ʻOku Mahuʻinga ʻa e Angaʻofá
Ko e Kole Fakamolemolé
ʻI ha ʻaho ʻe taha lolotonga ʻa e akó, naʻe fakakata ʻaki ʻe ha niʻihi ʻo hoku kaungāakó ha tokotaha ako ʻe taha ʻo nau lumolumaʻi ʻaki ia ha ngaahi hingoa. Naʻe ngali fakaoli ia, pea ne u kau fakataha leva mo kinautolu. Naʻe laulau uike ʻa ʻeku fakakata ʻaki ia mo hoku ngaahi kaungāmeʻá.
Hili ha ngaahi uike mei ai, naʻe talamai ʻe he tamasiʻí ʻa e ongo naʻá ne maʻú. Naʻá ne loto-mamahi koeʻuhí ko ʻemau ngaahi leá neongo naʻá ne fakangalingali pē naʻe ʻikai ke ne tokanga ki heʻemau fakakata ʻaki iá. Naʻá ne pehē naʻá ne tangi he pō kotoa pē. Naʻá ku meimei tangi ʻi heʻene talamai ʻení. Naʻá ku fie tokoni kiate ia peá u fakakaukau ke u kole fakamolemole koeʻuhí ko e meʻa kuó u lea ʻaki kiate iá.
ʻI he ʻaho hono hokó, ne u ʻalu atu kiate ia ʻo hili hoku nimá ʻi hono umá. Ne u pehē ange, “ʻOku ou kole fakamolemole atu ʻi heʻeku fakakata ʻaki koé.” Naʻá ne kamo pē mo hangē ka ne meimei tangí. Ka naʻe kei fakakata ʻaki pē ia ʻe he tamaiki kehé. Naʻá ku manatuʻi leva ʻa e meʻa ne u ako ʻi he kalasi Palaimelí: fili ki he totonú.
Ne u loto-toʻa ʻo talaange ki hoku kaungāakó, “Tuku hoʻomou fakakata ʻaki iá! ʻOku mou ʻiloʻi ʻene faingataʻaʻia ʻi he meʻá ni? Mou kātaki ʻo kole fakamolemole kiate ia ʻi he meʻa kuo mou faí pea hoko ko hano kaungāmeʻa.”
Ka naʻe ʻikai faingofua ke nau liliu. Ne nau ʻita mai kiate au ʻo pehē mai, “Ko e hā e meʻa ʻoku hoko fakafokifā kiate koé? Naʻá ke kau pē mo koe he fakakata ʻaki iá!”
Ne u kei ongoʻi halaia pē ʻi he meʻa ne u fai kimuʻá. Ko ia ne u pehē ange ai, “Naʻá ku ʻosi kole fakamolemole au ki ai. ʻOku ou loto ke mahino kiate kimoutolu e ongo ʻokú ne maʻú pea tuku hoʻomou fakakata ʻaki iá.”
Naʻe ʻi ai ha taha ʻiate kinautolu naʻá ne kole fakamolemole, pea ne mau hoko toko tolu ko ha ngaahi kaungāmeʻa lelei. ʻOku kei fakakata ʻaki pē ia ʻe ha niʻihi tokosiʻi, ka ʻokú ne ongoʻi fiefia ange he feohi mo kimauá. Te u fili ki he totonú ʻi heʻeku tokoniʻi haʻaku kaungāmeʻa ʻoku faingataʻaʻia.