ជំពូក ៣៥
មេទ័ពមរ៉ូណៃ និងពេហូរ៉ាន
មេទ័ពមរ៉ូណៃរីករាយដែលបានឮថា ហេលេមិន និងកងទ័ពរបស់គាត់បានដណ្តើមបានដែនដីជាច្រើនរបស់ពួកសាសន៍នីហ្វៃពីពួកសាសន៍លេមិនវិញ ។
ប៉ុន្តែហេលេមិន និងកងទ័ពរបស់លោកត្រូវការជំនួយ ។ ពួកគេគ្មានទាហានគ្រប់គ្រាន់ដើម្បីការពារទីក្រុងជាច្រើននោះឡើយ ។
មេទ័ពមរ៉ូណៃបានសរសេរសំបុត្រទៅពេហូរ៉ាន ដែលជាមេចៅក្រម និងលោកអភិបាល ។ លោកបានសូមឲ្យពេហូរ៉ានបញ្ជូនទាហានមកបន្ថែមទៀតដើម្បីជួយកងទ័ពហេលេមិន ។
ពួកសាសន៍លេមិនបានវាយប្រហារទីក្រុងរបស់ពួកសាសន៍នីហ្វៃដែលហេលេមិនដណ្តើមបាន ។ ពួកគេបានសម្លាប់ពួកសាសន៍នីហ្វៃជាច្រើននាក់ ហើយបានដេញពួកសាសន៍នីហ្វៃដែលនៅសល់ឲ្យចេញពីទីក្រុង ។
ដោយខឹងនឹងអ្នកដឹកនាំរដ្ឋាភិបាល ព្រោះពួកគេពុំបានបញ្ជូនជំនួយមក នោះមរ៉ូណៃបានសរសេរសំបុត្រមួយទៀតទៅកាន់ពេហូរ៉ាន ។
មេទ័ពមរ៉ូណៃបានសរសេរថា ប្រជាជនជាច្រើនត្រូវបានសម្លាប់ ដោយសារតែពេហូរ៉ានពុំបានបញ្ជូនទាហានមកបន្ថែមទៀត ។
ប្រសិនបើពេហូរ៉ានពុំបញ្ជូនទាហាន និងស្បៀងឲ្យលឿនទេ នោះមរ៉ូណៃនឹងយកកងទ័ពរបស់លោកទៅកាន់ទីក្រុងសារ៉ាហិមឡា ហើយយកអ្វីដែលកងទ័ពរបស់លោកត្រូវការ ។
មិនយូរប៉ុន្មានក្រោយមក មរ៉ូណៃបានទទួលសំបុត្រមួយពីពេហូរ៉ាន ។ លោកកើតទុក្ខដែលមរ៉ូណៃ និងកងទ័ពរបស់លោកកំពុងរងទុក្ខ ។
ពេហូរ៉ានបានប្រាប់មរ៉ូណៃថា ពួកសាសន៍នីហ្វៃទុច្ចរិតមួយក្រុមដែលហៅថា ពួកនិយមស្តេចពុំចង់ឲ្យលោកធ្វើជាមេចៅក្រមឡើយ ។ ពួកគេបានបង្ខំលោក និងអ្នកគាំទ្ររបស់លោកឲ្យចេញពីទីក្រុងសារ៉ាហិមឡា ។
ពេហូរ៉ានបានបន្ថែមថា លោកកំពុងប្រមូលកងទ័ពមួយក្រុមដើម្បីព្យាយាមយកទីក្រុងសារ៉ាហិមឡាត្រឡប់មកវិញ ។
ពួកនិយមស្តេចបានជ្រើសរើសស្តេចមួយអង្គឲ្យធ្វើជាអ្នកដឹកនាំពួកគេ ហើយបានចូលរួមនឹងពួកសាសន៍លេមិន ។
ពេហូរ៉ានពុំខឹងនឹងអ្វីដែលមរ៉ូណៃបានសរសេរឡើយ ។ លោកក៏ចង់ឲ្យពួកសាសន៍នីហ្វៃមានសេរីភាពផងដែរ ។
លោកបានសូមឲ្យមរ៉ូណៃនាំមនុស្សមួយចំនួនមកជួយលោក ហើយបានថ្លែងថា ប្រសិនបើមរ៉ូណៃប្រមូលមនុស្សបន្ថែមទៀតនៅតាមផ្លូវ នោះកងទ័ពដែលរួមបញ្ចូលគ្នាអាចវាយយកទីក្រុងសារ៉ាហិមឡាវិញបាន ។
មេទ័ពមរ៉ូណៃសប្បាយចិត្តដែលពេហូរ៉ាននៅតែស្មោះត្រង់ចំពោះប្រទេសរបស់លោក ហើយនៅតែចង់បានសេរីភាពឲ្យដល់ប្រជាជនលោក ។
មរ៉ូណៃបានទៅជួបពេហូរ៉ានជាមួយនឹងទាហានបន្តិចបន្តួចរបស់លោក ។ លោកបានកាន់ទង់ឥស្សរភាព ហើយមានមនុស្សរាប់ពាន់នាក់បានចូលរួមនឹងពួកគេនៅតាមផ្លូវ ។
កងទ័ពរបស់មរ៉ូណៃដែលចូលរួមនឹងពេហូរ៉ាន បានដើរឆ្ពោះទៅទីក្រុងសារ៉ាហិមឡា ។ ពួកគេបានសម្លាប់ស្តេចរបស់ពួកសាសន៍នីហ្វៃដែលទុច្ចរិតនោះ ហើយចាប់ពួកទាហានរបស់ទ្រង់ ។
បន្ទាប់មក មរ៉ូណៃបានបញ្ជូនស្បៀង និងទាហាន ១២០០០ នាក់ ដើម្បីជួយកងទ័ពរបស់ពួកសាសន៍នីហ្វៃ ។ ពួកកងទ័ពទាំងនេះបានបណ្តេញពួកសាសន៍លេមិនចេញ ហើយក៏មានសន្តិភាពជាថ្មីម្តងទៀតនៅក្នុងដែនដី ។