1902–1918

Susa Young Gates me Joseph F. Smith

Eu pwarata usun ewe nenien ngun

Susa Young Gates i noun Brigham Young nengin. A uputiw non Utah me marita ikena. A sani ne mak, me a sani ne angang non an ewe Samon we Mwichefen.

Saints, 3:9–10, 64

Nupwen Susa emon mi mwukono, a fokkun semwen. A tingor ren eu efeiochun pristut. Non ewe efeioch, ewe Samon a ureni Susa I a mochen neminewe epwe fori angangen tempel.

Saints, 3:193–94

Mwirin ewe efeioch, Susa a chikar. A awora an fansoun ne kaeo usun uruon an famini. Nupwen a kuna chochon an famini ra fen mano nge rese papatais, i a no ngeni ewe tempel pwe epwe papatais fan iter. A sani ne ureni aramas usun angangen uruon famini. Netipengawan, chommong aramas rese pwapwaiti.

Saints, 3:194–95, 206

Eu ran, Susa a churi chienan we Joseph F. Smith, ewe Presetenin ewe Mwichefen. Preseten Smith a fen semwen ren chommong wiik. Susa a sinei pwe i a pwan netipengaw pokien noun we at a fen mano. I a pwan netipengaw usun ekkoch mettoch a pwan fis non ewe fonufan, usun maun me semwen.

Saints, 3:197–99, 205–6

Nge nupwen Susa a mwotiw ren Preseten Smith, a fokkun mwasangasang an epwe kapas ngeni neminewe. A ureni Susa pwe Kot a fen ngeni i eu auchean nemasepwi. Ewe nemasepwi a porous usun ewe nenien ngun, ikewe aramas repwe no ie mwirin ra mano. An nemasepwi a makketiw won echo toropwe. Preseten Smith a ngeni Susa me tingor epwe anneani.

Saints, 3:206–7

Susa a anneani ewe toropwe. A apasa pwe Jises Kraist a churi ewe nenien ngun. A tinano Adam, Eve, me ekkoch pwan mwan me fefin mi nikitu repwe aiti ekkewe ngun minne rese angei ewe kapas allim nupwen ir mi manau. Ra anisi ekkei ngun repwe amonneta pwe aramas repwe tongeni papatais fan iter me non ewe tempel.

Doctrine and Covenants 138:11–19, 29–48; Saints, 3:206–7

Susa a ingeno nupwen a anneani an Preseten Smith we nemasepwi. Preseten Smith a amenimen ngeni. “Susa,” a apasa, “ka fori eu angang mi nap.” A ureni neminewe pwe a tongei pokiten an nuku no ewe Samon.

Saints, 3:206

Susa a makkei usun ewe pwarata non noun we puken manauan. “Oh, a eu ekinamwe ngeniei!” a apasa. Ese tongeni witiwiti an epwe ureni chienan kewe me ekkoch chon ewe Mwichefen porousan. A sinei an Preseten Smith we nemasepwi epwe anisi ekkewe Souneng ar repwe pwapwaiti ne fori angangen tempel fan iten aramas non ewe nenien ngun.

Saints, 3:207