M̧aanjāppopo n̄an iioon Anij

Jān Elder Quentin L. Cook

Jān Doulul eo an Jon̄oulruo Rijilōk ro

Pija

Official portrait of Elder Quentin L. Cook. Called to the Quorum of the Twelve Apostles on 6 October 2007.

Kōttōbraki eddo ko rekwojarjar ilo tiljek, ippān doon, im erom juon wōt enaaj kōpooj kōj n̄an iioon Anij.

Eliza R. Snow, ke ej kōnono kōn kōjeraam̧m̧an eo an Kirtland Tampeļ (ke ekar pād ie), ekar ba: “Bolen rekar kaminene moktaļo̧k laajrak in iien kōjeraam̧m̧an eo, bōtaab ejjeļo̧k kajin ilo mour in emaron̄ kōmeļeļeiki en̄jake ko rekwojarjar ilo raan eo me jeban meļo̧kļo̧k. Enjeļ ro raar waļo̧k n̄an jet, ejja iien ņe wōt aolep ro raar pād raar en̄jake ke elōn̄ armej ro rekwojarjar raar waļo̧k, im bōro ko kajjojo raar obrak kōn lan̄lōn̄ jon̄an reban kōmeļeļeiki im rekar obrak kōn aibojooj.”¹

En̄jake ko rekwojarjar ko me raar waļo̧k ilo Kirtland Tampeļ raar erom pedped eo n̄an unleplep in jepļaaktok eo an Kabun̄ eo an Jisōs Kraist n̄an boktok lo̧mo̧o̧r im mour indeeo an ajri ro nejin Jemedwōj Ilan̄.² Ilo ad m̧aanjabpopo n̄an iioon Anij, jemaron̄ jeļā eddo ko ad rekwojarjar emōj litoki rej n̄an etali ki ko rekwojarjar me emōj kōjepļaaki tok ilo kar Kirtland Tampeļ.

Ilo jar in kōjeraam̧m̧an eo, Rikanaan Josep Smith ekar akweļap ilo ettā “n̄an bōk m̧wiin … eo kar jiron̄ kōm n̄an kalōke.”³

Juon wiik tokālik, ilo Jabōt in Ijtō, Irooj eaar waļo̧k ilo juon visōn ekabwilōn̄lōn̄ im kile im errā kōn tampeļ eo An. Menin ekar bōk jikin ilo Eprōļ 3, 1836, mōttan jidik bwe en jejjet 182 iiō ko remootļo̧k jān Jabōt in Ijtō in. Ekar barāinwōt iien kwojkwoj in kijone—juon iaan iien ko rōjeja n̄e Ijtō im Kwojkwoj in kijone reidaaptok. Āļkin visōn eo, jilu rikanaan ro etto, Moses, Elias, im Ilaija, raar waļo̧k im leļo̧k ki ko remenin aikuj n̄an kadedeikļo̧k kōttōbar eo an Irooj n̄an Kabun̄ eo An ilo epepen in. Kōttōbar eo eļōmwaan, ak elukkun jejjet, meļeļein kakobaiktok bwijin Israel, liāpe er āinwōt juon baam̧le, im kōpooj laļ in n̄an Itok eo Kein Karuo an Rilo̧mo̧o̧r.⁴

N̄an Ilaija im Moses ke rekar waļo̧k ekar juon “āinļo̧k wōt … [ippā] manit an Ri Ju, ekkar n̄an tōmak an Ri Ju Moses im Ilaija renaaj juon wōt iien aer itok ilo ‘iien eo āliktata.’”⁵ Ilo katak ko ad, jekjek in eaar kadedeikļo̧k pedped in jepļaaktok eo an ki ko reaorōk “kar lewōj … n̄an raan ko āliktata im n̄an iien eo āliktata, eo me ilo e ej tarlep in tōrean iien bōk eddo ko.”⁶

Kirtland Tampeļ, jim̧or ia eo ej pād ie im jon̄an, ekar lukkuun dik. Bōtaab n̄e ej itok n̄an jon̄an aorōkin ippān armej, ej ļōme mour-indeeo. Rikanaan ro etto rekar kōjepļaaktok kii ko n̄an kain̄i in lo̧mo̧o̧r ko ilo gospel eo an Jisōs Kraist. Menin ekar bōktok eļap lan̄lōn̄ n̄an membōr ro retiljek.

Kii kein rej letok “kajoor ko jān ijo eutiej”⁷ n̄an eddo ko emōj litok n̄an kōj bwe en mōttanļo̧k kōttōbar eo an Kabun̄ in.⁸ Ilo raan in Ijtō eo eaibojooj ilo Kirtland Tampeļ, jilu kii ko rekar jepļaaktok:

Kein Kajuon, Moses eaar waļo̧kto̧k im̧aamro, im wūjlepitok n̄an kōmro kii ko an aintok Israel jān m̧ōttan ko emān ilo laļ in, eo me ej jerbal in mijenede.⁹

Kein Karuo, Elias eaar waļo̧k im wūjlepitok kii ko an tōrean bōk eddo in gospel eo an Ebream, eo ekitbuuj jepļaaktok eo an Bujen kalimur eo an Ebream.¹⁰ Būreejtōn Russell M. Nelson ekar katakin bwe kōttōbar eo an kii in bujen ko ej n̄an kōpooj membōr ro n̄an aelōn̄ in kiin̄ eo an Anij. Eaar ba, “Jejeļā wōn kōj im [jejeļā] ta eo Anij ekōņaan jān kōj.”¹¹

Kein Kajilu, Ilaija eaar waļo̧k im wūjlepitok kii ko an kajoor in liāp ilo epepen in, eo me ej jerbal in menmenbwij an baam̧le im kain̄i ko an tampeļ n̄an ro remour im ro remej.¹²

Ewōr, iumwin tōl eo an Būreejtōnji eo Kein Kajuon im Doulul eo an Rijilōk ro Jon̄oulruo, jilu ko̧o̧njel ko reutiej ilo headquarter eo an Kabun̄ in me rej eddoiki eddo kein rekwojarjar me emōj litoki pedped ioon kii ko me rekar jepļaaktok ilo Kirtland Tampeļ. Rej Missionary Executive Council, Priesthood im Family Executive Council, im Tampeļ im Family History Executive Council.

Jej Jutak ia Rainin ilo ad Kakūrmo̧o̧l Eddo kein Rekwojarjar me Emōj Litoki?

Kein kajuon, ilo kautiej Moses ilo an kar kōjepļaaktok kii ko n̄an aiintok bwijin Israel, rainin enan̄in 70,000 mijenede ro rej jeplōklōk ipeļaakin laļ in ilo aer kwaļo̧k gospel eo An n̄an aiintok ro emōj kālōt er. En̄in ej juon ijjino n̄an kakūrmo̧o̧l jerbal eo eļap im kabwilōn̄lōn̄ eo Nipai eaar loe ilubwiljin jimo̧r Ri Aelōn̄ ko im imōn Israel. Nipai eaar loe raan kein ad ilo an ro rekwojarjar an Anij naaj ejjeplōklōk ioon aolepān mejān laļ in, ak oraer renaaj iiet kōn wōt jerawiwi. Ijoke, eaar lo moktaļo̧k ke renaaj kar “pojak kōn jim̧we im kōn kajoor in Anij ilo aiboojoj eļap.”¹³ N̄e jej etale tukaduin bwebwenatoon jepļaaktok eo an Kabun̄ in, kijejeto an mijenede ej make wōt ļap an aorōk. Jej lo an kūrm̧ool visōn eo an Nipai. Men̄e jeiiet ilo bōnbōn, jenaaj wōnm̧aanļo̧k kōn ad kijejeto im diwōjļo̧k im kappukōt ro renaaj eo̧ron̄ enaan eo an Rilo̧mo̧o̧r.

Kein Karuo, Elias eaar waļo̧k, im wūjlepitok kii ko an tōrean bōk eddo in gospel eo an Ebream, im ba bwe ilo kōmro im ineemro aolep epepen ālikim ro renaaj jeraam̧m̧an. Ilo jem̧ļo̧k in kweilo̧k in, wāween tōl ko raorōk emōj litoki n̄an kōwāppenļo̧k ro rekwojarjar im kōpooj er n̄an aelōn̄ in kiin̄ eo an Anij.¹⁴ Kōjjeļļā in ilo m̧wen̄an eo an priesthood kōn kautiej n̄an doulul em̧m̧an ro im pris ro routiej renaaj jino kajoor eo an priesthood im maron̄ eo. Loļo̧k ko an em̧m̧aan im kōrā n̄an m̧ōko, kiiō “jerbal in karejar,” āinwōt eļap kōnono kake ilo m̧wen̄an in, naaj kōpooje Armej ro Rekwojarjar n̄an ioon Anij.

Kein kajilu, Ilaija eaar wūjlepitok kii in liāp ko ilo epepen in. N̄an kōj ro jej mour ilo tōre in, lōn̄ļo̧k in tampeļ im jerbal in menmenbwij an baam̧le ekabwilōn̄lōn̄. Bun̄ton̄ in enaaj wōnm̧aanļo̧k im mōkajļo̧k m̧ae Itok eo Kein Karuo an Rilo̧mo̧o̧r, m̧ae iien aolepān laļ “naaj kar ko̧kkure ilo itok eo An.”¹⁵

Jerbal in menmenbwij an baam̧le, jān kōjeraam̧m̧an an lan̄ kōn kein jerbal ko raan kein, ekōm̧m̧an bwe en mōkaj an ļapļo̧k ilowaan jejjo iiō remootļo̧k. Jeban kar kapeel n̄e jejjab inepata kōn eddo in ekwojarjar emōj letok im kōtmāne bwe Aunt Jane ak ro jet nukid me reniknik renaaj kōm̧m̧ani. Ikōnaan kwaļo̧k naan ko an Būreejtōn Joseph Fielding Smith ko me rekabōkakkak: “Ejjeļo̧k juon ejjab bōk koņaan ilo eddo in eļap. Emenin aikuj n̄an juon rijilōk im barāinwōt juon elder [ak sister] eo ettā. Jikin, ak make wōt, ak aeitok in kōm̧m̧ani eddo ilo Kabun̄ in … eban kōtļo̧k an juon jab kaorōk lo̧mo̧o̧ren ro remej.”¹⁶

Elōn̄ kiiō tampeļ ko ipeļaakin laļ in im kein jipan̄ ko n̄an jāān in jipan̄ an rijerbal in tampeļ n̄an jipan̄ ro rej aikuj in etal n̄an tampeļ jān jikin ko rettoļo̧k.

Āinwōt kajjojo, jej kōm̧m̧ani ilo jejjet n̄an etale kijejeto ko ad n̄an tōpar jerbal in mijenede, tampeļ im jerbal in menmenbwij an baam̧le, im m̧aanjabpopo ko n̄an iioon Anij.

Tiljek, Ippān doon, im Erom Juon Wōt imaan mejān Irooj enaaj Jipan̄ Eddo Kein Rekwojarjar

Ilo kauiej n̄an wāppen, mour in ej iien n̄an armej bwe ren m̧aanjabppopo n̄an iioon Anij.¹⁷ Bok in Mormon ej letok elōn̄ waanjon̄ak ko kōn leen ko rekabōromōjmōj n̄e juon ak kurup ko rej likjab n̄an kōjparok kien ko an Anij.¹⁸

Ilo aolepān mour e aō, būrabļōm im inepata ko an laļ in rej oktak jān kauwatata n̄an bar juon—jān kōņaan ko rejej tokjeer im rewaan n̄an jerawiwi ko reļļap. Ej menin nōbar bwe jet iaan jerawiwi ko jejjab errā kaki emōj kōnono kaki im emōj jab errā kaki.¹⁹ Jerawiwi ko me jejjab errā kaki ej kakkure kakien ko an Anij im an jukjukin pād. Ro remeļeļe karōk eo an Anij rej aikuj barāinwōt jum̧ae jerawiwi ko me jejjab errā kaki, kōnke ej barāinwōt juon jerawiwi. Naan in Kean̄ eo an Baam̧le n̄an laļ in ej kakkōl “bwe jabdewōt ro rej rube bujen ko an kien erreo, ro rej kakkure pāleen ak ro nejin [ak, ilo wāween in, jabdewōt] … naaj juōn raan ņaruwier im̧aan Anij.”²⁰

Ilo ad reitok reitak, jej lo kakkure ko itok jān jerawiwi im an̄urlep ilo aolep jikin. Eļan̄n̄e kōj kajjojo, jej lukkun inepata kōn ekajet eo eļap an Rilo̧mo̧o̧r n̄an kōj, jej aikuj pukot ukweļo̧k. Imijak n̄e elōn̄ armej rejjab kea kōn Anij im rejjab kappukōt jipan̄ jān jeje ko rekwojarjar ak rikanaan ro n̄an bōk jipan̄. Eļan̄n̄e kōj, āinwōt juon jukjukin pād, naaj lukkun ļōmņak kōn leen jerawiwi, enaaj kar ļap an armej bōbrae pija ko renana im kōm̧m̧ani jerbal ko me renana n̄an kōrā ro.²¹ Āinwōt Alma eaar ba n̄an ļaddik eo Nejin Korianton ilo Bok in Mormon, “Jerawiwi ejamin kar m̧ōņōņō.”²²

Kōnono kōn juon wōt, Rilo̧mo̧o̧r eo ekar kwaļo̧k, “Eļan̄n̄e kom̧ij jab juon kom̧ij jab Aō.”²³ Jejeļā bwe jetōb in jum̧ae ej jān devil.²⁴

Ilo raan kein, meļeļein ippān doon ilo jeje ko rekwojarjar emōj kajejtokjen, im elōn̄ armej rej kaorōkļo̧k jepel jān doon,²⁵ ekkā an pedped ioon kadkadier, wōņ er, er ria, im jon̄an aer m̧weie. Ilo elōn̄ laļ ko, n̄e ejjab aolep, armej rej lukkuun jepel jān doon kōn wāween aer mour. Ilo Kabun̄ eo an Irooj, manit eo me jej mour kake im katakin ej manit eo an gospel eo an Jisōs Kraist. Ippān Doon eo me jej pukote ej n̄an erom juon wōt ippān Rilo̧mo̧o̧r im katak ko An.²⁶

Ilo ad kalimjōk kōttōbār ko m̧oktata an Kabun̄ in, rej aolep pedped ioon erom juon wōt imaan mejān Irooj²⁷ im ļoor waanjon̄ak eo an gospel eo an Jisōs Kraist. Ilo kautiej n̄an jerbal in mijenede, katak ko remenin aikuj n̄an peptaij rej kōttāik kōj imaan mejān Anij im kōn juon bōro erub im jetōb ettā.²⁸ Jeļāļo̧kjeņ, m̧weie, kil, ak lāmoren rejjab lukkuun aorōk.

N̄an kakobabaikļo̧k, mijenede ro rej jerbal ilo ettā ijoko emōj kūr er n̄ani. Rejjab kajjieon̄ in kōm̧m̧ane jerbal in mijenede pedped ioon jon̄ak ko an laļ in bwe en āinwōt n̄e ej kadkadier ak kein aer kōpopo n̄an jerbal ko aer ilju im jekļaj. Rej jerbal kōn aolepān buruōer, maron̄, lōmņak, im kajoor ijoko emōj jitōn̄ er n̄an jerbal ie. Rejjab kālet wōn eo renaaj jerbal ippān, im rej kappukōt ilo tiljek n̄an ejaake mour āinwōt Kraist,²⁹ ro me relukkuun ļap tokjen ilo manit eo an Jisōs Kraist.

Jeje ko rekwojarjar ej letok tōl n̄an jem̧jerā eo ad eļap an aorōk. Rilo̧mo̧o̧r eaar katakin bwe kien eo moktata ej n̄an “iakwe Irooj am Anij.” Kein karuo āinwōt in “iakwe ro ri turum im āinwōt kwe.”³⁰

Rilo̧mo̧o̧r ekar kōmeļeļeik bwe aolep armej rej ri tūrūr.³¹ Bok in Mormon ej kalikkar bwe ej aikuj ejjeļo̧k jepel jān doon āinwōt ria, bwij, ak kadkad.³² Jej aikuj ippān doon im juon wōt im̧aan mejān Anij.

Kain̄i ko rekwojarjar im eddo ko rekwojarjar emōj kalōki ioon pedped in. Ij kōtmāne bwe en̄jake ko ami ilo tampeļ ej āinwōt en̄jake ko aō. N̄e ij etal jān jerbal eo aō ilo San Francisco im tōparļo̧k Oakland Tampeļ, ij en̄jake an obrak buruō kōn iakwe im aenōm̧m̧an. Mōttan en̄jake eo eļap ej en̄jake aō lukkuun epaake Anij im kōttōbar ko An. Kain̄i ko rekwojarjar rekar aorōk tata ippa, ak juon mōttan eo eaorōk kōn en̄jake ko reaibojooj rej itok jān ad erom juon wōt im ippān doon eo me ej waļo̧k ilowaan tampōļ. Aolep rej kanōk nuknuk ko remouj. Ejjeļo̧k kein kam̧ool kōn m̧weie, labōļ, ak jon̄an jeļāļo̧kjeņ eo epād ippam; jej aolep jeim jati ilo ad kōttāik kōj make im̧aan Anij.

Ilo room in liāp eo ekwojarjar, kain̄i in m̧are eo n̄an indeeo ej jon̄an wōt juon n̄an aolep armej. Im̧ōņōņō in lo an ripālele ro jān kadkad ko rettā im ripālele ro jān kadkad ko rem̧weie rej lukkuun juon wōt ilo en̄jake ko aer. Rej kanōk juon wōt kain nuknuk im kōm̧m̧ani juon wōt kain bujen iturin juon wōt lokatok. Rej barāinwōt bōk juon wōt kain kōjeraam̧m̧an an priesthood eo ejjeļo̧k jem̧ļo̧kin. Menin ej dedeļo̧k iļo juon tampeļ eo eaibojooj emōj kalōke kōn mōttan jon̄oul ko an ro Rekwojarjar āinwōt juon em̧ eo ekwojarjar imōn Irooj.

Kakūrm̧ool eddo ko rekwojarjar emōj litoki, pedped ioon tiljek, ippān doon, im juon wōt imaan mejān Irooj, ej bōktok m̧ōņōņō n̄an kajjojo im aeņōm̧m̧an ilo laļ in im kōpooj kōj n̄an mour indeeo ilo mour eo ej itok.³³ Ej kōpooj kōj n̄an iioon Anij.³⁴

Jej jar bwe kajjojo iaad, en kōjekdoon jekjek eo pād ie kiiō, enaaj bōk kapilōk jān bisop im erreo n̄an bōk peba in mālim n̄an delo̧n̄e tampeļ eo.³⁵

Jej kam̧m̧olool bwe elōn̄ ļo̧k membōr ro rej kōpopo n̄an etal n̄an tampeļ. Emōj an ļapļo̧k iļo bōnbōn oran rūtto ro reerreo n̄an bōk peba in mālim n̄an delon̄e tampeļ elōn̄ iiō ko. Peba in mālim eo n̄an delo̧n̄e tampeļ me elōn̄ jon̄an kōjerbale emōj an ļapļo̧k ilowaan iiō ko ruo remootļo̧k. Ealikkar bwe membōr ro an Kabun̄ in ro me retiljek relukkuun kajoorļo̧k jān mokta.

N̄an kōjem̧ļo̧ke, jouj im jeļā bwe ritōl eo etto tata an tōl ilo Kabun̄ in eo ej tōl kōttōbar ko rekwojarjar an Kabun̄ in ej bōk jipan̄ rekwojarjar. Tōl in ej itok jān Jetōb im jet iien ej kajju jān Rilo̧mo̧o̧r. Jimor tōl in jetōb kar letok. Eļap aō kam̧m̧olool ilo aō kar bōk jipan̄. Ak tōl ej itok ekkar n̄an iien ko an Irooj, lain im bar lain,³⁶ m̧ae “Irooj enaaj kālet n̄an katakin kōj.”³⁷ Tōl eo an Kabun̄ in āinwōt juon ilo dipio in ej itok wōt n̄an rikanaan eo An.

Kōjwōj aolep kar utiej ilo ad rejtake Būreejtōn Russell M. Nelson āinwōt juon Rikanaan im Būreejtōn an Kabun̄ eo an Jisōs Kraist im Armej ro Rekwojarjar ilo Raan Kein Āliktata ilo kweilo̧k in. Jon̄oulruo ro, āinwōt juon doulul im kajjojo, ekar wōr juon en̄jake in jetōb eo eaorōk ke kōm kar likit pā ko peim ioon bōran Būreejtōn Nelson im Būreejtōn Dallin H. Oaks, eo ej kōm̧m̧ane jar eo, kar kapiti e im kapene āinwōt juon Būreejtōn an Kabun̄ in. Ij kam̧ool bwe ekar ekkapit im emōj kar kōpooj aolepān mour eo an n̄an erom juon Rikanaan an Irooj ilo raan kein. Ilo etan Jisōs Kraist, amen.