“ʻI he Poto ʻo Ia ʻOkú Ne ʻAfioʻi ʻa e Ngaahi Meʻa Kotoa Peé”
Tā fakatātā ʻa Christopher Wormell
ʻI he taimi naʻá ku hū ai ki he senitā akoʻanga fakafaifekaú ko ha faifekau taimi kakató, naʻá ku ʻiloʻi ai naʻe lahi fau ʻa e meʻa ke akó. Ne u fai hoku lelei tahá ke u ako, fakamālohia ʻeku fakamoʻoní, pea mo tanumaki ʻa e fakavaʻe naʻá ku ʻosi maʻú. Ne u faʻa lotu ʻo ʻeke ki he Tamai Hēvaní ha fehuʻi, peá u fekumi leva ki he talí. Naʻe liliu ʻe he tōʻonga ko ʻení ʻeku moʻuí.
ʻI ha ʻaho ʻe taha lolotonga ʻeku ngāue fakafaifekau ʻi Peluú, ne maʻu ʻe ha ʻeletā ha tohi ne talaange ai kuo mate fakafokifā ʻa e tamai ʻa hono kaungāmeʻa mamaé. Naʻá ne tangi ʻaloʻimata. Naʻá ne pehē, “Ko e hā ka tuku ai ʻe he Tamai Hēvaní ke hoko ʻa e meʻá ni?”
Naʻe ongo moʻoni ʻa e fehuʻi ko ʻení ki hoku lotó. ʻI he pō ko iá, naʻá ku tuʻulutui ʻo ʻeke ʻa e fehuʻi tatau ki he Tamai ʻi Langí. Pea ʻi heʻeku fekumi ʻi he Tohi ʻa Molomoná, ne u vakai hifo ki he 2 Nīfai 2:24, ʻa ia ʻoku pehē, “Kae vakai, kuo fai ʻa e ngaahi meʻa kotoa pē ʻi he poto ʻo ia ʻokú ne ʻafioʻi ʻa e ngaahi meʻa kotoa pē.”
Naʻe nofoʻia e potufolofola ko iá ʻi hoku lotó. Naʻá ku ʻave ha kaati ki he ʻeletaá pea fakakau ai ʻa e potufolofola ko iá ko ha konga ʻo ʻeku fakamoʻoní. Naʻá ku fakapapauʻi ange ʻe lelei ʻa e meʻa kotoa pē he ʻoku ngāue ʻa e Tamai Hēvaní ʻi he fakapotopoto. ʻE lava ke tau falala kiate Ia he ʻokú Ne ʻofa ʻiate kitautolu mo ʻafioʻi ʻa e meʻa kotoa pē.
ʻI he hili nai ha taʻu ʻe taha mo e konga mei ai, ne u maʻu ha telefoni taʻeʻamanekina mei heʻeku palesiteni misioná ʻi he lolotonga ia ʻeku ngāue ʻi he ʻotu moʻunga ʻo Peluú. Naʻá ne talamai naʻe pā kalava ʻeku tamaí pea ʻokú ne ʻi ha tuʻunga fakatuʻutāmaki. Hili ha taimi nounou mei ai, ne mālōlō ʻeku tamaí. Naʻá ku fuʻu loto-mamahi ʻaupito, pea naʻe lomekina au ʻe he ngaahi fehuʻi hangē ko e, “Te u ikunaʻi fēfē nai ʻeni?”
Naʻá ku lotu ki he Tamai Hēvaní ke u maʻu ha tali. Ko e ʻuhinga lahí pē he naʻá ku fie ʻilo ki he ʻuhinga naʻe pau ke ʻave ai ʻeku tamaí taʻe te u maʻu ha faingamālie ke u lea māvae kiate iá. Ne u tafoki ki he Tohi ʻa Molomoná, fakaava hake ia peá u lau ʻa e ngaahi lea tatau pē ne u vahevahe mo e ʻeletā ko ia ʻi he ngaahi māhina kimuʻá: “Kae vakai, kuo fai ʻa e ngaahi meʻa kotoa pē ʻi he poto ʻo ia ʻokú ne ʻafioʻi ʻa e ngaahi meʻa kotoa pē.” Ne ʻomi ʻe he ngaahi lea ko iá ha loto-nonga moʻoni kiate au pea naʻá ku maʻu ai ha ʻaloʻofa ʻi he taimi ne u ongoʻi tuenoa aí.
Ne mole atu ʻeku tamai fakamatelié, ka ʻe ʻi ai maʻu pē ʻeku Tamai Hēvaní ke Ne tokoniʻi au. ʻOku fakahoko ʻe he Tamai Hēvaní ʻa e meʻa kotoa pē ʻi Hono potó, pea ʻi heʻetau fekumi mo fai hotau lelei tahá ke tau mateuteú, ʻe lava ke tau maʻu ai ha ngaahi tali mahuʻinga.