Tupu mo ha Ngaahi Taumuʻa Lelei
ʻOku fakaʻaongaʻi ʻe he fānau ʻi he funga ʻo e māmaní ʻa e Tohi Fakahinohino ʻa e Fānaú ke ʻahiʻahiʻi ha ngaahi meʻa foʻou mo tupulaki hangē ko Sīsuú!
ʻOku nofo ʻa Sēsika B., taʻu 10, ʻi ʻAkalā Lahi, Kana. ʻOkú ne fokotuʻu ha taumuʻa ke fakakaungāmeʻa ki ha kakai foʻou mo vahevahe ʻa e ongoongoleleí mo kinautolu. ʻOkú ne faʻo ha tatau ʻo e Friend ʻi hono kato naunaú peá ne lau ʻa e makasiní ʻi he akó. ʻOkú ne vahevahe ia mo hono ngaahi kaungā-akó peá ne talanoa kiate kinautolu fekauʻaki mo e ongoongoleleí. ʻOku pehē ʻe Sēsika, “ʻOkú ne ʻai ke u ongoʻi fiefia.”
Naʻe faingataʻaʻia ʻa Pita G., taʻu 9, mei ʻOhaiō, USA, ʻi he laukongá. Naʻe fie maʻu ke ne lava ʻi ha sivi laukonga mahuʻinga kae lava ke ne hiki ki he kalasi hokó. Ko ia naʻá ne fokotuʻu ha taumuʻa ke laukonga mo ʻene faʻeé mo e tuofāfiné he ʻaho kotoa pē ʻi ha miniti ʻe 20. ʻOku pehē ʻe Pita, “Naʻá ku kole ki he Tamai Hēvaní ke tokoniʻi au.” ʻI he taimi naʻá ne sivi ai kimui angé, naʻá ne lava!
Naʻe fakaʻamu ʻa Teniela P., taʻu 8, mei Sepū, Filipaini, ke ʻave ha meʻakai maʻá e kakai ʻoku ʻikai hanau ʻapí. ʻOkú ne pehē, “ʻOku ou loto ke fafanga kinautolu koeʻuhí ke nau fiefia mo mohe fiu.” Ko e taimi ʻoku maʻu ai ʻe hono fāmilí ha toenga meʻakai mei heʻenau pisinisí, ʻoku nau lele holo ʻo foaki ia maʻá e kakai ʻoku fiekaiá.
ʻOku nofo ʻa Palōfita M., taʻu 12, ʻi ʻAkalā Lahi, Kana. Hili ʻene ako ke tā e pianó, naʻá ne fokotuʻu ha taumuʻa ke akoʻi e niʻihi kehé nau tā-piano foki! Naʻá ne fakaafeʻi ʻa e kakai naʻá ne ʻiloʻí ke nau toʻo e kalasi piano naʻá ne akoʻi mo hono ngaahi kaungāmeʻá. ʻOku pehē ʻe Palōfita, “ʻI he taimi ní kuo ʻi ai haʻamau kau ako ʻe toko 50 tupu ʻoku nau ako e ngaahi lēsoní.” Kuo papitaiso ha toko valu ʻi he kau ako ko iá!