“Abraram ak Sara,” Istwa Ansyen Testaman yo (2021)
“Abraram ak Sara,” Istwa Ansyen Testaman yo
Jenèz 11–15; 17; Abraram 1–2
Abraram ak Sara
Yon pwomès pou beni fanmi imen an
Abraram t ap viv nan vil Ur. Gran prèt mechan yo nan kote sa a te vle sakrifye li bay idòl yo. Abraram te priye, epi Senyè a te sove l.
Apresa Senyè a te kòmande Abraram ak mandanm ni, Sara pou yo te kite Ur epi vwayaje al nan yon peyi byen lwen. Li te pwomèt pou yo ke L t ap beni yo pandan vwayaj la.
Abraram ak Sara te gen konfyans nan Senyè a epi yo te kite Ur. Men, yo te santi yo tris paske yo pa t kapab fè pitit. Senyè a te rekonfòte yo. Li te pwomèt ke yo t ap gen yon pitit.
Jenèz 11:30–31; 15:1–6; 17:2–16; Abraram 2:6–9
Abraram te priye Senyè a pou l te aprann plis konsènan Li. Senyè a te vizite Abraram epi li te rele tèt Li Jewova. Jewova te fè yon alyans avèk Abraram. Li te pwomèt ke Abraram t ap gen prètriz la. Li te pwomèt tou ke atravè fanmi Abraram, tout fanmi sou tè a t ap beni.
Pandan Abraram ak Sara t ap vwayaje a, yo te oblije chèche jwenn manje. Yo te eseye viv nan yon peyi ki te rele Kanaan. Pa t gen manje nan kote sa a, konsa, yo te oblije ale an Ejip. Men, viv an Ejip te danjere pou yo.
Jenèz 12:10–20; Abraram 2:21–25
Abraram ak Sara te kite Ejip epi yo te retounen al viv nan Kanaan. Yo te pote manje ak bèt soti an Ejip avèk yo. Kanaan te fè pati tè Senyè a te pwomèt yo a.
Jenèz 13:1–4, 12; Abraram 2:19
Senyè a te kenbe pwomès Li ke Abraram t ap resevwa prètriz la tou. Yon jou Abraram ak Sara te rankontre yon wa jis ki te rele Mèlkisedèk. Abraram te peye l ladim.
Abraram te resevwa prètriz la nan men Mèlkisedèk. Sete menm prètriz pwofèt Adan ak Nowe te resevwa a.
Tradiksyon Joseph Smith, Jenèz 14:36–40; Abraram 1:2–4; Doktrin ak Alyans 84:14
Abraram ak Sara te kontan nan Kanaan, men yo te gen pwoblèm paske yo pa t gen yon pitit. Yo te oblije kwè nan pwomès Senyè a ke yon jou fanmi yo t ap grandi epi beni tout tè a.