ʻOkú ke ʻilo fēfē kuo fakamolemoleʻi koe ʻe he Tamai Hēvaní?

ʻĪmisi

young woman looking contemplative

Ongoʻi ʻa e Laumālié

ʻOku ou ʻiloʻi kuo fakamolemoleʻi au ʻi he taimi kotoa pē ʻoku ou lava ai ʻo ongoʻi ʻa e Laumālié. ʻOku mahuʻinga maʻu pē ke maʻu ʻa e Laumālié ʻi heʻetau moʻuí, tautautefito ki he hoko ko ha faifekaú. Kapau ʻoku tau moʻui angatonu, te tau maʻu maʻu pē ʻa e Laumālié, pea te Ne tokoniʻi kitautolu ke tau ʻiloʻi hotau vā mo e ʻOtuá.

ʻEletā Peika, taʻu 23, Misiona Brazil Vitória

Toe Fakapapauʻi ʻOku ou Feʻao mo Kalaisi

Naʻe kātekina ʻe Sīsū Kalaisi ʻi he Ngoue ko Ketisemaní ʻa e mamahi mo e angahala kotoa pē ʻa e māmaní koeʻuhí kae lava ke fakamolemoleʻi ʻetau ngaahi angahalá pea taau ʻi ha ʻaho ke hū ki he puleʻanga fakasilesitialé. ʻOku ou ongoʻi kuo fakamolemoleʻi au ʻi he taimi ʻoku ou ongoʻi ai ha fakapapau ʻoku ou feʻao mo Kalaisi pea ʻokú Ne ueʻi fakalaumālie aú.

ʻĀleki H., taʻu 15, ʻAitahō, USA

ʻOfá mo e Fiefiá

ʻOku ou saiʻia ʻi he meʻaʻofa ʻo e fakatomalá he ʻoku ou faʻa ongoʻi ʻoku lōmekina au ʻe he halaiá mo e loto-mamahí ʻi he taimi kotoa pē ʻoku ou fehalaaki aí. ʻI he taimi ʻoku ou tuku taimi ai ke tūʻulutui ʻo kole ki he Tamai Hēvaní ha fakamolemole ʻi he loto-moʻoní, ʻoku ʻōʻōfaki au ʻe he ongoʻi mālohi ʻo e ʻofá, nongá, mo e fiefiá! ʻOku ʻikai ke u toe ongoʻi tuenoa, pea ko e founga ia ʻoku ou ʻiloʻi ai kuo fakamolemoleʻi au ʻe he Tamai Hēvaní.

Pilini H., taʻu 17, ʻIutā, USA

Nonga ʻi Hoku Lotó

Ko e founga ʻoku ou ʻiloʻi ai kuo fakamolemoleʻi aú ko ʻeku ongoʻi ha nonga ʻi hoku lotó. Te u manatuʻi maʻu pē kuó u fai ha fehalaaki, ka ʻoku tokoni ʻeni ke u ako ai ke ʻoua naʻa toe fai ia. Kuo ʻomi ʻe he ʻEikí ha talaʻofa fakaofo: “Vakai ko ia ia kuó ne fakatomala mei heʻene ngaahi angahalá, ʻoku fakamolemoleʻi ia, pea ko au ko e ʻEikí, ʻoku ʻikai te u toe manatu ki ai” (Tokāteline mo e Ngaahi Fuakava 58:42).

Tēvita E., taʻu 19, Sihuahua, Mekisikou