Fakaʻohovale he Faiʻaho ʻo ʻIngikulití
Naʻe hoko ʻa e talanoá ni ʻi Mekisikou. ʻAlu ki he peesi K8 ke ako lahi ange kau ki he fonua ko iá!
“Haʻu kia Kalaisi, pea piki maʻu ki he meʻa-foaki lelei kotoa pē” (Molonai 10:30).
“Estas son las mañanitas …”
Naʻe ofo hake ʻa ʻIngikuliti ʻi he hiva ʻa Mamá. Naʻá ne ʻā hake ʻo sio atu kia Mama ʻokú ne hū mai ki hono lokí. ʻOku faʻa hivaʻi maʻu pē ʻe Mama ha hiva makehe ʻi hono ʻaho fāʻeleʻí.
“Ke monūʻia ho ʻahó!” Ko Mama ange ia. “Tau teuteu ke tau paati.”
Naʻe nāmuʻi ʻe ʻIngikuliti ha keke sokoleti ʻoku taʻo ʻi he ʻōvaní. Naʻá ne fakakaukau, “Pe ko e hā nai e ngaahi meʻaʻofa te u maʻú!” Naʻá ne hifo mei he mohengá ʻo sio ki tuʻa he luvá. Naʻe matala lanu vāleti ʻa e fuʻu kāsia ʻi tuʻá.
Naʻe tokoni ʻa ʻIngikuliti ke teke ʻa e sea sofá ki he loki ʻo Mamá ke fakaʻataʻatā e lotofalé. Naʻá ne tokoni ke vali e kilimi e keké mo fokotuʻu ha foʻi teʻelango ʻe fitu ki ai. Ne taimi nounou pē kuo hokosia e taimi ke fai ai e pātí.
Naʻe haʻu e ngaahi kaungāmeʻa ʻo ʻIngikuliti he akó mo e Palaimelí. Naʻa nau vaʻinga mo kai keke. Naʻe aʻu leva ki he taimi naʻe saiʻia taha ai ʻa ʻIngikulití—ʻa e meʻaʻofá! Naʻá ne maʻu ha tohi foʻou, ko ha taika tamapua mo ha vesa.
Hili e mātuku ʻa e kakaí, naʻe fāʻofua ʻa ʻIngikuliti kia Mama. “Mālō ʻaupito, Mama. Ko e faiʻaho lelei tahá ʻeni!”
Naʻe pehē ange ʻe Mama, “ʻOku teʻeki ke ʻosi. ʻOku ʻi ai haʻaku meʻaʻofa makehe maʻau.” Naʻá ne mono ange kia ʻIngikuliti ha laʻipepa. Naʻe tohi ai, “Taimi ke mohe!”
Naʻe talaange ʻe Mama, “Ko ha kiʻi fakahinohino ʻena. Kuo pau ke ke kumi ʻa e fakahinohino hokó.”
Naʻe fakatovave ʻa ʻIngikuliti ki hono lokí. Naʻá ne maʻu ha laʻipepa ʻe taha ʻi hono lalo piló. Naʻe tohi ai, “ʻAho tā fō.”
Naʻe lele ʻa ʻIngikuliti ki peito ʻo fakaava ʻa e mīsino foó. Ko ha fakahinohino ia ʻe taha!
Naʻe maʻu ʻe ʻIngikuliti ha ngaahi fakahinohino kehe ʻi he tuʻa TV, ʻi loto he tohi ʻokú ne manako taha aí mo e lalo kāpetí. Naʻe maʻu e fakahinohino fakamuimuí ʻi hono loto kōpate valá. Naʻe ʻi ai ha puha naʻe kofukofuʻi ʻi he funga laupapá. Naʻe ʻikai ke lōloa feʻunga ʻa ʻIngikuliti ke ne aʻu ki ai, ko ia naʻe toʻo hifo ia ʻe Mama.
Naʻe hae ʻe ʻIngikuliti ʻa e kofukofú pea fakaava ʻa e tāpuní. Naʻe faʻo ʻi he loto puhá ha tupenu hinehina naʻe tā pelupelu mo ha fuʻu tohi lahi ʻo e Tohi ʻa Molomoná.
Naʻe pehē ange ʻe Mama, “Ko e taʻu foʻoú te ke papitaiso ai. Ko ha meʻaʻofa makehe ʻeni ke ne tokoniʻi koe ke ke mateuteu ki ai.” Naʻe toʻo hake ʻe Mama ʻa e konga tupenu hinehiná. “Ko e tupenu ʻeni te u fakaʻaongaʻi ke ngaohi ʻaki hoʻo kofu papí. Pea ko ʻeé”—naʻá ne toʻo hake e Tohi ʻa Molomoná—“ko e ʻai ia ke ke lau.”
Naʻe sio hake ʻa ʻIngikuliti kia Mama. “ʻOku teʻeki ke u lau tuʻo taha e Tohi ʻa Molomoná.”
“ʻOku ou ʻilo te ke lavaʻi pē ia.” Naʻe fakaava hake ʻe Mama ʻa e tohí. “Sio ki hē. ʻOku lalahi makehe ʻa e mataʻitohí. Mahalo ʻe faingofua ange ia.”
Naʻe tāpuniʻi ʻe Mama ʻa e tohí peá ne ʻoange ia kia ʻIngikuliti. Naʻe ala ʻa ʻIngikuliti ki he takafi molemolé.
Naʻe talaange ʻe Mama, “ʻOku mahuʻinga ke ke fekumi pē ʻiate koe pe ʻoku moʻoni nai e Tohi ʻa Molomoná. ʻOku ou palōmesi atu, kapau te ke lau mo lotu fakamātoato, ʻe tokoniʻi koe ʻe he Tamai Hēvaní ke ke ʻiloʻi.”
Naʻe lau ʻe ʻIngikuliti ʻi he pō ko iá ʻa e fuofua vahe ʻi he Tohi ʻa Molomoná. Naʻe ʻikai ke faingataʻa ia ʻo hangē ko ia naʻá ne fakakaukau ki aí. Naʻá ne saiʻia he lau folofolá.
Naʻá ne toe lau pē ʻene Tohi ʻa Molomoná ʻi he ʻaho hono hokó. Pea mo e ʻaho hoko aí. Naʻá ne lau ia he ʻaho kotoa pē. Hili pē ha ngaahi uike, naʻá ne fakakaukau naʻe ʻikai ke ne toe fie tatali ke toki lotu pē ki ai he fakaʻosinga ʻo e tohí.
Naʻe tūʻulutui ʻa ʻIngikuliti ʻi hono veʻe mohengá. Naʻá ne lotu fakamātoato ʻo kole ki he Tamai Hēvaní ke tokoniʻi ia ke ne ʻiloʻi ʻoku moʻoni e Tohi ʻa Molomoná. Naʻá ne talitali leva. Naʻá ne fakakaukau te ne ongoʻi ha leʻo, ka naʻe ʻikai. Ka naʻá ne ongoʻi ha fiefia makehe ʻi hono lotó. Naʻá ne ʻiloʻi ne tali ʻe he Tamai Hēvaní ʻene lotú.
ʻI he hili ha mei taʻu ʻe taha mei ai, ne ʻosiki ʻe ʻIngikuliti ʻa hono lau e Tohi ʻa Molomoná. Naʻá ne ʻiloʻi naʻe tatau ai pē pe ko e hā e meʻaʻofa naʻá ne maʻu ʻi hono faiʻaho taʻu valú, ko e meʻaʻofa lelei tahá ʻa e Tohi ʻa Molomoná! ●