ជំពូកទី ៤៦
ព្រះយេស៊ូវគ្រីស្ទបង្រៀន និងអធិស្ឋានជាមួយពួកសាសន៍នីហ្វៃ
ពួកសាសន៍នីហ្វៃដែលបានឃើញព្រះយេស៊ូវគ្រីស្ទ នោះបានប្រាប់មិត្តភក្តិរបស់ពួកគេថា ទ្រង់នឹងត្រឡប់មកវិញនៅថ្ងៃបន្ទាប់ ។ មានប្រជាជនជាច្រើនបានខិតខំធ្វើការយ៉ាងខ្លាំងដើម្បីទៅដល់កន្លែងដែលព្រះយេស៊ូវនឹងយាងមក ។
នៅព្រឹកបន្ទាប់ នីហ្វៃ និងពួកសិស្សផ្សេងទៀតបានបង្រៀនក្រុមមនុស្សដែលបានប្រមូលគ្នាមក ។ បន្ទាប់មក ពួកសិស្សបានអធិស្ឋានសូមឲ្យពួកគេទទួលបានព្រះវិញ្ញាណបរិសុទ្ធ ។
នីហ្វៃបានចុះទៅក្នុងទឹក ហើយបានទទួលបុណ្យជ្រមុជទឹក ។ បន្ទាប់មក គាត់បានធ្វើបុណ្យជ្រមុជទឹកឲ្យពួកសិស្សដទៃទៀត ។
ក្រោយពីពួកគេបានទទួលបុណ្យជ្រមុជទឹកហើយ នោះពួកសិស្សបានទទួលព្រះវិញ្ញាណបរិសុទ្ធ ។ ភ្លើងហាក់បីដូចជានៅព័ទ្ធជុំវិញពួកគេ ហើយពួកទេវតាបានយាងចុះមកពីស្ថានសួគ៌ ហើយបានបម្រើពួកគេ ។
ខណៈដែលពួកទេវតាបាននៅជាមួយពួកសិស្ស នោះព្រះយេស៊ូវបានយាងមក ហើយគង់នៅក្នុងចំណោមពួកគេ ។
ព្រះគ្រីស្ទបានប្រាប់ពួកសាសន៍នីហ្វៃទាំងអស់ឲ្យលុតជង្គង់ចុះនៅលើដី ។ ទ្រង់បានប្រាប់ពួកសិស្សរបស់ទ្រង់ឲ្យអធិស្ឋាន ។
ខណៈពួកគេកំពុងអធិស្ឋាន នោះព្រះយេស៊ូវបានយាងចេញឆ្ងាយពីប្រជាជនបន្តិច ហើយបានលុតជង្គង់ចុះ ហើយបានអធិស្ឋានទៅកាន់ព្រះវរបិតាសួគ៌ ។
ព្រះយេស៊ូវបានថ្លែងអំណរគុណដល់ព្រះវរបិតាសួគ៌ដែលបានប្រទានព្រះវិញ្ញាណបរិសុទ្ធដល់ពួកសិស្សទ្រង់ ។ បន្ទាប់មក ទ្រង់បានទូលសូមព្រះវិញ្ញាណបរិសុទ្ធឲ្យមានដល់អស់អ្នកណាដែលបានជឿតាមពាក្យរបស់ពួកសិស្ស ។
ព្រះយេស៊ូវបានប្រទានពរដល់ពួកសិស្សរបស់ទ្រង់ ខណៈដែលពួកគេកំពុងអធិស្ឋាន ។ ទ្រង់បានញញឹមដាក់ពួកគេ ហើយពួកគេបានក្លាយទៅជាសដូចជាព្រះភក្ត្រ និងព្រះពស្តរបស់ទ្រង់ ។
ព្រះយេស៊ូវបានអធិស្ឋានសម្រាប់ពួកសិស្សរបស់ទ្រង់ម្តងទៀត ។ ទ្រង់សព្វព្រះទ័យនឹងសេចក្តីជំនឿដ៏អស្ចារ្យរបស់ពួកគេ ។
ព្រះគ្រីស្ទបានប្រាប់ប្រជាជនឲ្យឈប់អធិស្ឋាន ប៉ុន្តែសូមឲ្យអធិស្ឋាននៅក្នុងចិត្តរបស់ពួកគេ ។ បន្ទាប់មក ទ្រង់បានឲ្យពួកគេទទួលទានសាក្រាម៉ង់ ។
គ្មាននរណាម្នាក់បានយកនំបុ័ង និងស្រាទំពាំងបាយជូរមកទេ ប៉ុន្តែព្រះអង្គសង្គ្រោះបានរៀបចំវាតាមវិធីដ៏អស្ចារ្យបំផុត ។
ព្រះយេស៊ូវគ្រីស្ទបានប្រាប់ពួកសាសន៍នីហ្វៃថា ដំណឹងល្អរបស់ទ្រង់នឹងនាំមកលើផែនដីវិញនៅថ្ងៃចុងក្រោយ ។
ទ្រង់បានប្រាប់ពួកគេឲ្យសិក្សាព្រះគម្ពីរ ហើយទ្រង់បានឲ្យនីហ្វៃកត់នៅក្នុងបញ្ជីអំពីការបំពេញការព្យាករដែលនៅសល់របស់សាំយូអែលជាសាសន៍លេមិន ។
បន្ទាប់មក ព្រះយេស៊ូវបានបង្រៀនប្រជាជនពីព្រះគម្ពីរ ។ ទ្រង់បានប្រាប់ពួកគេឲ្យបង្រៀនគ្នាទៅវិញទៅមកនូវអ្វីៗដែលទ្រង់បានបង្រៀនពួកគេ ។
ព្រះយេស៊ូវបានយាងឡើងទៅស្ថានសួគ៌វិញ ហើយពួកសិស្សរបស់ទ្រង់បានបង្រៀនប្រជាជន ។ អស់អ្នកដែលបានជឿបានទទួលបុណ្យជ្រមុជទឹក ហើយបានទទួលព្រះវិញ្ញាណបរិសុទ្ធ ។
ពួកសាសន៍នីហ្វៃបានចាប់ផ្តើមគោរពតាមព្រះបញ្ញត្តិទាំងអស់ ។