2018
Ta eo Aolep Rikabwijer Aaronic Priesthood Rej Aikuj in Jeļā
May 2018

Ta eo Aolep Rikabwijer Priesthood an Aron Rej Aikuj in Jeļā

Jān Douglas D. Holmes

Rikakpilōklōk eo Kein Kajuon ilo Būreejtōnji eo Eutiej an Likao ro

Pija
Brother Douglas D. Holmes, Young Men General Presidency First Counselor. Official Portrait 2018.

Ami ekkapit n̄an Priesthood eo an Aron ej pād ioļap n̄an jipan̄ ajri ro nejin Anij bōk kajoor in pinmuur eo an Kraist.

Em̧m̧aan raņ, ej juon jeram̧m̧an ilo aō pād ippāmi ilo kweilo̧k in ekabwilōn̄lōn̄. Ke ikar juon mijen būreejtōn, ikar kijoroor in wōnm̧aeiki kurup in mijenede ro nejim jinointata. Jet iaan mijenede ro am im eļapļo̧k aer imminene kōn jerbal in mijenede rekar m̧aanjabpopo n̄an juon kweilo̧k ekadu ippāer. Ikar kile ke em̧ōj aer karōk jea ko an ajri ro ilo jimettan in juon doulul.

“Kein ta jea jiddik ke?” Ikar kajjitōk.

Mijenede ro, rekar ekkōļ jidik, im ba, “N̄an mijenede ro rekāāl.”

Ij tōmak wāween ad kalimjōk ro jet ej kwaļo̧k ad ļōmņak kōn wōn er im ta eo renaaj erom.1 Mijenede ro nejim rekar jijjet ilo jea ko an rūtto raan eo.

Jet iien, Ij ekkōļ, jej leļo̧k n̄an ļikao ro nejid ilo Priesthood an Aron jea ko an ajri bwe ren jijet ie ijjeļo̧kin ad jipan̄ er jeļā bwe Anij eaar leļo̧k n̄an er juon lōke ekwojarjar im juon jerbal aorōk n̄an kōm̧m̧ane.

Būreejtōn Thomas S. Monson ekar kapilōk kōj bwe likao ro rej aikuj meļeļeļe “ta meļeļein … n̄an erom rikabwijer priesthood ro an Anij. Rej aikuj bōk tōl n̄an bōk jetōbin kakemeemej kōn kwojarjar in kūr ko aer emōj kapit er kaki.”2

Rainin Ij jar bwe Jetōb Kwojarjar enaaj tōl kōj n̄an juon meļeļe eļap kōn kajoor im kwojarjar eo an Priesthood eo an Aron im im̧we kōj n̄an mije eļapļo̧k ilo tiljōk kōn eddo ko an priesthood ko ad. Ennaan eo aō ej n̄an aolep rikabwijer Priesthood eo an Aron, ekoba ro rej barāinwōt kabwijer Melkisedek Priesthood eo.

Elder Dale G. Renlund ekar katakin bwe unleplep in priesthood eo ej n̄an letok iaļ n̄an ajri ro nejin Anij bwe ren en̄jake kajoor in pinmuur eo an Jisōs Kraist.3 N̄an bōk kajoor in pinmuur eo an Kraist ilo mour ko ad, jej aikuj tōmak ilo E, ukweļo̧k jān jerawiwi ko ad, kōm̧m̧an im kōjparok bujen ko rekwojarjar kōn kain̄i ko, im bōk Jetōb Kwojarjar.4 Rejjab jet katak ko me jej bōk koņaad ie juon wōt kōttan; ijelļo̧kin, rej jerbal ippān doon, jipan̄ im kalōk doon ilo juon jerbal eo ej wōnm̧aanļo̧k wōt ilo an eddōkļo̧k n̄an “itok n̄an Kraist, im weeppān ilo E.”5

Kōn menin, ta jerbal eo an Priesthood an Aron ilo menin? Ewi wāween an jipan̄ kōj maron̄ en̄jake kajoor in pinmuur eo an Kraist? Ij tōmak uwaak ko me rej pedped ioon kii ko an Priesthood an Aron—kii ko an jerbal in karejar eo an enjeļ ran im an gospel in m̧aanjāppopo in.6

Jipan̄ ko an Enjeļ ro

Jen jino kōn juon jekjek in jerbal in karejar eo an enjeļ raņ. Mokta jen an wōr an ajri ro nejin Anij tōmak ilo Jisōs Kraist, rej aikuj jeļā E im ekkatak gospel eo An. Āinwōt an Rijilōk Paul kar ba:

“Ekōjkan aer naaj lōke Eo raar jab ron̄ kōn E? Im ekōjkan aer naaj ron̄ n̄e ejjeļo̧k ri kwaļo̧k?

“Im ekōjkan aer naaj kwaļo̧k eļan̄n̄e jab jilkinļo̧k er? …

“Innām tōmak kōn ron̄jake, im ron̄jake kōn naan in Kraist.”7

Jen jinoin iien, Anij ekar “jilkinļo̧k enjeļ ro n̄an jipan̄ ro nejin armej, n̄an kwaļo̧k ilo alikkar … itok eo an Kraist.”8 Enjeļ ro rej armej in lan̄ ro rej ebōktok enaan an Anij.9 Ilo jimor Hibru im Greek, meļeļein naan in enjeļ ej “ribōktok enaan.”10

Ejja wāween in wōt Anij ekar jilkintok enjeļ ro rej rilotok ro em̧ōj kōmālim er n̄an kwaļo̧k naan ko An im juon uwaak in kalōk tōmak, kōj ro jej kabwijer Priesthood an Aron emōj kapit kōj n̄an “katakin, im kūr aolep n̄an itok n̄an Kraist.”11 N̄an kwaļo̧k gospel eo ej jerbal an priesthood. Im kajoor eo ilo jerbal in ejjab n̄an rikanaan ro ak mijenede ro wōt. Ej n̄an kom̧!12

Kōn menin ewi wāween ad bōk kajoor in? Ewi wāween an juon tikōn 12 an iiō—ak jabdewōt iaad—bōkļo̧k tōmak ilo Kraist n̄an ajri ro nejin Anij? Jej jino ilo ad kaurōki naan ko An bwe ren kajoor ilo kōj.13 Emōj an kalim̧m̧uri kōj bwe eļan̄n̄e jej kōm̧m̧ane, enaaj wōr ippād “kajoor an Anij n̄an ukōt buruōn armej.”14 Emaron̄ juon iien em̧m̧an n̄an katakin ilo iien kūlaaj ak ilo iien loļo̧k m̧ōko mōn member ro. Emaron̄ jab lukkun kōllaajrak, āinwōt bwebwenato ippān juon eo mōttam ak juon eo uwaan baam̧le eo am. Ilo aolepān jekjek kein, eļan̄n̄e jekar kōpooj kōj, jemaron̄ katakin gospel eo āinwōt enjeļ ro: kōn kajoor eo an Jetōb Kwojarjar.15

Pija
Jacob im Brother Holmes

Ikar ron̄ an Jacob ba, juon rikabwijer Priesthood an Aron ilo Papua New Guinea, ej kam̧ool kōn kajoor eo an Bok in Mormon im wāween an kar jipan̄ e anjo̧ jān nana im ļoor Jetōb. Naan ko an rekar kōļapļo̧k tōmak eo aō im tōmak an ro jet. Tōmak eo aō ekar barāinwōt eddōkļo̧k ke ikar ron̄ an rikabwijer Priesthood an Aron ro katakin im kam̧ool ilo kūlaaj ko aer.

Likao ro, kom̧ij rilotok ro em̧ōj kōmālim er. Jān naan ko ami im jerbal ko ami, kom̧ maron̄ bōktok tōmak ilo Kraist n̄an būruwōn ajri ro nejin Anij.16 Āinwōt Būreejtōn Russell M. Nelson ekar ba, “N̄an er kom̧ naaj erom̧ āinwōt juon rikarejar enjeļ.”17

Gospel in m̧aanjāppop eo

Kōļapļo̧k tōmak ilo Kraist enaaj tōl aolep iien n̄an juon ikdelel n̄an oktak ak ukweļo̧k.18 Kōn menin ewōr unin bwe kii ko an jerbal in karejar an enjeļ ro en ekkeijeļ ļo̧k ippān kii ko an gospel in m̧aanjāppopo “gospel in ukeļo̧k im in peptaij, im in jeorļo̧k in jero̧wiwi.”19

Ilo ami ekkatak kōn jerbal ko an Priesthood an Aron, kom̧ naaj loe bwe ej juon jerbal eo ealikkar n̄an kūr tok ro jet n̄an ukweļo̧k im eddōkļo̧k.20 Ejjab meļeļein jej jutak ilo kepoon in iaļ ko im elamōjmōj, “Kom̧in Ukeļo̧k!” Ekkā an meļeļein bwe jen ukweļo̧k, jeorļo̧k bōd im āinwōt an kwaļo̧k n̄an ro jet, jej leļo̧k kōjatdikdik im aeņōm̧m̧an me ej tōprakin ukweļo̧k—kōnke emōj ad en̄jake ilo kōj make.

Emōj aō pād ippān rikabwijer Priesthood an Aron ro ke rekar loļo̧k ro mōttaier ilo kūlaaj eo aer. Emōj aō kam̧oole bwe aer kea ekar kōpelļo̧k bōro ko im jipan̄ ro jeir im jatier en̄jake iakwe eo an Anij. Ikar ron̄ an juon likao kwaļo̧k naan in kam̧ool eo an n̄an ro mōttan kōn kajoor in ukweļo̧k. Ke ekar kōm̧m̧ane, ekar pelļo̧k buruōer, kalim̧m̧ur ko rekar kōm̧m̧an, im kar en̄jake kajoor in kōmour eo an Kraist.

Būreejtōn Gordon B. Hinckley ekar katakin: “Ej juon men n̄an ukweļo̧k. Ej bar juon n̄an meļo̧kļo̧k ak jeorļo̧k bōd ko ad. Kajoor eo n̄an kakūrm̧ool menin ej pedped ioon Priesthood an Aron.”21 Kain̄i ko an Priesthood eo an Aron kōn peptaij im kwojkwoj eo ej kam̧ool im dedeļo̧k in ukweļo̧k ko ad kōn juon jeorļo̧k bōd in jerawiwi ko.22 Būreejtōn Dallin H. Oaks ekar kōmeļeļeiki wāween in: “Emōj kakien n̄an ukweļo̧k jen jerawiwi ko aer im n̄an itok n̄an Irooj kōn juon bōro erub im jetōb ettā im bōk kwojkwoj eo. … N̄e jej kōkāāl bujen peptaij ilo wāween in, Irooj ej kōkāāl karreo eo ilo iien ad peptaij.”23

Em̧m̧aan ro rejitōn bōro, ej juon jeraam̧m̧an ekwojarjar n̄an kōm̧m̧ani kain̄i ko me rej bōktok juon jeorļo̧k in jerawiwi n̄an būruwōn riukweļo̧k ro jān kajoor in pinmuur eo an Rilo̧mo̧o̧r eo.24

Rekar ba n̄an eō kōn juon pris, eo ekar apan̄ an kwaļo̧k en̄jake ko an kar e eo ilo an kōjeraam̧m̧an e kwojkwoj eo ej kab kein kajuon an kōm̧m̧ane. Ke ekar kōjeram̧m̧ane, jetōb eo ekajoor ekar kalibubuiki im aolepen jarlepju eo. Tokālik ilo iien jar eo, ekar kwaļo̧k juon an naan in kam̧ool eļōmwaan ak naan in kam̧ool ewājepdik kōn kajoor an Anij ekar en̄jake ke ekar kōm̧m̧an kain̄i eo.

Pija
Doulul eo an pris ro ippān Mbuelongo Baam̧le

Ilo Sydney, Australia, emān membōr ro ilo juon doulul an pris ro rekar peptaiji ro uwaan baam̧le eo an Mbuelongo. Jinen juon iaan pris ro epaake eō ewi wāween an en̄jake in ekajoor im̧we ļaddik eo nejin. Pris rein rekar jino meļeļe ta meļeļein n̄an erom̧ “bwe em̧ōj an Jisōs Kraist kōmaron̄ eō.”25

Ilo ami jeļā, pris ro remaron̄ kiiō kōm̧m̧ani peptaij ko n̄an ro remej ilo tampeļ. Ļaddik eo nejū ekar peptaij eō kōn ro jet nuku eto. Jej jimor en̄jake kam̧m̧olool eļap kōn Priesthood an Aron eo im kōn jeram̧m̧an in n̄an kōm̧m̧ane n̄an lo̧mo̧o̧ren ajri ro nejin Anij.

Likao raņ, ilo ami tiljek kōm̧m̧ani eddo in priesthood eo ami, kom̧ij bōk koņaami ilo jerbal eo An Anij “n̄an kakūrm̧ool jab wabanban im mour in indeeo an armej.”26 En̄jake rot in rej kōļapļo̧k ikdeleel eo ami im kōpooje kom̧ n̄an katakin ukweļo̧k im peptaiji rioktak ro āinwōt mijenede ro. Rej barāinwōt kōpooji kom̧ n̄an jerbal in jipan̄ eo eaitok ilo Melkisedek Priesthood eo.

Jon Ri Peptaij, Ad Waanjon̄ak

Rikabwijer Priesthood eo an Aron ro, ewōr ad iien em̧m̧an im jerbal n̄an erom̧ rikarejar ro ippān Jon RiPeptaij. Kar jilkinļo̧k Jon āinwōt juon ribōkto bōktak enaan eo emōj kōmālimi n̄an kwaļo̧k kam̧ool kōn Jisōs Kraist im kūr aolep n̄an ukweļo̧k im peptaij—wāween in, ekar kōjerbal kii ko an Priesthood an Aron eo me jekar kōmeļeļe kake. Jon ekar ba, “N̄a ij peptaij kom̧ kōn dān in ukeļo̧k ippemi: a Eo ej itok ālikū eļap An kajoor jān eō … : Enaaj peptaij kom̧ kōn Jetōb Kwojarjar, im kijeek.”27

Kōn menin, Priesthood eo an Aron, kōn kii in jipan̄ ko an enjeļ im gospel in m̧aanjāppopo eo, ej kōpooj iaļ eo n̄an ajri ro nejin Anij n̄an bōke, kōn Melkesidek Priesthood, menin letok eo an Jetōb Kwojarjar, menin letok eo eļaptata jemaron̄ bōke ilo mour in.28

Ej juon eddo eo em̧ūlaļ Anij emōj an leļo̧k n̄an rikabwijer Priesthood an Aron!

Juon Kūr im Kallim̧ur

Ro jinen im jemān im ritōl ro an Priesthood, komaron̄ ke en̄jake aorōkin kapilōk eo an Būreejtōn Monson n̄an jipan̄ likao ro meļeļe “ta meļeļein … n̄an erom rikabwijer priesthood ro an Anij”?29 Meļeļe im kōļapļo̧k Priesthood an Aron eo enaaj kōpooj er bwe ren erom rikabwijer Melkesidek Priesthood ro retiljek, mijenede ro reobrak kōn kajoor, im ļōmaro pālele im baba ro. Kōn jerbal in jipan̄ ko aer, reban meļeļe wōt ak renaaj en̄jake m̧ool in kajoor an priesthood, kajoor n̄an kōm̧m̧ane ilo etan Jisōs n̄an lo̧mo̧o̧ren ajri ro nejin Anij.

Likao raņ, ewōr juon jerbal Anij ekōņaan bwe kom̧in kōm̧m̧ane.30 Ami ekkapit n̄an Priesthood an Aron ej pād ioļap n̄an jipan̄ ajri ro Nejin rej bōk kajoor in pinmuur eo an Kraist. Ij kalim̧m̧ur bwe n̄e kwoj likūt eddo kein rekwojarjar ioļapen mour eo am, kwonaaj en̄jake kajoor an Anij me kwojan̄in kar en̄jake mokta. Kwonaaj meļeļe kadkadim āinwōt juon eo nejin Anij, kar kūr e kōn juon kūr ekwojarjar n̄an kōm̧m̧ane jerbal eo An. Im, āinwōt Jon RiPeptaij, kwonaaj jipan̄ kōpooj iaļ n̄an jepļaaktok eo an eo Nejin. Kōn m̧ool kein ij lukkun kam̧ool ilo etan Jisōs Kraist, amen.

Kakeememej ko

  1. En̄in ej ta eo ekar waļo̧k n̄an Moses. Ālkin an kōnono ippān Anij, ekar jino lo an oktak jen kar mokta—āinwōt ļaddik eo nejin Anij. Jeļā in ekar jipan̄ e anjo̧ ioon Setan, eo kar kūr e “nejū m̧aan” (lale Moses 1:1–20). Bar lale Thomas S. Monson, “See Others as They May Become,” Liahona, Nov. 2012, 68–71; Dale G. Renlund, “Through God’s Eyes,” Liahona, Nov. 2015, 93–94.

  2. Thomas S. Monson, kweilo̧k eo an ritōl ro ilo kweilo̧k eo eļap, Maaj. 2011.

  3. Lale Dale G. Renlund, “The Priesthood and the Savior’s Atoning Power,” Liahona, Nov. 2017, 64–67.

  4. Lale 2 Nipai 31–32; 3 Nipai 11:30–41; 27:13–21; Ether 4:18–19; Moses 6:52–68; 8:24.

  5. Moronai 10:32; bar lale Preach My Gospel: A Guide to Missionary Service (2004), 6.

  6. Lale Katak im Bujen ko 13:1; 84:26–27; 107:20.

  7. Rom 10:14–15, 17. Joseph Smith ekar katakin kōn m̧ool in: “Tōmak ej ejaak ilo ad ron̄jake naan in Anij, itok jen naan in kam̧ool an rikarejaran Anij; bwe naan in kam̧ool ej aolep iien tōl jen jetōb in kanaan im revelesōn.” (Teachings of Presidents of the Church: Joseph Smith [2007], 385).

  8. Moronai 7:22; lale Alma 12:28–30; 13:21–24; 32:22–23; 39:17–19; Hilamōn 5:11; Moronai 7:21–25, 29–32; Katak im Bujen ko 20:35; 29:41–42; Moses 5:58; bar lale Matu 28:19; Rome 10:13–17.

  9. Lale George Q. Cannon, Gospel Truth, sel. Jerreld L. Newquist (1987), 54.

  10. Lale James Strong, The New Strong’s Exhaustive Concordance of the Bible (1984), Hebrew and Chaldee dictionary section, 66, Greek dictionary section, 7.

  11. Katak im Bujen ko 20:59.

  12. Lale Henry B. Eyring, “Bwe En Maron̄ Bar Kajoor,” Liaona, Nob. 2016, 75–78; Alma 17:3; Hilamōn 5:18; 6:4–5; Katak im Bujen ko 28:3.

  13. Lale 1 Jon 2:14; Alma 17:2; 26:13; 32:42. Kakūrm̧ool Eddo eo Aō n̄an Anij: N̄an Rikabwijer Aaronic Priesthood ej juon kein jerbal eo eaorōk n̄an jipan̄ kōtōpar in.

  14. Katak im Bujen ko 11:21; bar lale Katak im Bujen ko 84:85

  15. Lale 2 Nipai 32:3; Katak im Bujen ko 42:14; 50:17–22.

  16. Lale Moronai 7:47.

  17. Russell M. Nelson, “Honoring the Priesthood,” Ensign, May 1993, 40; bar lale Alma 27:4.

  18. Lale Alma 34:17; Hilamōn 14:13.

  19. Katak im Bujen ko 84:27.

  20. Lale Katak im Bujen ko 20:46, 51–59, 73–79. Kakūrm̧ool Eddo eo Aō n̄an Anij: N̄an Rikabwijer Aaronic Priesthood ej juon kein jerbal eo eaorōk n̄an jipan̄ kōj meļeļe eddo ko ad.

  21. Gordon B. Hinckley, “The Aaronic Priesthood—a Gift from God,” Ensign, May 1988, 46.

  22. Elder Todd. Christofferson ekar kōmeļeļeiki: “Peptaij ilo dān ej bun̄tōn eo āliktata im ilōn̄tata ilo jerbal in ukweļo̧k. Jeorļo̧k in jerawiwi, ippānļo̧k bujen in pokake, ej kadedeikļo̧k ad ukweļo̧k; ilo m̧ool, ukweļo̧k ejjab dedeļo̧k n̄e ejjab bujen eo” (“Kalōk Tōmak ilo Kraist,” Liaona, Jep. 2012, 14–15). Bar lale D. Todd Christofferson, “Menin Letok eo Ekwojarjar an Ukweļo̧k,” Liaona, Nob. 2011, 38–41; Ukook eo an Joseph Smith, Matu 26:24 (in the Bible appendix).

    Kain̄i in kwojkwoj eo ej letok n̄an kōj “juon iien em̧m̧an kajjojo wiik n̄an kōkāāli bujen ko rekwojarjar n̄an kōtļo̧k bwe jen ribōk koņaad ilo jouj in pinmuur eo an Rilo̧mo̧o̧r kōn juon wōt jetōbin karreo eo an peptaij im kapen” (“Understanding Our Covenants with God,” Liaona, Juļae 2012, 21). Bar lale Dallin H. Oaks, “Always Have His Spirit,” Ensign, Nov. 1996, 59–61.

  23. Dallin H. Oaks, “The Aaronic Priesthood and the Sacrament,” Liahona, Jan. 1999, 44.

  24. Elder David A. Bednar ekar kōmeļeļeiki: “Kain̄i ko an lo̧mo̧o̧r im mour indeeo rej waļo̧k ilo Kabun̄ eo an Irooj ko eļap tokjāer jān jabdewōt ikitōltōl ak kōkkaļļe ko. Ijjelļo̧k, rej ejaake jānōļ ko emōj kōmālimi eo me kōjeram̧m̧an im kajoor ko an lan̄ me remaron̄ itok n̄an mour ko ad”Aolep iien Jeorļo̧k Ami Jerawiwi” (“Aolep iien Jeorļo̧k Ami Jerawiwi,” Liaona, Māe 2016, 60).

  25. Katak im Bujen ko 20:73.

  26. Lale Moses 1:39.

  27. Matu 3:11.

  28. Elōn̄ ritōl ro ilo Kabun̄ iņ rej kile Jetōb Kwojarjar āinwōt menin letok eo eļaptata an mour in.

    Būreejtōn Dallin H. Oaks ekar ba, “N̄an wōnm̧aanļo̧k wōt kōn jem̧jerā eo an Jetōb Kwojarjar ej juon menin jo̧let eo eaorōk tata jemaron̄ bōke ilo mour in” (“Aaronic Priesthood and Kwojkwoj eo,” Liaona, Jān. 1999, 44).

    Elder Bruce R. McConkie ekar katakin: “Kōnono jān jeļā eo kōn mour indeeo, mour indeeo ej juon iaan menin letok ko reļļaptata an Anij. Ak kakaduikļo̧k jeļā in kōn mour in wōt, menin letok eo an Jetōb Kwojarjar ej menin letok eo eļaptata jemaron̄ m̧ōņōņō kake ilo mour in” (“Ta Unleplep eo an Jetōb Kwojarjar’?)” Instructor, Feb. 1965, 57).

    Būreejtōn Woodruff ekar kam̧ool: “Eļan̄n̄e Jetōb Kwojarjar ej pād ippām—aolep ewōr ippān kajjojo—imaron̄ ba n̄an kom̧ bwe ejjeļo̧k bar juon menin letok eļapļo̧k, ejjeļo̧k bar juon kōjeram̧m̧an eļapļo̧k, ejjeļo̧k bar juon naan in kam̧ool emōj letok n̄an jabdewōt armej ioon laļ in. Emaron̄ wōr ippam tōl an enjeļ ro; komaron̄ lo elōn̄ menin kabwilōn̄lōn̄ ko; komaron̄ lo menin bwilōn̄ ko ilo laļ in; ak ij kam̧ool bwe Jetōb Kwojarjar ej menin letok eo me maron̄ letok n̄an armej” (Teachings of Presidents of the Church: Wilford Woodruff [2004], 49).

    Im Elder David A. Bednar ekar kakobabaikļo̧k: Kien ko jān Anij jej pokake im im̧we in kapilōk ko jen ritōl ro ilo Kabun̄ in me jej mour kaki n̄an bōk jem̧jerā eo an Jetōb. Aolep katak ko an gospel im makūtkūt ko rej pād ioļap n̄an itok n̄an Kraist n̄an bōk menin letok eo an Jetōb Kwojarjar ilo mour ko ad” (“Bōk Jetōb Kwojarjar,” Liaona, Nob. 2010, 97).

  29. Thomas S. Monson, kweilo̧k eo an ritōl ro ilo kweilo̧k eo eļap, Maaj. 2011.

  30. Lale Moses 1:6.