Elder Terence M. Vinson
Būreejtōnji eo an Jiljilimjuonn̄oul eo
Elder Terence M. Vinson ej tōmak bwe Rilo̧mo̧o̧r eo ejjjamin pād ettoļo̧k. “E ej iien otemjej epaak, eļaptata ilo jikin ko rekwojarjar im ilo iien aikuj ko,” eaar kam̧ool ilo Oktoba 2013 kweilo̧k eo eļap. “Jet iien, n̄e ij kōtmāne, ij en̄jake āinwōt Ej dōn̄dōn̄te aera bwe in jeļā bwe E ej iakwe eō.”
Juon iien, ke Elder Vinson eaar etetal ippān Elder Jeffrey R. Holland jān Doulul eo an Jon̄oulruo Rijilōk ro, Elder Holland eaar likūt pein ioon aeran Elder Vinson im ba n̄an e bwe ej iakwe e. Elder Vinson ekar ba, “Ij tōmak bwe eļan̄n̄e emaron̄ kar lōn̄ ad iien n̄an etetal ippān Rilo̧mo̧o̧r eo, jenaaj kar en̄jake Pein ej likūt ioon aerar āinwōt in.”
Elder Vinson, kar rejtake e āinwōt juon uwaan Būreejtōnji eo an Jiljilimjuonn̄oul eo ilo M̧aaj 31, 2018, ej ba bwe iakwe eo an Anij “ej en̄jake eo em̧m̧antata.”
Elder Vinson, eo enaaj jino kūr eo an ekāāl ilo Okwōj 1, 2018, kar rejtake āinwōt Ritōl Eutiej Jiljilimjuonn̄oul an Kabun̄ in ilo Eprōl 6, 2013 eo. Ilo iien eo, eaar jerbal āinwōt juon uwaan Doulul eo Kein Kōralitōk an Jiljilimjuonn̄oul eo ilo Pacific Eria eo. Ej kiiō jerbal āinwōt Būreejtōn an Africa West Area eo.
Elder Vinson eaar bōk bachelor degree eo an ilo mathematics im statistics, education im teaching diploma, im master degree ilo applied finance. Jerbal eo an eaar koba katakin, kaminene, im lecture ilo university ko. Eļap wōt an jerbal āinwōt juon rikakpilōklōk kōn jāān im funds manager.
Ke eaar ekkatak kōn Kabun̄ in āinwōt juon rūm̧m̧an ded, Elder Vinson eaar bōk juon im̧we ilo jetōb ekajoor. Eaar alikkar an en̄jake bwe ej aikuj kobatok ilo Kabun̄ in n̄an an maron̄ wōnm̧aanļo̧k im lo uwaak ko n̄an kajjitōk ko an. Eaar peptaij im kapen wiik eo tok juon.
Jān iien eo m̧aanļo̧k, “Iaar jeļā ta eo Irooj eaar kōtmene jān n̄a n̄an kōm̧m̧ane im lo bwe aolep kajjitōk ko aō ekar wōr uwaakier.”
Jān kar iien peptaij eo an ilo 1974 eo, Elder Vinson eaar jerbal āinwōt juon rikakpilōklōk ilo bisoprik, bisop, ko̧o̧njeļ eo eutiej, rikakpilōklōk ilo stake būreejtōnji, regional representative, rikakpilōklōk ilo mijen būreejtōnji, rijerbal in kain̄i an tampeļ, im Eria Jiljilimjuonn̄oul.
Ekar ļotak ilo Sydney, Australia, ilo M̧aaj 12, 1951. Ekar m̧areik Kay Anne Carden ilo Māe 1974 eo. Rej jinen im jemen jiljino ajri ro.