʼ chʼiyáán yee nihikʼijisdliʼ, áko tʼáadoo daneeʼnáa da.