Ko e Fāʻofua Lelei Tahá!
ʻOku nofo e tokotaha naʻá ne fai e talanoá ʻi ʻIutā, USA
Naʻe saiʻia ʻa ʻEle he fāʻofuá. Fāʻofua mei heʻene Tangataʻeikí. Fāʻofua mei heʻene Kui Fefiné mo e Kui Tangatá. Fāʻofua mei heʻene Mamí. Naʻá ne ongoʻi māfana ʻi he fāʻofuá. Mo malu. Mo fiefia.
Ko e ʻuhinga ia ne fāʻofua ai ʻa ʻEle ki heʻene Mamí lolotonga e lotú. Naʻá ne manako ke huki ʻi heʻene Mamí. Naʻe faʻa kuku maʻu mai pē ia ʻe heʻene Mamí.
Naʻe tuku leva ʻa e houalotu sākalamēnití. Ko e taimi leva ʻeni ki he Palaimelí. Naʻe manako ʻa ʻEle ʻi he Palaimelí. Kuó ne fefine lahi he taimí ni. Kuó ne taʻu tolu! Naʻe ʻi ai foki mo ʻene tohi folofola pē ʻaʻana!
Ka ko e ʻaho ní naʻe fie fāʻofua pē ʻa ʻEle ia ki heʻene Mami ʻo taʻengata.
Naʻe fua ʻe Mami ʻa ʻEle ʻi he holó. Naʻe fakatangutu ʻe Mami ʻa ʻEle ʻi ha sea ʻi he loki Palaimelí.
“ʻE lava ke ta ʻalu pē?” Ko ʻEle ange ia.
Ne tali ange ʻe heʻene Mamí “ʻIkai.” Naʻá ne leʻo angaʻofa. Naʻá ne pehē ange, “ʻOku fie maʻu ke ke nofo ʻi hoʻo kalasí. Pea ʻoku fie maʻu ke u ʻalu ki heʻeku kalasí.”
Naʻe ʻuma ʻa Mami ki he kouʻahe ʻo ʻElé. Peá ne hū leva ki tuʻa he matapaá.
Naʻe ongoʻi ʻe ʻEle ʻa e lele hifo e loʻimatá ʻi hono kouʻahé.
Naʻá ne fakakaukau ki hono puke ia ʻe heʻene Mamí. Naʻe huki maʻu pē ia ʻe heʻene Mamí ʻi he taimi ne na lau ai ʻa e Tohi ʻa Molomoná. Naʻá na faʻa laukonga maʻu pē mo e fāmilí. Ka ko e taimi ʻe niʻihi naʻe faʻa laukonga toko ua pē ʻa ʻEle ia mo ʻene Mami.
Naʻe toʻo hake ʻe ʻEle ʻene Tohi ʻa Molomoná. Naʻe ʻi loto ha fakatātā ʻo Sīsū.
Naʻe tāpuniʻi ʻe ʻEle ʻa e tohí peá ne fāʻofua ki ai. Naʻá ne ongoʻi ʻo hangē ʻokú ne fāʻofua kia Sīsuú. Naʻá ne ongoʻi māfana. Mo malu. Mo fiefia. Ne hoko ia ko e fāʻofua lelei tahá!