Naʻá ne Fakanonga ʻa e Ngaahi Vaí
ʻOku ou nofo ʻi Vanuatu, ko ha ʻotumotu ʻi he ʻŌseni Pasifiki Tongá. Naʻá ku fiefia ʻaupito he hokosia hoku taʻu valú kae lava ke u papitaiso mo hilifakinima.
Ka naʻá ku hohaʻa fekauʻaki mo hono teu papitaiso au ʻi he tahí ʻi muʻa ʻi hoku ʻapí koeʻuhí ʻe lava ke aake mai ʻa e ngaahi fuʻu peaú ai. ʻOku fakalata e vaʻinga ʻi he ngaahi fuʻu peaú, ka naʻe ʻikai ke u fakapapauʻi pe ʻe fēfē ʻeku papitaiso aí. Naʻá ma luelue atu he veʻe tahi ofi homau ʻapí mo ʻeku fineʻeikí ke ma sio pe ʻoku fēfē, peá u ʻilo ʻe SAI pē.
Naʻá ma fili ʻa e ʻaho ke fai ai hoku papitaisó, pea naʻá ku fiefia ʻaupito. Ka naʻe ofi mai ha matangi ki homau motú. Naʻe pau ke mau telefoni ki he palesiteni fakavahefonuá ʻo kaniseli hoku papitaisó.
Neongo naʻe ʻi ai ha kiʻi tāfea mei he matangí, naʻe lava ke mau ʻalu ki he lotú he Sāpate ko iá. Naʻe fanongonongo ʻe he palesiteni fakavahefonuá te u papitaiso ʻi he Tokonakí.
ʻI he pongipongi Tokonakí, naʻe lalahi ʻaupito e ngaahi peaú, ko ia naʻá ku kiʻi ilifia. Naʻá mau fakataha ʻi hoku ʻapí, pea mau lue kotoa atu leva ki he matātahí. Ne u kole ki hoku tokoua ko Siuá ke ne papitaiso au.
Naʻe fua au ʻe Siua ʻi ʻolunga mei he ngaahi peaú ʻi heʻema lue atu ki lotó, ka ʻi he teu ke u papitaisó, naʻe nonga ʻa e ngaahi peaú. ʻOku ou tui ne fakanonga ʻe Sīsū e tahí maʻaku lolotonga hono fakahoko ʻe Siua e lotu ʻo e papitaisó.
ʻI heʻemau foki mai mei he lototahí, naʻe toe luafasi mai ʻa e peaú, ka naʻe ʻikai ke u toe tokanga ki ai koeʻuhí kuó u ʻosi meleuku kakato au. ʻOku ou fiefia ʻaupito ʻi he hokosia hoku taʻu valú pea lava ke u muimui ai ki he sīpinga ʻa Sīsuú ʻaki hono papitaiso aú. ʻOku ou ʻilo ʻoku fanongo mai ʻa e Tamai Hēvaní ki heʻeku ngaahi lotú. ●