Kakai Lalahi Kei Talavoú
Founga Ne u Ako ai ke Mahino ʻa e Fakakaukau ʻa e ʻOtuá ki he Tōʻonga Fakasekisualé
Tohi ʻa e ʻētitá: Ko e fakamatala ko ʻení ko ha konga ia ʻo ha fakamatala hokohoko fekauʻaki mo hono maʻu ha fakakaukau lelei ki he tōʻonga fakasekisualé, feohi fafale fakasekisualé mo e fono ʻo e angamaʻá ʻi he Liahona ʻo ʻAokosi 2020. ʻOku kehekehe e ʻuhinga ʻo e foʻi lea tōʻonga fakasekisuale ki he kakai kehekehe, ka ʻi he tūkunga ko ʻení, ʻoku fakatefito ʻetau talanoá ki hotau ongó mo e tuʻunga fakasekisualé.
ʻI heʻeku kei tupu haké, ne ʻikai ke u ʻilo ʻa e founga ke u mapuleʻi ʻaki ʻa e ngaahi ongo fakasekisualé, ʻa ia ne tataki ai au ki ha ngaahi fili hala, ka naʻe hoko ʻa hono ako e ngaahi moʻoni fekauʻaki mo e tōʻonga fakasekisualé mo e angamaʻá ke liliu ʻeku moʻuí ke toe lelei ange.
Laʻitā ne fakatātaaʻi ʻe ha kau mōtolo
Ne u tangutu fakamāʻia ʻi hoku seá ʻi he fakafeʻiloaki mai ʻe he faiakó ʻa e lēsoni ki he angamaʻá. Naʻá ne kamata ʻaki ʻene pehē, “ʻOku ou ʻiloʻi ko kimoutolu tamaiki fefiné ʻoku ʻikai haʻamou palopalema mo e fono ʻo e angamaʻá … ” Ne ʻikai ke ne ʻilo—pe ko ha toe taha—ko ha meʻa ia ne u fefaʻuhi mo ia ʻi heʻeku kei finemuí.
Ne hanga ʻe he ngaahi lēsoni ʻi he lotú ʻo ʻai ke u ongoʻi ko e ngaahi ongo fakasekisualé ʻoku toki taau pē ia ʻi he nofo-malí pea ko e ngaahi ongo fakasekisuale ʻi tuʻa mei he nofo-malí naʻe kovi ia. Ne u ongoʻi mā, vaivai, mo tuenoa, ʻa ia ne tupu ai haʻaku fehiʻa fakaʻaufuli ʻi he foʻi tefito ko iá.
ʻI heʻeku tupu hake ʻi he Siasí, ne u faʻa fakakaukau ko e talanoa fekauʻaki mo e feohi fakasekisualé—ʻo aʻu pē ki he ngaahi founga tāú—pe ko hono fakahaaʻi e ngaahi fakakaukau mo e ongo fakasekisualé ne tapuʻi ia pe hala tukukehe kapau kuó ke ʻosi mali. Ne fakahehema ʻeku fakakaukaú ke pehē ko ha faʻahinga fieʻilo pe fehuʻi fekauʻaki mo e tōʻonga fakasekisualé pe naʻa mo ha fehuʻi fekauʻaki mo e angamaʻá ʻoku totonu ke taʻofi ia he naʻe ʻikai muimui ia ki he palani ʻa e ʻOtuá. Pea koeʻuhí ne u fakakaukau ne fuʻu fakamā ʻeku ngaahi fehuʻí ke aleaʻi mo ha taha, ne u fekumi ai ki ha ngaahi tali mei he ngaahi maʻuʻanga tokoni ne ʻikai hoʻata mei ai ʻa e tōʻonga fakasekisualé ʻi he founga ne taumuʻa ki ai ʻa e Tamai Hēvaní.
Fefaʻuhi mo e Ongoʻi Maá
Ne taʻu lahi ʻeku fefaʻuhi mo ʻeku ngaahi ongó mo e ʻulungāngá. Naʻá ku ʻiloʻi pē ne hala ia, ka naʻe ʻikai ke u ʻiloʻi pe ko hai te u tafoki ʻo kumi tokoni ki aí. Naʻá ku fuesia ʻa e mafatukituki ʻo e faiangahalá mo e ongoʻi maá ʻi he ʻaho kotoa pē, ka naʻá ku kei feinga pē ke fai ʻa e meʻa kehe kotoa pē ke tonu. Ne hangē ne u fihia ʻi ha “feituʻu ʻo e tō-ʻi-vahaʻá”—ko haʻaku konga ʻe taha ʻi he māmaní pea konga ʻe taha ʻi he ongoongoleleí.
Naʻá ku fakaʻamu lahi ke u nofo kakato ʻi he ongoongoleleí. Ko ia ai ne u ako ʻeku ngaahi folofolá, lotu, kau ʻi he ngaahi ʻekitivitī ʻa e Siasí, mo fua hoku ngaahi fatongiá. Ne hangē ko e ongoongoleleí pē taha naʻá ne ʻomi ha fakafiemālie kiate aú.
ʻI he fakaʻau ke u ako lahi ange mo ʻunu ke ofi ange ki he Fakamoʻuí, ne mālohi ange ai ʻeku holi ke moʻui kakato ʻaki ʻa e fono ʻo e angamaʻá. Hili haʻaku fakalaulauloto mo e lotu lahi, ne faifai peá u fakakaukau ke talanoa ki heʻeku pīsopé fekauʻaki mo ʻeku ngaahi faingataʻaʻiá.
Ongoʻi ʻa e Mālohi Faifakamoʻui ʻa e Fakamoʻuí
ʻI heʻeku mavahe mei he ʻōfisi ʻo ʻeku pīsopé, ne hangē ne mole atu ʻa e mamahi fakaeloto ne u fufuuʻi ʻi ha ngaahi taʻu lahí. Ne u tangi ʻi he ongoʻi fiemālie. Ne u ʻosi ongoʻi e ngāue ʻa e mālohi faifakamoʻui ʻa e Fakamoʻuí ʻi heʻeku moʻuí. Ne fakafou ʻi he fakatomalá ʻa hono tokonia au ʻe he ngaahi fakataha mo e pīsopé ke mahino ne angamaheni pē ʻeku ngaahi ongó pea naʻe ʻikai ke u tuenoa ʻi he fāifeinga ki he angamaʻá. Ne u ako ʻoku ʻi ai mo ha niʻihi kehe—hangē ko aú—ne nau faingataʻaʻia fakalongolongo pē koeʻuhí ko e ongoʻi maá, manavaheé mo e taʻemahinó.
Ne tokoniʻi au ʻe heʻeku pīsopé ʻi he founga ʻo e fakatomalá, ka naʻe liliu lahi foki ʻe haʻaku kaungāmeʻa ʻa e ongo naʻá ku maʻu fekauʻaki mo ʻeku faingataʻaʻiá. Naʻá ne hoko ko ha faʻifaʻitakiʻanga lelei kiate au. ʻI ha ʻaho ʻe taha naʻá ne vahevahe ʻa ʻene fefaʻuhi he kuohilí mo e ponokalafí. Naʻá ku fuʻu ʻohovale—ne ʻikai haʻaku teitei mahamahalo ne ma fefaʻuhi mo e meʻa tatau. Ne u faitohi kiate ia fekauʻaki mo ʻeku ngaahi aʻusia ʻi he fakatomalá koeʻuhi ko e ngaahi faingataʻa tatau pea moe founga ne tokoni ai ke u ʻiloʻi ne ʻikai ke u toko taha peé. Naʻá ne fāʻofua mai kiate au ʻi he lotú he Sāpaté, mo talamai naʻá ne fiefia ʻi heʻeku ngāue mo e pīsopé pea he ʻikai ʻaupito te u tuenoa. Naʻá ne tokoniʻi au ke u ongoʻi mālohi ange ʻa e ʻofa ʻa e Fakamoʻuí.
Talu mei ai, kuó u malava ke kaungāongoʻi mo fakalotolahiʻi ʻa e ngaahi kaungāmeʻa ne nau foua ʻa e ngaahi faingataʻa tatau ke tokoni ke mahino kakato ange kiate kinautolu ʻa e fono ʻo e angamaʻá.
ʻI he ikuʻangá, ne tokoni ʻa hono ʻiloʻi ne ʻikai ke u toko tahá, ongoʻi ʻa e ʻofa mo e mahino mei heʻeku pīsopé mo e Fakamoʻuí, pea mo e ako fekauʻaki mo e mahuʻinga taʻengata ʻo e angamaʻá, ke fakamoʻui au.
ʻOku ou ʻiloʻi he taimí ni ne hala ʻaupito ʻeku maʻú. Ko e angamaʻá mo e tōʻonga fakasekisuale ʻoku tāú ko ha konga ia ʻo e palani ʻa e ʻOtuá ki he fiefiá. Ko e ngaahi ongo fakasekisualé ko ha konga fakanatula ia ʻo e moʻui fakamatelié pea ʻe lava ke fakaʻofoʻofa ia ʻi heʻetau ako ke ngāue ʻaki kinautolu ʻi he founga ʻoku tāú.
ʻI heʻeku fakakaukau ki he kuohilí, ʻoku ou ongoʻi loto-mamahi ʻi he ʻikai ke u teitei ongoʻi malu feʻunga ke aleaʻi ʻa e fono ʻo e angamaʻá mo ha taha kimuʻa peá u toki talanoa mo ʻeku pīsopé. Ne totonu pē ke u ʻiloʻi ʻoku ʻikai ke fakamā ke fehuʻia ʻa e angamaʻá pe tōʻonga fakasekisualé pea ʻoku mahuʻinga ke talanoaʻi ia ʻi he loto-ʻaʻapa mo e kakai totonu.
ʻE Lava ke Tataki Koe ʻe he Ngaahi Moʻoni Taʻengatá
Koeʻuhi ko e ngaahi meʻa kuó u aʻusiá, te u lava ʻo fakapapauʻi ki ha taha pē ʻoku fefaʻuhi mo e fono ʻo e angamaʻá ʻe lava pē ke liliu ho lotó. ʻOku ʻi ai ha ʻamanaki lelei, fakamoʻui, mo ha ngaahi moʻoni taʻengata ʻe lava ke ne tataki koe. Kuó u ako ko e mahino ʻoku maʻu ʻe he māmaní ki he tōʻonga fakasekisualé ʻoku mātuʻaki kehekehe ʻaupito ia mei he finangalo ʻo e Tamai Hēvaní.
ʻOku ou fakamālō koeʻuhí ko e ngaahi lēsoni kuó u akó. Kuó u maʻu ha fakamoʻoni mālohi ange ki he fono ʻa e ʻEikí ki he angamaʻá, mahuʻinga ʻo e tōʻonga fakasekisualé ʻi heʻetau moʻuí, pea mahuʻinga tahá, ʻa e ʻofa mo e mālohi faifakamoʻui ʻa e Fakamoʻuí.