Jiron̄ ro ilo Jerbal in
Jān Bonnie L. Oscarson
Būreejtōn eo Eutiej an Doulul eo an Jiron̄ ro Ej Kab Mōj Kōtļo̧k jān Jerbal
Kajjojo jiron̄ ilo Kabun̄ in rej aikuj en̄jake aer aorōk, wōr aer iien em̧m̧an n̄an jerbal in jipan̄, im en̄jake bwe eļap tokjen n̄an jipan̄ ilo jerbal in.
Juon iiō em̧ootļo̧k, ilo m̧wen̄an eo an priesthood ilo juon iien kweilo̧k eļap, Bisop Gérald Caussé eaar kōnono n̄an em̧m̧aan ro ilo Kabun̄ in eaar kōmeļeļeik wāween an rikabwijer Priesthood eo an Aron im Melkisedek ro rej paatnōr ilo aer jerbal ippān doon n̄an kadedeiļo̧k jerbal in lo̧mo̧o̧r.1 Enaan in ej juon kōjeram̧m̧an eļap n̄an jipan̄ likao ro rej kabwijer Priesthood eo an Aron meļeļe kōn eddo ko rej kōm̧m̧ani n̄an kalōk aelōn̄ in kiin̄ eo an Anij ioon laļ in. Jerbal kein aer ippān doon ej kōkjoorļo̧k Kabun̄ in im boktok lukkuun oktak eo em̧ool im wūjlepļo̧k ilo buruōn likao ro ilo aer lo jon̄an an aorōk ijoko koņaer im jon̄an an kabwilōn̄lōn̄ jerbal in.
Rainin ikōņaan bwe enaan in aō en rie enaan eo ilo aō kōnono kōn wāween an jiron̄ ro ilo Kabun̄ in, ro me jon̄aer wōt juon ad aikuji er im aer aorōk n̄an kadedeikļo̧k jerbal in an Irooj ilo baam̧le ko aer im ilo Kabun̄ in An.
Āinwōt Bishop Caussé, iaar pād ilo juon branch jidikdik an Kabun̄ in ilo tōre ko rem̧m̧an ke ij jodikdik, im ekkā aer letok aō eddo im kūr ko me rej letok wōt n̄an rūtto bwe ren kōm̧m̧ani. N̄an waanjon̄ak, kōj ro ilo būrokūraam ko an jodikdik ekkā ad tōl n̄an jipan̄ ejaaki im kōm̧m̧ani makūtkūt ko im iien ko raorōk. Jekar jeje tieta, kar ejaake juon kurup in al n̄an kalimoiki makūtkūt ko an branch eo, im rekar lukkuun bōk koņaer ilo kweilo̧k ko kajjojo. Kar kūr eō bwe in juon ritōl al im ikar tōl al ko ilo kweilo̧k in kwojkwoj eo kajjojo wiik. Ekar juon en̄jake em̧m̧an āinwōt juon eo me 16 iiō dettan n̄an jutak im̧aan mejān jarlepju in armej ilo branch eo kajjojo Jabōt im tōl er ilo al. Ikar jeļā bwe rekar aikuj eō im eļap ijoko koņaaō n̄an kōm̧m̧an. Armej rekar kōjatdikdik kōn n̄a n̄e elōn̄ menin jipan̄, im ikar m̧ōņōņō ke ij en̄jake bwe ewōr tokja. En̄jake in ekar jipan̄ eō kaļōk naan in kam̧ool eo aō kōn Jisōs Kraist, im ejja āinwōt ta eo Bishop Caussé, ekar kōkajoorļo̧k mour eo an kōn jerbal ko an gospel in.
Kajjojo membōr e aikuj jeļā jon̄an aer aikuji e. Kajjojo armej ewōr ijoko koņaer raorōk n̄an jipan̄ im wōr aer tōļan ko rejeņoļo̧k im kapeel ko me remaron̄ jipan̄ er kōwōnm̧aanļo̧k wōt jerbal in aorōk. Likao ro nejid ewōr aer eddo ilo Priesthood eo an Aron me kar kōmeļeļeik ilo Katak im Bujen ko me relukkuun alikkar. Emaron̄ jab lukkun alikkar n̄an jiron̄ ro ilo Kabun̄ in, ro jineer im jemāer, jān iien eo rekar peptaij, jiron̄ ro ewōr aer eddo ilo bujen ko rekar kōm̧m̧ani n̄an “jan̄ ippān ro rej jan̄; aaet, im kaenōm̧m̧an ro rej pād ilo aikuj in aenōm̧m̧an, im n̄an jutak āinwōt rikam̧ool ro an Anij ilo aolep men otemjeļo̧k, im ilo aolep jikin ko [kom̧] maron̄ pād ie, em̧ool m̧ae mej.”2 Jiron̄ ro ewōr aer eddo n̄an kakūrm̧ool eddo kein ilo ward ko aer im branch ko im n̄e rej pād ilo būreejtōnji ko an kūlaaj ko, ilo doulul ko an jodikdik ro, im kūr ko jet. Kajjojo jiron̄ ilo Kabun̄ in rej aikuj en̄jake aer aorōk, wōr aer iien em̧m̧an n̄an jerbal in jipan̄, im en̄jake bwe eļap tokjen n̄an jipan̄ ilo jerbal in.
Ilo Bok in Bok Meļeļe 2, jej ekkatak bwe jerbal in lo̧mo̧o̧r ilowaan ward ko ad ekoba “membōr ro rej kōm̧m̧an jerbal in mijenede, dāpij ro rekāāl tok, jerbal in kōro̧o̧ltok ro rejaniknik, tampeļ im jerbal in menmenbwij an baam̧le, im kwaļo̧k kōn gospel eo.”3 Jerbal in ej tōl jān bisop ro retiljek, ro rej kabwijer kii ko an priesthood ilo ward ko aer. Elōn̄ iiō kiiō, in an būreejtōnji eo ad kajjitōkin kōj kajjitōk in, “Ewi wōt iaan jerbal ko em̧ōj kōlaajraki ko me jiron̄ ro nejid rejjab aikuj bōk koņaer ie?” Uwaak eo ej ewōr tokjāer n̄an jipan̄ ilo aolep jerbal ko ilo jerbal in.
N̄an waanjon̄ak, raan ko ļo̧k iaar iioon jejjo jiron̄ ilo Las Vegas ro em̧ōj kūr er n̄an jerbal āinwōt rijipan̄ an ward ikkijeen tampel im menmenbwij an baam̧le. Rekar meram kōn aer itok limo ilo aer maron̄ rikaki im jipan̄ membōr ro ilo ward ko aer kappukōt ro nukuier etto. Ewōr aer kapeel ko raorōk ikkijeen kamputōr, rekar ekkatak wāween n̄an kōjerbal FamilySearch, im rekar itok limoier n̄an kwaļo̧k jeļā eo aer n̄an ro jet. Ekar alikkar bwe ewōr aer naan in kam̧ool im meļeļe kōn aorōk in aer kappukōt et ko etan ro nukier etto me remej bwe jen maron̄ kōm̧m̧ani kain̄i in lo̧mo̧o̧r ko aer rekwojarjar ilo tampeļ.
Jejjo allōn̄ rem̧ootļo̧k, ekar wōr aō iien em̧m̧an n̄an kajjieon̄ juon aō ļōmņak ippān jiron̄ ro me 14 aer iiō. Ikar bōk ruo kape in laajrak in ward ko̧o̧njel im ikar kajjoļo̧k an Emma im Maggie juon kape. Ikar kajjitōkin er n̄an riiti laajrak ko im lale eļan̄n̄e elōn̄ jabdewōt makūtkūt jān ward ko̧o̧njel eo n̄e elōn̄ jabdewōt men remaron̄ jipan̄ kake. Emma ekar lo bwe juon baam̧le ekāāl ej kab em̧akūt ļo̧k n̄an ward eo, im ekar ba bwe emaron̄ jipan̄ er kōn m̧weik ko aer. Ekar ļōmņak bwe emaron̄ mōttāik ajri ro ilo baam̧le eo im kwaļo̧k n̄an er m̧ōn jikuul eo aer ekāāl. Ekar lo bwe enej wōr juon kōjota an ward eo im ekar en̄jake bwe ekar lōn̄ kain wāween ko emaron̄ jipan̄ kaki.
Maggie ekar lo bwe ekar wōr jejjo rūtto ro ilo ward eo me relukkun aikuj aer loļo̧k er im mōttāik er. Ekar ba ke em̧ōņōņō in loļo̧k ippān im jipan̄ membōr rein rerūtto im rejouj. Ekar barāinwōt en̄jake ke emaron̄ jipan̄ katakin membōr ro wāween aer kōpelļo̧k im kōjerbal akkaun ko. Ekar ejjeļo̧k juon iaan men ko ilo laajrak in kweiļo̧k eo me jiron̄ rein rejjab maron̄ jipan̄ kake!
N̄an ro uwaan ward ko̧o̧njel eo, ak jabdewōt eo ej kabwijer kūr ko ilo ward eo, kom ej ke watōk jiron̄ ro āinwōt jet kein jipan̄ ko raorōk n̄an kakke aikuj ko rellōn̄ ilo ward ko ad? Ekkā an lōn̄ laajrak in jekjek ko me emenin aikuj n̄an jipan̄ ie, im ekkā ad likūt ej n̄an rūtto ro wōt ilo ward eo n̄an kakke aikuj ko. Āinwōt an ro nejid ro me rej rikabwijer Priesthood eo an Aron m̧ōj kūr er n̄an jerbal ippān jemāer im em̧m̧aan ro rej kabwijer Melkisedek Priesthood, jiron̄ ro nejid remaron̄ kūr er n̄an jipan̄ im kakke aikuj ko an membōr ilo ward eo ippān ro jineer ak sister ro jet reniknik. Remaron̄e, rekijoroor, im ikdeleel n̄an kōm̧m̧an eļapļo̧k jān etal wōt im jar ilo aolep Jabōt!
Ilo ad ļōmņake eddo ko me an jiron̄ ro nejid me emenin aikuj bwe ren kōm̧m̧ane ilju im jekļaj, jemaron̄ kajjitōkin kōj make kain en̄jake rōt ko jemaron̄ leļo̧k n̄an er kiiō me enaaj jipan̄ er m̧aanjāppopo n̄an erom mijenede, tijem̧ļo̧k ilo gospel, ritōl ilo ra ko an Kabun̄, rijerbal in tampeļ, lio pālele, rijipan̄, im erom rimōttā. Remaron̄ lukkuun jino kiiō n̄an kōm̧m̧ani aolep eddo kaņe. Jodikdik ro ekkā ba n̄an er n̄an jipan̄ kwaļo̧k katak ilo Jabōt ilo kūlaaj ko aer. Iien ko rem̧m̧an repojak n̄an jiron̄ ro nejid n̄an kōm̧m̧an jerbal in jipan̄ eo ilo tampeļ eo me ekar m̧ōj jān rijerbal ro ilo tampeļ ak bōk koņaer n̄e rej pād ippān kurup in jodikdik ro n̄an kōm̧m̧an peptaij kōn ro remej. Leddik ro nejid ilo Būraimāre rej kiiō ruwainene n̄an pād ilo kweilo̧k ko an Tampeļ im Kōppopo an Priesthood, eo me enaaj jipan̄ er meļeļe bwe relukkun aorōk ilo aer bōk koņaer ilo jerbal in eo ej tōl jān priesthood eo. Rej katak bwe em̧m̧aan ro, kōrā ro, jodikdik ro, im ajri ro rej aolep ribōk kōjeram̧m̧an ko an priesthood im aolep remaron̄ kōm̧m̧ane ijoko koņaer n̄an kowōnmaanļo̧k jerbal in eo an Irooj.
Bisop ro, jejeļā eddo ko ami reppen, āinwōt juon iaan eddo eo ami ej n̄an tōl doulul eo an rikabwijer Priesthood eo an Aron, eo ej kwaļo̧k ilo, Bok in Bōk Meļeļe 2 ej kōmeļeļeik bwe “bisop eo im rikakpilōklōk ro an rej leļo̧k tōl an priesthood n̄an Doulul eo an Jiron̄ ro. Rej mije im kōkajoor kajjojo jiron̄ ro, rej lukkuun jerbal ippān ro jineer im jemeer im ritōl ro an Doulul eo an Jiron̄ Ro ilo kijejeto in.” Ej barāinwōt kwaļo̧k bwe “bisop eo im rikakpilōklōk ro an emmakijkij aer bōk koņaer ilo kweilo̧k ko an Doulul eo an Jiron̄ Ro, jerbal in jipan̄, im m̧akūtkūt ko.”4 Jej kam̧m̧olool kōn bisop ro rej joļo̧k iien n̄an loļo̧k kūlaaj ko an Jiron̄ Ro im leļo̧k iien ko rem̧m̧an n̄an jiron̄ ro bwe ren en̄jake an wōr tokjāer ilo jerbal in ijjeļo̧kiņ aer jijet wōt im ron̄jake. Kom̧ em̧m̧ool kōn ami kōm̧m̧an bwe jiron̄ ro ami ren en̄jake aer aorōk ilo aer bōk koņaer n̄an kake aikuj ko an membōr ro ilo ward eo. Em̧ōj am jeļā bwe elōn̄ iaami ro me rej apan̄ wōt kōn mour erreo, mijak, ļap inepata, im bolen buromōj.
N̄an kom̧, jiron̄ ro ilo Kabun̄ in, iiō kein an jodikdik emaron̄ lukkun ļap boub ak ļap mālijjon̄. Em̧ōj am̧ jeļā bwe elōn̄ iaami ro me rej apan̄ wōt kōn mour erreo, mijak, ļap inepata, im bolen buromōj. Kōjekdoon aolep ļōmņak kein, ijjeļo̧kiņ ami mour kaki būrabōļōm ko, emaron̄ jab jipan̄ eļļā jān apan̄ kein, ak jerbal in jipan̄ emaron̄ kōmeraik eddo ko ami im kōm̧m̧an bwe apan̄ ko ami ren jab pen. Juon iaan wāween ko rem̧m̧an n̄an kōļapļo̧k en̄jake in ļap tokjer ej n̄an kwaļo̧ke, kōn ad ļōmņak im jerbal in jipan̄ ko ad n̄an ro jet, me elukkun ļap tokjed n̄an leļo̧k jipan̄.5 Ij rojan̄ kom̧ jiron̄ ro n̄an kajutak peim n̄an bōk koņaam likūt pā kan̄e n̄an jerbal n̄e kwoj lo aikuj ko ipeļaakim. Ilo ami kakūrm̧ool eddo ko ami ilo bujen eo kom̧ kar kōm̧m̧ani im bōk koņaami ilo kaļōk aelōn̄ in kiin̄ eo an Anij, kōjeram̧m̧an ko renaaj kobrak mour ko ami im kom̧ naaj lo lan̄lōn̄ eo ejjeļo̧k jem̧ļo̧kiņ an juon rikaļoor.
Ro jeiū im jatū, jiron̄ ro nejid rekabwilōn̄lōn̄. Ewōr aer tōļan, ikdeleel ejjeļo̧k jon̄an, im kajoor, im rej kea im tūriam̧o̧. Rekōņaan jipan̄. Rej aikuj jeļā bwe eļap tokjāer im aorōk ilo jerbal in lo̧mo̧o̧r. Āinwōt an likao rein ilo Priesthood eo an Aron ej kōpooj n̄an jerbal in jipan̄ ko reļļapļo̧k āinwōt aer wallōn̄ļo̧k n̄an Melkisedek Priesthood, jiron̄ ro nejid rej kōpopo n̄an erom ro uwaan doulul eo eļap an kōrā ro ilo laļ in—Doulul eo an Kōrā ro. Ippān doon, jiron̄ im likao rein reaibojooj, rekajoor, im retiljek ro me rej kōpooj er n̄an erom lio ak ļeo pālele, im erom mama im baba ro renaaj ejaake juon baam̧le eo ewāppen ilo celestial aelōn̄ in kiin̄ eo an Anij.
Ij kam̧ool bwe jerbal eo an Jemedwōj Ilan̄ ej n̄an bōktok mour jab wabanban im mour indeeo an ajri ro Nejin.6 Jiron̄ ro nejid moktaļo̧k ekar wōr aer eddo eaorōk n̄an kōm̧m̧an n̄an jipan̄ kadedeikļo̧k jerbal in. Ilo etan Jisōs Kraist, amen.