Ko e Vakai ki he Kahaʻú, Langaki Hake ʻe he Kuohilí
Ki he tokolahi taha ʻi he māmaní, ʻoku hoko ʻa e taʻu foʻoú ko ha taimi ke nau fakakaukau ai ki he kahaʻú. Ka ko ha toe taimi foki ia ke ako ai mei he kuohilí. ʻI he fetaulakiʻanga ko ʻeni ʻo e feituʻu naʻa tau ʻi aí mo e feituʻu ʻoku tau ʻalu ki ai, ʻoku tau maʻu ai ha ngaahi faingamālie ke tupulaki.
ʻI he laumālie ko iá, ʻoku ʻikai ngata pē ʻi hono fakakau ʻi he pulusinga ko ʻení ha ngaahi liliu foʻou fakafiefia ki he kahaʻú, ka ʻokú ne toe vakaiʻi foki hotau kuohilí kae lava ke mahino hotau tuʻunga ki he kahaʻú.
ʻOku tau fakamanatua he taʻú ni ʻa e taʻu 200 ʻo e ʻUluaki Mata Meʻa-Hā-Maí. Kuo teuteuʻi ʻe he Kau Palesitenisī ʻUluakí mo ha niʻihi kehe ha ngaahi fakamatala hokohoko ʻokú ne siviʻi ʻa e kuohilí pea tokoni ke tau fakapapauʻi hotau kahaʻú. Ko e māhina ní ʻoku tokoni ai ʻa Palesiteni M. Lāsolo Pālati, Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá, ke mahino kiate kitautolu hotau tuʻunga ʻi hono Toe Fakafoki Mai ʻa e puleʻanga ʻo e ʻOtuá pea mo ʻEne ngaahi ngāue ke teuteuʻi kitautolu ki he Hāʻele ʻAnga Ua Maí (vakai peesi 12).
ʻI he palani ko ia ki he kahaʻú, ʻoku toe ʻoatu foki ʻi he pulusinga ko ʻení ha ngaahi maʻuʻanga tokoni ki he polokalama foʻou ʻa e Siasí ke tokoniʻi ʻa e fānaú mo e toʻu tupú (vakai peesi 20 mo e 26) pea mo kamataʻi ʻa e lēsoni ki he Tohi ʻa Molomoná maʻá e fakafoʻituituí mo e ngaahi fāmilí (vakai peesi 34 mo e 38). ʻOku fakafeʻiloaki atu ʻi he konga maʻá e toʻu tupú ʻa e kaveinga foʻou ʻa e toʻu tupú (vakai peesi 56 mo e 60).
ʻOku mau fakatauange ʻe kei hokohoko atu pē ʻa e Liahona ko ha maʻuʻanga tokoni mahuʻinga ʻi hono poupouʻi hoʻomou ako e ongoongoleleí ʻo fakatefito ʻi ʻapí ʻi heʻetau tupulaki fakataha kae poupouʻi ʻe he fakalakalaka ʻo e kuohilí.
Adam C. Olson
ʻĒtita Pulé