March–June 1844

Joseph me Hyrum Ra Fangeno Manauer ngeni ewe Kapas Allim

Ewe Soufos a mano, nge ewe angangen ewe Samon mi soposopono

Joseph Smith a noninen. Met epwe fis ngeni ewe Mwichefen ika a mano? A mochen epwe tumunochu an ewe Samon angang epwe soposopono. Iwe a ionfengeni ekkewe Aposel me ngenir ekkewe pristut kii Jises Kraist a fen ngeni i. Wewen pwe ekkewe Aposel ra tongeni emweni an ewe Samon we Mwichefen me fori An angang. Ei a anisi Joseph epwe mefi kinamwe.

Souneng, 1:519–20

Nge mi chommong aramas ra song ren Joseph. Pwan mwo ekkoch ra mochen nieno i. Rese sani met a afanafana. Ra makei porousan non echo simpung ar repwe fori an ekkoch aramas repwe pwan song ren. Ekkoch me neir ra mochen efeiengawa Nauvoo.

Souneng, 1:526–28, 530–32, 533–34

Joseph me ekkoch souemwen non Nauvoo ra atai ewe mwesinen for puk ar repwe akounoi ewe koput a cheewno. Ei a fori an ekkewe aramas rafen wesen song. Ewe kepina a ereni Joseph pwe epwe no ngeni ewe sopwun Carthage pwe emon sou kapwung epwe tongeni finata ika i a atai ewe annuk. Joseph mi sinei pwe ika epwe no Carthage, aramas repwe nieno i.

Doctrine and Covenants 135:4; Souneng, 1:533–37, 539–41

Nge Joseph a pwan mochen ekkewe Souneng repwe tumun. Ika a no ngeni Carthage, meni aramas repwe nikitano ekkewe Souneng non Nauvoo. Joseph a finata epwe no. A efeiochu Emma me noun kewe semirit, kisir an epwene feino, me a no ngeni Carthage.

Souneng, 1:542–44

Pwin Joseph we Hyrum a fiti i. Pwan John Taylor, Willard Richards, me ekkoch chiener. Nupwen ra no, Joseph a akounoi wan we oris me nenesefaniti Nauvoo. “Iei ewe ningochun neni me murinon aramas fan nang,” a apasa.

Souneng, 1:543–45

Nupwen ra tori Carthage, ra tonong non imwen kanapus. Nupwen ra nom non kanapus, Hyrum a annea ngenir seni ewe Puken Mormon. Joseph a ereni ekkewe chon mas pwe ewe Puken Mormon mi ennet.

Souneng, 1:546

Epwe ekinamwei chiechian kewe, John Taylor a konu echo kon mi fel usun Jises. A men ngioch, me Hyrum a tingorei epwe konu sefan.

Souneng, 1:549

Mwirinon non ena ran, mwan mi song fiti nour pistor ra mwitirinong non ewe imwen kanapus. Ra pussenong ewe asam me poputa ne pekinong non ewe rum ikewe Joseph me chienan kewe ra nom non. John Taylor a fokkun feiengaw. Hyrum me Joseph ra ninnino.

Doctrine and Covenants 135:1–2; Souneng, 1:550–52

Ekkewe Souneng ra fokkun netipengaw nupwen ra sinei pwe Joseph me Hyrum ra mano. Nge ir mi sinei pwe manon ekkewe Soufos esap akounoi ewe Mwichefen. Ina an ewe Chon Amanau we Mwichefen, me i epwe sopweno ne emweni. Ewe Mwichefen epwe soposopono ne marino me efeiochu noun Kot semirit non unusen ewe fonufan.

Souneng, 1:553–59