2018
Katakin ilo M̧weo—Juon Eddo Elem̧ōņōņ im Ekwojarjar
May 2018


Katakin ilo M̧weo—Juon Eddo Elem̧ōņōņō im Ekwojarjar

Ij akweļap kōn jipan̄ jān lan̄ ilo ad kajjieon̄ erom rūkaki ro āinwōt Kraist ilo im̧ōko im̧ōd.

Lio ippa ejitōn bōro, Julie, im n̄a kar karūttoļo̧k jiljino ajri ro raiboojoj, im kiiō ekar ejjeļo̧k kobban m̧weo. Eļap aō būrom̧ōj kōn an jako ajri ro nejim ilo m̧weo imōm̧ ilo aolep iien. Ibūrom̧ōj bwe ejako aō katak jān er im katakin er.

Rainin ennaan ko aō rej iookļo̧k aolep ro jinen im jemen im aolep ro me rekōņaan erom ro jinen im jemen. Elōn̄ iaami rej karūttoļo̧k ajri ro kiiō. N̄an ro jet, iien emaron̄ in itok kiiō wōt. Im n̄an ro jet, erom jinen im jemen maron̄ juon kōjeraam̧m̧an ilju im jekļaj. Ij jar bwe aolepād wōj jej kile eddo eo elem̧ōņōņō im ekwojarjar ej n̄an katakin juon ajri.1

Āinwōt ro jinen im jemen, jej kwaļo̧k kadkad in ajri ro nejid n̄an Jemedwōj Ilan̄ im Nejin, Jisōs Kraist. Jej jipan̄ ajri ro nejid kōm̧m̧ane jar eo aer im̧aan tata. Jej leļo̧k tōl im rie ilo aer deļo̧n̄e iaļ in bujen eo kōn2 peptaij. Jej katakin er n̄an pokake kien ko an Anij. Jej katakin er kōn karōk eo An n̄an ajri ro Nejin, im jipan̄ er kile unoojdikdik ko an Jetōb Kwojarjar eo. Jej jiron̄ er bwebwenato ko an rikanaan ro etto im kōketak er n̄an ļoor ro remour. Jej jar kōn anjo̧ ko aer im metak ippāer ilo iien mālijjon̄ ko aer. Ij kam̧ool n̄an ajri ro nejid kōn kōjeraam̧m̧ān ko an tampeļ, im jej kajieon̄ kōpooj er ilo jejjet n̄an jerbali mijen ko redipio. Jej leļo̧k kapilōk ko rem̧m̧an āinwōt an ajri ro nejid erom ro jinen im jemen er make. Bōtaab—innām men̄e—jejjamin bōjrak jān ro jineer im jemeer. Jejjamin in bōjrak jān ad aer rūkaki ro. Jejjamin kōtļo̧k jān kūr kein indeeo.

Rainin jān kejōkļo̧kjeņ kōn jet iaan iien ko rem̧m̧an raiboojoj ewōr ippād n̄an katakin ajri ro nejid ilo mōko im̧ōd.

Katakin ilo Nokon in Jota an Baam̧le

Jān ijjino kōn nokon in jota an baam̧le, eo eaar juon menin kōttōbar eaorōk ilo m̧weo eobrak kōn tōmak ijo iaar rūttoļo̧k ie. Ijjab keememej lukkuun katak ko kar katakin ilo nokon in jota an baam̧le, bōtaab ij keememej bwe kōm kar jab n̄an jidik miji juon wiik.3 Iaar jeļā ta eo eaar aorōk n̄an ro jinō im jema.4

Ij keememej juon iaan m̧akūtkūt ko an nokon in jota an baam̧le em̧m̧an tata ippa. Jema ekōn kūr juon iaan ajri ro nejin n̄an bōk “Teej Eo.” Ekōn leļo̧k n̄an juon ajri elōn̄ kōmeļeļe ko āinwōt, “M̧oktata, etal n̄an jikin m̧ōn̄ā eo im kōpeļļo̧k im kiil aiij bo̧o̧k eo. Innām ettōrļo̧k n̄an ruum̧ in kiki eo aō im jibwetok juon pea in takūn jān lowaan jikin nuknuk eo aō. Innām bar ro̧o̧ltok n̄an ippa, ekāke jilu alen, im ba, ‘Baba, Ikar kōm̧m̧ane!”

Ekar em̧m̧ān ippa ke eaar aō iien. Iaar kōņaan kōm̧m̧ane aolep bun̄tōn ko ilo jejjet, im iaar kautiej iien eo ke imaron̄ kar ba, “Baba, Ikar kōm̧m̧āne!” M̧akūtkūt in eaar jipan̄ kalōk lōke eo aō im kapidodoikļo̧k n̄an juon ļaddik eo en̄ak tōt n̄an lukkuun m̧ad n̄e M̧am̧a ak Baba raar katakin juon pedped an gospel eo.

Būreejtōn Gordon B. Hinckley eaar kapilōk: “Eļan̄n̄e ewōr am̧ jabdewōt pere kōn jeram̧m̧an ko an nokon in jota an baam̧le, kajjieon̄ e. Aiin ajri ro nejimi iturum̧, katakin er, kwaļo̧k naan in kam̧ool n̄an er, riit jeje ko rekwojarjar ippān doon im kōm̧m̧an iien em̧m̧an ippān doon.”5

Enaaj wōr iien otemjej jum̧ae n̄an kōm̧m̧an nokon in jota an baam̧le.6 Jekdo̧o̧n ta, ij kūr kom̧ n̄an pukōt juon wāween n̄an ņa mejļan kapan̄pan̄ ko im kōm̧m̧an bwe nokon in jota an baam̧le en juon kōttōbar—im lale bwe en juon en̄jake ekalimomo.

Katakin ilo Jar an Baam̧le

Jar an baam̧ļe ej bar juon iien em̧m̧antata n̄an katakin.

Em̧m̧an ippa jekjek eo jemen Būreejtōn N. Eldon Tanner kar katakin e ilo iien jar an baam̧le. Būreejtōn Tanner eaar ba:

“Ij keememej juon jota ke kōm kar bukwelōlōn̄ ilo jar an baam̧le, jema eaar ba n̄an Irooj, ‘Eldon eaar ba juon men rainin ejjab aikuj in kōm̧m̧ane; ej joļo̧k bōd, im eļan̄n̄e kwonaaj jeorļo̧k an bōd, ejjamin bar kōm̧m̧ane’

“Menin eaar kōm̧m̧an bwe in kile n̄an jab bar kōm̧m̧ane—eļapļo̧k jān in juon kaje enaaj kar waļo̧k.”7

Āinwōt juon ļaddik, ikōn jet iien kūtōtō kōn jar ko an baam̧le āinwōt raittok, ļōmņak ippa make, “Jejjab jar wōt jejjo wōt minit?” Kiiō, āinwōt juon jemen, ijeļā kōm ban maron̄ jar eļap āinwōt juon baam̧ļe.8

Ikar iien otemjej m̧weiur kōn ekōjkan an Jemedwōj Ilan̄ kwaļo̧k kadkad in Jisōs Kraist āinwōt Nejin Jitōnbōro.9 Ij lem̧ōņōņō ilo jar kōn ajri ro nejū kōn etaer ilo aer ron̄jake aō kwaļo̧k n̄an Jemed Ilan̄ ewi jon̄an aer jitōnbōro n̄an n̄a. Āinwōt ejjeļo̧k iien em̧m̧anļo̧k n̄an kōnono kōn iakwe n̄an ajri ro nejim jān n̄e jar ippāer ak kōjeraam̧m̧an er. N̄e baamļe ko rej koba ilo jar ettā, katak ko rekajoor im aitok kitiet rej katakin.

Katakin ilo Iien eo Jab Kōtmene

Katakin an jinen im jemen ej āinwōt juon taktō eo ej pād n̄e-kūri n̄an jerbal. Jej iien otemjej aikuj in pojak n̄an katakin ajri ro nejid kōnke jejjamin jeļā n̄e iien em̧m̧an enaaj kwaļo̧k e make.

Pija
Jisōs ej katakin kōrā eo ilo aibōj laļ eo

Jej āinwōt Rilo̧mo̧or eo, eo katak eo an emakijkij an “jab waļo̧k ilo juon synagogue ak ilo jekjek ko raan otemjej repidodo—ilo iien eo ej m̧ōn̄ā ippān ro Rikaļoran, itōk aibōj jān juon aibōl laļ, ak etal leļļaļo̧k jān juon wōjke fig.”10

Iiō ko ļo̧k m̧am̧a eaar kwaļo̧k bwe ruo iaan bwebwenato ko rem̧m̧an tata an gospel eo ippān ļeo jeiū erūtto tata, Matt, kar juon iien ke eaar lemlem nuknuk im bar juon iien ke eaar ettōrļo̧k kake n̄an jikin kōm̧m̧an n̄i eo. Juon iaan men ko rellōn̄ iaar nōbar m̧am̧a kake eaar pojak eo an n̄an katakin ajri ro nejin.

Katakin eo an juon jinen ejjamin kar bōjrak. Ke iaar jerbal āinwōt juon bisop, m̧am̧a, iien eo kar 78 iiō dettan, kar jiron̄ eō iaar aikuj in m̧wijbar. Liin eaar jeļā iaar aikuj in juon waanjon̄ak, im eaar jab pere n̄an jiron̄ eō aindein. Ij iakwe eok, M̧am̧a!

Āinwōt juon jemen, ij ellowetak n̄an ekkatak make im kejōkļo̧kjeņ kōn jeje ko rekwojarjar n̄an maron̄ in uwaak n̄e ajri ro nejiū ak jibū rej kwaļo̧k juon iien em̧m̧an n̄an katakin ilo jab-kōtmene.11 “Jet iaan iien ko rem̧m̧an tata katakin rej ijjino āinwōt juon kajjitōk ak n̄ūrbōktak ilo būruwōn juon [baam̧le] membōr.”12 Kwoj ke ron̄jake ilo iien ko?13

Ij iakwe kūr eo an Rijilōk Piter: “Im kom̧win pojak iien otemjej bwe kom̧win uwaak n̄an jabdewōt armej [im ij kakobaba, ajri] ej kajjitōk ippemi kōn unin kōjatdikdik eo ej ilowami.”14

Ke iaar juon jodikdik, baba im n̄a kar m̧ōņōņō in idajon̄jon̄e doon n̄an lale wōn eo ekar kajoor tata an kōdāpdep. Kōm kōn keen pein doon jon̄an wōt am maron̄ n̄an kōttōbar eo n̄an kōm̧m̧an bwe en waļo̧k metak ippām jim̧or. Eaar jab āinwōt eļap m̧ōņōņō kiiō, bōtaab ilo juon jekjek eaar ilo tōre eo. Ālkin bar juon leto ak ļaron, Baba eaar kalimjōk meja im ba, “Pā ko peiūm̧ rekajoor, Nejū. Ij kōjatdikdik bwe pā ko peiūm iien otemjej renaaj kajoor n̄an jab n̄an jidik jibwe juon jiron̄ ilo jab ekkar.” Innām eaar kūr eō n̄an pād wōt ilo erreo im jipan̄ ro jet kōm̧m̧an ejja āinwōt.

Elder Douglas L. Callister eaar kwaļo̧k menin kōn jemen: “Ke kar etal n̄an m̧weo jān jerbal juon raan Baba eaar jidimkij an ba, ‘Iaar kōļļāik juon m̧ōttan jon̄oul eo aō rainin. Iaar je “kom̧m̧ool” ilo juon m̧ōttan jon̄oul jāāk eo. Ikanooj in kam̧m̧oolol n̄an Irooj kōn an kōjeraam̧m̧an baam̧le eo am.’”

Innām Elder Callister eaar nōbar jemen-rūkaki eo: “Eaar katakin jerbal ko im m̧wil ko jim̧o̧r an pokake.”15

Ij ļōmņak juon ļōmņak em̧m̧an n̄an kajjitikin kōj make jet iien, “Ta eo inaaj katakin, ak ta eo ij katakin, ajri ro nejū kōn jerbal ko im m̧wil ko aō an pokake?”

Katakin ilo Ekkatak Jeje Ko Rekwojarjar an Baam̧le

Ekkatak jeje ko rekwojarjar an baam̧le ej juon jikin ejejjet n̄an katakin katak eo ilo m̧weo.

Būreejtōn Russell M. Nelson eaar ba, “Ejjab wōt ro jinen im jemen rekajoor n̄an naan an Irooj, ak ewōr ippāer juon eddo jān Irooj n̄an katakin n̄an ajri ro nejier.”16

Ke Julie im n̄a kar karūttoļo̧k ajri ro nejim, kōm kar kajjieon̄ jab m̧ūjkōk im kōmij mejādik. Juon iiō kōm kar kālet n̄an riiti Bok in Mormon ilo kajin Spanish āinwōt baam̧le. Eaar ke etke Irooj eaar kūr kajjojo ajri ro nejim me raar jerbale juon mijen edipio n̄an mijen ko rej kōnono kajin Spanish? Emaron̄ in tōprak.

Ikar lukkuun m̧weiur ke Jeid im jatid Brian K. Ashton eaar kwaļo̧k n̄an eō bwe e im jemen raar riiti aolepān alen ko an Bok in Mormon ippān doon ilo iiō eo eaar senior ilo high school. Jeid im jatid Ashton eaar iakwe jeje ko rekwojarjar. Raar jeje ilo ļōmņak eo an im būruwōn. Jemen eaar katōk ine eo ke Jeid im jatid Ashton eaar juon jodikdik, im bwe ine eo17 eaar eddōkļo̧k n̄an juon okar in wōjke an m̧ool em̧wilaļ. Jeid im jatid Ashton eaar kōm̧m̧ane ejja āinwōt ippān ajri eo erūtto tata nejin.18 Ļaddik eo nejin ralitōk iiō-dettan eaar kajjitōk ippān, “Baba, n̄āāt eo inaaj riiti Bok in Mormon eo ippam̧?”

Katakin ilo Waanjon̄ak

Āliktata, kareel eo ad eļaptata an jinen im jemen ej waanjon̄ak eo ad. Kar kapilōk kōj n̄an “a kwon juon jon̄ak n̄an ro rej tōmak, ilo naan, ilo kōm̧anm̧an, ilo yokwe, ilo tōmak, ilo kwōjarjar.”19

Ilo juon tūreep ejjab to, Julie im n̄a kar etal n̄an jar im lo eoon in ilo an jerbal. Juon likao, epaak an etal n̄an mijen eo an, kar kōnono ilo kweilo̧k in kwojkwoj eo.

Eaar ba, “Kom̧ij aolep ļōmņak baba ej juon em̧m̧aan em̧man ilo m̧ōn jar, bōtaab …” Eaar bōjrak, im iaar kijooror in ļōmņak ta eo emaron̄ kar ba tokālik. Eaar wōnm̧aanļo̧k wōt im ba, “E ej juon em̧m̧aan em̧m̧an ilo m̧weo.”

Pija
Baam̧le eo an Steward

Iaar kam̧m̧oolol likao in ālkin kōn nōbar eo eim̧we eaar kwaļo̧k kōn jemen. Innām iaar lo bwe jemen eaar bisop eo an ward eo. Men̄e bisop in eaar jerbal tiljek ilo ward eo an, ļeo nejin eaar en̄jake bwe jerbal eo an em̧m̧an tata eaar kōm̧m̧an ilo m̧weo.20

Elder D. Todd Christofferson ej kapilōk: “Ewōr ippād elōn̄ kōl ko n̄an katakin … diktak in epepen eo, im jej aikuj wujlepļo̧k ad ļōmņak im kijejeto eo em̧man tata n̄an bōk aolepān em̧m̧an ko aer. Ilōn̄ in aolep, jej aikuj wōnm̧aanļo̧k wōt n̄an kōketak im jipan̄ ro jinen im jemen erom em̧m̧an tata im rūkaki ro eļapļo̧k aer jab m̧ūjkōk … eļap tata kōn waanjon̄ak.”21

En̄in ej wāween an Rilo̧mo̧o̧r eo katakin.22

Ilo juon iien kakkūje ejjab to ippān ajri ro ruo nejim reddik tata, Julie eaar elmakot bwe kōm̧ij kōm̧m̧āni peptaij in proxy ko ilo jim̧or St. George im San Diego Tampeļ. Iaar alin̄ūrn̄ur—n̄an n̄a make—ļōmņak, “Jej etal n̄an tampeļ eo ilo ijo jikid, im kiiō jej pād ilo iien kakkūje. Etke jejjab kōm̧m̧ane juon men eļapļo̧k an jejjet n̄an iien kakkije?” Ālkin peptaij ko, Julie eaar kōņaan pija itulikin tampeļ eo. Iaar alin̄ūrn̄ur—bar juon alen. Komaron̄ kajidedeik ta eo eaar waļok tok ālik—kōm kar pija.

Pija
Durrant rein rej pād ilo San Diego California Temple
Pija
Durrant ro rej pād ilo St. George Utah Temple

Julie ekōņaan bwe ajri ro nejim en wōr aer ememļo̧kjeņ kōn ekōjkan am kar jipan̄ rūtto ro am, im n̄an barāinwōt. Kōm kar jab aikuji juon katak eo jeļā kake kōn tampeļ ko. Kōm kar mour kake—kam̧m̧oolol n̄an juon jinen eo ej iakwe tampeļ im kōņaan ajri ro nejin n̄an kwaļo̧k iakwe in.

N̄e ro jinen im jemen rej kaorōk doon im leļo̧k waanjon̄ak ko rejim̧we, ajri ro rej indeeo jeraam̧m̧an.

Jem̧ļo̧k in

N̄an kōjwōj aolep ro rej kajjieon̄ in kōm̧m̧āne ijo em̧m̧an tata ippāer n̄an katakin ilo m̧ōko im̧ōmi, kōm̧m̧an bwe kom̧ij lo aenōm̧m̧an im lan̄lōn̄ ilo kijejeto ko ami. Im eļan̄n̄e kom̧ij en̄jake ewōr ruum̧ n̄an kōkōm̧ānm̧anļo̧k ak aikuj eļāpļo̧k kōppopo, jouj kōm̧m̧ani ilo ettā āinwōt an Jetōb eo im̧we kom̧ im kallim̧ūri kom̧ make n̄ān jerbal.23

Elder L. Tom Perry eaar ba, “Ājmour eo an jabdewōt jukjuk in pād, ej m̧ōņōņō eo an armej ro an, ro ineer, im aenōm̧m̧an eo aer aolep loi ilo katakin ro nejier āinwōt pedped eo ilo m̧weo.”24

Aaet, ejako an ajri ro nejim jokwe m̧weo, bōtaab ij pojak wōt n̄an iien eo n̄an katakin, pojak im kijooror n̄an lo iien ko rem̧m̧ān jet n̄an katakin ajri ro nejū rōrūtto, ajri ro nejier, im juon raan, ij kōjatdikdik, ajri ro nejier.

Ij kallim̧ur kōn jipan̄ an lan̄ ilo ad ad kajieon̄ erom rūkaki ro āinwōt Kraist ilo im̧ōko im̧ōd. Ilo etan Jisōs Kraist, amen.

Kakeememej ko

  1. Lale Katak im Bujen ko 68:25; 93:40.

    Elder L. Tom Perry eaar katakin: “Kareel eo an rijum̧ae eo ekanooj ererak im ej tariņae, kajieon̄ n̄an kōm̧ōjņo̧ļo̧k im kakkure pedped eo an jukjuk in pād eo ad; jekdo̧o̧n baam̧le. Ro jinen im jemen rej aikuj ņamejļan katakin eo ilo im̧weo ej juon eddo ekanooj ekwojarjar im aorōk” (“Mothers Teaching Children in the Home,” Liahona, May 2010, 30).

    Būreejtōnji eo Kein Kajuon im Doulul eo an Jon̄oulruo Rijilōk ro kar katakin: “Ļeo im lio pālele ewōr juōn aer eddo n̄an io̧kwe im kōjparok doon im ajri ro nejier. ‘Ajri ro rej jolet jān Iroij’ (Sam ko 127:3). Ro jinier im jemier ewōr juōn aer eddo ekwojarjar n̄an kōkkaajririik ajri ro ilo io̧kwe im jim̧we, n̄an kabwe aikuj ko aer ilo jetōb im kanniōk, im n̄ān katakin er n̄an io̧kwe im jerbal n̄an doon, kōjparok kien ko an Anij, im armej ro rej mour kōn kien ko ijoko rej mour ie. Ļōmaro im limaro pālele—ro jinen im jemed—naaj ņaruwier im̧aan Anij ilo aer jab kōm̧m̧ane eddo kein aer” (“Baam̧le Eo, Juon Naan in Kean̄ n̄an Laļ in,” Liahona, Māe 2017, 145).

  2. Lale Russell M. Nelson, “As We Go Forward Together,” Liahona, Apr. 2018, 7.

  3. Elder David A. Bednar eaar ba: “Rainin eļān̄n̄e komaron̄ kajjitōk ippān ļaddik ro rōrūtto nejim ta eo rej kememej kōn jar an baam̧le, ekkatak jeje ko rekwojarjar, im nokon in jota eo an baam̧le, ij tōmak ijeļā ekōjkan naaj kar uwaak eo aer. Renaaj kar ba jab kile juon jar ak juon jekjek an ekkatak jeje ko rekwojarjar ak juon katak an nokon in jota eo an baam̧le eļap meļeļe in ilo aer kwaļo̧k eddōkļo̧k in jetōb eo aer. Ta eo enaaj kar ba rej kememej ej bwe āinwōt juon baam̧le kōm kar jab m̧ūjkōk” (“More Diligent and Concerned at Home,” Liahona, Nob. 2009, 19).

  4. Lale “Home Can Be a Heaven on Earth,” Hymns, no. 298.

  5. Teachings of Presidents of the Church: Gordon B. Hinckley (2016), 171.

  6. Lale 2 Nipai 2:11.

  7. N. Eldon Tanner, “Never Be Ashamed of the Gospel of Christ,” Ensign, Feb. 1980, 4.

  8. Lale 3 Nipai 18:21.

  9. Lale Matu 3:16–17; 3 Nipai 11:6–8; Katak im Bujen ko 18:34–36; Josep Smith—Bwebwenato 1:17.

  10. “Take Advantage of Spontaneous Teaching Moments,” Teaching in the Savior’s Way (2016), 16. Teaching in the Savior’s Way ekoba elōn̄ jipan̄ ko im kein jerbal ko n̄an katakin ilo m̧weo.

  11. Lale Katak im Bujen ko 11:21; 84:85.

  12. Teaching in the Savior’s Way, 16.

  13. Lale “Listen,” Preach My Gospel: A Guide to Missionary Service (2004), 185–86.

  14. 1 Piter 3:15.

  15. Douglas L. Callister, “Most Influential Teacher—Emeritus Seventy Pays Tribute to Father,” Aug. 29, 2016, news.lds.org.

  16. Russell M. Nelson, “Set in Order Thy House,” Liahona, Jān. 2002, 81.

  17. Lale Alma 32:28–43.

  18. Sister Melinda Ashton ej bōk eddo in n̄e ļeo pāleen, Būratōr Ashton, ej jako.

  19. 1 Timote 4:12; lale bar Alma 17:11.

  20. Bisop Jeffrey L. Stewart ej jerbal ilo Southgate Second Ward ilo St. George Utah. Samuel, ļaddik eo nejin, ej kiiō jerbal ilo Colombia Medellín Mission.

  21. D. Todd Christofferson, “Strengthening the Faith and Long-Term Conversion of the Rising Generation,” general conference leadership meeting, Sept. 2017.

  22. Lale 3 Nipai 27:21, 27.

  23. Lale Katak im Bujen ko 43:8–9.

  24. L. Tom Perry, “Mothers Teaching Children in the Home,” 30.