Ngaahi Talaʻofa Fakaepalōfita
Manatuʻi Ko Hai Koe
Palesiteni Dieter F. Uchtdorf, Tokoni Ua ʻi he Kau Palesitenisī ʻUluakí, “Tautehina ʻe Toko Tolú,” Liahona, Nōvema 2010, 17.
“Manatuʻi ʻokú ke kau ki ha fale fakatuʻi ʻo e puleʻanga ʻo e ʻOtuá, ko e ngaahi ʻofefine kimoutolu ʻo ha Ongomātuʻa Fakalangi, ʻokú Na puleʻi ʻa e ʻunivēsí.
“ʻOku mou maʻu e DNA fakalaumālie ʻo e ʻOtuá. ʻOku mou maʻu ha ngaahi meʻafoaki mahuʻinga ko e tukuʻau mai mei homou fakatupu fakalaumālié lolotonga hoʻomou ʻi he maama fakalaumālié. Ko e fānau kimoutolu ʻo ʻetau Tamai Hēvani mohu ʻaloʻofa mo taʻengatá, ko e ʻEiki ʻo e Ngaahi Kau Tau, ko e Tokotaha naʻe fakatupu ʻa e ʻunivēsí, ʻo ne fofola e ngaahi fetuʻú he ʻataá mo fokotuʻu e ngaahi palanité ʻi honau viloʻangá.
“ʻOku mou ʻi Hono toʻukupú.
“Ongo toʻukupu funganí.
“Ongo toʻukupu ʻofá.
“Ongo toʻukupu tokangá.
“Pea he ʻikai teitei hanga ʻe ha lau ʻa ha taha kau kiate koe ʻo liliu e meʻa ko iá. Ko e muna pē ʻenau ngaahi leá ʻi hono fakahoa atu ki he folofola ʻa e ʻOtuá kau kiate koé.
“Ko ʻEne fānau pelepelengesi koe.
“ʻOku Ne ʻofa ʻiate koe.
“Neongo hoʻo humú, neongo hoʻo tafoki meiate Iá, ka ʻoku kei ʻofa pē ʻOtuá ʻiate koe. Kapau ʻokú ke ongoʻi hē, liʻekina pe tuēnoa—ʻoua ʻe ilifia. ʻE kumi koe ʻe he Tauhisipi Leleí. Te Ne hiki hake koe ki Hono umá. Pea te Ne fua mai koe ki ʻapi.”