ʻOmi ʻe he ʻŪ Mīsini Tuituí ha Tāpuaki Lahi ki Haʻamoa
ʻOku ako e kakai fefine ʻo e kolo ko Salelesí ki he founga ʻo e tuituí.
Ne toki hoa ngāue kimuí ni mai e LDS Charities mo e kōmiti fefine ʻo e Siasi ʻo Nasaliné (ʻoku ui ko e “Taumalingi ʻo e Ngaahi Tāpuakí”) ke ʻomai ha nāunau tuitui maʻá e houʻeiki fafiné.
Ne maʻu e foʻi fakakaukaú he taimi ne feʻiloaki ai ʻa Maunga Lupina, ko e uaifi ʻo e Faifekau ʻo e Siasi ʻo e Nasaliné, mo Palesiteni O. Viniseni Hāleki ʻi ha fakataha ʻa e Kosilio e Ngaahi Siasi ʻi Haʻamoá.
Ne kole ʻe Maunga kia ʻEletā Hāleki pe ko e hā e meʻa ʻe lava ke fai ke tokoni ki he kakai fefine ʻi hono siasí mo e koló ke fakatupulaki e moʻui honau fāmilí.
Ne fokotuʻu ange ʻe ʻEletā Hāleki ke ne fai ha kole ki he ʻōfisi uelofea ʻo e Siasí ʻi Haʻamoá naʻa lava e LDS Charities ke fai ha tokoni.
Naʻe fai ʻe Maunga e kolé kia ʻEletā Meliula Fata, ko ha Fitungofulu Faka-ʻĒlia mo e Pule he Uelofea ʻa Haʻamoá, ʻo kole ha tokoni ʻaki hano ʻomi ha ʻū mīsini tuitui mo e ʻū mīsini fakaonopooni maʻá e kakai fefine hono koló mo e siasí.
Ne fakataha e ongo faifekau matuʻotuʻa ʻa e Siasí ko ʻEletā Kilifi mo Sisitā Kefilini Velinga, mo Maunga Lupina mo ha kau mēmipa kehe mei he kōmiti ʻo e kakai fefiné. Ne nau ʻiloʻi ko hano fokotuʻu pē ha ngaahi tuʻuʻanga palaki ʻuhilá, ʻe feʻunga lelei e fale ʻo e kōmiti kakai fefine ʻo e koló ke hoko ia ko ha loki ako tuitui. Ne nau toe ʻiloʻi ʻoku maʻu ʻe Maunga e taukei ke ne akoʻi e kau fefine kehé ki he tuituí.
Ne loto e kōmiti ʻo e kakai fefiné ke tokoniʻi e ngaahi fāmili he koló ke nau lava ʻo tuitui ha vala mo ha ngaahi meʻa kehe, koeʻuhí ke nau lava ai ʻo fakahaofi ha paʻanga ki he ngaahi fie maʻu tefito kehe hangē ko e meʻakaí, ʻuhilá, mo e totongi akó.
Ne nau loto foki ke tokoniʻi e kau finemui ʻo e koló ke nau ako ha pōtoʻi ngāue te ne lava ʻo tokoniʻi ʻenau moʻuí ʻi he kahaʻú. Koeʻuhi ko e fusi-mo-ʻomo fakapaʻangá kuo ʻi ai ha kau finemui kuo nau nofo mei he akó.
Ne ʻomi ʻe he LDS Charities ha mīsini tuitui ʻe 13 mo ha mīsini tuitui fakaonopooni ʻe taha pea hanga ʻe he Kōmiti ʻo e Kakai Fefiné ʻo fakaʻatā e lokiakó ʻaki hano tānaki atu ha ʻū palaki ʻuhila lahi ange, tēpile mo e sea, mo ha ʻū nāunau tuitui.
Kuo tokoniʻi ʻe he LDS Charities he taʻú ni ha ngaahi ngāue peheni ʻe 18 ke tokoni ki he kakai ʻo Haʻamoá ke nau moʻui fakafalala lahi ange ki honau fāmilí mo e koló.