Fonongaʻia e Falefehikitaki ʻo Onoʻahó
Hange ko e ngaahi temipale ʻi ʻonopōní, ʻoku lava ke akoʻi kitautolu ʻe he fakataipe ʻi he falefehikitakí, ʻo fekauʻaki mo hotau halafononga foki ki he ʻafioʻanga ʻo e ʻOtuá.
Kuo lau afe e ngaahi taʻu e hoko ʻa e temipalé ko ha feituʻu ʻoku fakaʻaongaʻi ai ʻe he ʻOtuá e ngaahi ouau ‘o e lakanga fakataulaʻeikí mo e ngaahi fuakava toputapú, ke akoʻi ki Heʻene fanaú e ngaahi moʻoni taʻengata fekauʻaki mo ʻEne palani ʻo e fakamoʻuí.
Lolotonga ʻenau faifononga ʻi he toafá, naʻe fekau ki he kakai ʻo ʻIsilelí ke langa ha fale fehikitaki ke lava ʻa e ʻOtuá ʻo “nofoʻia ʻiate kinautolu” (ʻEkesōtosi 29:46). ʻOku ʻuhinga e “fale fehikitakí ki he ʻfeituʻu ʻo e nofo’ pea naʻe ui pehē ia ʻi he tui naʻe ʻafio e ʻOtuá ʻi hono ngaahi potu toputapú. ʻI he taimi ʻo e ʻapitanga ʻo ʻIsilelí, naʻe fokotuʻu ʻa e fale fehikitakí ʻi lotomalie ʻo e ʻapitangá (ko e fakataipe ʻo e fakakaukau ke fakatefito e moʻui ʻa e kakaí ʻi he ʻOtuá).”1
Fakakaukau ki he ngaahi meʻá ni ʻi he fale fehikitakí, mo e meʻa te nau lava ʻo akoʻi mai fekauʻaki mo ʻetau toe foki ki he ʻao ʻo e ʻOtuá.
Tā fakatātaaʻi ʻe Steve Creitz / licensed from GoodSalt.com
Fale Fehikitakí: Naʻe vahe tolu ʻa e fale fehikitakí, pea naʻe pau ke fou kotoa ai e taha kotoa ke ne aʻu ki he ʻao ʻo e ʻOtuá: ko e konga ki tuʻá, ko e potu maʻoniʻoní, pea mo e Potu Toputapú (vakai, ʻEkesōtosi 25–30)
ʻŌlita: ʻOku ʻomi ʻe he fono ʻa Mōsesé ʻa e ngaahi feilaulau ke fai hení, kikiteʻi ʻa e Fakamoʻuí mo ʻEne feilaulau “lahi mo fakaʻosí”(vakai ʻAlamā 34:10) ʻOku hanga ʻe he feilaulaú ʻo fakataipe foki ʻetau fakatomalá- ʻa hono tukuange ʻetau ngaahi angahalá kae ʻoatu ha loto mafesifesi mo ha laumālie fakatomalá (vakai 3 Nīfai 9:19–20; Fakahinohino ki he Folofolá, “Feilaulau”).
Sene vai: Kimuʻa pea toki hū ki he potu toputapú, ʻoku fakaʻaongaʻi ʻe he taulaʻeikí ʻa e sene palasa ʻo e vaí ke fufulu honau nimá mo e vaʻé (vakai ʻEkesōtosi 30:19–21), ko e fakamanatu kiate kitautolu ʻa e fie maʻu ke tau maʻa ʻi heʻetau teuteu ke foki ki he ʻao ʻo e ʻEikí (vakai, 3 Nīfai 27:19–20).
Tuʻuʻanga teʻelango: Naʻe ulo e ngaahi maama ʻe fitú ʻi he lolo ʻōlive maʻa, ke fakamaama e potu toputapú (vakai Levitiko 24:2–4). ʻE lava ke fakamanatu mai ai kiate kitautolu e Maama ʻo Kalaisí pea mo e Laumālie Māʻoniʻoní, ko e ongo maʻuʻanga maama fakalaumālié.
[Tēpile ʻo e Maá]: Ko e foʻi mā taʻe fakalēvani ia ʻe hongofulu mā ua ne tuku ʻi he Sapate takitaha ʻi he tēpile maá, ko e ʻuhinga faka-Hepeluú, ko e “mā ʻo e ʻaó” (vakai, ʻEkesōtosi 25:30). Naʻe kai e ngaahi foʻi mā ko iá he Sāpate kotoa pē ʻi he potu toputapú, “ko ha fuakava taʻengata” (vakai, Levitiko 24:5–9
Feilaulauʻanga ʻo e Meʻa Namu Kakalá: ʻOku tutu ʻe he kau taulaʻeikí ʻa e meʻa namu kakalá ʻi he funga ʻōlita ʻi muʻa ʻi he veilí, he pongipongi mo e poʻuli kotoa pē. ʻE lava ke fakafofongaʻi ʻe he kohu ʻoku ʻalu haké ʻa e ngaahi lotu ʻoku ʻohake ki he langí (vakai, Fakahā 5:8).
Veilí: ʻOku hū ʻa e taulaʻeiki lahí ki he Potu Toputapú ʻo fakafou ʻi he veilí. Naʻe tui lalanga ki he veilí e Selupimí pe kau ʻāngeló (vakai, ʻEkesōtosi 26:30–33; T&F 132:19). ʻE lava ke fakamanatu mai ʻe he veilí kiate kitautolu, ʻoku fakapuliki kitautolu ʻe ha veili mei he ʻao ʻo e ʻOtuá, pea ko e Taulaʻeiki Lahi maʻongoʻongá pē—ʻa Sīsū Kalaisi—te ne lava ʻo tatala ʻa e veilí.
Potu Toputapu ʻAupitó: ʻOku hū tuʻo taha he taʻu ʻa e taulaʻeiki lahí ki he konga toputapu tahá ni, ʻi he ʻAho ʻo e Fakaleleí. ʻOku hanga ʻe he Potu Toputapu ʻaupitó ʻo fakafofongaʻi ʻa e ʻao ʻo e ʻOtuá, pea ʻoku tuku ai e puha ʻo e fuakavá, pea ko hono tāpuní naʻe ui ia ko e nofoʻanga ʻaloʻofá. Naʻe folofola ʻa e ʻEikí kia Mōsese, “Pea te u fakafetaulaki ʻi ai kiate koe, pea te ta alea ai mo koe” (ʻEkesōtosi 25:22; vakai foki, ʻEkesōtosi 29:43; 30:36).2