ʻOku ou pehē ʻoku faingofua ange he taimi ʻe niʻihi ki he kakai lalahi kei talavoú ke nau tui ko e fakatomalá ko ha meʻa fakailifia. Ko e moʻoni ʻe malava ke fakailifia ʻa hono tala totonu ʻa e meʻa kuo tau faí kapau ʻoku tau ilifia naʻa mole ai ʻa e ʻofá mei he kakai ʻoku tau tokanga ki aí pe mei heʻetau Tamai Hēvaní. ʻI he fakakaukau ko ia ʻo e fakatomalá, ʻe malava ke ʻahiʻahiʻi kitautolu ke tau vete ha ngaahi meʻa “feʻunga pē” ke tau mavahe hake ai mei he meʻa ʻoku hangē ha siví ki he tuʻunga hokó. Ka neongo ia, kuó u ako ʻi heʻeku ngaahi aʻusiá ʻoku ʻikai pehē ʻa e fakatomala moʻoní. ʻOku ʻikai fiemālie maʻu pē ʻa e fakatomalá, ka ʻo kapau ʻe mahino kiate kitautolu ʻa e lahi ʻo e ʻofa mo e fie tokoni ʻa e ʻEikí kiate kitautolú, ʻe mōlia atu ʻa e ilifiá ʻi heʻetau fakamālohia ʻetau tui ki Hono ivi malava ke fakamaʻa kitautolú. Kuó u ako ʻi heʻeku fakamālohia ʻeku tui kia Kalaisí ʻo fakafou ʻi he fakatomalá, ʻoku ʻikai fie maʻu ke tala ʻe heʻeku ngaahi tōnounou he kuohilí ʻa hoku lolotongá mo hoku kahaʻú (laukonga lahi ange ʻi heʻeku talanoa ʻi he peesi 44).
ʻI he ngaahi talanoa fakaʻilekitulōniká pē, ʻoku fakamahinoʻi ai ʻe ʻĒvita ʻoku hanga ʻe he fakatomala moʻoní ʻo ʻai kitautolu ke tau houngaʻia he Fakamoʻuí mo ʻEne Fakaleleí pea ʻomi ai ha mālohi ke tau tekeʻi ʻa e ʻahiʻahí he kahaʻú. Naʻe toe pehē ʻe Lia ʻoku ʻikai fie maʻu ia ke tau tatali ki he sākalamēnití ʻi he Sāpaté—ʻoku ʻomi ʻe he tafoki ki he ʻEikí ʻo fakafou ʻi he fakatomala fakaʻahó ha mālohi ke tau veteki ʻa e fanga kiʻi tōʻonga moʻui ʻokú ne tohoakiʻi kitautolu meiate Iá. Pea kapau te tau fai ha ngaahi angahala mamafa, ʻoku vahevahe ʻe Soili ʻoku lava ʻe he fakatomalá ʻo akoʻi mai ʻa e ʻofa ʻa e Fakamoʻuí ki he tokotaha kotoá.
Ko e fakatomalá ko ha meʻaʻofa ia ʻoku ou houngaʻia ke maʻu ʻi heʻeku moʻuí. ʻOku ʻafioʻi ʻe he ʻOtuá ʻoku tau kei tangata pē pea ʻoku tau fai ha ngaahi fili hala he taimi ʻe niʻihi. Neongo ʻetau taʻehaohaoá, ka ʻoku kei ʻi ai pē ha ʻamanaki lelei maʻatautolu. Kapau te tau tuku ʻetau falalá ki he Fakamoʻuí, te Ne ʻaʻeva mo kitautolu ʻi he hala foki ki heʻetau Tamai ʻi Hēvaní—neongo pe ko e hā hono lōloá.