November 1833–February 1835

Ewe Camp an Israel

Kaeo ne nuku ewe Samon

Ekkewe Souneng kewe ra fen akkom nonnom non Independence, Missouri, a namot ngenir aninis. Ra fen angang weires ne aueta Saion usun Kot a fen tingor. Nge ekkoch aramas non ewe sopw rese mochen ir repwe nom ikeweie. Ra fori ekkewe Souneng repwe suseni imwer kewe.

Saints, 1:195

Joseph Smith a nom non Kirtland. A rong usun met a fis ngeni ekkewe Souneng non Missouri, me a netipengaw. A iotek an epwe sinei met epwe fori. Ewe Samon a ereni Joseph an epwe kut aramas repwe fiti ne no Missouri. Ra anean pwe we government epwe anisi ekkewe Souneng ar repwe angei sefani imwer kewe.

Doctrine and Covenants 103:1–2, 11–20, 30–34; Saints, 1:195–96

Arap 100 aramas ra finata repwe fiti i. Ewe Soufos a eita ngeni ei mwich ewe Camp an Israel. Ra fokkun mwasangasang ar repwe no anisi ekkewe Souneng non Missouri.

Saints, 1:197–99

Brigham Young me chienan we Heber Kimball ir chon ewe mwich. Emon anuon itan Wilford Woodruff a feito seni New York an epwe aninis.

Saints, 1:197–98

Pwan ekkoch aramas ra fiti ewe camp. Ra maas ren unusen eu maram me feino ewe epekin ewe wamongun chonupupun ngeni Missouri. Ra fokkun pekus me metekitek. Ewe nakatamen maas a pwan fori an ekkoch aramas repwe ningeringer. Ir mi chok tawaweno seni ar repwe tori ewe sopwun Independence.

Saints, 1:200–201

Nupwen ra soposopono ne maas, emon fefin a kokkou rer. A apasa pwe ekkoch mwan ra feito repwe nireno.

Saints, 1:203

Ewe Camp an Israel ra kouno ren ewe pwinin won eu chukuchukuta asan eu chonupupu. Nupwen ra aueta ar camp, nimmon mwan ra sato rer won oris. Ra kapas eingeing pwe 300 pwan mwan ra feito repwe atai ewe camp. Chommong chochon ewe Camp an Israel ra nuokus. Joseph a urenir pwe epwe wor ar nuku pwe Kot epwe anisir.

Saints, 1:203

Mwitir chok fan nang a ureno ren kuchu mi topwutop. Punguchoun ran a poputa ne pungutiw. Ewe chonupupu a anononono. Asepwan a usatiw ekkewe ira. Inefi a tineno unusen fan nang. Joseph me ekkewe ekkoch ra kuna eu kukkun imwen fan ikewe repwe tumun me ie. Ra konu kon mi fel non unusen ewe pwinin. “Kot mi nom non ei monumon!” Joseph a apasa.

Saints, 1:203–4

Ewe monumon a akouonoi ekkewe aramas ekkewe ra mochen efeiengawer. Ewe camp a tumun. Nge ewe government a apasa pwe resap anisi ekkewe Souneng. Ewe Samon a ureni Joseph pwe ewe Camp an Israel ra tongeni no neimw. Ekkewe Souneng repwe aueta Saion ren ar apwonueta an Kot kewe annuk. A pwonei pwe I epwe “ani ekkewe maun an Saion.”

Doctrine and Covenants 105:1–19; Saints, 1:204–5

Ekkoch chon ewe camp ra song nupwen ra rong usun ei. Ra netipengaw pwe rese fiu fan iten Saion. Ekkoch aramas ra ekieki pwe ewe Camp an Israel ra tur. Nge ekkoch, usun Brigham Young, Heber, me Wilford, ra kinisou ren ewe tufich ar repwe nom ren ewe Soufos Joseph me kaeo seni I.

Saints, 1:205–6

Mwirin, ewe Samon a ureni Joseph Smith an epwe kokkori Engon me Ruemon Aposel ar repwe anisi ne emweni An Mwichefen. Ekkewe Aposel repwe chon pwarata iten Jises Kraist non unusen ewe fonufan. Wanimon me nein ekkewe Engon me Ruemon Aposel ra fen maas non ewe camp an Israel. Angang ren Joseph a anisi ne amonnereta ngeni ei auchean kokko.

Doctrine and Covenants 18:26–27; 107:23; Saints, 1:214–17