1 Áádóó baa hoolzhiizh Diyin yá naalʼaʼí éí shichʼįʼ haadzííʼ, kóníigo: Niníłʼį́! Dóó nééłʼį́į́ʼ dóó łą́ʼígo ałʼąą dineʼé índa bił ndahazʼą́ągo yiiłtsą́.

2 Áádóó Diyin yá naalʼaʼí kóshidííniid: Haʼaʼtʼíísh yiniʼį́? Dóó kódííniid: łą́ʼígo ałʼąą dineʼé índa bił ndahazʼą́ągo yiiłtsą́.

3 Áádóó kóshidííniid: Díidí Gentile bidineʼé dóó bił nahazʼą́ą́góó ádahootʼé.

4 Áádóó baa hoolzhiizh Gentile bidineʼé bitahgóó sóhodizin ayóó átʼéego álnééhgo yiiłtsą́.

5 Áádóó Diyin yá naalʼaʼí kóshidííniid: Jó ákon kin biiʼ sóhodizin ayóó átʼée ndeezʼą́ éiyá nááná łaʼ kin biiʼ sódahodizinígíí tsʼídá aláahgo woolchʼį́dígíí átʼé, Diyin God yá naazínígíí ndéiłtseed, aooʼ, dóó atídeiłʼį́ dóó niʼjįʼ kódayósin, dóó béésh bizéédeetą́ago ádeiileʼ, dóó ąąh shizhjééʼgo ádeileʼ.

6 Áádóó baa hoolzhiizh díí sodizin ayóóʼátʼéii dóó aláahgo woolchʼį́dígíí éí néshʼį́; dóó biʼiiníziinii éí hayiyííłwodgo éí yiiłtsą́.

7 Áádóó shí ałdóʼ béésh óola, dóó béésh łigaii, dóó naaʼtʼąhí łigai daditsʼid, dóó naaʼatʼąhí deiilchííʼ, dóó áłtsóózígo naaʼtʼąhí yisdizgo daʼílínígíí, dóó ʼééʼ daʼílį́ ałąą áátʼeełgo; dóó kin yąąh siziní ląʼígo yiiłtsą́.

8 Áádóó Diyin yá naalʼaʼí shichʼįʼ haadzííʼ: kóníigo: Jó ákon béésh óola, dóó béésh łigaii, dóó naaʼatʼąhí łigai daditsʼid, dóó naaʼatʼąhí deiilchííʼ, dóó áłtsóózígo naaʼatʼąhí yisdizgo daʼílínígíí, dóó ʼééʼ daʼílínígíí; dóó kin yąąh siziní, díí sodizin ayóóʼátʼéii dóó aláahgo woolchʼį́dígíí ayóó yidádanoolníh.

9 Áádóó nahasdzáán bikááʼ baa dahániih yiká ałdóʼ Diyin God yá naazínígíí ndéiiłtseed, dóó ąąh azhjééʼ góyaa ádayiiʼéésh.

10 Áádóó baa hoolzhiizh éí shí dééʼį́į́ dóó tónteel ląʼígo néshʼį́; dóó Gentile dineʼé shikʼiské bílástsiiʼ tónteel bitʼagi siyį́.

11 Áádóó baa hoolzhiizh Diyin yá naalʼaʼí shichʼįʼ haadzííʼ: Jó ákon Diyin God beʼateʼelʼį́ nikʼiské bílástsiiʼ bikʼijįʼ kólyaa.

12 Áádóó dééʼį́į́ʼ dóó Gentile dineʼé bitahgi hastiin néshʼį́, éí shikʼiské bílástsiiʼ tónteel yiláahdę́ę́ naaghá; dóó Diyin God biʼIiʼ Sizį́ Diyinii neshʼį́, éí adaayá dóó hastiin yikʼi hooleʼ; dóó tónteel yikááʼgóó dah diiyá, azhą shikʼiské bílástsiiʼ yichʼįʼ, éí kéyah aa deetʼą́ądi kéédahatʼį́.

13 Áádóó baa hoolzhiizh Diyin God biʼIiʼ Sizį́ Diyinii néshʼį́, nááná łaʼ Gentile dineʼé bikʼidahooleʼ, dóó ąąh shizhjééʼdóó dahdadiikai, tónteel bikááʼgóó.

14 Áádóó baa hoolzhiizh Gentile dineʼé ląʼída kéyah bee ahaʼdeetʼanii yikááʼ dah deiyínéehgo néshʼį́; dóó Diyin God bibee ateʼelʼį́ néshʼį́, shikʼiské bílástsiiʼ éí bikʼistíh; dóó Gentile dineʼé bidááhdóó daʼníłtsʼą́ąjigo adeineeskaad dóó yikʼee kádadeeskai.

15 Áádóó Diyin Bóhólníihii biʼIiʼ Sizį́ Diyinii néshʼį́, Gentile dineʼé bikʼih dahóoleʼ, dóó akʼih dadeesdzíl dóó kéyah daabí dooleełgo ádá shódayoostʼeʼ; dóó daalgai, dóó tʼáá íiyisíí yáʼátʼééh dóó danizhóní, tʼah doo shidineʼé naatseedyę́ędą́ą́ʼ ákodanóolnin ńtʼę́ę́ʼ.

16 Áádóó baa hoolzhiizh shí, Nephi, nléi Gentile dineʼé ąąh shizhjééʼdóó dahdadiikai yę́ę Diyin Bóhólníihii yitsijįʼ tʼáá bí hojoobaʼ ídaʼdiilyaa; dóó Diyin Bóhólníihii bibeʼádziil bee dahólǫ́ǫ ńtʼę́ę́ʼ.

17 Áádóó Gentile dineʼé dabimá tónteel yikááʼ ałhíikaigo néshʼį́, dóó kéyah ałdóʼ yikááʼ, hakʼiidóójah yiniiyé.

18 Áádóó Diyin God bibee ádziil bił dahólǫ́ǫgo néshʼį́, dóó Diyin God bibee ateʼelʼį́į ałtso bikʼijįʼ ndadoobah yiká áłah daazlíʼígíí bikʼijįʼ kólyaa.

19 Áádóó shí, Nephi, Gentile dineʼé ąąh shizhjééʼ yiiʼdóó chʼeheshkai Diyin God bibeʼádziil yee ałtso dadineʼé yilákʼeedóó habiizhʼéezhgo néshʼį́.

20 Áádóó baa hoolzhiizh shí, Nephi, kéyahgi danéésééłgo néshʼį́; dóó naaltsoos léiʼ neshʼį́, dóó bitah náás dayiʼááh.

21 Áádóó Diyin yá naalʼaʼí kóshidííniid: Níísh naaltsoos bikáhígíí nił bééhózin?

22 Áádóó kóbidííniid: Dóó shił bééhózin da.

23 Áádóó ádííniid: Jó ákon Jew léiʼ bizéédóó háátiʼ. Dóó shí, Nephi, néshʼį́; dóó kóshidííniid: naaltsoos Jew dineʼé ndayíízooígíí níníłʼį́, Diyin Bóhólníihii bibee ahaʼdeetʼą́ dabiyiʼ, Israel bighanjí yichʼįʼ kódayiilaa; dóó ałdóʼ Diyin yá yádaałtiʼii dadiyinii łą́ągo áhodoonííł daanínée dabiyiʼ; naháasdzohígíí béésh łitsoii tʼą́hí bikʼih naháasdzohígíí nahálin, tʼáá ahazhóʼó doo łą́ągo da; ákótʼée ndi, Diyin Bóhólníihii biʼahaʼdeetʼą́ dabiyiʼ, Israel bighanjí yichʼįʼ kóyiilaa; ákohgo, tʼáá átʼé Gentile dineʼé ayóó bił danilį́į doo.

24 Áádóó Diyin Bóhólníihii bá naalʼaʼí áshidííniid: áko naaltsoos éí Jew dineʼé yee hadahaasdziʼę́ę bitsʼą́ą́dóó átʼéego baa ákónínízin; áádóó łaʼ Jew dineʼé bizééʼdóó yee haadzííʼgo éí Diyin Bóhólníihii binahatʼá bee yisdáʼiildéehii tʼáá átʼé átʼé, éí hastóí naakitsʼáadah bikʼihodiiniiʼígíí yaa ńdaʼíizoh; dóó Diyin God biDibé Yázhí biyiʼ tʼáá aaníinii yikʼehgo ńdayíizoh.

25 Ákohgo, díidí Jew dineʼé bitsʼą́ądę́ę́ʼ tʼáadoo leʼé niłtólígo Gentile bichʼįʼ kólyaa; Diyin God biyiʼ tʼáá aaníinii bikʼehgo.

26 Áádóó Diyin God biDibé Yázhí hastóí naakitsʼáadah bikʼihodiiniiʼígíí bilákʼeedóó náás kólyaa dóó bikʼijįʼ, Jew dineʼé bitsʼą́ądóó nléi Gentile dabichʼįʼ, sodizin ayóóʼátʼéii dóó woolchʼį́dígíí bá siʼánígíí niníłʼį́, łaʼ biiʼ sódahodizin ałtso tsʼídá aláahgo woolchʼį́dígíí átʼé; háálá áko shooh, Dibé Yázhí wolyéii binahatʼá bee yisdáʼiildéehii łą́ągo tʼáá béédahózíníyę́ę dóó tsʼídá daʼílį́įgi hadayíizhjaaʼ; dóó Diyin Bóhólníihii bibee ahaʼdeetʼą́ ałdó łą́ągo doo ílį́į́go ádeiyilaa.

27 Áádóó díí Diyin Bóhólníihii bihonítiʼ tʼáá ákótʼéhii daatsʼí ałtso łahgo ádayiilaa ńtʼę́ę́ʼ, nihokááʼ dineʼé baʼáłchíní dah yee yinááʼ ádeidoołdįįł dóó yijéí deidóołtłʼis.

28 Ákohgo, sodizin ayóóʼátʼéii dóó woolchʼį́dígíí naaltsoos bilakʼee hadiiltsídgo niniłʼį́, naaltsoos biyiʼdę́ę́ʼ éiyá tʼáadoo leʼé łą́ągo tʼáá béédahózíníyę́ęʼ dóó tsʼídá daʼílįínígíí yiidʼééʼ hadayíizhjaaʼígíí, éiyá Diyin God biDibé Yázhí binaaltsoos átʼé.

29 Áádóó díidí tʼáadoo leʼé tʼáá béédahózíníyę́ęʼ dóó daʼílį́įgo hadayíizhjaaʼ dóó bikʼijįʼ Gentile dabidineʼé ałtso baa heesʼnil; dóó Gentile dabidineʼé ałtso baa heesʼnil dóó bikʼijįʼ, aooʼ, azhą́ tónteel tseʼnáá Gentile dineʼé bił deiníłtsánígíí ąąh naazhjééʼdóó chʼéheeskai, niníłʼínígíí—tʼáadoo leʼé łą́ągo tʼáá béédahózíníyę́ęʼ dóó daʼílį́ naaltsoos yiyiʼdóó hadayíizhjaaʼę́ę, nihokááʼ dineʼé baʼáłchíní doo bá nantłʼágóó yikʼidaʼdidootį́į́łę́ę́, Diyin God biDibé Yázhí biyiʼ tʼáá béédahózíníyę́ęʼ bikʼehgo—díidí Dibé Yázhí wolyéii binahatʼá bee yisdáʼiildéehii biyiʼdóó tʼáadoo leʼé éiyá haheesjáaʼgo biniinaa, tʼáá íiyisíí łą́ągo dahidigeeh, aooʼ Chʼį́įdii beʼadziil tsʼídá yéigó yee hakʼeh didlį́.

30 Ákótʼée ndi, Gentile dineʼé ąąh shijééʼdóó dah hidiikáígíí daniníłʼį́, dóó Diyin God bibeeádziil yee ałtso ałʼąą dadineʼé yiláahjįʼ haizhʼéézh, kéyahígíí yikááʼjí éiyá ałtso kédaayahígíí biláahgo nidzingo, kéyahígíí Bóhólníihii Diyin God shą́ą́ʼ nizhéʼé yee yił ahaʼdeetʼą́ kéyah báʼáłchíní láʼ yéiidiniʼą́; ákohgo, Bóhólníihii Diyin God Gentile dineʼé niʼálástsiiʼ ałʼąą áátʼeeł doo ałtso yee yá hwiidoołʼaałgo ádeidoołdį́įł da, nikʼiské bitah hólónígíí.

31 Gentile dineʼé nikʼiské bílástsiiʼ doo ádeidoołdįįłgo yá hwiidoołʼaał da.

32 Doo Bóhólníihii Diyin God Gentile dineʼé áhoolʼáágóó tʼóó baaʼíhgo binaaʼádeesdiidígíí tʼóó yikʼinidantʼáadoo, ákódaatʼéhígíí níníłʼį́, Dibé Yázhí wolyéii binahatʼá bee yisdáʼiildéehii sodizin aláahgo woolchʼį́dígíí tʼáá béédahózíníyę́ę dóó aláahdi daʼílínii tʼą́ą́ʼ kódayósinígíí biniinaa, éí ályaaígíí niníłʼį́.

33 Ákohgo, Diyin God biDibé Yázhí kóní: Gentile dineʼé baa jiideeshbááł, ńléí Israel bighandóó chʼéédziʼígíí anihootʼą́ ayóó átʼéii yee yaa doogááł.

34 Áádóó baa hoolzhiizh Diyin Bóhólníihii bá naalʼaʼí shichʼįʼ haadzííʼ, kóníigo: Jó ákon, ní Diyin God biDibé Yázhí, Israel bighandóó chʼéékaaígíí baa niyáh dóó bikʼijįʼ—dóó díí chʼéékaigo baa yáshtiʼígíí shizhéʼé baʼáłchíní ádaatʼį́—ákohgo, nihoniʼáanígíí yee yaa níyá, dóó Gentile dineʼé bílaʼ yee kandookah, dóó Gentile dineʼé tʼáá íiyisíí yee chą́ą́hdadidoogóh, Dibé Yázhí wolyéii binahatʼá bee yisdáʼiildéehii sodizin aláahgo woolchʼį́dígíí aláahdi tʼáá béédahózíníyę́ęʼ dóó daʼílínii tʼą́ą́ʼ kódayósinígíí biniinaa, kin yąąh sizíní yimá éiyá nilį́, Dibé Yázhí ání—Gentile dineʼé áadi yoołkaałgo haajiideeshbaał, éí bichʼįʼ kódeeshłííł, tʼáá shí she ádziil biiʼ,nahatʼá bee yisdáʼiildéehii ląʼída, tʼáá béédahózíníyę́ę dóó daʼílį́nígíí, Dibé Yázhí wolyéii ání.

35 Háálá, áko shooh, Diyin God biDibé Yázhí ání: Tʼáá shí naʼáłchíní bichʼįʼ ííshją́ą́ ídiʼdeeshnííł, tʼáadoo leʼé bee biká adeeshwółígíí éiyá łą́ągo yaa ákʼedaʼdoołchił, tʼáá béédahózíníyę́ęʼ dóó daʼílínígíí; dóó nílástsiiʼ ábiʼdidooldį́į́ł, dóó doo daʼosdláádgóó dóó bikʼijįʼ, dóó nikʼiské bílástsiiʼ ałdóʼ, jó ákon, díidi tʼáadoo leʼé ndadidóolʼį́į́ł, Diyin God biDibé Yázhí biʼaʼiilyé dóó bibee ádziil binahjįʼ, náásdi Gentile dineʼé bichʼįʼ kódoolnííł.

36 Áádóó nahatʼá bee yisdáʼiildéehii biiʼ bikʼeʼdoolchííł, ní Diyin biDibé Yázhi, dóó shitsé dóó shiyisdaʼiinííłii.

37 Áádóó tʼáá háiida yoołkáałdi shí Zion yiniyé yindaalnishgo, Iiʼ Sizį́ Diyinii aayílyé dóó bibee ádziil bee dahólǫ́ǫ doo; dóó adabiyííłką́ąjįʼ yídaníłdzilgo yisdádookah, dóó Diyin God biDibé Yázhí bił hazʼą́ąjįʼ yidááhidookáh; dóó tʼáá háiida hozyéél, aooʼ, ayóó átʼéii iłhózhǫ́ yaa halneʼgo, ayóó dził dabighą́ą́ʼgóó bił dahózhǫ́ǫ doo.

38 Áádóó baa hoolzhiizh nikʼiské baʼáłchíní chʼéékaaígíí néshʼį́, dóó ałdóʼ Diyin God biDibé Yázhí binaaltsoos, Jew dineʼé bizééʼdę́ę́ʼ náás deestsʼid, éí Gentile dineʼé bitsʼą́ą́dóó dah diiltsʼid ńléí nikʼiské baʼáłchíní chʼéékaaígíí bichʼįʼ.

39 Áádóó éí baa yítʼą dóó bikʼijįʼ naaltsoos łaʼ náádeiłtsą́, Dibé Yázhi bibee ádziil éiyá binahjįʼ haníídeeʼ, Gentile dineʼé dóó bí bichʼįʼ, Gentile dineʼé dóó nikʼiské bílástsiiʼ yee déiidoodląął, dóó Jew dineʼé ałdóʼ nahasdzáán bikááʼgóó tʼáá ałtso daʼníłtsʼą́ąjigo adahineeskaad, áko Diyin yá yádaałtiʼii dóó Diyin God biDibé Yázhí hastóí naakitsʼáadah bikʼihodiiniiʼígíí yaa ndáíizohígíí tʼáádaʼaaníí.

40 Áádóó Diyin yá naalʼaʼí shichʼįʼ haadzííʼ, kóníigo: Díidí akéedi ńdaheesdzohgo, Gentile dineʼé bitahgi yiniłtsánígíí, shį́į́ áłtsé tʼááʼaaníngo íídoolííł, Diyin God biDibé Yázhí hastóí naakitsʼáadah bikʼihodiiniiʼígíí éiyá bitsʼą́ą́dóó, tʼáadoo leʼé tʼáá béédahózíníyę́ęʼ dóó daʼílį́ hadayíizhjaaʼígíí ííshjání ádadoolnííł; dóó daakʼé, dabizaají, dóó dineʼé tʼáá ałtso bichʼįʼ ííshją́ní ádadoolnííł, Diyin God biDibé Yázhí Hoolʼáágóó nihiTaaʼ yiYeʼ nilį́, dóó nihokááʼ Yisdáʼiiníiłii nilį́; dóó nihokááʼ dineʼé tsʼídá tʼáá ałtso baahidookáh, éí doodágóó doo yisdááhidookáh da.

41 Áádóó saad tsʼídá yikʼéhgo nihidookah Dibé Yázhí bizaadígíí binahjįʼ ádoolnííł; dóó Dibé Yázhí bizaad nílástsiiʼ ndayizooígíí biyiʼ ííshją́ní ádeidoolííł, Dibé Yázhi hastóí naakitsʼáadah bikʼihodiiniiʼígíí ndayíizohígíí ałdóʼ biyiʼ; ákohgo tʼááłaʼígo bee nidooltsʼił; háálá akǫ́ǫ́ Diyin God tʼáałaʼí, dóó naahasdzáán tʼáá ałtsogóó ínaʼniłkaadii tʼáałaʼí.

42 Áádóó bikʼíidoołkááł tʼáá bí ałtso áłʼąą dineʼé yichʼįʼ ííshją́ą́ ídiʼdoolnííł, tʼáá áłah Jew dineʼé dóó ałdóʼ Gentile dineʼé yichʼįʼ; dóó tʼáá bí Jew dineʼé dóó ałdóʼ Gentile dineʼé yichʼįʼ ííshją́ą́ íʼdiilyaa dóó bikʼijįʼ, áádóó tʼáá bí Gentile dineʼé dóó ałdóʼ Jew dineʼé yichʼįʼ ííshją́ą́ ídiʼdoolnííł, akéédeʼę́ę átsé doolééł, dóó átséhę́ę akéedi doolééł.