Rikanaan ro rej kōnono kōn kajoor in Jetōb Kwojarjar
Jān Elder Ulisses Soares
Jān Doulul eo an Jon̄oulruo Rijilōk ro
An wōr juon rikanaan ej juon kōkkaļļe an iakwe eo an Anij n̄an ajri ro Nejin. Rej kwaļo̧k kallim̧ur ko im kadkad eo em̧ool an Anij im an Jisōs Kraist.
Ro jeiū im jatū, jekdo̧o̧n ia kom̧ maron̄ pād ie, ikōņaan kwaļo̧k aō kam̧oolol em̧ilaļ im m̧ool kōn bout in rejtake eo ami inne. Ij en̄jake aō ban kōnono im rum̧wij aō kōnono āinwōt Moses, ij kaenōm̧m̧an eō make ilo naan ko an Irooj n̄an e:
“Wōn ear kōm̧anm̧an lo̧n̄iin armej? ak wōn ej kōm̧m̧an armej bwe en ban kōnono ak jarron̄ron̄ ak pilo? E jab N̄a Irooj ke?
“Kiiō, kwōn ilo̧k, im Inaaj ilo lo̧n̄iim, im naaj katakin eok ta eo kwōnaaj ba” (Exodus 4:11–12; bar lale eoon 10).
Ij barāinwōt bōk aenōm̧m̧an im jipan̄ jān kōrā eo pāleeō ejitōn bōro. Ekar juon waanjon̄ak eo kōn em̧m̧an, iakwe, im lukkuun wūjlepļo̧k n̄an Irooj im n̄a im baam̧le eo aō. Ilukkuun in iakwe e, im ij kam̧m̧oolol kōn kareel eo em̧m̧an ewōr ippān n̄an kōm̧.
Ro jeiū im jatū, ikōņaan kam̧ool n̄an kom̧ bwe Būreejtōn Russell M. Nelson ej rikanaan eo an Anij ioon laļ in. Ijjan̄in loe juon armej eļapļo̧k an jouj im iakwe jān e. Men̄e ikar en̄jake aō jab wājebdik kōn kūr in ekwojarjar, naan ko an im an retok ejouj ilo mejān ilo an letok eddo in ekar kōm̧m̧an aō en̄jake kautiej jān iakwe eo an Rilo̧mo̧o̧r eo. Kom̧m̧ool, Būreejtōn Eyring. Ij rejtake eok im iakwe eok.
Ejjab ke juon kōjeraam̧m̧an bwen wōr juon rikanaan, rilolo, im rikwaļo̧k revelesōn ro ioon laļ in ilo raan kein jej mour ie, ro rej pukot n̄an jeļā ankilaan Irooj im ļoor e? Ej juon kaenōm̧m̧an n̄an jeļā bwe jejjab make iaad ilo laļ in, mekarta apan̄ ko jej jelm̧ae ilo mour in. An wōr juon rikanaan ej juon kōkkaļļe an iakwe eo an Anij n̄an ajri ro Nejin. Rej kwaļo̧k kallim̧ur ko im kadkad eo em̧ool an Anij im an Jisōs Kraist n̄an armej ro Aer. Ikar ekkatak men in jān en̄jake ko aō.
Jon̄oulralitōk iiō remootļo̧k, kōrā eo pāleeō im n̄an kom̧ro kar bōk juon ko̧o̧ļ ilo taļboon jān Būreejtōn James E. Faust, innām jān Rikakpilōklōk eo Kein Karuo ilo Būreejtōnji eo Kein Kajuon. Ekar kūr kōm̧ n̄an jerbal āinwōt mijen būreejtōn im kōmpānien ilo Portugal. Ekar jiron̄ kōm̧ bwe ewōr wōt am jiljino wiik ko m̧okta jān am jino mijen eo. Men̄e kōm̧ kar en̄jake am jab pojak im jab wājebdik, kōm̧ kar bōk kūr eo. N̄ūrbōktak eo am eļaptata iien eo ekar n̄an ebbōk visa ko remenin aikuj n̄an jerbal ilo laļ eo kōnke, ekkar n̄an en̄jake ko m̧oktaļo̧k, kōm̧ jeļā bwe jerbale visa ebōk jiljino n̄an ruwalitōk allōn̄ ko n̄an aer dedeļo̧k.
Būreejtōn Faust innām ekar kajjitōk bwe eļan̄n̄e enej wōr am tōmak ilo Irooj enaaj kōm̧m̧ane juon kabwilōn̄lōn̄ im bwe kōm̧ maron̄ in ņamejļan jorrāān eo kōn m̧ōkaj in visa. Uwaak eo am ekar juon aaet kileplep im kōm̧ kar jino kōm̧m̧an karōk ko iien eo em̧ōkajtata. Kōm̧ kar kōpooji peba ko remenin aikuj n̄an visa ko, bōk jilu ajri reddik, im etal n̄an opiij an kien jon̄an wōt am maron̄ m̧ōkaj. Juon kōrā ejouj ekar ioon kōm̧ ijo. Ke ej etale peba ko am im jino jeļā kōn ta eo kōm̧ij itōn kōm̧m̧ane ilo Portugal, ekar oktaktok n̄an kōm̧ im kajjitōk ippem, “Mool ke kom̧ij tōn jipan̄ armej ro ilo laļ eo aō?” Kōm̧ ar kapen uwaak eo am aaet im kar kōmeļeļe bwe kōm̧ naaj bōk jikin Jisōs Kraist im kwaļo̧k kōn e im mijen eo An ekwojarjar ilo laļ in. Kōm̧ ar bar ro̧o̧lļo̧k n̄an ijin emān wiik ko tokālik, bōk visa ko am, im jokļo̧k ilo jikin mijen eo am ilowaan wōt jiljino wiik ko, āinwōt juon rikanaan an Irooj ekar kajjitōk ippem n̄an kōm̧m̧ane.
Ro jeiū im jatū, jān tum̧wilaļ in būruwō, ij kam̧ool bwe rikanaan ro rej kōnono jān kajoor eo an Jetōb Kwojarjar eo. Rej kam̧ool kōn Kraist im mijen eo An ekwojarjar ioon laļ in. Rej itok kōn ļōmņak im būruwōn Irooj im rej kūr ro rej pinej jenkwan E im katakin kōj ta eo jej aikuj kōm̧m̧ane n̄an jepļaakļo̧k im mour imaan mejān Anij im Nejin, Jisōs Kraist. Jej jeraam̧m̧an ilo ad kōjerbal tōmak eo ad im ļoor katak ko Aer. Jān ad ļoor er, mour ko ad rej m̧ōņōņō ļo̧k im dikļo̧k aer poktak, men ko reppen ippād im inepata ko rej meraļo̧k ilo ad ineeki, im jej ejaake juon nuknuk in tariņae an jetōb ipeļaakid n̄an kōjparoke kōj jān jodik ko an rikōjdat eo ilo raan ko ad.
Ilo raan in Ijtō in Ij kwaļo̧k aō kam̧ool bwe Jisōs Kraist ej mour im bwe E ej tōl Kabun̄ in An ioon laļ in kōn rikanaan ro An, rilolo ro, im rikwaļo̧k revelesōn ro. Ij kam̧ool bwe E ej Rilo̧mo̧o̧r eo im Ripinmuur eo an laļ in im bwe jān E jemaron̄ in bōk lo̧mo̧o̧r im wanlōn̄ļo̧k imaan mejān ad jitōn bōro Anij. Ij iakwe E; ij kautiej E. Ikōņaan ļoor E im kōm̧m̧ane Ankilaan im erom̧ āinwōt E. Ij etta ba men kein ilo et eo ekwojarjar etan Irooj Jisōs Kraist, amen.