Jetōb eo An en pād Ippem
Jān Būreejtōn Henry B. Eyring
Rikakpilōklōk eo Kein Karuo ilo Būreejtōnji eo Kein Kajuon
Ij jar kōn aolepen būrūō bwe kwonaaj rōn anikien Jetōb, eo ekar jilkintok n̄an eok ilo jouj.
Ro jeiu im jatū, Ij m̧ōņōņō kōn iien in em̧m̧an n̄an kōnono n̄an ko̧m̧ ilo Jabōt in an Irooj, ilo kweiļo̧k in eļap an Kabun in An, ilo iien Ijitō in. Ij kam̧m̧oolol Jemedwōj Ilan̄ kōn menin letok eo an Nejin Jitōnbōro, eo ekar kelet n̄an itok n̄an laļ in bwe en ad Ripinmuur. Ij m̧ōņōņō bwe ijela ke Ekar mej kōn jerawiwi ko ad im kar jerkakpeje. Aolep raan ij jeram̧m̧an n̄an jela bwe, kōn Pinmuur eo an, inaaj juon raan jerkakpeje n̄an mour n̄an indeeo ippān baamle eo rej iakwe.
Ijelā bwe men kein ej ial eo wōt kōj kajojo emaron̄ jeļā kaki. Jetōb Kwojarjar ekar kōnono ilo kōlmenļo̧kijeņ im būruwō bwe men kein rej m̧ool—ejjab juon wōt kōttan ak elōn̄ kōttan. Ikar aikuji kainenōm̧m̧an in bwe en wanmanļo̧k wōt. Emōj ad en̄jake jerata ilo iien eo im jej aikuji m̧ool eo jān Jetōb. Ikar en̄ajke juon raan ilo ao kar jutak ippen jema ilo juon aujpitōļ. Komro kar lale an mama bōk jidik menokan—im bōjrak. Ilo amro kar kalimijōk mejān, ekar ettōn̄ dikdik ilo an kar metak eo etal. Ālikin jet iien ejjeļo̧k keroro, jema ekar kōnaan moktata. Jema eaar ba, “Jiron̄ in emōj an jepļaakļo̧k n̄an kapijuknen.”
Ekar mera an ba. Āinwōt ekar aenōm̧m̧an. Ekar kean̄ kōn ta eo ejelā em̧ool. Ekar jino ae men ko mweien mama. Ekar riwōjļo̧k n̄an etōnaak eo an aujpitōl eo n̄an kam̧m̧oolol aolep nōōj im taktō ro rekar jerbal ippān ilo elōn̄ raan ko.
Ekar pād m̧ōttā eo an Jetōb Kwojarjar ilo iien eo jema ekar en̄jake, jeļā, im kōm̧m̧ane ta ko ekar kōm̧m̧ani ilo raan eo. Ekar bōk kallim̧ur eo āinwōt ro jet: “Bwe Jetōb eo An en maron̄ pād ippāer” (K&B 20:79).
Jibadbad eo aō rainin ej n̄an kōļapļo̧k ikdelel im maron̄ eo am̧ n̄an bōk Jetōb Kwojarjar. Keememej, E ej m̧ōttan eo kein kajilu an Doulu in Anij eo. Jemen im Nejin rej armej ro em̧ōj aer jerkakpeje. Jetōb Kwojarjar ej armej in jetōb. (Lale K&B 130:22). Ej am kālet n̄an bōk E im karuwainene E n̄an buruōm im kōlmenļo̧kijeņ eo am.
Ta ko jermaron̄ bok kōn kōjeramaan ko n̄an mour eo aiboojoj rej alikkar ilo naan ko kōnono kaki aolep wiik bōtaab jet iien ejjab itok n̄an burueer im kōlmenļo̧kijen ko ad. Bwe Jetōb en maron̄ letok n̄an kōj jej aikuj “iien otemjej keememej” Rilo̧mo̧o̧r eo im “kōjparok kien ko an” (K&B 20:77).
Tōre in ilo iiō in ejipan̄ kōj keememej en̄taan eo an Rilo̧mo̧o̧r eo im kōn An kar jerkakpeje jān lōb āinwōt armej. Elōn̄ iaadwōj jej dapij pija kein ilo ememej. Kar juon iien ikar jutak nabōjin juon lōb ilo Jerusalem. Elōn̄ rej tōmak bwe lōb eo in Rilo̧mo̧o̧r eo ekar dōbwāle kar jerkakpeje jān e im erom̧ Anij emour.
Eo ekar tōl kim ilo ettā ilo raan eo ekar jitōnļo̧k kōn pein im ba n̄an kim, “Itok, lale lōb in ejeļo̧k kobban.”
Kōm ekar m̧alļo̧k im reļo̧n̄. Kōm kar loe juon jikin jijjōt kōm̧m̧an jān deka ilo kiin lōb eo. Ako ekar itok juon pija oktak n̄an kōlmenļo̧kijen eo aō, ekar lukkuun m̧ool ta eo kōm kar loe raan eo. Ekar kōn Mary, eo kar likūt wōt ippān lōb eo jān Rijilōk ro. Kar ta eo Jetōb ekar kōtļo̧k bwe in loe im kar rōn ilo kōlmenļo̧kjen eo aō, ej alikkar āinwōt ke ikar ped ijjo:
“A Meri ej jutak i nabōj iturin lōb eo im jan̄: im ke ej jan̄ ej jirļo̧k ilo lōb eo,
“Im ej lo ruo enjeļ, rej kōņak nuknuk mouj, rej jijet, juon i bōran, im eo juon i neen, ijo ubōn Jisōs e kar pād ie.
“Im re ba n̄an e, Kōrā, etke kwōj jan̄? E ba n̄an er, Bwe raar bōkļo̧k aō Irooj, im I jaje ijo raar likūt E ie.
“Im ke em̧ōj an kōnono āinwōt, ej oktaklik im lo Jisōs e jutak, im e jaje e Jisōs.
“Jisōs e ba n̄an e, “Kōrā, etke kwōj jan̄? wōn eo kwōj pukot e? Liin, ļōmņak e ri kallib, Ļeiō, eļan̄n̄e kwaar bōkļo̧k e jān ijin, kwōn kwaļo̧k n̄an eō ijo kwar likūt e ie, im i naaj bōkļo̧k,
“Jisōs eba n̄an e, Meri. Ej oktaklik im ba n̄an e, Rabbonai; ukōtōn naan, Ri Kaki.
“Jisōs e ba n̄an e, kwōn jab un̄n̄ūr Eō; bwe I jan̄inwanlōn̄ļo̧k n̄an Jema, a kwon ilo̧k n̄an ro jeiū im jatū im ba n̄an er, Ij walōn̄ļo̧k n̄an Jema, im Jemami, im n̄an Aō Anij, im ami Anij” (Jon 20:11–17).
Ikar jar bwe in mārōn̄ en̄jake ta eo Meri ekar en̄jake ilo lōb eo im ta eo rikaļo̧o̧r ro ruo rekar en̄jake ilo ial eo n̄an Emmaus ilo aer kar etetal ippān Riļo̧m̧o̧o̧r eo ekar jerkakpeje, lōmņak kake ilo iaļ eo n̄an Jerusalem.
“A rejro dāpij E, im ba, Kwōn pād ippem: bwe e jota, im e nan̄in bon̄. Im Ej deļo̧n̄ bwe En pād ippāer. Im ekar etal n̄an pād ippeer.
“Im ke ej jibadek in m̧ōn̄ā ippāer, ej bōk pilawā, im jar, im ruje, im leļo̧k n̄an er.
“Im e peļļo̧k mejeier, im rej kile e; im Emo̧o̧n ļo̧k jān er.
“Im rejro ba n̄an doon, Būruwed e jab bwil ilowad ke Ear kōnono n̄an kōj ilo iaļ eo, im ke Ear kameļeļeik Jeje ko n̄an kōjro ke?” (Luk 24:29–32).
Jet iaan naan ko rekar bar elij ilo iien kweilok in kwojkwoj ikar pād ie elōn̄ ļo̧k jān 70 iiō emootļo̧k. Ilo tōre ko, kweiļo̧k in kwojkwoj ko raar kōm̧m̧an ilo jota. Eaar marok namōj. Jarlepju eo eaar al naan kein jeļā kaki. Ikar rōn men kein elōn̄ kōttan. Ak ememej eo aō ej en̄jake eo jān juon bōn ejenoļo̧k. Ekar kepaak ļo̧k eō n̄an Kraist? Ne inaaj ba naan kein, enaj itok n̄an kōj bar juon alen:
Pād ippa; ’Mae ejem̧ļo̧k rainin.
Raan ej etal im jako
Aelooror ko an bon rej wōtļo̧k.
Bon̄ ej itok wot.
Ilo buruō ej ruwainene ro otemjej,
Tōllo̧k ilo kapijuknen eo aō.
Pād ippa; ’Mae ejem̧ļo̧k rainin.
Etetal ippa rainin
Kar urur buruō,
Ilo aō kar kōnono ippem.
Kijetoto in naan ko am ekar kanne buruō
Im dapij iō iturūm.
O Rilo̧mo̧o̧r, pād ippa ilo bon̄ōn̄ in;
Lo, ’mae ejem̧ļo̧k rainin.
O Rilo̧mo̧o̧r, pād ippa ilo bon̄ōn̄ in;
Lo, ’m̧ae ejem̧ļo̧k rainin.1
Eļapļo̧k aer aorōk jān juon ememļo̧kjeņ an m̧akūtkūt ko ej ememļo̧kjeņ eo an Jetōb Kwojarjar un̄ur būruwōd im wōnm̧aanļo̧k wōt eo an m̧ool ko repen. Elapļo̧k an aorōk jān ad loe kōn mej ko mejeer make ak keememej naan ko rej kōnono im riiti ej kwaļo̧k en̄jake ko jān unoojdikdik eo an Jetōb. Ejeja, em̧ōj aō en̄jake ta eo ro rekar etal ilo ial eo n̄an Emmaus—āinwōt meoeo in ak eban bōd bwil ilo būruō. Ekkā wōt en̄jake in meram im ejeļo̧k keroro.
Ewōr ad kallim̧ur eo ejjeļo̧k wōnāān bwe Jetōb Kwojarjar en juon eo mōttad im barāinwōt an lōn̄ ippād iaļ ko rem̧ool kōn wāween ad bōk menin letok in. Naan kein rej ba jān rijerbal ro ewōr aer mālim jān Irooj ilo likut pā ko ioon bar: “Bōk Jetōb Kwojarjar.” Ilo iien in wot kwe im n̄a ewōr kōjatdikdik bwe enaaj letok n̄an kōj. Ak jerbal eo ad in n̄an kālet n̄an kōpelļo̧k buruweer n̄an bok jerbal ko an Jetōb n̄an mour indeeo.
En̄jake eo an Rikanaan Josep Smith kar letok juon tōl. Ekar jino im etal wōt kōn jerbal eo an kōn kālet eo ekar jelā bwe ejjab meletlet ippān n̄an jeļā ta ej aikuj kōm̧m̧ane. Ekar kālet n̄an ettā im̧aan Anij.
Alikin, Josep ekar kālet n̄an kajjitōk ippān Anij. Ekar jar kōn tōmak ke Anij enaaj uwaake. Uwaak eo ekar itok ke ej juon ļaddik jidikdik. Enaan kein rekar itok iien eo ekar aikujin jeļā ewi wāween an Anij kajutak Kabun̄ eo An. Jetōb Kwojarjar eo ekar kaenōm̧m̧ane im tōl e aolepān mour eo an.
Ekar pokake im̧we eo ilo iien eo ekar pen. Kōn menin, ekar bōk ial n̄an jilkinļo̧k jon̄oul ruo n̄an England iien eo ekar lukkuun aikuji er. Ekar jilkinļo̧k er.
Ekar bōk kajimwe im kaenōm̧m̧an jān Jetōb iien eo ekar kalibuuj im armej ro rekwojarjar rekar en̄taan. Im ekar pokake iien eo ekar etal laļ ļo̧k n̄an ial eo n̄an Carthage men̄e ekar jeļā ke enaaj ioon joraan ilo ānbwin.
Rikanaan Josep ekar kōm̧m̧an wanjonaak n̄an kōj n̄an elmen wōnm̧aanļo̧k n̄an bōk ial im aenōm̧m̧an jān Jetōb Kwojarjar.
Kālet eo moktata ekar kōm̧m̧āne ej n̄an ettā imaan Anij.
Kein karuo ekar n̄an jar kōn tōmak ilo Irooj Jisōs Kraist.
Kein kajilu ej lukkuun pokake. Pokake emaron̄ meļeļe n̄an ekairir em̧akūtkūt. Emaron̄ meļeļein n̄an kōppopo. Ak emaron̄ meļeļein kōttar ilo kijenmej n̄an eļapļo̧k ikdeleel.
Im kein kemān ej n̄an jar n̄an jeļā ta aikuj im būruwōn ro jet im elmen jipan̄ er n̄an Irooj. Josep ekar jar kōn armej ro rekwojarjar ilo iien liaajlo̧ļ ke ej pād kalibuuj. Ej juon iien em̧m̧an n̄an n̄a ilo aō kar lale Rikanaan ro an Anij ilo aer jar, kajjitōk kōn ikdeelel, bōk ial, im kōm̧m̧āne men kein.
Em̧ōj aō loe ewi ukut in jar ko aer kōn armej ro rej iakwe im jerbal n̄an er. Ekar peļo̧k buruweer n̄an bok ikdeleel kōn ro rej kea kake er. Emaron̄ m̧ool wōt n̄an eok.
Im̧we eo enaaj jipan̄ koj jerbal n̄an ro jet n̄an Irooj. Em̧ōj am loe ilo en̄jake ko am, āinwōt aō barāinwōt. Bisop eo ekar ba n̄an eo—ilo iien eo kōra eo ippa ekar pād ilo juon bo̧o̧j eļap ilo mour eo an make—“Aolep iien ij rōn ke juon armej ilo ward eo ej aikuj jipan̄, iļo̧k etal n̄an jipan̄, Ij loe ke kōrā eo ippām emoj an pād ijōn mokta jān na. Ekōjkan an kōm̧m̧ane?”
Liin ej āinwōt aolep rikarejar ro rem̧m̧an ilo aelōn̄ in kiin̄ eo an Irooj. Āinwōt ewōr ruo men ko rej kōm̧m̧ani. Rijerbal ro rem̧m̧an rej kōtōļo̧k bwe Jetōb Kwojarjar en m̧ōttāer iien otemjej. Im rej kwaļo̧k n̄an kōj kōn menin letok eo an iakwe-em̧ool, eo ej iakwe erreo an Kraist. Menin letok kein rej eddōk ilo er ilo aer kōjerbali n̄an jerbal jān iakwe eo n̄an Irooj.
Ilo wāween eo me jar, im̧we, im iakwe eo an Irooj ej jerbal ippān doon ilo jerbal ko ad ej kwaļo̧k ilo naan kein:
“Eļan̄n̄e kom̧ naaj kajjitōk jadewōt ilo eta, men in I naaj kōm̧m̧ane.
“Eļan̄n̄e kom̧ij yokwe Eō, kōjparok kien ko Aō.
“Im I naaj jar im kajjitōk ippān Jema, im Enaaj lewōj n̄an kom̧ bar juon Ri Kaaenōm̧m̧an, bwe En pād ippemi indeeo;
“Jetōb in m̧ool; Eo laļ e ban bōk E, bwe e jab lo E, im e jab jeļā E: A kom̧ jeļā, bwe Ej jokwe ippemi, im Enaaj pād ilo kom̧
“I jāmin likūt kom̧ atajinemjen: I naaj iwōj n̄an kom̧.
“A jidik iien, im laļ e jāmin bar lo Eō, a kom̧ij lo Eō; kōn Aō mour, kom̧ naaj mour barāinwōt.
“Ilo raan eo kom̧ naaj jelā N̄a ilo Jema, im kom̧ ilo N̄a, im N̄a ilo kom̧.
“Eo kien ko Aō ippān, im ej kōjparoki, e in ej iakwe Eō: Im eo ej yokwe Eō Jema enaaj iakwe e, im Inaaj iakwe e, im Inaaj kwaļo̧k Eō n̄an e” (Jon 14:14–21).
Ij kwaļok ao naan in kam̧ool bwe Jemed ilo iien ej kile eok, enjake ko am, im aikuj ko an jetōb im anbwin an aolep ro ipelaakōm̧. Ij kwalok ao naan in kam̧ool bwe Jemed im eo Nejin rej jilkintok Jetōb Kwojarjar n̄an aolep ro eped menin letok in ippeer, im pukote n̄an wanōk. Jim̧or Jemen, ak Nejin, ak Jetōb Kwojarjar eo jab kipel Er make n̄an mour kein ad. Jej anemkwoj n̄an kelet. Irooj ekar ba n̄an aolep:
“Lo, Ij jutak im̧aan kōjām, im kaļļaļļaļ: eļan̄n̄e jabdewōt armej enaaj ron̄ ainikiō, im kapeļļo̧k kōjām eo, Inaaj deļo̧n̄ļo̧k n̄an e, im naaj kejota ippān im e Ippa.
“Eo ej bōk anjo̧ Inaaj leļo̧k n̄an e bwe en jijet Ippa ioon tūroon eo Aō, āinwōt Iar barāinwōt bōk anjo̧, im Iar jijet ippān Jema, ioon tūroon ro An.
“Eo lo̧jiln̄in ippān, en ron̄jake men ko Jetōb ej ba” (Revelesōn 3:20–22).
Ij jar kōn aolepen būrūō bwe kwonaaj rōn anikien Jetōb, eo ekar jilkintok n̄an eok ilo jouj. Im ij jar bwe kwonaaj aolep iien kōpeļo̧k būruom n̄an bok E. Ne kwonaaj kajjitōk kōn lukkun m̧ool im tōmak ilo Jisōs Kraist n̄an ikdeelel, kwonaaj bok ilo ial eo an Irooj im iien eo An. Anij ekar kōm̧m̧an ejja in wōt n̄an eo edik Josep Smith. Ej barāinwōt rainin n̄an rikanaan eo ad emour rainin, Būreejtōn Russell M. Nelson. Em̧ōj an likut eo ilo ial eo ippen ajri in Anij n̄an jerbal n̄an E. Ijelā bwe ejjab kōn ta ko ikar loe kōn meja make ak elapļo̧k kōn kajoor eo jān ta eo Jetōb ej unoojdikdik n̄an būruō.
Em̧ōj aō en̄jake iakwe eo an Jemed im eo Nejin Ejitōbōro n̄an aolep ajri in Anij ilo laļ in im n̄an ro Nejin ilo laļ eo an Jetōb. Em̧ōj aō en̄jake aenōm̧m̧an im tōl eo an Jetōb Kwojarjar. Ij jar bwe kwon maron̄ lōn lanlon in an ped Jetōb eo ippem āinwōt juon eo mōttam̧. Ilo etan Jisōs Kraist, amen.