1 Áádóó baa hoolzhiizh shí, Nephi, Iiʼ Sizį́ Diyinii dah shiʼdiiłtį́ dóó díidí ałtso deiiłtsą́ągo, shizhéʼé biníbaaljįʼ nánisdzá.

2 Áádóó baa hoolzhiizh shikʼis nééłʼį́į́ʼ, dóó shizhéʼé tʼáadoo leʼé yee bichʼįʼ yááłtiʼę́ę yee saad bee ałghadaazhditʼááh.

3 Háálá tʼáadoo leʼé ląʼída ayóó ádaatʼéii tʼáá aaníí yee yichʼįʼ yááłtiʼ, éí bikʼiʼdidootį́į́łgo ayóó nántłʼah, tʼáá hazhóʼó Diyin Bóhólníihii tsʼídá neiyíizhdiłkidʼgo tʼéiyá, dóó bijéí biiʼ yistłʼisgo, biniinaa Diyin Bóhólníihii doo yichʼįʼgóó déezʼį́į́ʼ da ńtʼę́ę́ʼ.

4 Áádóó kʼad shí, Nephi, bijéí deistłʼisgo biniinaa baa yinííł sélį́į́ʼ, dóó ałdóʼ, tʼáadoo leʼé daneełʼįʼígíí biniinaa, dóó tʼáá oólyéego nihokááʼ dineʼé baʼáłchíní tsiʼnaakaaígíí biniinaa tsʼídá áhodooníiłgo baa ákoniizį́į́ʼ.

5 Áádóó baa hoolzhiizh bikʼee tiʼhooshníhígíí biniinaa shikʼeʼhodeesdlį́į́, jó bikʼee tiʼdahooshnííhígíí tʼáá ałtsoní biláahgo ayóó ádaatʼé nísin, shidineʼé ábiʼdisdįįdígíí biniinaa, naaʼániideeʼgo yiiłtsą́.

6 Áádóó baa hoolzhiizh shitsxeʼ nísisdlį́į́ʼ dóó bikʼijįʼ shikʼiské bichʼįʼ yeiiłtiʼ, saad ahídeitʼáhígíí shił ííshjání adeidoolííł biniyé.

7 Áádóó kódadííniid: Áko shooh, nihizhéʼé saad olive bitsin bitsʼádáozʼá yaa hoolneʼę́ę doo bikʼiʼdádiitį́įh da, dóó Gentile dineʼé yaa halneʼígíí ałdóʼ.

8 Áádóó kóbidííniid: Nihíísh Diyin Bóhólníihii ndeidoołkid?

9 Áádóó kódashidííniid: Tʼáadoo ádeilyaa da; háálá Diyin Bóhólníihii tʼáadoo leʼé doo nihił ííshją́ą́ íidoolíił da.

10 Áko shooh, kóbidííniid: Haitʼáosh doo Diyin Bóhólníihii bibee hazʼáanii bikʼeh honółʼį́į da? Haitʼáosh nihijéí sołtłʼisígíí biniinaa tʼóó dinóohneeł?

11 Nihíísh tʼáadoo leʼé Diyin Bóhólníihii yee haadzíʼę́ę doo benáłniih da?—Doo nihijéí sołtłʼisgóó, dóó oodląʼ bee naʼídołkidgo, nihaadoodił yinóhdlą́ągo, shibee hazʼáanii ayóó dinóhsingo, díidí tʼáadoo leʼé tsʼídá nihił íishjání ádoolnííł.

12 Áko shooh, kónihidishní, Diyin Bóhólníihii biʼIiʼ Sizį́ Diyinii nihishizhéʼé biyiʼ hólónígíí bikʼehgo, Israel bighandóó háájeʼígíí olive bitsin bił áłhąąh sinil nahálin; áádóó áko shooh Israel bighan bąąhdóó doo danihiʼdiistiʼ da, dóó Israel bighandóó atsʼádáozʼaʼ daniidlį́ yaʼ?

13 Áádóó kʼad, nihizhéʼé tʼáadoo leʼé bitsʼádáozʼaʼ daniidlínée bitákʼiz ánahidootsi yiłníigi Gentile dineʼé tʼáá átʼé bee hólónii binahjįʼ, áko, dííjį́į́di, nihílástsiiʼ doo oodlą́ yiyiʼ ahiih naakaigo, aooʼ, tʼóó ahayói béédadooháh, dóó Messiah bitsʼíís nihokááʼ dineʼé baʼáłchíní yichʼįʼ ííshją́ą́ áyiilaa dóó bikʼijįʼ tʼóó ahayói ałkʼih nídaʼdoochííł, áádóó Messiah binahatʼá bee yisdáʼiildéehii Gentile dineʼé tʼáá átʼé yéídoolééł, áádóó Gentile dineʼé bitsʼą́ą́dóó nihílástsiiʼ yidziʼíhígíí yichʼįʼ kódeidoolííł—

14 Áádóó éí jį́įdi nihílástsiiʼ yidziʼíhígíí éí Israel bighandóó haajéʼígíí bił béédahódoozįįł, dóó Diyin Bóhólníihii dineʼé yił ahaʼdeetʼánée éí ádaatʼį́; dóó áadi bił béédahózingo dóó dabizhéʼę́ę yaa ídahwiidoołʼááł, dóó ałdóʼ báNináʼnídláii binahatʼá bee yisdáʼiildéehii yaa ídahwiidoołʼááł, bí dabizhéʼę́ę yee yił hoolneʼ; ákohgo, báNináʼnídláii dóó tsʼídá bí yee naʼnítinígíí yaa ídahwiidoołʼááł, áko haitʼáo baa hidookáh dóó yisdááhidookáh dah yikʼidaʼdidootį́į́ł.

15 Áádóó éí jį́įdiísh hoolʼáágóó dabiDiyin God yaa bił dahózhǫ́ dóó yaa dahaniih doo, dabitsé dóó yisdábidooníłígíí? Aooʼ, éí jį́įdi, dooísh chʼil naʼatłʼoʼii bitłʼóól tʼáá aaníí yee dabitsxeʼ dóó yąąh daʼdooyį́į́ł da? Aooʼ, dooísh Diyin God biʼtʼáá aaníí dahyiikahígíí yaa dookah da?

16 Áko shooh, kónihidishní, Aooʼ; Israel bighandóóígíí bitah bénáhodooníh; bitákʼiz ahídootsí, olive bitsin bitsʼádáozʼá danilį́įgo, ńléí tʼáá aanínígíí olive bitsinjįʼ.

17 Áádóó nihizhéʼé díí ááh yiłní; dóó Gentile dineʼé daʼníłtsʼą́ąjigo adahineeskaad dóó bikʼijįʼ baa hódoozhíshgo ááh yiłní; dóó Gentile dineʼé binahjįʼ áhanéehgo ááh yiłní, Diyin Bóhólníihii beʼádziil Gentile dineʼé yichʼįʼ íishjání íídoolííł, háálá Jew dineʼé biniinaa doo dabiniizį́į́ʼ da, doodágo Israel bighandóó haajeʼígíí.

18 Ákohgo, nihizhéʼé doo nihílástsiiʼ tʼáá sahí yaa yááłtiʼ da, ndi Israel tʼáá ałtso bighandóó haajeʼígíí ałdóʼ, akéedi iiłkąąhjįʼ ahaʼdeetʼą́ tsʼídá béhodoolníłígíí yichʼįʼ dah dilníh; Diyin Bóhólníihii nihizhéʼé Abraham yił ahaʼdeetʼą́, kóníigo: Nílástsiiʼ biyiʼ tʼáá ałtso nihokááʼ dineʼé bikʼihojidoodliił.

19 Áádóó baa hoolzhiizh shí, Nephi, díidí tʼáadoo leʼé ląʼída bee bichʼįʼ yéiiłtiʼ; aooʼ, ńléí akéedi iiłkąąjįʼ Jew dineʼé háádidoolníłígíí baa yéiiłtiʼ.

20 Áádóó Isaiah bizaad bee bichʼįʼ ánaadishní, Jew dineʼé háádidoolníłígíí yaa yááłtiʼ, éí doodago Israel bighandóóígíí; dóó háádidoolníłígíí dóó bikʼijįʼ doo bikʼeh nááhodidoodléeł da, doondi daʼníłtsʼą́ąjigo ałtsʼánáádahidínóolkał da. Áádóó baa hoolzhiizh éí shikʼiské ląʼída saad bee bichʼįʼ yéiiłtiʼ, éí hashtédadíítʼeʼ dóó Diyin Bóhólníihii yidááhdóó hójoobaʼ ídaʼdilyaa.

21 Áádóó baa hoolzhiizh tʼáá áłah shichʼįʼ hanáánáádzííʼ, kóníigo: Tʼáadoo leʼé nihizhéʼé yaa nayiizyeelígíísh haʼátʼíí yaa halneʼ? Tsin yiyiiłtsáníish haʼátʼíí yaa halneʼ?

22 Áádóó kóbidííniid: Éí tsin bee iináanii yaa halneʼígíí átʼé.

23 Áádóó tʼáá áłah kóshidííniid: nihizhéʼé béésh bąąh níʼáago yiyiiłtsánée éí haʼatʼíí yaa halneʼ?

24 Áádóó Diyin God bizaad átʼé bidííniid; dóó tʼáá háiida Bóhólníihii bizaad yiyíístsʼą́ą́ʼgo, dóó éí ádíyóltąʼgo, doo dinóonééł da; doondi atsʼą́ą́jí biʼachʼįʼ nahwiiłná nabínítaah da doo dóó biʼiiníziinii bikǫʼ yee ádiłtʼóhígíí doo binitsídaakees yikʼeh didoodleeł da, doo bił hodoołchxǫǫł yaa bidooʼish da.

25 Ákohgo, shí, Nephi, Diyin Bóhólníihii bizaadjígo yéego beʼołʼį́ bidishní; aooʼ, dóó shiiʼ sizíinii bee shidziiligíí tʼáá átʼé bee bichʼįʼ yánáshtih, dóó tʼáá átʼé bee áníshtʼéhígíí ałdóʼ bee, Diyin God bizaad deididoóótsʼį́į́ł dóó bibee hazʼáanii tʼáá ałtsoní yéédaalniihgo áłahjįʼ deidísin doo nisin.

26 Áádóó kóshidííniid: nihizhéʼé tooh nilį́įgo yiyiiłtsánígíí haʼátʼíí yaa halneʼ?

27 Áádóó shizhéʼé tó yiyiiłtsánéé éiyá tʼóó baaʼíhii átʼé bidííniid; dóó tʼáadoo leʼé biniʼ biyiʼgo biniinaa tó tʼóó baaʼíhígíí tʼáadoo yiyiiłtsą́ą da.

28 Áádóó tʼóó baaʼíhgo ahoodzą́ bidííniid, doo yáʼáshóonii yaa naakaiígíí tsin bee iináanii yee yitsʼáskaiígíí átʼé, dóó Diyin God yá naazínígíí ałdóʼ yitsʼáhaaskai.

29 Áádóó ńléí chʼį́įdiitahdi tʼóó baaʼíhígíí yaa halneʼ bidííniid, Diyin yá naalʼaʼí éiyá tsiʼnaakaiígíí bá hashtʼeelyaa shił ní.

30 Áádóó bił hweesneʼ nihizhéʼé ałdóʼ Diyin God bibee hazʼáanii kʼídeiyitįįhgo bándawiitʼaahii éí doo yáʼádaashóonii dóó Diyin yikʼehgo deiyíkááhii ałtsáyiinííł; dóó bitsʼázdinídínígíí yeeʼ kǫʼ diltłiʼ nahanilgo bitsʼázdinilííd, Diyin God bichʼįʼ dégo kwááníiłgo áhoyéélʼáágóó, doo ninítʼiʼ da.

31 Áádóó tʼáá áłah kóshidííniid: dííʼish atsʼíís abíyiiłkáajįʼ tiʼhoonííh bá hooʼaʼígíí ááh yiłní, éí doodagooísh hatsʼíís daatsaah dóó bikʼijįʼ hwiiʼ sizíinii bił áhootʼéegi ááh yiłní, éí doodagooísh hatsʼíís bee hijiináagi ááh yiłní?

32 Áádóó baa hoolzhiizh tʼáadoo leʼé tʼáá áłah hatsʼíís dóó hwiiʼ sizíiniikʼehgo yitihgóó ááh yiłní bidííniid; tsʼídá baa yiníłkąądi yináashnishígíí binahjįʼ bá nihodootʼááł, aooʼ, hatsʼíís abíyiiłkáajįʼ bá hooʼaʼgo biyiʼ yináashnishę́ę átʼé.

33 Ákohgo, tsiʼnaakaigo ádin daazlį́įʼgo ałdóʼ nilááhgóó biʼdoolnih, tʼáadoo leʼé dadiyinígíí bitsʼą́ąjįʼ, tʼáá ákogi átʼéii bidéetiʼgi; ákogo, Diyin God baa yítʼéeshgo yidáahgi deidoozį́į́ł, yindááshnish yę́ę bá ndahodooʼááł; dóó yindááshnish tʼóó badaaʼígo tsʼídá tʼóó badaaʼí doo; dóó tʼóó badaaʼíhgo éí Diyin God bił hazʼą́ą góneʼ doo yił kéédahatʼį́į da doo; ákodzaago, Diyin God bił hazʼą́ądi ałdóʼ tʼóó baaʼíh doo.

34 Ákondi shooh, kónhidishní, Diyin God bił hazʼą́ądi doo tʼóó bahooʼíh da, dóó Diyin God bił hazʼą́ąjįʼ tʼóó baaʼíhígíí doo yáh adoogáał da; ákohgo tʼóó baaʼíhígíí tsʼídá tʼóó baaʼíhgo łaʼ bá hazhʼą́ągo hashtʼehoolyaa.

35 Áádóó łaʼ hazʼą́ągo bá hashtʼéelyaa, aooʼ, ńléí chʼį́įdiitah tʼáá íiyisíí tʼóó baaʼihgo bił hooʼaʼgo baa yéiłtiʼyę́ę, dóó éí biʼiiníziinii eíí hashtʼeiyiilaa, ákohgo nihokááʼ dineʼé biʼiiʼ sizíinii bá hashtʼedahóólyaaígíí éí Diyin God bił hazʼą́ąjįʼ bił yáh anáhidookah, éí doodago nahjįʼ kódabidiʼdoolnííł háálá bee ánahwiiʼtaah baa yéiiłtiʼę́ę biniinaa.

36 Ákohgo, tʼáá ákogi ádaatʼéii bitsʼą́ą́dóó tsiʼnidaakaígíí doo daniidzį́į da, dóó tsin bee iináanii yitsʼą́ą́dóó ałdóʼ ákótʼé, éí bineestʼąʼ ayóó yáʼátʼééh dóó ałtso daneestʼą́ʼ ayóó biláahgo nidzin; dóó éí Diyin God aláahdi háiidoolééł. Dóó kótʼáo shikʼiské bichʼįʼ yéiiłtiʼ. Amen.