“Chon Pwarata Nengeni ewe Puken Mormon,” Doctrine and Covenants Tutunap (2024)
“Chon Pwarata Nengeni ekkewe Seleichen ewe Puken Mormon,” Doctrine and Covenants Tutunap
March–September 1829
Chon Pwarata Nengeni ekkewe Seleichen ewe Puken Mormon
Awora kapasen pwarata ngeni ei fonufan
Joseph, Emma, me Oliver ra sopweno ne chiakuni ekkewe seleich kon me non imwen ewe faminien Smith me non Pennsylvania. Nge aramas me non nenier we ra mochen akourono. Mi wor emon chienen Oliver itan David Whitmer a nom non New York. Oliver a tingorei David ika ir mi tongeni repwe etino nonom ren ewe faminien Whitmer me awesano ewe chiaku.
Souneng, 1:68
David me an famini mi tipeeu ngeni. Ra etiwanong Joseph, Emma, me Oliver non imwer we. Iei ra tongeni angang won ewe chiaku non kinamwe. Mi wor chommong aramas ra nonom non imwen Whitmer ewe. Wewen pwe mi chommong angang repwe fori, akaewin faniten inen David ewe, Mary.
Souneng, 1:68–70
Eu ran, nupwen Mary a angang, ewe chon nang Moronai a pwa ngeni. A apasa pwe mi sinei mettoch meinisin ekkewe waten angang mine a fori an epwe monunu. A mochen epwe apochokuna an nuku. A suki eu chota me a wau ekkewe seleich kon. A suki ngeni ewe peich me pwari ngeni Mary ekkewe mak. A pwon ngeni Mary pwe epwe fokkun feioch.
Souneng, 1:70–71
Ekkoch aramas rese nuku pwe ekkewe seleich it mi wesewesen ennet. Joseph a anneasosichi an ewe Samon annuku ngeni pwe esap pwari ekkewe seleich ngeni emon. Ewe Samon a apasa pwe Epwe mutata pwan unumon chon pwarata repwe kuna ekkewe seleich. David Whitmer, Martin Harris, me Oliver Cowdery ra tingor ika repwe tongeni chon pwarata. Ewe Samon a apasa pwe ir mi tongeni.
Doctrine and Covenants 5:11–12; 17; Souneng, 1:73
Joseph, Martin, Oliver, me David ra feino nein ewe ira. Ra fotopukutiw me ekesiwin ne tingor ngeni Kot ika repwe tongeni kuna ekkewe seleich, nge esap wor met epwe fis.
Souneng, 1:73
Martin a mefi pwe i popun ewe ar iotek ese ponu. Martin a tou, me ekkewe ekkoch ra chok sopweno ne iotek.
Souneng, 1:73
Iwe ewe chon nang a pwa non eu saramaramen saram. A pwari ngeni Oliver me David ekkewe seleich kon me ekkewe mak won. Ra rongorong mongungun Kot a apasa pwe Joseph a chiakuni ekkewe seleich seni ewe manamanen Kot me ewe chiakun mi pung. Kot apwan apasa pwe repwe ureni meinisin met ra kuna me rong.
“Ewe pwarata seni Ekkewe Unumon Chon Pwarata“, Souneng, 1:73–74
Joseph a feino kuta Martin. I mi chok chiwen iotek. Joseph a fiti ne iotek. Iwe ewe chon nang a pwato me pwari ekkewe seleich ngeni Martin usun chok a fis ngeni Oliver me David.
Souneng, 1:74
Mwirin, Joseph a feino kuta inan ewe me saman, ekkewe ra churi Mary Whitmer. A erenir ukukun an pwapwa an ekkoch ra kuna ekkewe seleich. Iei ekkewe chon pwarata ra tongeni ereni aramas pwe Joseph a aporousa met mi ennet. Martin a ureni menisin ukukun an pwapwa an Kot mut ngeni i an epwe emon chon pwarata.
Souneng, 1:74–75
Fitu ran mwirin, ewe Samon a ureni Joseph epwe pwari ekkewe seleich kon ngeni pwan wanumon aramas—saman we, ruemon pwin kewe, fomon pwin David kewe me osen David ewe. Repwe komoch ekkewe seleich me suki ekkewe peich. Ra sinei pwe ekkewe seleich ir mi wesewesen pukupukun.
“Pwarata seni Ekkewe Wanimon Chon Pwarata“; SounengJ, 1:75
Ewe chiakun ewe Puken Mormon a wes iei. Joseph a ngeni sefani ewe chon nang Moronai ekkewe seleich. Iei fansoun epwene kawor kapin ewe puk pwe meinisin repwe tongeni anea me kaeo usun Jises Kraist.
Souneng, 1:75–76
A fokkun momong kaworen kapin ewe Puken Mormon. Martin Harris a fangeta esop kinikinin an we atake an epwe mon ngeni. A fori ei pokiten a sinei pwe ewe Puken Mormon mi ennet. Iteiten kapin ewe puk a wor an Martin pwarata me ekkewe ekkoch chon pwarata fan iten meinisin mi anneani. Ekkewe chon pwarata rese tongeni amam ar kapasen pwarata.
Doctrine and Covenants 19:26–27, 34–35; Souneng, 1:76–78