« ការត្រៀមខ្លួនជាស្រេចរបស់ខ្ញុំសម្រាប់អាជីវកម្មដ៏ជោគជ័យ ៖ រៀន » ការចាប់ផ្ដើម និងការពង្រីកអាជីវកម្មរបស់ខ្ញុំសម្រាប់ភាពខ្លួនទីពឹងខ្លួន ( ឆ្នាំ ២០១៧ )
« ការត្រៀមខ្លួនជាស្រេចរបស់ខ្ញុំសម្រាប់អាជីវកម្មដ៏ជោគជ័យ ៖ រៀន »
រៀន
ម៉ោងជាអតិបរមា ៖ ៥៥ នាទី
១. ការអនុវត្តលើគោលការណ៍ត្រឹមត្រូវ
អាន ៖
គោលការណ៍ជាច្រើនរួមចំណែកធ្វើឲ្យអាជីវកម្មមានជោគជ័យ ។ គោលការណ៍មួយចំនួនទាំងនេះមានរៀបរាប់ដូចតទៅនេះ ៖
-
ទស្សនវិស័យ ៖ « គ្រាណាដែលឥតមានការបើកសម្តែង នោះបណ្តាជនរមែងលែងទប់ចិត្ត » ( សុភាសិត ២៩:១៨ ) ។
-
ការងារ ៖ត្រូវឧស្សាហ៍ចូលរួមក្នុងប្រយោជន៍ល្អ … ដ្បិតអំណាចគឺមាននៅក្នុងខ្លួនគេ ម្ល៉ោះហើយ ពួកគេជាភ្នាក់ងារចំពោះខ្លួនគេផ្ទាល់ » ( គ.&និង ស. ៥៨:២៧–២៨ ) ។
-
ការបំផុសគំនិត ៖ « ចូរអំពាវនាវដល់ [ ព្រះ ] សម្រាប់ដំណាំនៅក្នុងចម្ការរបស់អ្នក ដើម្បីឲ្យអ្នករាល់គ្នាអាចបានចម្រើនឡើងដោយសារនោះ ។ ចូរអំពាវនាវសម្រាប់ហ្វូងចៀម នៅឯវាលស្រែរបស់អ្នក ដើម្បីឲ្យវាអាចកើនឡើង » ( អាលម៉ា ៣៤:២៤–២៥ ) ។
-
ព្យាយាមតស៊ូ ៖ « យើងនឹងមិនចុះទៅរកឪពុកយើងនៅក្នុងទីរហោស្ថានឡើយ … ទាល់តែយើងបានសម្រេចនូវកិច្ចការ » ( នីហ្វៃទី ១ ៣:១៥ ) ។
-
ការទទួលខុសត្រូវ ៖ « ប្រពៃហើយ បាវល្អស្មោះត្រង់អើយ ឯងមានចិត្តស្មោះនឹងត្រួតរបស់បន្តិចនេះ ដូច្នេះ អញនឹងតាំងឲ្យឯងត្រួតលើរបស់ជាច្រើនទៅទៀត ចូរឲ្យឯងប្រកបដោយសេចក្តីអំណររបស់ចៅហ្វាយឯងចុះ » ( ម៉ាថាយ ២៥:២១ សូមមើលខទី ១៤–៣០ ) ។
-
ការគិតថាមានអ្វីៗជាច្រើន ៖ ផែនដីបានពោរពេញ ហើយមានបរិបូរគ្រប់គ្រាន់ និងនៅសល់ទៀតផង » ( គ.&និង ស. ១០៤:១៧ ) ។
-
ការគ្រប់គ្រងពេលវេលា ៖ « ពេលវេលារបស់អ្នកមានតម្លៃ » ( ថូម៉ាស អេស ម៉នសុន « Guideposts for Life’s Journey » [ ការប្រជុំធម្មនិដ្ឋានសាកលវិទ្យាល័យ ព្រិកហាំ យ៉ង់ ថ្ងៃទី ១៣ ខែ វិច្ឆិកា ឆ្នាំ ២០០៧ ] ទំព័រ ១ គេហទំព័រ speeches.byu.edu ) ។
-
អំណាចនៃកិច្ចការតូចតាច និងងាយ ៖ « ដោយកិច្ចការតូចតាច និងងាយ ទើបនាំឲ្យកើតកិច្ចការដ៏ធំៗបាន » ( អាលម៉ា ៣៧:៦ ) ។
-
ការតាំងចិត្ត ៖ « ក្នុងពួកអ្នករាល់គ្នា … តើមិនអង្គុយលៃលកមើលជាមុនទេឬអី ដើម្បីឲ្យដឹងជាមានល្មមនឹងធ្វើបង្ហើយបានឬមិនបាន ? » ( លូកា ១៤:២៨ សូមមើលផងដែរខទី ២៩–៣០ ) ។
ពិភាក្សា ៖
តើគោលការណ៍ណាមួយដែលអ្នកចាប់អារម្មណ៍ ដែលអ្នកអាចអនុវត្តបាន នៅពេលអ្នកចាប់ផ្តើម ឬពង្រីកអាជីវកម្មរបស់អ្នក ?
២. ហេតុអ្វីខ្ញុំចង់ចាប់ផ្ដើម ឬពង្រីកអាជីវកម្ម ?
អាន ៖
មានហេតុផលសមរម្យជាច្រើនអំពីមូលហេតុដែលអ្នកអាចចាប់ផ្តើម ឬពង្រីកអាជីវកម្មរបស់អ្នក ៖
-
ភាពជាម្ចាស់
-
ចំណូលបន្ថែម
-
ចំណង់ចំណូលចិត្តផ្ទាល់ខ្លួន
-
មុខរបរទីពីរ
-
ឧបសគ្គនៃបទពិសោធន៍
-
ភាពចាំបាច់ ( មានជម្រើសការងារតិចតួច ឬគ្មានសោះ )
-
សេរីភាព និងការគ្រប់គ្រងផ្ទាល់ខ្លួន
-
សុវត្ថិភាពហិរញ្ញវត្ថុដ៏ប្រសើរ
មានវិធីជាច្រើនដែលអ្នកអាចអនុវត្តជាមួយអាជីវកម្មរបស់អ្នក ។ ឧទាហរណ៍ខាងក្រោមនេះបង្ហាញអំពីរបៀបដែលមនុស្សមួយចំនួនបានធ្វើ ។
អាន ៖
យើងមានពរជាមួយនឹងធនធាននានាដូចជា ពេលវេលា ថាមពល និងប្រាក់ ។ យើងសម្រេចចិត្តរៀងរាល់ថ្ងៃអំពីរបៀបដែលយើងនឹងចែករំលែកធនធានទាំងនេះទៅដល់គ្រួសារ ការងារ ការបម្រើ និងចំណាប់អារម្មណ៍ផ្សេងទៀត ។
ការមានអាជីវកម្មបង្កើតឲ្យមានផលប្រយោជន៍ ប៉ុន្តែជារឿយៗប្រយោជន៍ទាំងនេះកើតឡើងជាមួយចំណាយថ្លៃដើម ។ យើងម្នាក់ៗគួរតែស្វែងរកការបំផុសគំនិត និងប្រើសេរីភាពជ្រើសរើសរបស់យើងដើម្បីកំណត់អំពីរបៀបដែលយើងប្រើប្រាស់ធនធានរបស់យើងសម្រាប់គ្រួសារ និងជីវិតរបស់យើង ។
៣. ការវាយតម្លៃអំពីភាពត្រៀមខ្លួនជាស្រេចរបស់ខ្ញុំសម្រាប់ភាពជាម្ចាស់លើអាជីវកម្ម
៤. ជំនាញអាជីវកម្មដែលខ្ញុំនឹងអភិវឌ្ឍនៅក្នុងវគ្គសិក្សានេះ
អាន ៖
គោលបំណងមួយនៃវគ្គសិក្សានេះ គឺដើម្បីជួយអ្នកឲ្យអភិវឌ្ឍទម្លាប់នានានៃម្ចាស់អាជីវកម្មដែលមានជោគជ័យ ។ ម្ចាស់អាជីវកម្មដែលជោគជ័យគឺជាអ្នកសង្កេត ចង់ដឹងចង់ឃើញ មានចិត្តអន្ទះសាចង់រៀនពីយោបល់ថ្មីៗរៀងរាល់ថ្ងៃ ។ ពួកគេទទួលស្គាល់ថា ឱកាសអាជីវកម្មរបស់ពួកគេគឺជាការងារមួយដែលកំពុងដំណើរការ ។ ពួកគេយល់ថា ពួកគេនឹងត្រូវកែតម្រូវអាជីវកម្មរបស់ខ្លួនជាច្រើនទៀត គឺដើម្បីឲ្យមានការចាប់ផ្តើមដ៏ជោគជ័យមួយ ។
ដើម្បីក្លាយជាម្ចាស់អាជីវកម្មប្រភេទនេះ អ្នកនឹងត្រូវអនុវត្តសេចក្តីជំនឿ ហើយធ្វើអ្វីៗលើសពីអ្វីដែលអ្នកធ្លាប់ធ្វើ ។ អ្នកត្រូវតែចេញពីផ្ទះ ឬការិយាល័យរបស់អ្នក ហើយជារឿយៗត្រូវនិយាយជាមួយអ្នកដែលអាចក្លាយជាអតិថិជនអំពីតម្រូវការ និងចំណង់ចំណូលចិត្តរបស់ពួកគេ ។ អ្នកត្រូវស្វែងរកព័ត៌មាន និងមតិកែលម្អថ្មីៗដែលនឹងជួយអ្នកឲ្យកែលម្អអាជីវកម្មរបស់អ្នក ។ ម្ចាស់អាជីវកម្មដែលគ្មានឆន្ទៈទាក់ទងជាមួយអតិថិជនរបស់ខ្លួន គ្មានឆន្ទៈបន្តរៀន និងគ្មានឆន្ទៈធ្វើការផ្លាស់ប្តូរក្នុងអាជីវកម្មរបស់ពួកគេនឹងឃើញថា មានការពិបាកដើម្បីទទួលជោគជ័យនៅក្នុងរយៈពេលយូរ ។
នៅពេលយើងធ្វើការដើម្បីចាប់ផ្តើម ឬពង្រីកអាជីវកម្មរបស់យើង នោះយើងនឹងលើកទឹកចិត្តគ្នាទៅវិញទៅមកឲ្យចេះគិត និងអនុវត្តដូចម្ចាស់អាជីវកម្មដែលមានជោគជ័យ ។ ការតាំងចិត្តជាច្រើនរៀងរាល់សប្តាហ៍ដែលយើងនឹងបំពេញ នៅក្រៅការប្រជុំរបស់យើងនឹងជួយយើងឲ្យអភិវឌ្ឍទម្លាប់ដែលយើងត្រូវការដើម្បីទទួលបានជោគជ័យ ។
រៀងរាល់សប្តាហ៍យើងនឹងអនុវត្តដូចតទៅនេះ ៖
-
សង្កេត និងនិយាយជាមួយអតិថិជន ៖ ប្រមូលគំនិត យល់ពីតម្រូវការរបស់អតិថិជន សាកល្បង និងកែតម្រូវគំនិតអាជីវកម្មរបស់យើង និងប្រមូលមតិកែលម្អ ។
-
កត់ត្រាគំនិតរបស់អ្នក ៖ កត់ចំណាំការសង្កេត គំនិតនានាមកពីអ្នកដទៃ និងការបំផុសគំនិតមកពីព្រះវិញ្ញាណបរិសុទ្ធ ។
-
លក់ ៖ រៀនស្តាប់ពីតម្រូវការរបស់អ្នកដទៃ និងស្វែងរកដំណោះស្រាយសមរម្យ ។
-
កត់ត្រាព័ត៌មានលម្អិតផ្នែកហិរញ្ញវត្ថុនៃអាជីវកម្មរបស់យើង ៖ តាមដានកត្តាគន្លឹះជោគជ័យនៃអាជីវកម្មរបស់យើង និងគម្រោងនាពេលអនាគត ។
សប្តាហ៍នេះអ្នកនឹងត្រូវបានអញ្ជើញឲ្យអនុវត្តជំនាញទាំងនេះ ហើយរាយការណ៍ទៅកាន់ក្រុម ។ អ្នកក៏នឹងចាប់ផ្តើមនិយាយជាមួយអ្នកដែលអាចក្លាយជាអតិថិជនផងដែរ ។ អ្នកនឹងរាយការណ៍លទ្ធផលរបស់អ្នកនៅសប្តាហ៍ក្រោយ ។
៥. អ្វីដែលយើងនឹងរៀន ហើយធ្វើជាក្រុម
អាន ៖
យើងនឹងធ្វើការរួមគ្នា ដើម្បីជួយគ្នាទៅវិញទៅមកឲ្យចាប់ផ្ដើម និងពង្រីកអាជីវកម្មរបស់យើង ។ គោលដៅដ៏ធំរបស់យើងគឺប្រែជាមានភាពខ្លួនទីពឹងខ្លួន ។ នៅពេលយើងអាចមើលថែខ្លួនយើង នោះយើងអាចជួយអ្នកដទៃបានល្អប្រសើរជាង ។
អំឡុងពេល ១២ សប្តាហ៍បន្ទាប់ យើងនឹងរៀនជំពូកដូចតទៅនេះជាមួយគ្នា ៖
-
ជំពូក ១—ការត្រៀមខ្លួនជាស្រេចរបស់ខ្ញុំសម្រាប់អាជីវកម្មដ៏ជោគជ័យ
-
ជំពូក ២—ការដោះស្រាយតម្រូវការរបស់អតិថិជនដែលពុំទាន់បានដោះស្រាយ
-
ជំពូក ៣—ការធ្វើឲ្យប្រាកដថា ខ្ញុំមានអាជីវកម្មមួយដែលមានប្រាក់ចំណេញ
-
ជំពូក ៤—ការស្វែងរកអតិថិជន
-
ជំពូក ៥—ការរក្សាអតិថិជន
-
ជំពូក ៧—ការទុកប្រាក់អាជីវកម្ម និងប្រាក់ផ្ទាល់ខ្លួនរបស់ខ្ញុំឲ្យនៅដាច់ដោយឡែកពីគ្នា
-
ជំពូក ៩—ការពង្រីកអាជីវកម្មរបស់ខ្ញុំ
-
ជំពូក ១១—ការបន្តកែលម្អអាជីវកម្មរបស់ខ្ញុំ
-
ជំពូក ១២—ការបង្ហាញអំពីអាជីវកម្មរបស់ខ្ញុំ
៦. ការរៀបចំផែនការអាជីវកម្មរបស់ខ្ញុំ—សៀវភៅផែនការអាជីវកម្មផ្ទាល់ខ្លួន
អាន ៖
មនុស្សមួយចំនួនគិតខុស ដោយសារព្យាយាមបង្កើតអាជីវកម្មរបស់ពួកគេជុំវិញការសន្មតរបស់ខ្លួន ឬ « ទុកចិត្តខ្លួនឯង » ថា គំនិតរបស់ពួកគេនឹងដំណើរការ ។ ជាទូទៅអាជីវកម្មទាំងនេះពុំទទួលបានជោគជ័យឡើយ ។ វគ្គសិក្សានេះនឹងលើកទឹកចិត្តអ្នកឲ្យសង្កេត និងទាក់ទងអតិថិជនរៀងរាល់សប្តាហ៍ ហើយកែតម្រូវគំនិតរបស់អ្នកស្របទៅតាមអ្វីដែលអ្នករៀន ។ យើងនឹងរៀនដើម្បី « រៀបចំ …អ្វីៗដែលត្រូវការគ្រប់មុខ » ហើយបន្តកែលម្អអាជីវកម្មរបស់យើង និងកត្តាផ្សេងៗទៀតនៃជីវិតរបស់អ្នក ( គ.&និង ស. ៨៨:១១៩ ) ។
នៅក្នុងក្រុមនេះ អ្នកនឹងប្រើប្រាស់សៀវភៅផែនការអាជីវកម្មផ្ទាល់ខ្លួន ដើម្បីបង្កើតផែនការសម្រាប់អាជីវកម្មរបស់អ្នកដោយសន្សឹមៗ ។ សៀវភៅផែនការនឹងជួយអ្នកឲ្យរៀបចំព័ត៌មានលម្អិត និងវាយតម្លៃអំពីការសម្រេចបាននូវឱកាសអាជីវកម្មរបស់អ្នក ។ សៀវភៅផែនការរបស់យើងក៏នឹងមានប្រយោជន៍ ពេលអ្នកបង្ហាញអាជីវកម្មរបស់អ្នកដល់ក្រុមនៅក្នុងសប្តាហ៍ទី ១២ ។ បន្ទាប់ពីអ្នកបានបញ្ចប់វគ្គសិក្សា នោះវានឹងជួយអ្នកឲ្យបន្តផែនការរបស់អ្នកដើម្បីពង្រីកអាជីវកម្មរបស់អ្នកទៀត ។
ព័ត៌មានផែនការលម្អិតនៃអាជីវកម្មរបស់អ្នក គួរតែសាកល្បងនាពេលដំបូង ដោយសារវានឹងផ្លាស់ប្តូរនៅពេលអ្នករៀនបន្ថែមទៀត តាមរយៈការនិយាយជាមួយអតិថិជន អ្នកផ្គត់ផ្គង់ និងម្ចាស់អាជីវកម្មដទៃទៀត ។ សូមប្រើខ្មៅដៃមួយនៅពេលអ្នកសរសេរលើ សៀវភៅផែនការអាជីវកម្មផ្ទាល់ខ្លួន ដោយសារអ្នកអាចនឹងធ្វើបច្ចុប្បន្នភាព ពេលអ្នកកែតម្រូវអាជីវកម្មរបស់អ្នក ។ សូមបើកទៅឧបសម្ព័ន្ធដើម្បីមើល សៀវភៅផែនការអាជីវកម្មផ្ទាល់ខ្លួន ដែលអ្នកនឹងប្រើ ។
៧. អនុវត្តប្រចាំថ្ងៃ និងរក្សាការតាំងចិត្ត
មើល ៖
« Keeping Commitments Leads to Growth » មាននៅគេហទំព័រ srs.lds.org/videos ។ ( គ្មានវីដេអូឬ ? សូមអានអត្ថបទវីដេអូនៅចុងវគ្គនេះ ) ។
ពិភាក្សា ៖
តើយើងអាចជួយគ្នាទៅវិញទៅមកដើម្បីអនុវត្តជំនាញ និងរក្សាការតាំងចិត្តដទៃទៀតដូចម្តេច ?
ប្រអប់អាជីវកម្មជោគជ័យ
នៅក្នុងឧបសម្ព័ន្ធគឺជាប្រអប់អាជីវកម្មជោគជ័យ ។ ប្រអប់នេះសង្ខេបនូវគោលការណ៍គន្លឹះមួយចំនួន ដែលយើងរៀននៅក្នុងវគ្គសិក្សា ហើយអាចប្រើទុកជាឯកសារយោង ។
វិញ្ញាបនបត្របញ្ចប់វគ្គសិក្សា
អាន ៖
សមាជិកក្រុមដែលចូលរួមការប្រជុំ ហើយរក្សាការតាំងចិត្តរបស់ពួកគេ អាចទទួលបានវិញ្ញាបនបត្រភាពខ្លួនទីពឹងខ្លួនមកពីមហាវិទ្យាល័យពាណិជ្ជកម្ម អិល.ឌី.អេស ។ សូមមើល ជំពូក ១២ ។