ʻOkú ne Fie Maʻu ʻa e Lelei Tahá Maʻaku
Fai ʻeʻEletā Hugo E. Martinez
ʻO e Kau Fitungofulú
“ʻOku [ʻofa ʻa e Tamai Hēvaní ʻiate au]” (Tohi Hiva ʻA e Fānaú, 228).
ʻI heʻeku kei siʻí, naʻá ku saiʻia ke u fai ʻa e ngaahi meʻa naʻe fai ʻe heʻeku tamaí. Naʻá ne hoko ko ha toketā. Ne u faʻa ʻalu mo ia ki he falemahakí, ʻa ia ne u sio ai kiate ia ʻi heʻene tokoniʻi e kau mahakí. Naʻe ueʻi au heʻeku sio ki heʻeku tangataʻeikí ke u fie hoko foki ko ha toketā.
ʻI he ʻaho ʻe taha naʻá ku lue ai ki he falemahakí mo ʻeku tangataʻeikí. Naʻe hū mai ha toketā ʻe taha ki tuʻa. Naʻá ne sio mai kiate au peá ne ʻeke ange ki heʻeku tangataʻeikí, “Ko ho fohá ʻeni?” Naʻe tali ange ʻe heʻeku tangataʻeikí, ʻio. Naʻe tūʻulutui hifo e toketā ʻo ne sio mai kiate au. Naʻá ne ʻeke mai, “Ko e hā te ke fai ʻi hoʻo tupu haké?”
Naʻá ku talaange, “ʻOku ou fie hoko ko ha toketā ʻo hangē ko ʻeku tamaí.” Naʻá ne tali mai leva, “Sai, ʻoku ou ʻamanaki pē te ke hoko ko ha toketā lelei ʻo hangē ko iá.” Ka naʻe pehē mai ʻe heʻeku tamaí, “ʻIkai, ʻoku ou fie maʻu ke lelei ange ia ʻiate au.”
Naʻe tokoni lahi ia kiate au ke u ʻiloʻi ai ʻa e ʻofa lahi ʻeku tamaí ʻiate aú. Naʻá ne fie maʻu ʻa e lelei tahá maʻaku.
Hili ha ngaahi taʻu mei ai naʻá ku toe fakakaukau ki he momeniti ko iá. Naʻe akoʻi au mo hoku uaifí ʻe he kau faifekaú. Naʻe fehuʻi mai ʻe he kau faifekaú kiate au, “ʻOkú ke tui te ke lava ʻo hoko ʻo hangē ko e ʻOtuá?” Naʻe teʻeki ke u fakakaukau ki ai. Ka naʻá ku fakakaukau, “Kapau ko ʻeku Tamaí ʻa e Tamai Hēvaní, te Ne finangalo ke u maʻu ʻa e lelei tahá, ʻo hangē ko e fie maʻu ʻeku tamaí. Te Ne fie maʻu ke u lava ʻo hoko ʻo hangē ko Iá.” Ko ia naʻá ku talaange ki he kau faifekáu, “ʻIo, ʻoku ou tui te u lava ʻo hangē ko ʻeku Tamai Hēvaní.”
ʻI he momeniti naʻá ku tali aí, naʻá ku ʻilo ʻoku moʻoni ʻa e meʻa ne u lea ʻakí.
ʻOku ou loto ke ke ʻilo ʻoku ʻofa lahi atu ʻaupito hoʻo Ongo Mātuʻa Fakalangí kiate koe. ʻOkú na fie maʻu ʻa e lelei tahá maʻau. Te ke lava ʻo hoko ʻo hangē ko Kinauá. ●