E eo ej Niknik n̄an Jem̧ļo̧kin, Ejja in Wōt Naaj Lo̧mo̧o̧ren
Jān Elder Claudio D. Zivic
Jān Jiljilimjounn̄oul eo
Jen tiljek n̄an ta eo emōj ad tōmake im jeļā.
Iakwe ro jeiū im jatū, ij kam̧m̧olool eļap kōn iien in em̧m̧an n̄an kwaļo̧k n̄an kom en̄jake kein aō.
Jejjo iiō rem̧ootļo̧k, n̄a im kōrā eo pāleeō komro kar pād ilo iien kōppelļo̧k n̄an kein kalojooj ko an ajri ilo Museum eo an Kabun̄ in ilo Salt Lake City. Ilo jem̧ļo̧kin kōpelļo̧k eo, Būreejtōn Thomas S. Monson eaar kajju tok n̄an ippām̧im ke ej letok pein im iakweik kōm, eaar ba, “Niknik, im kom̧ naaj anjo̧”—juon ennaan in katak eo em̧ool, aaet, jemaron̄ aolep jeļā.
Jisōs Kraist eaar kallim̧ur bwe “e eo ej niknik n̄an jem̧ļo̧kin, ejja e eo wōt naaj lo̧mo̧o̧ren.”1
N̄an niknik meļeļein “n̄an dim wōt ilo am wūjlepļo̧k n̄an m̧ool n̄an kien ko an Anij jekdoon kapo, jum̧ae, im apan̄.”2
Barāinwōt n̄an ro me emōj aer kar en̄jake kajoor ilo jetōb im emōj kar leļo̧k n̄an aer jerbal ko retiljek remaron̄ bar juon raan jebwābwe ak jāniknik eļan̄n̄e rejjab niknik n̄an jem̧ļo̧kin. Jemaron̄ ke likūt ilo ļōmņak ko ad im buruōd aolep iien ilo ejjeļo̧k uata naan in “Menin eban waļo̧k n̄an n̄a.”
Ke Jisōs Kraist eaar katakin ilo Kaperneum, “elōn̄ iaan rū kaļoran raar jepļaak, im jab bar etetal Ippān.
“Innām Jisōs e ba n̄an jon̄oul im ruo, Kom̧ barāinwōt kōņaan ilo̧k ke?”3
Ij tōmak rainin, Jisōs Kraist ej kajjitōkin kōj aolep ro me emōj ad kōm̧m̧ani bujen ko rekwojarjar Ippān, “Kom̧ barāinwōt kōņaan ilo̧k ke?
Ij jar bwe kōj aolep, kōn meļeļe eļap ilo buruwōd kōn ta eo mour indeeo ej letok n̄an kōj, jemaron̄ ke uwaak āinwōt Simon Piter: “Irooj, kōm naaj ilo̧k n̄an wōn? Ippam̧ naan ko naan in mour indeeo.”4
Jen tiljek n̄an ta eo emōj ad tōmake im jeļā. Eļan̄n̄e jekar jab mour ekkar n̄an jeļā eo ad, jen oktak. Rijerawiwi ro rej mour kōn jerawiwi ko aer, im jab ukweļo̧k, rej depdāp wōt ilo men ko rettoon, m̧ae iien Setan ej kapool er, kakkure iien ko aer rem̧m̧an n̄an ukweļo̧k, bwe ren jeorļo̧k bōd, im ren bōk jeram̧m̧an ko an mour indeeo.
Ikar ron̄ elōn̄ jekpen ņae ko jān ro me emōj an bōjrak aer niknik ilo Kabun̄ in im emōj an jako visōn eo aer ejimwe im alikkar kōn unleplep mour ko ad ilo laļ in. Ij rōjan̄ er bwe ren ļōmņak kake im bar rool tok, kōnke ij tōmak bwe ejjeļo̧k juon enaaj kōm̧m̧an jekpen ņae imaan mejān Irooj, Jisōs Kraist.
Ke jaar peptaij, jaar kōm̧m̧ani bujen ko—ejjab bar ippān juon armej ak ippān Rilo̧mo̧o̧r, m̧ōņōņō in “bōk [iood] etan Jisōs Kraist, kōn juon pen in bōro n̄an jerbal n̄an E n̄an jem̧ļo̧k in.”5
Pād ilo iien kweilo̧k in kwojkwoj ko ej juon iaan wāween ko jemaron̄ etale ikdeelel ko ad n̄an jerbal n̄an E, ad kajoor ilo jetōb, im eddōkļo̧k eo ad ilo tōmak ilo Jisōs Kraist.
Bōk mōttan kwojkwoj eo ej men eo eaorōk tata jemaron̄ kōm̧m̧ane ilo raan in Jabōt. Irooj eaar kōmeļeļeik kain̄i in n̄an Rijilōk ro An mokta jān An kar mej. Eaar barāinwōt kōm̧m̧ane ejja menin wōt ilo Amedka. Eaar ba n̄an kōj bwe eļan̄n̄e jej bōk koņaad ilo kain̄i in, enaaj erom juon naan in kam̧ool n̄an Jemen bwe jej keememej e iien otemjej, im Ej kalim̧m̧ur bwe, ekkar n̄an e, jetōb eo an enaaj pād ippād iien otemjej.6
Ilo katak ko an Alma eo Edik n̄an ļeo nejin Siblon, jej lo kapilōk im kakkōl em̧m̧an me ejipan̄ kōj dim ilo tiljek n̄an bujen ko:
“Kwōn lale bwe kwōn jab utiej ilo juwa; aaet, kwōn lale bwe kwōn jab kōmmejāje ilo mālōtlōt eo am̧ make, ak ilo am̧ kanooj kajoor.
“Kwōn kōjerbal peran, ak jab kabwilōn̄lōn̄; im lale bwe kwōn kajeikiki aolep ikdeelel ko am̧, bwe kwōn maron̄ obrak kōn iakwe; kwōn lale bwe kwōn bōjrak jān pād waan.”7
Jejjo iiō ko remootļo̧k, ilo juon iien kakkije, iaar kōņaan kaeaak nej kein kajuon aō kōm̧m̧ane ilo mour eo aō. Iaar jataiki juon kaeaak, im kar lukkuun kijoroor, iaar jino etal metoļo̧k.
Jejjo wōt minit ak, juon ņo eaar bun̄ūt kaeaak eo im pedo. Kōn kijejeto eļap, iaar jibwe aņōōņ eo im kaeaak eo ilo pā eo juon, ikar maron̄ bar jutak.
Iaar bar kajjieon̄ aņōōņ ilo kaeaak eo, ak jejjo minit tokālik, kaeaak eo eaar bar okjak. Iaar akweļap im bar kōm̧m̧ane, ilo an ejjeļo̧k tōprak, m̧ae iien juon armej eo ejeļā kilen kaeaak ekar ba n̄an n̄a bwe emaron̄ wōr ettaļ iumin im emaron̄ delo̧n̄ dān ilo kaeaak eo, kōm̧m̧an bwe en jab peļan im pen kōjebwebweiki. Iaar ibbere kaeaak eo n̄an parijet im kōpelļo̧ke, im aaet em̧ool, ekar lutōktok bwijin dān.
Ij ļōmņak jet iien jej mour maanļo̧k kōn jerawiwi ko me, rej āinwōt ettaļ eo ilo kaeaak eo waaō, ko rej kabūūr eddōkļo̧k ko ad ilo jetōb.
Eļan̄n̄e jej wōnm̧anļo̧k wōt kōn jerawiwi ko ad, jej meļo̧kļo̧k bujen ko ad jaar kōm̧m̧ani ippān Irooj, jekdoon n̄e jej okjak wōt kōn wōt an jab peļan kōn wōt an jerawiwi ko ļōme mour ko ad.
Āinwōt ettaļ eo ilo kaeaak eo waaō, ettaļ ko ilo mour ko ad rej aikuj karpen. Jet jerawiwi rej aikuj kijejeto ko reļļap jān ko jet n̄an ukweļo̧k jāni.
Jej aikuj kajjitōkin kōj make: Jepād ia ekkar n̄an m̧wil ko m̧wilid n̄an Rilo̧mo̧o̧r im Jerbal ko An? Jej ke pād ilo jekjek eo an Piter ke ekar kaarmejete Jisōs Kraist? Ak em̧ōj ke ad wōnm̧aanļo̧k ke juon jekjek eo me m̧wil ko m̧wilid im ikdeeel āinwōt kar e ālkin eddo an eļap kar leļo̧k n̄an e jān Rilo̧m̧o̧o̧r?8
Jej aikuj kajjieon̄ pokake aolep kien ko im leļo̧k aolepān ad n̄an kien ko relukkuun eppen n̄an kōj bwe jen kōjparoki. Irooj enaaj pād ilo jait ko ad, jipan̄ kōj ilo iien ko jej aikuji im mōjņo, im eļan̄n̄e jej kwaļo̧k juon bōro em̧ool im jerbal ekkar n̄an e, Enaaj kōm̧m̧an “menin mōjņo ko ren erom kajoor n̄an er.”9
Pokake enaaj letok n̄an kōj kajoor n̄an eļļā ioon jerawiwi. Jej aikuj barāinwōt meļeļe bwe mālijjon̄ n̄an tōmak ko ad remenin aikuj n̄an pokake, ilo ad jab jeļā ta eo enaaj waļo̧k.
Ij kwaļo̧k juon jon̄ak eo me enaaj jipan̄ kōj niknik n̄an jem̧ļo̧kiņ:
-
Jar im riiti jeje ko rekwojarjar aolep raan.
-
Bōk kwojkwoj eo kōn juon bōro erup im jetōb ettā kajjojo wiik.
-
Kōļļā juon mōttan jon̄oul im menin joortak ko kajjojo allōn̄.
-
Aolep ruo iiō—aolep iiō n̄an jodikdik ro—kōkkāāl peba in mālim n̄an delo̧n̄e tampeļ.
-
Ilo aolepān mour ko ad, kōm̧m̧ane jerbal eo an Irooj.
Kōjatdikdik bwe m̧ool ko an gospel in ren kapen kōļmenļo̧kjeņ ko ad, im kōm̧m̧an bwe en ejjeļo̧k ettaļ ko me remaron̄ kabūūr iaļ ko ad rem̧m̧an ilo juon mour eo epen.
Tōprak ilo wāween ko an Irooj elōn̄ wōnāān, im kōļ eo wōt n̄an tōpare ej n̄an kōļļāiki wōnāān.
Eļap aō kam̧m̧olool bwe ad Rilo̧mo̧o̧r eaar niknik n̄an jem̧ļo̧kin, kadedeikļo̧k pinmuur eo an.
Eaar en̄taan kōn jerawiwi ko ad, metak ko, inepata, nan̄inmej, im mijak, im kōn menin ejeļā wāween jipan̄ kōj, wāween n̄an im̧we kōj, wāween kaeņōm̧m̧an kōj, im wāween kōkajoor kōj bwe jen maron̄ niknik im bōk kūraun eo me emōj n̄an ro me rejan̄in luuj.
Mour eoktak n̄an kōj kajjojo. Ewōr iien mālijjon̄ ko jej iiooni, juon iien n̄an m̧ōņōņō, juon iien n̄an kōm̧m̧ani kālet ko, im juon iien n̄an ellā jān apan̄ ko, im juon iien n̄an kōjekdoon doon iien ko rem̧m̧an.
Jekdoon jekjek ta ko jepād ie, ij kam̧ool bwe Jemedwōj Ilan̄ eban jem̧ļo̧k an ba, “Ij iakwe eok. Ij rejtake eok.” Ij pād Ippām. Jab ebbweer. Ukweļo̧k im niknik ilo iaļ in me emōj aō kwaļo̧k n̄an kom. Im ij kallim̧ur n̄an kom̧ bwe jenaaj bar lo doon ilo m̧weo imōd ilo celestial.” Ilo etan Jisōs Kraist, amen.