Ko ʻEku Meʻa ke Fai he Konifelenisí
ʻĪmisi
man walking down a dirt road
“Naʻe talamai ʻe haku kaungāmeʻa lolotonga ʻene lau e ngaahi pōpoaki konifelenisi lahí, naʻá ne faʻu ha lisi ʻo e meʻa kuo kole mai hotau kau taki faka-Siasí ke tau faí. Peá ne fakaʻaongaʻi leva ʻene lisí ke fokotuʻu ʻaki ha ngaahi taumuʻa ʻe tokoni ke ne muimui ai ki heʻenau faleʻí. Ne u pehē ke kamata haʻaku lisi pē ʻaʻaku. Kuo hoko ha liliu heʻeku fakalaulauloto ki he ngaahi pōpoakí mo fakakaukauʻi e meʻa ke u faí. ʻOku tokoni moʻoni ia ke u fakatefito ʻi he meʻa ʻoku mahuʻinga tahá.”
—Edna Washburn, Utah, USA
Ko e hā ʻoku kehe hoʻo faí koeʻuhí ko e meʻa naʻá ke ako mei he konifelenisi lahí? Fakahū mai ho‘o talanoá ʻi he liahona.lds.org pe vahevahe ia ʻi he facebook.com/liahona.
Ko ha fanga kiʻi fakaafe ʻeni ne tau fanongo ki ai ʻi he konifelenisi lahí. Fakakaukau ke fakamanatu e ngaahi leá ke toe tānaki atu ki he ngaahi fakaafe ʻoku lisi ko ʻení.
“Fakakaukauʻi e meʻa ʻe lava ke tau fai ke tau toe tali lelei ange, mo fietokoni ki he [kaungāmeʻa foʻoú], ʻo kamata he Sāpate hokó” “Taha ʻia Kalaisi Liahona, Nov. 2018, 39).
“Lau fakaʻaulikiki mo fakakaukauloto ki he fakahā ko ʻeni [ʻo e meʻa-hā-mai ki hono huhuʻi ʻo e pekiá, ʻoku hā ʻi he Tokāteline mo e Ngaahi Fuakava 138 ]” (M. Russell Ballard, “Ko e Meʻa-hā-mai ʻo e Huhuʻi ʻo e Kau Pekiá Liahona, Nov. 2018, 73).
“Foki ki he fale ʻo e ʻEikí mo ho loto kuo kafó mo hoʻo ngaahi hingoa fakafāmilí ʻi he lahi taha te ke lavá” (Neil L. Andersen, “Kuo Kafo Liahona, Nov. 2018, 85).
Ngaahi Tali ki ha NGAAHI FAKAKAUKAU
Naʻe ʻi ai haʻaku fakamoʻoni, ka kimuí ni mai kuo faingataʻa ke u tui ʻoku ʻi ai ha ʻOtua. ʻE lava nai ke toe mālohi ʻeku tuí ʻo hangē ko ia ʻi muʻá?
“Ki ha niʻihi, ʻoku faingataʻa ʻa e ngāue ke tuí. ʻOku faʻa fakafeʻātungiaʻi ia ʻe heʻetau hīkisiá. Mahalo ʻoku tau fakakaukau koeʻuhí ko ʻetau potó, ako leleí, pe ngaahi aʻusiá, ʻoku ʻikai pē lava ia ke tau tui ki he ʻOtuá. Pea kamata ke tau vakai ki he tui fakalotú ko ha tukufakaholo fakavalevale.
“ʻI heʻeku aʻusiá, ko e tuí ʻoku ʻikai hangē ha tā valivali ʻoku tau mamata mo saiʻia ai pea tau aleaʻi mo fokotuʻu fakakaukau ki ai. Ka ʻoku hangē ia ha palau ʻoku tau ʻave ke ne palauʻi ha ngaahi ʻotu he konga kelekelé, ʻo tau ngāue mālohi ke tō ha ngaahi tenga ke maʻu ai ha fua.
“ʻUnuʻunu atu ki he ʻOtuá, pea ʻe ʻunuʻunu mai Ia kiate kimoutolu. Ko e talaʻofa ʻeni kiate kinautolu kotoa ʻoku fekumi ke tuí.”
ʻEletā Dieter F. Uchtdorf ʻo e Kōlomu ʻo e Kau ʻAposetolo ʻe Toko Hongofulu Mā Uá, “Tui, ʻOfa, Ngāue Liahona, Nov. 2018, 47.
Ko e hā ha ngaahi fehuʻi naʻá ke maʻu ne tali atu ʻi ha meʻa naʻá ke fanongo ai ʻi he konifelenisí? Vahevahe hoʻo aʻusiá ʻi he facebook.com/liahona .
ʻĪmisi
Christ sitting with child from Bible videos
“Ko e ngaahi meʻa lelei taha ʻi he moʻui ko ʻení ʻoku fakatefito ia ʻia Sīsū Kalaisi pea mo e mahino ʻo e ngaahi moʻoni taʻengata pe ko hai Ia pea ko hai kitautolu ʻi heʻetau fetuʻutaki mo Iá.
ʻEletā Jack N. Gerard ʻo e Kau Fitungofulú, “Ko e Taimí ʻEni Liahona, Nov. 2018, 109.
Uku Loloto Angé
Ko e Toʻo Hono Huafá
Naʻe fakamanatu mai ʻe Palesiteni Russell M. Nelson ʻa hono mahuʻinga ke toʻo e huafa ʻo e Fakamoʻuí kiate kitautolú—ʻi heʻetau hoko ko ha kau ākonga mo e kāingalotu ʻo Hono Siasí. Naʻá ne pehē, “ʻI he taimi ʻoku tau toʻo ai Hono huafá mei Hono Siasí, ʻoku ʻikai ke tau fakatokangaʻi ʻetau toʻo ai Ia mei Heʻene hoko ko e ʻelito ʻo ʻetau moʻuí.
“ʻOku kau ʻi hono toʻo kiate kitautolu ʻa e huafa ʻo e Fakamoʻuí, ʻa ʻetau talaki mo fakamoʻoni ki he niʻihi kehé—ʻo fakafou ʻi heʻetau ngāué mo ʻetau ngaahi leá—ko e ʻa Sīsū” (“Ko e Hingoa Totonu ʻo e Siasí Liahona, Nov. 2018, 88). Naʻe tokolahi foki mo ha kau taki ne nau fakaafeʻi kitautolu ke tau fakalaulauloto ki he founga te tau lava ʻo toʻo ke lelei ange Hono huafá kiate kitautolú.
Naʻe fakaafeʻi kitautolu ʻe Palesiteni Henry B. Eyring, ke tau fai ha fehuʻi ʻe ua kiate kitautolu takitaha “Ko e hā kuo pau ke u fai ke toʻo Hono huafá kiate aú?“ mo e ”Te u ʻiloʻi fēfē ʻa e taimi ʻoku ou fakalakalaka aí?” (“Feinga, Feinga, Feinga Liahona, Nov. 2018, 91).
Naʻe ʻomi ʻe ʻEletā Robert C. Gay ha founga ʻe tolu ʻe lava ke tau toʻo ai kiate kitautolu e huafa ʻo e Fakamoʻuí (vakai, “Ko Hono Toʻo Kiate Kitautolu ʻa e Huafa ʻo Sīsū Kalaisí Liahona, Nov. 2018, 97–99).
Naʻe akoʻi mai ʻe ʻEletā Paul B. Pieper ʻa e ʻuhinga ke toʻo moʻoni kiate kitautolu ʻa e huafa ʻo Sīsū Kalaisí (vakai, “Kuo Pau ke Toʻo Kiate Kinautolu Kotoa ʻa e Huafa kuo ʻOmi ʻe he Tamaí Liahona, Nov. 2018, 43–45).
Fakakaukau ke hiki ʻi hoʻo tohinoá ʻa hoʻo ngaahi fakakaukaú mo e ongo ʻokú ke maʻu lolotonga hoʻo ako ki he ʻuhinga ʻo e toʻo kiate koe e huafa ʻo e ʻEikí.