ʻE Toki Lahi Moʻoni Hoʻomo Fiefia Mo Iá
ʻOku maʻu heʻetau Tamai ʻi Hēvaní mo Hono ʻAlo ko Sīsū Kalaisí ha ʻofa taʻe fakangatangata kiate kitautolu takitaha. Ne akoʻi mai ʻe Sīsū Kalaisi kiate kitautolu e meʻá ni:
“Pea kuo hoko mai ʻa e Foha ʻo e Tangatá ke fakamoʻui ʻa ia naʻe heé, Ko e hā homou lotó? Kapau ʻoku maʻu ʻe ha tangata ʻa e sipi ʻe teau, pea ʻalu hē pē hanau taha, ʻikai ʻokú ne tuku ʻa e hivangofulu mā hivá, pea ʻalu ki he ngaahi moʻungá, ʻo kumi ʻa ia kuo heé?
Pea kapau te ne ʻilo ia, ko ʻeku tala moʻoni atu kiate kimoutolu, ʻoku lahi ʻene fiefiá he sipi ko iá, ʻi he hivangofulu mā hiva naʻe ʻikai ʻalu heé.
ʻOku ʻikai ko e finangalo ʻo hoʻomou Tamai ʻoku ʻi he langí, ke malaʻia ha tokotaha ʻiate kinautolú ni ʻoku siʻí” (Mātiu 18:11–14).
ʻOku kau ki hono fakanofo ʻo e Kau Fitungofulú ha fatongia toputapu ne fakahā mai ʻe he ʻEikí:
“Kuo pau ke ngāue ʻa e Kau Fitungofulú ʻi he huafa ʻo e ʻEikí, ʻi he pule mai ʻa e Toko Hongofulu Mā Uá pe ko e fakataha alēlea māʻolunga fononga holó, ʻi hono langa hake ʻo e siasí mo tokangaʻi hono ngaahi meʻa kotoa pē ʻi he ngaahi puleʻangá kotoa pē, ʻo fuofua fai ki he kau Senitailé pea toki hoko ki he kau Siú” (T&F 107:34).
Ne u toki folau ki he motu ko Manihí ki ha konifelenisi fakavahefonua mo Palesiteni Nauta ko ha tokoni ʻi he misioná. ʻI heʻemau feʻiloaki ʻo pōtalanoa mo e palesiteni fakakoló, naʻá ma ongoʻi e faingataʻaʻia lahi ʻokú ne fekuki mo iá koeʻuhi ko e moveuveu ʻa e koló.
Naʻá ne pehē, “ʻOku meimei ke mole moʻoni ʻeku ʻamanakí … he ʻoku ʻikai ke toe haʻu ʻeku tangataʻeikí mo hono kotoa hoku ngaahi tokouá mo e tuofāfiné ki he lotú talu hono ui au ko e palesiteni fakakoló.”
Ne ma ongoʻi ke foaki kiate ia ha tāpuaki lakanga fakataulaʻeiki kimuʻa peá ma toki ʻalu ki honau ʻapí. ʻI heʻemau feʻiloaki mo hono uaifí, ne ma fakapapauʻi ange, ʻoku ʻikai ko kinaua pē ʻoku faingataʻaʻiá he ʻoku ofi pē ʻa e Fakamoʻuí kiate kinaua.
Ne mahino e lahi ʻo e ngaahi ʻaʻahi fakahaofi ke fakahokó ke fai ha feʻiloaki mo tāpuekina e kakaí.
Ne ongo mai ki homa ʻatamaí e ngaahi folofola ʻa e ʻEikí:
“Ko ia, ke ke faivelenga; tuʻu ʻi he lakanga kuó u fili koe ki aí; tokoniʻi ʻa e vaivaí, hiki hake ʻa e nima ʻoku tautau ki laló, pea fakamālohi ʻa e ngaahi tui ʻoku vaivaí” (T&F 81:5).
Ne mau fokotuʻu ha kulupu ʻe ua ʻi he hoʻatā Falaite ko iá, peá u ʻaʻahi ki he fāmili Maó ʻoku nau nofo ofi mai pē ki he falelotú. Ne ʻosi sila ki hono fāmilí pea ʻi ai ʻene fānau fakaʻofoʻofa ʻe toko tolu, ʻa ia ko e taha ne fanauʻi ʻi he fuakavá, ka kuo nau māmālohi kotoa pē ʻi ha ngaahi taʻu lahi. Ne mau akoʻi ange e ʻofa ʻa ʻetau Tamai Hēvaní mo fakamoʻoni ki he mālohi ʻo e Fakaleleí ʻi heʻenau moʻuí kapau te nau tui ki hotau Fakamoʻui ko Sīsū Kalaisí pea nau siʻaki e ngaahi meʻa ʻoku halá. Ne mau fakahaaʻi ange ʻemau ʻofa ʻiate kinautolú mo foaki kiate kinautolu ha tāpuaki ʻo e lakanga fakataulaʻeikí mo fakaafeʻi ke nau haʻu ki he Fakamoʻuí mo e fakatahaʻanga ʻo e konifelenisí: Ne nau fakahaaʻi mai, “ʻIo, te mau ō atu.”
Ne hoko atu he ʻaho hono hokó ʻema ʻaʻahí ki ha ngaahi fāmili ʻo kau ai ʻa Sione, ko e tokoua ʻo e palesiteni fakakoló mo hono fāmilí. Kuo taʻu lahi ʻa e ʻikai ke nau maʻulotú. ʻOku ʻi ai haʻane fānau ʻe toko fitu mo ha makapuna ʻe 10 tupu: ko hono fakakātoá ko ha toko 20 ʻi hono fāmilí. Ne ma fakahaaʻi ʻema ʻofa ʻiate kinautolú mo e ʻofa ʻa ʻetau Tamai Hēvaní ʻiate kinautolú mo lau ange e folofola ko ʻení:
“He ʻikai koā te mou tafoki mai ʻeni kiate au, pea fakatomala mei hoʻomou ngaahi angahalá, ʻo liliu, koeʻuhi ke u fakamoʻui ʻa kimoutolu?
ʻIo, ko e moʻoni ʻoku ou pehē kiate kimoutolu, kapau te mou haʻu kiate au te mou maʻu ʻa e moʻui taʻengatá. Vakai, ʻoku mafao atu hoku nima ʻo e ʻaloʻofá kiate kimoutolu, pea ko ia ia ʻe haʻú, te u maʻu ia; pea ʻoku monūʻia ʻa kinautolu ʻa ia ʻoku haʻu kiate aú.
Vakai, ko au ko Sīsū Kalaisi ko e ʻAlo ʻo e ʻOtuá. Naʻá ku fakatupu ʻa e ngaahi langí mo e māmaní, pea mo e ngaahi meʻa kotoa pē ʻoku ʻi aí …” (3 Nīfai 9:13–15).
Naʻá ma fakamoʻoni ki he ʻofa ʻa ʻetau Tamai ʻi Hēvaní mo hotau Fakamoʻuí kiate kinautolú pea ʻeke ange kiate kinautolu, “Te mou lava ʻo haʻu ki hotau Fakamoʻuí ʻaki hono teuteuʻi kimoutolu mo ho fāmilí ke ʻalu ki he temipalé?”
Ne nau tali mai, “ʻIo, te mau fai ia.”
Ne ma ʻeke ange pe te nau haʻu ki he ngaahi fakatahaʻanga ʻo e konifelenisí.
Ne nau malimali pē ʻo pehē mai, “ʻIo, te mau ʻalu atu.”
ʻI he fakatahaʻanga ʻo e ʻaho Sāpaté, ne toko 135 e maʻu fakatahá, ʻo meimei liunga ua mei he angamaheni ʻo e ʻaho Sāpaté. Ne lahi ha ngaahi fāmili ne foki maí, pea fakamoʻoni ʻa Sione mo hikinimaʻi ia ko e kalake fakakoló ʻi he fakataha lahi ʻo e konifelenisí. He toki meʻa fakafiefia moʻoni ke sio ki he foki ʻa e ngaahi foha ʻo e ʻOtuá ki ʻapí ke ngāue maʻa hotau Fakamoʻuí. Ne fiefia lahi e palesiteni fakakoló ʻo ongoʻi nonga mo nēkeneka he ngaahi mana ʻokú ne mamata tonu ki aí.
ʻOku ou fakamoʻoni ʻe tokoni mai hotau ʻEiki ko Sīsū Kalaisí ki he kau maʻu lakanga fakataulaʻeiki kotoa pē ʻi he māmaní mo fakafoki mai e fanga sipi heé ki he tākangá. ʻOku ou fakamoʻoni te Ne ʻomi e melino mo e fiefia ʻi heʻetau fakaafeʻi Ia ki heʻetau moʻuí, ʻi he huafa toputapu ʻo Sīsū Kalaisí, ʻēmeni.