Elder Juan Pablo Villar
Ritōl Eutiej Jiljilimjuonn̄oul an Kabun̄ in
Ijjino eo an Elder Juan Pablo Villar n̄an Kabun̄ in ekar itok ilo Santiago, Chile, ke ļaddik eo jein, Ivan, ekar kōjjeļļā n̄an baam̧le eo bwe enej peptaij ilo an jinen im jemān kōmālimi im tokālik ekar ba ekar pepe ippān n̄an jerbale juon mijen. Ke rekar kajjitōk etke, Ivan ekar kwaļo̧k naan in kam̧ool eo an im kōņaan in jerbal.
“Ikar jab meļeļe meļeļe eo an aolepān men ņe,” Elder Villar ej keememej, 17 an iiō. “Bōtaab ilo iien eo, ej likūt juon ine ilo būruwō.”
Ine in kar maron̄ leļo̧k juon an iien n̄an eddōkļo̧k ke ļaddik jein ekar letok etan n̄an mijenede ro. Ilo katak eo an kein kajuon, Elder Villar ekar bōk naan in kam̧ool an make kōn m̧ool eo an Bok in Mormon eo.
“N̄an n̄a make, ekar jab menin aikuj bwe in bukwelōlō im jar, kōnke iien eo rekar kwaļo̧k naan in kam̧ool ko aer, ikar jeļā ilo būruwō bwe ekar m̧ool,” ekar ba. “Ke ikar jeļā menin, men otemjej rekar m̧ool.”
Ivan, jerbal ilo juon mijen epaak, bōk mālim n̄an peptaiji Elder Villar ilo 1988. Tokālik, jineer im ļaddik eo juon jatin, Claudio, ekar barāinwōt kobatok ilo Kabun̄ in.
Juon iiō ālkin peptaij eo an, Elder Villar ekar jerbal ilo Chile Viña del Mar Mission, jino juon mour in jipan̄ eo ekar kitbuuj an jerbal āinwōt juon stake būreejtōn, bisop, rikakpilōklōk ilo juon bisoprik, rikakpilōklōk ilo Chile Santiago East Mission, im Eria Jiljilimjuonn̄oul ilo South America South Area. Kar rejtake ilo Maaj 31, 2018, āinwōt juon Ritōl Eutiej Jiljilimjuonn̄oul.
Elder Villar ekar ļotak ilo Jeptōm̧ba 11, 1969, ilo Valparaiso, Chile, n̄an Sergio Villar Vera im Genoveva Saaverdra Ekar m̧areiki Carola Cristina Barrios ilo Maaj 31, 1994, ilo Santiago Chile Temple. Rej jinen im jemān jilu ajri ro.
Ālkin an bōk juon bachelor degree ilo social communications im public relations im master degree ilo marketing, ekar jerbal ilo pharmaceutical im medical devices industry. Ilo 2007 ekar kobaikļo̧k juon an master degree ilo business administration jān Brigham Young University. Innām ekar ro̧o̧l n̄an Chile im jerbal n̄an Orica, juon mining services company, kiiō āinwōt juon senior manager.