Senē, ʻAositelēlia

ʻĪmisi

Sydney Australia

ʻI he matāfanga ʻo e taulanga fakaʻofoʻofa ʻo Seneé ʻoku tuʻu ai ha falelotu ʻa ia ʻoku maʻulotu ai ha haʻofanga ʻe 4 ʻo e haʻofanga Kāingalotu ʻe 309 ʻo e Siasí ʻi ʻAositelēliá: ʻa ia ʻoku takitaha ai ʻa e lea faka-Pilitāniá, lea faka-Tongá, lea faka-Sipeiní, mo e lea faka-Siaina Manitaliní. ʻOku angamaheni pē ʻa e faʻahinga kulupu kehekehe pehení ʻi Senē, ʻa ia ko ha feituʻu ʻoku fele ai ʻa e ngaahi tākiekina fakafonua mei he tapa kehekehe ʻo māmaní.

Naʻe fakafeʻiloaki ʻa e Siasí ki ʻAositelēlia ʻi he 1840 ʻe ha talavou taʻu 17 mei Pilitānia Lahi ko Uiliami Sēmisi Pālati. Naʻá ne papitaiso ʻa e fuofua papi ului ʻAositelēliá ko Lōpeti Pousamí, ʻa ia naʻe hoko kimui ko ha palesiteni fakamisiona.

Naʻe fehangahangai ʻa e fuofua kāingalotu ʻi ʻAositelēliá mo e ngaahi fakaanga taʻeʻofa ʻa e ʻū nusipepá, pea naʻe hikifonua ha kāingalotu tokolahi ki ʻIutā, USA. Ka naʻe kātaki pē e Kāingalotu ʻo e Siasí ʻi ʻAositelēliá, pea ʻi he ʻosi ha ngaahi taʻu mei ai naʻe kamata ke tupulaki ʻa e Siasí. ʻI he ʻaho ní, ʻoku hoko ʻa ʻAositelēlia ko e nofoʻanga ia ʻo e kāingalotu ʻe toko 151,000 tupu, pea kuo maʻu ʻe he Kāingalotu ʻo e Siasí ha ngaahi fakahikihiki mei he kau faiongoongó ʻi hono ʻomi e tokoni ʻofa fakaetangatá hili e ngaahi fakatamaki fakaenatulá hangē ko e vela ʻa e vaotaá mo e afaá.

Naʻe fokotuʻu ʻa e fuofua misiona ʻi ʻAositelēliá ʻi he 1851, pea ʻi he taimi ní kuo aʻu ʻo misiona ʻe ono.
Naʻe langa ʻa e fuofua ʻapisiasi LDS ʻi ʻAositelēliá ʻi Pilisipeini ʻi he 1904.
Naʻe fakatapui ʻa e Temipale Senē ʻAositelēliá ʻi he 1984, pea hoko ai ki he ngaahi temipale ʻi ʻAtelaite (2000), Melipoane (2000), Peefi (2001), mo Pilisipeini (2003).