1 Háálá áhoodzaa shizhéʼé tʼáadoo leʼé dayiiłtsánéé shił bééhódoozįįł niizį́į́ʼ dóó bikʼijįʼ, dóó Diyin Bóhólníihii shił ééhódoosįįłgo éí yinishdlą́, shijéí biiʼ baa ntsééskeesgo Diyin Bóhólníihii biʼIiʼ Sizį́ Diyinii dashidiiłtį́, aooʼ, dził aghá áhoníłnéézjįʼ, éí tʼah doo yiistsée da ńtʼę́ę́, dóó éí tʼah doo shikeeʼ bee bikááʼ nidinisʼées da ńtʼę́ę́.

2 Áádóó Iiʼ Sizį́ Diyinii áshidííniid: Jó áko, háʼátʼíísh ninízin?

3 Áádóó kodííniid: shizhéʼé tʼáadoo leʼé yiyiłtsánéé yideestsééł nisin.

4 Áádóó Iiʼ Sizį́ Diyinii áshidííniid: Níish nizhéʼé tsin yiyiiłtsánéé dóó yaa yááłtiʼę́ę yinídlą́?

5 Áádóó kodííniid: Aooʼ, shizhéʼé bizaad tʼáá ałtso yinishdlánígíí nił bééhózin.

6 Áádóó díidí saad bee haasdzíiʼgo, Iiʼ Sizį́ Diyiinii biinééʼ yéego yee hádoolghaazh, kóníigo: Diyin Bóhólníihii baa dahohniih, aláahdi Diyin God nilíinii; háálá nahasdzáán tʼáá ałtso biDiyin God nilį́, aooʼ, tʼáá ałtso yilááhdi nilį́. Dóó nikʼihojídlí, Nephi, aláahdi Diyin God nilíinii biYeʼ yinídláanii biniinaa; ákohgo, tʼáadoo leʼé dinéeshʼįįł ninízinéé dadiníiłʼį́į́ł.

7 Áádóó áko shooh díí tʼáadoo leʼé bee ééhózinii dooleeł, áko nizhéʼé tsin bineestʼąʼ yizlįhígíí niniłʼį́į́ʼ dóó bikʼįjįʼ, yáʼąąsh biyiʼdę́ę́ʼ hastiin adá yigálígíí ałdóʼ diniiłįįł, dóó yiiłtsą́ didíínííł; dóó yiiłtsą́ diníniid dóó bikʼijįʼ éí Diyin God biYeʼ nilį́įgo baa ndiʼyíízoh.

8 Áádóó baa hoolzhiizh Iiʼ Sizį́ Diyinii koshidííniid: Níníłʼį́! Dóó nééłʼį́į́ʼ dóó tsin léiʼ neshʼį́; dóó shizhéʼé tsin yinéełʼį́ʼę́ę nahálin; dóó aláahdi ayóó anoolnin, aooʼ, ałtso ayóó ádanoolnínii bitixsgo; dóó bee łigaiígíí yas bił niníyol biláago łigai.

9 Áádóó baa hoolzhiizh tsin yiiłtsą́ dóó bikʼijįʼ, Iiʼ Sizį́ Diyinii kóbidííniid: tsin shił ííshjání íínilaíígíí tʼáá ałtsoní biláahgo daʼilíinii atʼé.

10 Áádóó kóshidííniid: Háʼátʼíísh ninízin?

11 Áádóó kóbidííniid: baa ataʼ haneʼ dooleełígíí bééhózíní doo—Háálá diné yáłtiʼígi átʼáo bichʼįʼ yáshtiʼ; háálá bí éí diné benoolníngo neshʼį́; ákótʼée ndi, éí Diyin Bóhólníihii biʼIiʼ Sizį́ Diyinii átʼį́įgo éí baa ákonisin; dóó diné ahił yáltiʼígi átʼáo shichʼįʼ yááłtiʼ.

12 Áádóó baa hoolzhiizh kóshidííniid: Níníłʼį́! Dóó nééłʼį́į́ʼ yideestsééł biniyé, dóó tʼáadoo yiiłtsą́ą da; háálá shidááhdóó najįh dah diiyá.

13 Áádóó baa hoolzhiizh shí dééʼį́į́ʼ dóó Jerusalem bikintah ayóó átʼéii néshʼį́, dóó łaʼ daakintah ałdóʼ. Dóó Nazareth bikintah néshʼį́; dóó Nazareth bikintah biyiʼgi chʼikę́ę́h tʼah doo diné bee haléehii neshʼį́, dóó tʼáá íiyisíí nizhóní dóó łigai.

14 Áádóó baa hoolzhiizh yáʼąąsh ąą ádzaago yiiłtsą́; dóó Diyin yá naalʼaʼí adááyá dóó shidááhgi yiizį́ʼ dóó kóshidííniid: Nephi, háʼátʼíish niníłʼį́?

15 Áádóó kóbidííniid: chʼikę́ę́h tʼah doo diné bee haléehii, tsʼídá nizhóní dóó ałtso chʼikę́ę́h yiláago yáʼátʼéhígíí.

16 Áádóó kóshidííniid: Diyin Godʼísh aʼoh áʼdiilyaagoóísh nił bee hózin?

17 Áádóó kóbidííniid: baʼáłchíní ayóóʼáyóʼníigo shił bééhózin; ákótʼée ndi, tʼáadoo leʼé tʼáá ałtsoní doo baaʼ ákonisin da.

18 Áádóó kóshidííniid: Áko shooh, chʼikę́ę́h tʼah doo diné bee haléeh niníłʼínígíí éí Diyin God biYeʼ bimá átʼį́, atsʼíískʼehjí.

19 Áádóó baa hoolzhiizh neełʼį́ʼę́ę́ éí Iiʼ Sizį́ Diyinii dah bidiiłtį́; dóó Iiʼ Sizį́ Diyinii dah bidiiłtį́į dóó haashíínizah nihoolzhiizhgo Diyin yá naalʼaʼí shichʼįʼ haadzííʼ, kóníigo: Níníłʼį́!

20 Áádóó dééʼį́į́ʼ dóó chʼikę́ę́h tʼah doo diné bee haléehii, awééʼ dah yoołtéełgo neshʼį́.

21 Áádóó Diyin yá naalʼaʼí kóshidííniid: Áko shooh Diyin God biDibé Yázhí, aooʼ, índa Hoolʼáágóó nihiTaaʼ biYeʼ nilį́! Nizhéʼé tsin yiyiiłtsą́ągo ááh yiłnínígíísh nił bééhózin?

22 Áádóó kóbidishní: Aooʼ, éí Diyin God beʼayóóʼóʼóʼní átʼé, nihokááʼ dineʼé baʼáłchíní bijéí biyiʼdi ąąh kwéénííł; ákohgo, tsʼídá tʼáadoo leʼé tʼáá ałtso biláahgo nizin.

23 Áádóó shichʼįʼ yááłtiʼ, kóníigo: Aooʼ, dóó hwiiʼ sizíinii tsʼídá yaa bił hózhǫ́.

24 Áádóó díidí saad yee haadzííʼ dóó bikʼijįʼ, kóshidííniid: Níníłʼį́ʼ! Dóó dééʼį́į́ʼ, dóó Diyin God biYeʼ nihokááʼ dineʼé baʼáłchíní yitah naanáádáałgo neshʼį́; dóó tʼóó ahayóí bikétsį́į́jįʼ nitsidadinígoʼ dóó yá dahódisin.

25 Áádóó baa hoolzhiizh béésh bąąh níʼáago yiiłtsą́, shizhéʼé yiyiiłtsánéé, Diyin God bizaad átʼéé lá, tó hináago haalínééʼ bíighah niʼá, doodago tsin bee iináanii bichʼįʼ; tóhígíí Diyin God beʼáyóóʼóʼóʼní yaa halneʼ; tsin bee iináanii ałdóʼ éí Diyin God beʼáyóóʼóʼóʼní átʼéego neshʼį́.

26 Áádóó Diyin yá naalʼaʼí anááshidooʼniid: Díníʼį́į́ʼ áádóó áko shooh Diyin God aʼoh áʼdiilyaago néshʼį́!

27 Áádóó dééʼį́į́ʼ dóó nahasdzáán yáNináʼnídláii néshʼį́, éí shizhéʼé yaa yááłtiʼ; dóó Diyin yá yałtiʼii łaʼ yilą́ąjįʼ bihonítʼiʼ hashtʼeh yidoolígíí ałdóʼ néshʼį́. Dóó Diyin God biDibé Yázhí akǫ́ǫ́ niyá dóó tó yee bíísį́į́ʼ; dóó tó yee bíísį́į́ʼ dóó bikʼijįʼ, yáʼąąsh ąą ádzaago néshʼį́; Iiʼ Sizį́ Diyinii yáʼąąshdę́ę́ʼ adááyá dóó hasbídi nahalingo bikʼih hooleʼ.

28 Áádóó niyáago dineʼé diyinkʼehgo ákáʼanálwoʼgo, ádziil dóó ayóó átʼéí bitsʼádiʼnílíídgo yiiłtsą́; dóó dabididootsʼį́į́łígíí áłhihíikai; dóó bitahdóó chʼíneelchą́ʼii éí néshʼį́.

29 Áádóó naakitsʼáadah bikééʼ yikahíhígíí ałdóʼ néshʼį́. Áádóó baa hoolzhiizh éí Iiʼ Sizį́ Diyinii shidááhdóó dah yidíyiijaaʼ, dóó tʼáadoo deiłtsą́ą da.

30 Áádóó baa hoolzhiizh Diyin yá naalʼaʼí shichįʼ hanáánaadzííʼ, kóníigo: Níníłʼį́ʼ! Dóó dééʼį́į́ʼ, dóó yáʼąąsh ąą ánáánádzaago néshʼį́, dóó Diyin bá ndaalʼaʼí nihokááʼ dineʼé baʼáłchíní yikʼi dah hóoleʼ; dóó yiká aheezhjééʼ.

31 Áádóó shichʼįʼ hanáánáádzííʼ, kóníigo: Níníłʼį́! Áádóó nééłʼį́į́ʼ, dóó Diyin God biDibé Yázhí nihokááʼ dineʼé baʼáłchíní yitahgóó yigááł. Dóó dineʼé dah naazhjaaʼgóó bitah dahóneezgai, dóó ndáałnii áłąą ádaatʼáo atídaboolííł, bidaʼiiníziinii yił dóó iiʼnaazį́ bidaʼiinízíinii; dóó Diyin yá naalʼaʼí yááłtiʼ dóó díidí ałtso shił ííshjání áyiilaa. Dóó Diyin God biDibé Yázhí bibee ádziil ndabííłzííʼ; dóó biʼiiníziinii dóó iiʼnaazį́ bedaʼiinízįįdii háineeskaad.

32 Áádóó baa hoolzhiizh Diyin yá naalʼaʼí shichʼįʼ hanáánaadzííʼ, kóníigo: Níníłʼį́ʼ! Dóó dééʼį́į́ʼ dóó Diyin God biDibé Yázhí néshʼį́, diné dah dabidiiłtį́; aooʼ, Diyin God ahoolʼáágóó biYeʼ nilíinii nihokááʼ dineʼé bá nidahwiizʼą́; dóó yiiłtsą́ dóó baa naʼiisóóh.

33 Áádóó shí, Nephi, tsin ałnáozʼá bikʼijįʼ bił oʼoolkaalgo yiiłtsą́ dóó nihokááʼ dineʼé bibąąhági ádaatʼéii biniyé biʼdíísxį́į.

34 Áádóó biʼdíísxį́į dóó bikʼijįʼ nihokááʼ diné dah naazhjaaʼgo yiiłtsą́, éí Diyin biDibé Yázhí hastóí bikʼihodiiniiʼígíí yił daʼáhidoogą́ą́łgo ałhidahiikai; ákótʼéego Diyin Bóhólníihii bá ndaalʼaʼí naakitsʼáadah yee yiyíízhiʼ.

35 Áádóó nihokááʼ dineʼé tʼóó ahayóí ahíikaigo áłah silį́į́ʼ; dóó kin ntsaago biiʼ hazʼą́ą léiʼ yiiʼ ahííkai, shizhéʼé kin yiyiiłtsánée nahálingo. Dóó Diyin Bóhólníihii bá naalʼaʼí shichʼįʼ hanáánáádzííʼ, kóníigo: nihokááʼ dineʼé dóó yídahoołʼą́ʼígíí niníłʼį́; aooʼ, Israel bighandóó ałhaniheeskaigo Diyin biDibé Yázhí hastóí naakitsʼáadah bikʼihodiiniiʼígíí yikʼijįʼ ńdadiibaaʼígíí baa ntséníkeesgo niníłʼį́.

36 Áádóó baa hoolzhiizh éí yiiłtsą́ dóó baa naʼíisóóh, kin ntsaago biiʼ hazʼą́ éí nahasdzáánjí biʼádaa hodzódlí átʼé, dóó ahiihnáázhoozh, dóó tʼáá íiyisíí ayóó átʼao ahiihnáázhoozh. Dóó Diyin Bóhólníihii bá naalʼaʼí shichʼįʼ hanáánáádzííʼ, kóníigo: Ákótʼéego shį́į́ ałʼąą dadineʼé, kʼé deiłníinii, dabizaadjí, dóó dineʼé, Diyin God biDibé Yázhí hastóí naakitsʼáadah bikʼihodiiniiʼígíí shį́į́ yikʼijįʼ ńdaabáahgo ałtso ábidiʼdooldįįł.