Ko Hono Akoʻi e Founga ke Haohaoa mo Mateuteu Fakasekisualé
ʻI heʻeku hoko ko ha palōfesa ʻi he ʻUnivēsiti Pilikihami ʻIongí, kuó u fekumi mo akoʻi fekauʻaki mo e fatongia fakaemātuʻá ʻi he taʻu ʻe 15 kuohilí. ʻI heʻeku talanoa mo e mātuʻá, ko e taha ʻo e ngaahi fehuʻi angamaheni ʻoku ʻeke maí ko e taimi mo e founga ke talanoa ai ki he fānaú fekauʻaki mo e tōʻonga fakasekisualé. ʻI heʻeku talanoa mo e fānau ako ʻunivēsití, ʻoku ou faʻa fanongo ki heʻenau ilifia pe veiveiua fekauʻaki mo e tōʻonga fakasekisualé pe ko e siʻi ʻo ʻenau ʻiló mo e mahinó.
ʻOku fakautuutu ʻetau fanongo mei he kau taki ʻo e Siasí mo e ngaahi maʻuʻanga tokoni lelei mo foʻou ʻa e Siasí ki he founga ʻe lava ke fepōtalanoaʻaki lelei ange ai e mātuʻá mo e toʻu tupú kau ki he feohi fafale fakasekisualé kae lava ʻo maʻu ʻe he kakai kei talavoú ha fakakaukau lelei mo totonu ki he tōʻonga fakasekisualé mo e fono ʻo e angamaʻá. Naʻe pehē ʻe Palesiteni M. Lāsolo Pālati, “Fakamahino ʻa e lava ʻa e feohi fakaesinó ke hoko ko ha meʻa lelei mo fakaʻofoʻofa ʻi he taimi ʻoku fakahoko ai ʻi he ngaahi haʻi kuo ʻosi fokotuʻu ʻe he ʻEikí ʻo kau ai ʻa e ngaahi fuakava ʻo e temipalé mo e ngaahi tukupā ʻo e mali taʻengatá” (“Tamaí mo e Fohá: Ko ha Feohi Fakaʻofoʻofa,” Liahona, Nōvema 2009, 49).
-
Ne u vahevahe mo ha kaungā faʻu tohi ko Meki Senikovisi, pea mo e mātuʻá ha ngaahi fakakaukau ki he founga, taimi mo e ʻuhinga ʻo e talanoa mo ʻenau fānaú fekauʻaki mo e tōʻonga fakasekisualé (vakai, peesi 18).
-
Ko e aleaʻi ʻe ʻEletā mo Sisitā Lenilani ʻa hono mahuʻinga ke tauhi e fono ʻo e angamaʻá. (vakai, peesi 12).
-
ʻOku aleaʻi ʻi he ngaahi fakamatala maʻá e kakai lalahi kei talavoú ʻa e founga ke fakatupulaki ai ha fakakaukau ʻoku leleí ki he tōʻonga fakasekisualé pea mo e founga ʻoku tāpuekina ai kitautolu ʻe he fono ʻo e angamaʻá (vakai, peesi 42).
-
ʻE lava ke maʻu ʻe he toʻu tupú ha ngaahi fokotuʻu ki he ngaahi pōtalanoa lelei ʻa e mātuʻá mo e toʻu tupú fekauʻaki mo e tōʻonga fakasekisualé peesi 52.
ʻOku ou lotua ʻe maʻu ʻe he kakai lalahi kei talavoú mo e mātuʻá ha holi ʻi he ngaahi fakamatalá ni ke nau fepōtalanoaʻaki tauʻatāina pea toe ofi ange ki he ʻEikí ʻi heʻenau tekeʻi ʻa e fakamatala hala ʻoku feʻaveaki holo ʻi māmani he ʻahó ni ʻo fekauʻaki mo e feohi fafale fakasekisualé kae fakakaukau ki he mālohi ʻo e haohaoa mo e mateuteu fakasekisualé.
Fakaʻapaʻapa atu,
Laura M. Padilla-Walker, PhD