Jerbal in Karejar āinwōt Rilo̧mo̧o̧r ekar Kōm̧m̧ane
Jān Jean B. Bingham
Būreejtōn eo Eutiej an Doulul eo an Kōrā
Jej aikuj kwaļo̧k ad kam̧m̧oolol im iakwe n̄an Anij ilo ad jerbal in karejar ilo iakwe n̄an ro jeid im jatid indeeo.
Ej juon kōjeram̧m̧an n̄an mour ilo juon tōre eo ej wōnm̧aanļo̧k wōt revelesōn jān Anij! Ilo ad kijoroor im m̧ōņōņō kōn “iien karōk men otemjej,”1 eo emōj im enaaj itok kōn kanaan in makūtkūt ko ad ilo tōre kein ad, emōj ad kōppopo n̄an Itok eo Kein Karuo an Rilo̧mo̧o̧r.2
Im ejjeļo̧k juon wāween eo em̧m̧anļo̧k n̄an kōppopo n̄an iioon E ijjelļo̧kin ad kajjieon̄ erom āinwōt E itok jen ad loļo̧k doon ilo iakwe! Ke Jisōs Kraist ekar katakin rikaļoor ro An ilo jinoin epepen in, “Eļan̄n̄e kwōj iakwe Eō kwo naaj jerbal n̄an Eō.”3 Jerbal in jipan̄ ko ad n̄an ro jet ej juon jerbal an rikaļoor im ad kam̧m̧oolol im iakwe n̄an Anij im eo Nejin, Jisōs Kraist.
Jet iien jej ļōmņak jej aikuj kōm̧m̧ani men ko reļļap im kabwilōn̄lōn̄ n̄an “watōke” āinwōt jipan̄ ro rūtūrir. Jerbal in jipan̄ ko reļamwaan remaron̄ kōm̧m̧an eļap oktak ilo mour an ro jet—barāinwōt n̄an kwe make. Ta eo Rilo̧mo̧o̧r ekar kōm̧m̧ane? Kōn menin letok eo An ekwojarjar kōn Pinmuur im Jerkakpeje eo—eo jej kakeememeji ilo Jabōt in Ijtō in eaibojooj—“ejjeļo̧k bar juon emaron̄ kar ukōt mour [an] armej ro rekar mour ioon laļ in im ro renaaj mour tokālik.”4 Ak Ekar bar ettōn̄dikdik n̄an er, kar kōnono ippāer, ettetal ippāer, ron̄jake er, kōm̧m̧an an iien ippāer, kōketak er, katakin er, naajdik er, im jeorļo̧k aer bōd. Ekar jipan̄ baam̧le ko an im ro m̧ōttan, ro rūtūrin im ro ruamājet jon̄aer wōt juon, im Ekar kūr tok ro m̧ōttan im ro rejitōnbōro n̄an m̧ōņōņō kōn kōjeram̧m̧an ko reaibojooj ilo gospel eo An. Jerbal in jipan̄ ko “reļamwaan” im iakwe ej letok juon waanjon̄ak kōn loļo̧k ko ad.
Ilo an wōr am iien n̄an bōk jikin Rilo̧mo̧o̧r ilo kijejeto in loļo̧k ko am, kajjitōkin eok make? Ewi wāween aō kwaļo̧k meram in gospel ippān kajjojo ak baam̧le? Ta eo Jetōb ej im̧we eō n̄an kōm̧m̧ane?
Jerbal in loļo̧k emaron̄ kōm̧m̧an ilo elōn̄ wāween ko an juon make. Kōn menin, ta waanjon̄ak in loļo̧k ko?
Waanjon̄ak in loļo̧k ej ilo an būreejtōnji eo an doulul eo an elder ro im doulul eo an kōrā ro rej lukkuun jar im kapilōk do̧o̧n kōn ijjitōn̄ ko. Ijjeļo̧kin an ritōl ro leto letak peba jiddik ko, emaron̄ bar leļo̧k kapilōk kōn kajjojo armej im baam̧le ko ilo an m̧ōj jitōn̄ er n̄an rikarejar jeid im jatid m̧aan im kōrā ro. Emaron̄ āinwōt ettetal ippān doon, ikkure ippān doon in jota, leļo̧k jipan̄, ak emaron̄ jipan̄ doon. Emaron̄ āinwōt loļo̧k er ak bwebwenato ilo taļboon ak jeje im bwebwenato ilo online. Emaron̄ āinwōt bokļo̧k juon birthday kaat im kabbo̧kbo̧k ilo iien jiie jakkad. Emaron̄ āinwōt kwaļo̧k juon eoon ak kout jān juon kōnono ilo juon iien kweilo̧k me emaron̄ ļap meļeļein n̄an armej en. Emaron̄ āinwōt kōmeļeļe kōn kajjitōk ko an gospel in im kwaļo̧k naan in kam̧ool n̄an meļeļe im lo aeņōm̧m̧an. Emaron̄ āinwōt erom juon eo mōttan im kea kōn e. Emaron̄ āinwōt loļo̧k ilo intōrpiu ijo jemaron̄ kōnono kōn mōjņo im kajoor ko an ilo wāween eo ekkar im jejjet. Emaron̄ āinwōt karōk ward ko̧o̧njeļ n̄an kakke aikuj ko reļļap.
Kain loļo̧k in ej kōkajoorļo̧k juon sister eo em̧ōj an em̧m̧akūt jān m̧weo imōn ke ļeo pāleen ekar jino jikuuļ ilo jikuuļ ko reutiejļo̧k. Ilo an ejjeļo̧k taļboon im juon nin̄nin̄ ippān n̄an kōjparoke, ejakoņ an pād ilo juon jikin ekāāl, jajineet im ajimakeke. Ilo an jab jeļā, juon sister jān doulul eo an kōrā ekar itok n̄an kōjem eo an im ej boktok juon pea in juuj jidikdik n̄an nin̄nin̄ eo, kauweik erro ilo wa eo waan, im bokļo̧k er bwe ren kaikujkuj. Sister in ekar obrak kōn kam̧m̧oolol ekar ripoot āinwōt in, “Ekar jipan̄ eō ilo iien ko rekar eppen n̄an eō!”
Jerbal in karejar eo em̧ool ej waļo̧k ilo kōmeļeļe in an juon sister erūtto ilo Africa ke kar jitōn̄n̄e n̄an pukot tok juon sister eo me eto an jab bar jar. Ke ej etal n̄an m̧weo imōn sister eo, ekar lo bwe emōj m̧an e im ko̧o̧ti men ko m̧weieņ, kar jidik wōt kijen, im ekar ejjeļo̧k an nuknuk ko me rekkar n̄an kweiļo̧k ko an Kabun̄ in ilo Jabōt. Kōrā eo me rekar jitōn̄n̄e n̄an loļo̧k e ekar lukkun pojak in ron̄jake, ekar boktok leen wōjke ko jen jikin kaļļip, jeje ko rekwojarjar n̄an riit, im jem̧jerā. Sister in eto an jab bar jar ekar bar ro̧o̧l tok im jar im kiiō ewōr juon an kūr kōnke ej en̄jake iakwe im an aorōk.
Kobain aolep kijejeto kein an doulul eo an kōrā ippān jerbal in loļo̧k eo ekāāl an elders quorum enaaj boktok juon ippān do̧o̧n eo me emaron̄ tōprak ko rekabwilōn̄lōn̄. Jerbal in karejar ej erom juon kijejeto n̄an kakūrm̧ool eddo an Priesthood n̄an “loļo̧k m̧weo imōn kajjojo membōr”, im n̄an “emmejraake kabun̄ in iien otemjej, im pād ippāer im kōkajoor er,”5 barāinwōt n̄an tōpar kōttōpar eo an Doulul eo an Kōrā n̄an jipan̄ do̧o̧n kōppopo n̄an kōjeram̧m̧an ko an mour indeeo.6 Jerbal ippān doon iumin tōl eo an bisop, doulul eo an elder im būreejtōnji an doulul eo an kōrā remaron̄ im̧we ilo aer kappukot wāween ko rem̧m̧an tata n̄an emmejraake im kea kōn kajjojo im baam̧le.
In lewaj juon waanjon̄ak. Juon mama eo ekar nan̄inmej in kāānjer. Ejjab to ekar jino ebbōk uno, im emōkaj an sister ro ilo doulul eo an kōrā jino kōmadmōd, rekar pepe ippān doon wāween aer jipan̄ kōn m̧ōn̄ā ko kijen, iaļan ilo iien taktō ko an, im jipan̄ ko jet. Ekar emmakijkij aer loļo̧k e, leļo̧k n̄an e jem̧jerā eo ekam̧ōņōņō. Ilo ejja iien eo wōt, doulul eo an Melkisedeik Priesthood ekar kajju bar bōk koņaan. Rekar kōm̧m̧an jerbal n̄an kōm̧m̧ane juon an peet im jikin an kōppojak n̄an kapidoddikļo̧k ilo aer kea kōn sister in enan̄inmej. Likao ro rekar leļo̧k peier im kōm̧m̧ani jerbal ko reļļap ilo kijejeto eo eaorōk. Im jiron̄ ro rekar bar bōk koņaer: rekar lukkun m̧ōņōņō in niknik in lale kidu eo nejin kajjojo raan. Iien ko rem̧ootļo̧k wōt, ward eo ekar wōnm̧aanļo̧k wōt kōn jerbal in jipan̄ ko aer, rekar kōm̧m̧ani ijoko remenin aikuj. Ekar juon jerbal in iakwe, kajjojo membōr rekar leļo̧k ijoko koņaer n̄an e, ilo aer juon wōt im kwaļo̧k aer kea ilo wāween ko kajjojo me ekar jab kōjeram̧m̧anwōt rinan̄inmej eo ak membōr ro kajjojo ilo baam̧le eo.
Ālkin juon kijejeto eperan, sister in ekar jab maron̄ wōnm̧aanļo̧k wōt kōn kāānjer im ekar mej. Ward eo ekar ke meļak im watōke juon jerbal em̧m̧an im ededeļo̧k im jem̧ļo̧k? Ejjab, jiron̄ ro rekar wōnm̧aanļo̧k wōt im lale kidu eo aolep raan, doulul eo an priesthood rekar wōnm̧aanļo̧k wōt im jerbal in karejar n̄an ļeo pāleen im baam̧le eo an, sister ro ilo doulul eo an kōrā rekar wōnm̧aanļo̧k n̄an loļo̧k ilo iakwe n̄an lale ta aer aikuj im m̧ōjņo. Brother im sister raņ, en̄in ej jerbal in loļo̧k—en̄in ej iakwe āinwōt Rilo̧mo̧o̧r!
Bar juon kōjeram̧m̧an kōn kōjjeļā kein reim̧we ej kōn iien ko rem̧m̧an n̄an jiron̄ ro me 14 n̄an 18 aer iiō n̄an bōk koņaer loļo̧k ilo aer m̧ōttāeiki sister ro ilo doulul eo an kōrā, āinwōt likao ro me ejjejet iiō in aer kōmpānien ro rej jerbal in karejar n̄an Melkisedek Priesthood ro rejitōn bōro. Jodikdik remaron̄ kwaļo̧k menin letok ko rejeņoļo̧k kaki im eddōkļo̧k ilo jetōb ilo aer jipan̄ ippān rūtto ro ilo jerbal in lo̧mo̧o̧r. Kōjerbal jodikdik ro ilo ijjitōn̄ in loļo̧k ko emaron̄ bar kōļapļo̧k tōprak ko an doulul eo an kōrā im doulul eo an elder ro ilo aer kalōn̄ļo̧k oran membōr ro rej bōk koņaer n̄an lale ro jet.
Ke ij ļōmņak kōn jiron̄ ro reaibojooj me ijeļā kajjier, ilukkun em̧ōņōņō kōn sister ro ilo doulul eo an kōrā ro me renaaj jeram̧m̧an kōn jiron̄ ro me reobrak kōn ikdelel, taļōņ, im epidodo aer en̄jake jetōb ilo aer jipan̄ do̧o̧n ak rej loļo̧k ro jet. Im n̄a, jon̄an wōt juon aō lukkuun lan̄lōn̄ kōn an lōn̄ an jiron̄ ro iien n̄an bōk jipan̄ im ekkatak im kajoorļo̧k kōn sister ro ilo doulul eo an kōrā. Iien in em̧m̧an n̄an bōk koņaad n̄an kaļōk aelōn̄ in kiin̄ eo an Anij enaaj juon jeram̧m̧an eļap n̄an jiron̄ ro, jipan̄ er bwe en em̧m̧anļo̧k aer kōppopo n̄an kakūrm̧ool eddo ko aer āinwōt ritōl ro ilo Kabun̄ in im jukjukin pād im āinwōt jet paatnōr ro rej jipan̄ do̧o̧n ilo baam̧le ko aer. Āinwōt Sister Bonnie L. Oscarson ekar kwaļo̧k inne, jiron̄ ro rekōņaan bwe ren jipan̄. Rej aikuj jeļā bwe eļap aer aorōk im remenin aikuj ilo jerbal in lo̧mo̧o̧r.”7
Ilo m̧ool, jiron̄ ro em̧ōj kadede aer kōm̧m̧an jerbal in karejar n̄an ro jet, ilo aer jan̄in jitōn̄ er ak kile er kōn aer kōm̧m̧ani loļo̧k ko aer. Juon baam̧le ijeļā ekar em̧m̧akūt jibukwi m̧ael ko n̄an juon jikin eo ekāāl ijo ejjeļo̧k juon rejeļā kajjien. Ilowaan wiik eo jinoin, leddik eo me 14 an iiō jān ward eo aer ekāāl ekar pād ilo nabōj in kōjem̧ eo aer kōn juon pileej in kukiij, im ej karuwaineneik er n̄an jikin eo. Jinen ekar jutak likin leddik eo im ettōn̄dikdik āinwōt juon eo epojak in jipan̄, ej rie leddik in kōn ikdelel in an n̄an loļo̧k.
Bar juon mama ekar lukkuun inepata juon raan kōn leddik eo nejin 16 an iiō ke ekar jako jān m̧weo ilo awa eo ekkā an pād m̧weo ie. Ke leddik eo ej tōparļo̧k m̧weo, jinen ear kajjitōkin e ilo an illu kōn ia eo ekar pād ie. Leddik in 16 an iiō ekar būrom̧ōj ilo an uwaak kōnke ekar bokļo̧k juon wūt n̄an juon kōrā eo ejjeļo̧k pāleen eo eaar jokwe epaakeļo̧k er. Ekar kile bwe sister eo an erūtto ekar ejjeļo̧k m̧ōttan im ekar en̄jake bwe en loļo̧k. Ke jinen ej kōmālimi, jiron̄ in ekar wōnm̧aanļo̧k wōt im loļo̧k kōrā in erūtto. Rekar mōttaiki dooņ, im m̧ōttā in aerro ekar wōnm̧aanļo̧k wōt ilo elōn̄ iiō ko.
Kajjojo jiron̄ rein, im elōn̄ ļo̧k ro jet āinwōt er, kar jeļā kōn aikuj an juon armej im jerbal n̄an kōttōbrake aikuj ko. Jiron̄ ro ewōr ippāer ikdelel n̄an kea im kwaļo̧k me emaron̄ kar bōk jikin ilo aer jerbal in karejar im m̧ōttāiki juon eo rūtto.
Kōjekdoon iiō ko aer, n̄e jej ļōmņak kōn wāween loļo̧k eo em̧m̧an, jej kajjitōk, “Ta eo [ej] aikuji?” Kobain kajjitōk kein im juon ikdelel em̧ool n̄an jipan̄, innem jej bōk tōl an Jetōb n̄an kōm̧m̧ane ta eo enaaj kōketak im kōkajoorļo̧k kajjojo. Ikar ron̄ elōn̄ bwebwenato ko kōn bratōr im sister ro me rekar jeram̧m̧an itok jān men jiddik ko reļam waan kar kōm̧m̧ani im karuwainene ko ilo mōn jar eo, juon email emman ak enaan ilo txt, loļo̧k er ilo juon iien epen, juon kūr n̄an mōttanļo̧k makūtkūt ko, ak leļo̧k jipan̄ ilo jekjek ko reppen. Mama ak baba ro me rej make iaaer, ro rekāāl tok n̄an kabun̄ in, membōr ro rejaniknik, kōrā ro ejjeļo̧k pāleer im em̧m̧aan ro ejjeļo̧k pāleer, ak jodikdik ro me rej aikuj eļapļo̧k jipan̄ jān rikarejar ro jeid im jatid m̧aan im kōrā. Jerbal ippān doon eo ikōtaan doulul eo an elder ro im būreejtōnji eo an doulul eo an kōrā ro ej kōm̧m̧an bwe ijjitōn̄ kein ren jejjet ilo aer kōm̧m̧ani.
Āļkin aolepān men ko em̧ōj ba im kōm̧m̧ani, m̧ool in jerbal in karejar ej tōprak juon ilo̧k juon kōn iakwe āinwōt ej kōketak. Aorōkin im aibojooj in jerbal in karejar eo em̧ool ej bwe ej lukkuun ukōt mour an armej! N̄e buruōd ej pelļo̧k im ikdelel n̄an iakwe im karuwainene, kapilōk im kaeņōm̧m̧an, kajoor in ad jerbal in karejar ban maron̄ kajekdoon. Kōn iakwe āinwōt kein kōketak, menin bwilōn̄ ko renaaj waļo̧k, im jenaaj lo wāween ko n̄an boktok m̧aan im kōrā ro jeid im jatid ro me “rejaniknik” im karuwaineneik er n̄an gospel eo an Jisōs Kraist.
Rilo̧mo̧o̧r ej juon ad waanjon̄ak ilo men otemjeļo̧k—ejjab ilo men ko wōt jej aikuj kōm̧m̧ani ak etke jej aikuj kōm̧m̧ani.8 “Mour eo an ioon laļ in ekar [juon] kūr n̄an kōj—n̄an kōļapļo̧k loļo̧kjeņ ko ad, n̄an meļo̧kļo̧k būrabļōm ko ad make im [n̄an] loļo̧k ro jet.”9 Ilo ad bōk iien eo em̧m̧an n̄an loļo̧k sister im bratōr ro kōn aolepān buruōd, jejeram̧m̧an n̄an eddōkļo̧k ilo jetōb, kōm̧m̧ane ankilaan Anij, im maron̄ meļeļe eļapļo̧k kōn karōk eo An n̄an jipan̄ kajjojo n̄an jepļaak n̄an E. Jenaaj kile kōjeram̧m̧an ko An im kijoroor in erļo̧ke kōjeram̧m̧an ko n̄an ro jet. Būruōd im ainikier renaaj al ippān do̧o̧n:
Rilo̧mo̧o̧r, ij aikuj iakwe ro jeiū im jatū
Āinwōt Aō jeļā kwoj iakwe eō,
Ilo kwe ij lo aō kajoor, aō meram,
Bwe ij juon karejeram.
Rilo̧mo̧o̧r, Ij aikuj iakwe ro jeiū im jatū
Irooj, Inaaj ļoor Eok.10
Jej aikuj kwaļo̧k kam̧m̧oolol im iakwe n̄an Anij ilo ad loļo̧k ilo iakwe n̄an sister im bratōr ro ad n̄an indeeo.11 Uwaak eo enaaj kōn juon en̄jake in ippān doon āinwōt armej ro etto ilo Amedka rekar m̧ōņōņō ium̧win 100 iiō ko ālkin an kar Rilo̧mo̧o̧r eo waļo̧kļo̧k n̄an āneo āneer.
“Im ālikin men kein eaar ejjeļo̧k jum̧ae doon … kōnke iakwe eo an Anij eo eaar pād ilo būruōn armej ro.
“… Eaar ejjeļo̧k juunm̧aad ko, ak akwāāl ko, … im em̧ool eaar ejjeļo̧k bar armej rem̧ōņōņōļo̧k ilubwiljin armej ro otemjej kar ejaak jān pein Anij.”12
Ij m̧ōņōņō iņ kwaļo̧k aō naan in kam̧ool bwe oktak ko rej bōk jikier kōn revelesōn ko rej im̧we an Anij im bwe, ilo ad kōm̧m̧ani kōn buruōn ikdelel, enaaj em̧m̧anļo̧k ad kōpooj kōj n̄an ioon eo Nejin, Jisōs Kraist, ilo itok eo An.Jenaaj epaakeļo̧k n̄an erom juon Zāion im jenaaj lan̄lōn̄ ippān ro me em̧ōj ad kar jipan̄ er ilo iaļ in an rikaļoor. Bwe jen maron̄ kōm̧m̧ane men in ej aō jar ilo etan Jisōs Kraist, amen.