Ko Hono Fili ʻa e Sēnoló
Fēfē kapau naʻe ʻikai ke toe fie kaungāmeʻa ʻa Poloki ia mo Kamila?
“ʻE [maluʻi koe ʻe he ʻOtuá; fai leva ʻa e meʻa ʻoku totonú!” (Ngaahi Himí, fika 145).
“Naʻá ku sio he foʻi faiva fakaoli ʻaupito ʻaneafi. ʻOku totonu ke ke sio ai. Pea mahalo te ta toki sio fakataha ai ha taimi!” Ko Poloki ange ia.
Naʻe saiʻia ʻaupito ʻa Kamila ʻi he talanoa mo hono kaungāmeʻa mamaé lolotonga ʻena lue fakataha ki ʻapi mei he akó. Naʻá ne saiʻia ʻaupito ʻi he lahi e ngaahi meʻa ne na faitatau aí.
“Sai ʻaupito ia!” Ne taʻataʻalo atu ʻa Kamila peá ne hū he matapā ʻi muʻá.
Hili e fakaʻosi ʻe Kamila ʻene ngāue fakaako mei ʻapí, naʻá ne fakamoʻui ʻa e TV peá ne maʻu ʻa e faiva totonú. ʻE fakalata ke talanoaʻi ia mo Poloki ʻapongipongi!
Naʻe fakaoli ʻaupito ʻa e faivá. Naʻe fai ʻe he kau ʻeti faivá ha ngaahi meʻa fakaoli mo fai ha ngaahi talanoa fakaoli. Naʻe kata lahi ʻa Kamila. Ka naʻe ʻikai ke fakaoli ʻa e meʻa kotoa pē ne nau lea ʻakí. Ne nau lea ʻaki ha ngaahi lea ne ongoʻi ai ʻe Kamila ne hangē ne ʻi ai ha fanga poto ne nau puna holo ʻi hono loto keté. Ne ʻikai ko ha ngaahi lea lelei ia.
Naʻá ne fifili, Ko e hā nai ʻoku totonu ke u faí? Naʻe ʻiloʻi ʻe Kamila ne ʻikai ko ha ngaahi lea lelei ʻeni. Ka naʻá ne fie ʻilo ki he ikuʻanga ʻo e foʻi faivá. Ko e hā haʻane tali kapau ʻe ʻeke ange ʻe Poloki ʻapongipongi kau ki he faivá?
Ne mapuhoi pē ʻa Kamila mo ne tamateʻi ʻa e TV.
Hili e aʻu mai ʻa Mami ki ʻapí, ne tokoni ʻa Kamila ki ai ke fokotuʻutuʻu e tēpilé ki he maʻu meʻatokoni efiafí. “Naʻe fēfē akó?” Ko e fehuʻi ange ia ʻa Mamí.
Naʻe fokotuʻutuʻu ʻe Kamila ʻa e huhú mo e sēpuní. “Naʻe sai ʻaupito! Ka … naʻe talanoa mai ʻe Poloki ha foʻi faiva ke u sio ai. Naʻá ku kamata sio ai, ka naʻe ʻi ai e ngaahi lea kovi ia ai. Naʻe ʻikai ke fuʻu ongo lelei ia kiate au, peá u hanga ʻe au ʻo tamateʻi.”
“ʻOku hangē naʻá ke fai ha foʻi fili ʻoku lelei ʻaupitó.”
“Ka ʻoku loto ʻa Poloki ia ke ma sio fakataha ai. ʻOkú ma kaungāmeʻa lelei ʻaupito! ʻOkú ma saiʻia he hiva tatau, ʻaisi kilimi tatau, mo e ʻū tohi tatau …”
Naʻe tuku ʻe Mami ha poulu pasitā ʻi he funga tēpilé. “Moʻoni ia, ka ʻoku ʻikai ʻuhinga ia kuo pau ke mo fai ʻa e meʻa kotoa pē ke tatau. Tautautefito kapau ko ha meʻa ia ʻoku ʻikai ke ke ongoʻi fiemālie ki ai. ʻOku sai pē ke ke fili ʻe koe ha meʻa kehe mei he fili hoʻo kaungāmeʻá.”
“Ko e hā hoʻo ʻuhingá?” Ko e fehuʻi ange ia ʻa Kamilá.
Ne fakamatalaʻi ange ʻe Mami, “ʻOku tau fili ke fakaʻehiʻehi mei he ngaahi lea koví kae lava ke tau ongoʻi ʻa e Laumālie Māʻoniʻoní. Ka ʻoku ʻikai ke maʻu ʻe he tokotaha kotoa pē ʻa e tuʻunga moʻui tatau mo kitautolú. ʻOku ʻikai ʻuhinga ia ko ha kakai kovi kinautolu.”
Naʻe kei hohaʻa pē ʻa Kamila ki he meʻa ʻe hoko ʻi he taimi ʻe ʻeke ange ai ʻe Poloki fekauʻaki mo e faivá. Naʻá na talanoa ki he meʻa kotoa pē! Fēfē kapau ʻe fakakaukau ʻa Poloki ia ko ha kiʻi leka vale ia? Pe ko e kovi tahá, fēfē kapau he ʻikai ke toe loto ia ke na kaungāmeʻa?
Ne fai ʻe Kamila ha lotu kimuʻa peá ne toki mohé. Tamai Hēvani, fakamolemole muʻa ʻo tokoni mai ke u talanoa kia Poloki ʻapongipongi. Kātaki ʻo tokoni mai ke u loto-toʻa. Ne kaka ʻa Kamila ki he mohengá mo e fakaʻamu ʻe sai pē meʻa kotoa he akó.
“Kamila!” Ko e kaila mai ia ʻa Poloki he loto malaʻe vaingá. Naʻá ne lele mai he musié ke fetaulaki mo Kamila. “Naʻe hā ho fakakaukau ki he faivá? Naʻe fakaoli ē?”
Naʻe mihi ʻe Kamila ʻene mānavá. “Naʻe ʻikai ke u loko sio au ai.”
Naʻe mataʻi puputuʻu ʻa Poloki. “He ko e hā?”
Naʻe kiʻi fakakaukau ʻa Kamila. Te ne talaange pē naʻá ne moʻua? Ko e hā e meʻa ʻe lea ʻaki ʻe Polokí? “ʻĀsingá … naʻe ʻikai ke u sio aí he naʻa nau lea ʻaki e ngaahi lea ne ʻikai ke u saiʻia ai. Naʻe ʻikai ke u ongoʻi fiemālie he sio aí.”
Naʻe lea leʻo siʻi ange ʻa Poloki, “ʻOi.” Hili iá naʻá ne pehē ange leva, “ʻOku sai pē ia. ʻOku ʻikai fie maʻu ia ke ta sio fakataha ai. Te ta lava pē taua ʻo toki kumi ha foʻi faiva ʻokú ta fakatou saiʻia ai pe fai ha meʻa kehe.”
“Sai ia!” Naʻe malimali ʻa Kamila. Naʻe lue fakataha leva ʻa e ongo kaungāmeʻá ki he kalasí, ʻo na talanoa mo kakata he halá. ●
ʻOku nofo ʻa e tokotaha naʻá ne faʻú ʻi ʻIutā, USA.