Ko e Folofola Fakaʻosí
ʻAlu ʻo Fakahoko ʻi he Loto Falala ki he ʻOtuá
Fai ʻe Palesiteni Henry B. Eyring
Tokoni Ua ʻi he Kau Palesitenisī ʻUluakí
Mei ha lea ʻi he konifelenisi lahi ʻo ʻOkatopa 2010.
ʻOku ueʻi hotau lotó ʻe he talavou ko Nīfai ʻi he Tohi ʻa Molomoná ke tau fakatupulaki ʻetau falala ki he ʻEikí pea talangofua ki Heʻene ngaahi fekaú. Naʻe fepaki ʻa Nīfai mo e faingataʻá pea aʻu pē ki he maté ʻi heʻene lea ʻaki e ngaahi lea ʻo e falala ʻa ia te tau lava pea kuo pau ke tau ongoʻi maʻu ʻi hotau lotó: “Te u ʻalu ʻo fai ʻa e ngaahi meʻa kuo fekau ʻe he ʻEikí, he ʻoku ou ʻilo ʻoku ʻikai tuku mai ʻe he ʻEikí ha fekau ki he fānau ʻa e tangatá kae ʻikai te ne teuteu ha hala maʻanautolu ke nau lava ai ʻo fai ʻa e meʻa kuó ne fekau kiate kinautolú” (1 Nīfai 3:7).
ʻOku haʻu e falala ko iá mei hono ʻiloʻi ʻo e ʻOtuá. ʻOku fakafou ʻi he ngaahi meʻa nāunauʻia ne hoko ʻi hono Toe Fakafoki Mai ʻo e ongoongoleleí, ʻa ʻetau ongoʻi loto-houngaʻia, ʻo lahi hake ʻi ha toe kakai ʻi he māmaní, ʻi he meʻa kuo fakahā ʻe he ʻOtuá fekauʻaki mo Ia koeʻuhí ke tau falala ai kiate Iá.
Kiate aú, ne kamata ia ʻi he 1820 ʻe ha talavou ʻi ha vaoʻakau ʻi ha faama ʻi Niu ʻIoke. Ne ʻalu atu ʻa e tamasiʻi ko Siosefa Sāmita ko e Siʻí ki ha feituʻu ne lōngonoa peá ne tūʻulutui ʻo lotu ʻi he falala kakato ʻe tali mai ʻe he ʻOtuá. Ko e taimi kotoa ne u lau ai ʻene fakamatalá ne tupulaki ʻeku tui ki he ʻOtuá mo ʻEne kau tamaioʻeikí:
“Naʻá ku mamata ki ha pou maama feʻunga tonu mo hoku ʻulú, naʻe lahi ange hono ngingilá ʻi he laʻaá, ʻa ia naʻe maliu māmālie hifo kae ʻoua kuo tō ia kiate au.
“… ʻI he nofo mai ʻa e māmá ʻiate aú, naʻá ku sio ki he Tangata ʻe toko ua, ʻa ia ko hona ngingilá mo e nāunaú ʻoku ʻikai faʻa lava ke mafakamatalaʻi, ʻokú na tuʻu mai ʻi ʻolunga ʻiate au ʻi he ʻataá. Naʻe folofola mai ʻa e toko taha kiate au, ʻo ne ui au ʻaki hoku hingoá, ʻo ne tuhu ki he tokotahá ʻo pehē—Ko Hoku ʻAlo ʻOfaʻangá ʻEni. Fanongo kiate Ia!” (Siosefa Sāmita—Hisitōlia 1:16–17).
Ne fakahā mai kiate kitautolu ʻe he Tamaí ʻokú Ne moʻui, ko Sīsū Kalaisi Hono ʻAlo ʻOfaʻangá, pea ʻi Heʻene ʻofa kiate kitautolú ne fekauʻi mai ai e ʻAló ke fakamoʻui kitautolu, ko ʻEne fānaú. Pea ʻi heʻeku maʻu ha fakamoʻoni naʻá Ne ui e tamasiʻi taʻeako ko iá ko ha ʻaposetolo mo ha palōfita, ko ia ʻoku ou falala ai ki Heʻene kau ʻaposetoló mo e palōfita he ʻaho ní mo kinautolu ʻoku ui ke ngāue maʻá e ʻOtuá.
ʻOku fakahā hoʻo falala ki he ʻOtuá ʻi hoʻo fakafanongo mo e loto [ʻoku fakataumuʻa] ke ako pea fakatomala, pea ʻalu ʻo fai ha meʻa pē ʻokú Ne kole atu. Kapau te ke falala ki he ʻOtuá ke fakafanongo ki Heʻene pōpoaki fakalotolahí, fakatonutonú, mo e faifakahinohinó mei Heʻene kau tamaioʻeikí, kuo pau ke ke maʻu ia. Pea ka ke toki ʻalu ʻo fai Hono finangaló, ʻe tupulaki ho mālohi ke falala kiate Iá, pea ʻe hokosia e taimi te ke fonu he fakafetaʻi ʻi hoʻo ʻilo kuó Ne falala kiate koe.