“O Ai o i le Itu a le Alii?”
Afai e te tumau i le itu o le laina a le Alii, e le mafai ona alu atu le fili iina e faaosooso ia te oe.
O’u uso e ma tuafafine pele, ou te faafetai ona o loo tatou ola i se vaitaimi o loo femaliuai ai aposetolo ma perofeta i le lalolagi ma tuuina mai musumusuga ma le taitaiga mo i tatou. Ou te tuuina atu la’u molimau o Peresitene Hinckley e moni lava o se perofeta a le Atua—e pei foi ona sa i ai i a Mose, Aperaamo, ma isi perofeta uma talu mai le amataga o le lalolagi. Ou te faafetai mo ana timaiga i lenei taeao ma mo le avanoa o le a tatou maua i le faaiuga o lenei konafesi e toe faalogo atu ai ia te ia.
O le aso e faapitoa la’u talanoa atu i alii talavou ma tamaitai talavou o le Ekalesia, e faapea foi i o latou matua ma taitai. Ou te talanoa atu foi i talavou nofofua matutua maoae—o e o loo i ai ni taleni ofoofogia ma gafatia ma malosiaga mo le auaunaga i le malo.
Na saunoa Peresitene Hinckley e uiga i lenei tupulaga: “E le’i i ai lava se taimi faapea e pei o lenei. O se vaitau e maeu i le talafaasolopito o le lalolagi e ola ai! E le’i i ai foi se augatupulaga faapea o le autalavou… . O outou moni lava “o se tupulaga filifilia” (Way to Be! [2002], 3).
O outou, le autalavou o Siona, o loo i ai se galuega tele e faia—ma ua tuuina uma atu i ai taleni ma avanoa, e tusa lava po o fea o outou nonofo ai, ina ia faia tonu lava mea ua faamoemoeina e lo outou Tama o i le Lagi mai ia te outou. Ou te tatalo ina ia fesoasoani o’u manatu i lenei aoauli ia te outou i lena sailiga.
Ia Fepuari 1852, sa papatisoina ai se tamaitai talavou e igoa ia Hannah Last Cornaby i Yarmouth, Egelani. E le o se aafiaga paganoa ma migao e toatele nisi latou te maua, ae sa faamatalaina e ia i upu nei: “Na matou iloa ua siomia e tagata leaga le fale, lea sa faafaigata ai lo matou agai atu i le vai… . Ae matou te le’i taunuu i le auvai, sa siomia foi i matou e le vaega leaga; ma sa papatisoina a’u e lo’u toalua e ui i le timuto atu o maa, ma tuualaga … ma, e ui i le toulu ifo o maa i o ma autafa e pei o se uato’a, ae leai ma se maa na tau ia i ma’ua, ma sa ma taunuu ma le saogalemu i le fale, e faafetaia ai le Atua mo le faasaoina faavavega o i ma’ua” (Hannah Cornaby, Autobiography and Poems [1881], 24–25).
O lona olaga na mulimuli mai ai, sa le’i faigofie. I tausaga mulimuli ane, sa ia tusia ai upu nei:
O ai o i le itu a le Alii? O ai?
O le taimi lenei e faailoa mai ai.
Matou te fesili ma le le fefefe:
O ai o i le itu a le Alii? O ai?
(Who’s on the Lord’s Side?” Hymns, no. 260)
E ui o upu nei o se pese e le masani ona tatou usuina, ae ua avea ma se tasi o viiga ou te fiafia i ai ona o le tautinoga i le upumoni ma le mea tonu. O le mea moni, o se fesili e tatau ona i mafaufau o alii talavou ma tamaitai talavou taitoatasi i le lalolagi atoa: “O ai o i le itu a le Alii?” Ma o la tatou tali leotele e tatau ona i ai o le, “O a’u!”
O le fesili lea sa i ai i le mafaufau o Nifae ina ua poloaiina Nifae ma ona uso e le Alii, e ala mai i lona tama o Liae, ina ia toe foi i Ierusalema e aumai papatusi apamemea. Ina ua muimui Lamana ma Lemuelu, na oo ifo le fesili ia Nifae, “O ai o i le itu a le Alii?” Lea na ia tali atu i ai, “O a’u!” i upu: “Ou te alu atu ma fai ia mea ua poloaiina e le Atua, aua ua ou iloa, e le aumai e le Atua ni poloaiga i le fanauga a tagata, sei iloga na te saunia le ala mo i latou ia mafai ai i latou ona fai le mea ua ia poloaiina ai i latou” (1 Nifae 3:7).
E faapena foi ia le taulealea o Tavita i le Feagaiga Tuai. Manatua lona asiasi atu o se leoleo mamoe talavou i ona uso sa i le taua. A o i ai iina sa ia faalogo i le taufaifai o le sauai Filisitia o Koliata i ‘au a Isaraelu—ma taulu’ilu’i i latou i le taua. Ma sa fefefe uma ia fitafita o Isaraelu e fetaui ma le sauai. O la latou tali i le fesili: “O ai o i le itu a le Alii?” e le o le “O a’u!” ae o le “O ai, o a’u?”
Ae lei faapena le taulealea o Tavita. Sa ave na o ni nai maa ma se maata a le leoleo mamoe a o ia alu atu i le sauai, ma faapea atu, “Ua e sau ia te au ma le pelu, ma le tao, ma le tao leoleo: a ou te alu atu ia te oe i le suafa o Ieova o ‘au… .”
“O le aso nei e tuuina mai ai oe e Ieova i lo’u lima; … e iloa ai le lalolagi uma, o i ai le Atua ia Isaraleu” (1 Samuelu 17:45–46). I le tulaga lena, e le’i savali atu i ai Tavita ma le fefe, ae sa tamoe atu o ia e faafetaui i le sauai. Ma ona o le faatuatua o Tavita i le Atua, o lea na fasiotia ai Koliata ma manumalo ai Isaraelu.
O’u uso e ma tuafafine talavou, po o fea lava ou te malaga i ai ou te feiloai ai lava i talavou tamalii e pei o outou o e o loo feagai e le aunoa ma Koliata o ona po nei e faafoliga mai i faaosoosoga lea e mafua ai ona tatou solia a tatou feagaiga ma faatulagaga ua uma ona tuuina mai e le Alii ia i tatou. Ua faateleina atu ona taua lenei mea pe afai o loo siomia oe i aso taitasi e upu masoa, taliaina faalauaitele o amioga e le mama, o lavalava e le talafeagai, o ponokalafi, ma isi mea e le talafeagai i ala o faasalalauga, e aofia ai le televise ma le Initoneti, ma le salalau o le mauaina o fualaau faasaina ma ava malosi. I se isi faaupuga, e leai se aso e mavae atu e le fesiligia ai i tatou i soo se ituaiga, “O ai o i le itu a le Alii? O ai?” E lua lava ni a’u fautuaga faigofie e fesoasoani ai ia te outou ina ia saunia lau tali i lena fesili.
Muamua, aua lava ne’i galo po o ai oe. O le upumoni faigofie o loo i le viiga a tamaiti lea e toatele i tatou na aoaoina i le Peraimeri: “O a’u o se atalii o le Atua” (Viiga, nu. 184). Ma e le’i auina mai i tatou e lo tatou Tama Faalelagi atamai ma le agalelei iinei ona tuua ai lea na o i tatou. Ua uma ona ia tuuina mai taiala maoti e fesoasoani ai ia i tatou ina ia ausia mea ua Ia faamoemoeina mai ia i tatou. Ua Ia tuuina mai ia i tatou aiga ina ia fesoasoani ia i tatou, ia alolofa ia i tatou, ma aoaoina i tatou. Ua Ia tuuina mai ia i tatou ia perofeta soifua ina ia taitai i tatou. Ua Ia tuuina mai ia i tatou, e ala mai i le Au Peresitene Sili, ia faatulagaga o loo i le tamaitusi “Mo Le Malosi o le Autalavou” faatasi ma lenei folafolaga: “Matou te folafola atu afai e te tausia nei tulaga faatonuina ma ola ai i upumoni o loo i tusitusiga paia, o le a mafai ona e faia i le poto ma le tomai e sili atu galuega o lou olaga, ma onosaia tofotofoga i se loto tele e sili atu. O le a e maua le fesoasoani a le Agaga Paia” ([2001], 2–3).
Ou te teuina pea lava la’u kopi o le tamaitusi—i taimi uma! Ou te tuuina atu se lu’i ia te outou ina ia faia le mea lea e tasi. Afai, e te faatalitali mo se pasi po o le maua o se taimi avanoa, aveane i fafo, faitau i ai ma toe tautino atu ina ia e ola i faatulagaga o i ai i lena tamaitusi. Ou te folafola atu, a outou faia, o le a mulimuli mai le fiafia, filemu, ma lagona loloto o le lototele ma le lagona tauaogaina.
A o e faaaogaina lou faitalia, ia manatua e le o tuua na o oe. E faaopoopo atu i le Tama Faalelagi agalelei ma le atamai, o loo i ai isi o e o loo tatalo mo outou ina ia faia ni faaiuga atamai. A o avea ma se talavou, afai ou te alu i se tafaoga faamasani pe matou te o ma a’u uo, ou te faailoa lava i o’u matua pe a ou foi mai i le fale. E masani na o lo’u tuitui atu lava i lo la’ua faitotoa, tatala ma faapea atu, “Lea ua ou sau,” ona ou alu lea ou te moe. I se tasi po na ou foi mai ai mai se tafaoga faamasani, tuitui e pei ona masani ai ma tatala le faitotoa. A o faapea ona ou faia, na suluia e le moli mai le potutele lo’u tina agelu o loo tootuli i ona tulivae i le tatalo. Ma sa ou vaaia o ia iina, ma sa ou iloa le tagata o loo ia talosiaina. E le galo lava ia te a’u lena aafiaga. Ma o le iloa o loo tatalo pea lo’u tina mo a’u i le aso nei, o loo faamalosia ai au ma faamanatu mai ai po o ai a’u ma e le o tuua lava na o a’u.
O la’u fautuaga lona lua: aoao ia pulea ou manatu. O se vaega o le fuafuaga o le fiafia a lo tatou Tama Faalelagi ua tuuina mai ia i tatou o le auina mai lea o i tatou iinei ina ia suesueina ai. O lea la, o le a i ai pea lava faaosoosoga. O la tatou galuega, i le avea ai ma Au Paia o Aso e Gata Ai o le tausia lea o poloaiga a le Atua, e ui i faaosoosoga e tuuina mai e Satani ia i tatou. I lo’u olaga, ua ou iloaina ai e matuai faigofie lava ona faia lenei mea pe a mafai ona tatou pulea o tatou manatu—aemaise lava pe a i ai ni a tatou musika ua taulotoina, mau ma solo lelei ua taulotoina e suitulaga ai manatunatuga leaga e oo mai i o tatou mafaufau.
Ua fautuaina i tatou e Peresitene Boyd K. Packer ina ia i ai se viiga e taulotoina ma afai e oo mai se mafaufauga e le talafeagai i o tatou mafaufau, e mafai ona tatou suitulagaina i se viiga. I le faaaogaina i lenei aoaoga, na faamatala mai ai e sa’u uo: “I se tasi aso na ou alu ese ai mai lo’u ofisa mo vaiaiga o le aoauli. Pe tusa ma le lua poloka le mamao na ou savali ese ai, sa ou matauina ai lo’u usuusuina o ‘la’u pese’: ‘O A’u se Atalii o le Atua.’ A o toe foi o’u mafaufauga i tua i le selau iata, sa ou iloaina ai a o o’u kolosia le auala mai lo’u ofisa, sa ma fepasiai ai ma se tamaitai talavou e le o lelei le faiga o ona ofu. Na vave lava, e aunoa ma le mafaufauina, le amata ona oo mai o upu ma le fati o le ‘O a’u se Atalii o le Atua’ i lo’u mafaufau—e suitulaga ai i mafaufauga e le talafeagai.” Na aoaoina ai e la’u uo i lena aso se lesona tele e uiga i lona mafaia ona pulea o ona mafaufauga.
Na tuuina mai e Peresitene Siaosi Alapati Samita se fautuaga matagofie i lenei mataupu ina ua ia saunoa: “O loo i ai se laina e faailoga lelei ai lava le va o le itu a le Alii ma le itu a le tiapolo. Afai e te tumau i le itu o le laina a le Alii, e le mafai ona alu atu le fili iina e faaosooso ia te oe… . Ae … afai e te sopo atu i le itu o le laina a le tiapolo, ua e i ai i lana itu … ma o le a ia galue ia te oe ma taumafai e aveese oe ia mamao ese mai lena laina i le mamao e mafai ona ia aveesea ai oe, ma lona iloa e na o le pau lava le mea e manumalo ai o ia i le faaumatiaina o oe o le aveese mai lea o oe mai le nofoaga lena e i ai le saogalemu” (in General Conference Report, Oct. 1945, 118).
O le autu a le Mutuale mo le 2007 o loo tuuina mai ai se folafolaga mo i latou o e usiusitai i lenei fautuaga atamai: “Ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua … [ma] E avea le Agaga Paia mau aumea tumau …” (MFF 121:45–46).
Ou te molimau atu o loo soifua le Atua. Ua ou iloa o i tatou o Ana fanau, ma Na te silafia i tatou i o tatou igoa ma e le o tuua na o i tatou a o tatou faia nei faaiuga taua. O aso taitasi o lou olaga, o le a e faia ai ni filifiliga, o le taunuuga o ia filifiliga o le a e taunuu atu ai i le tasi itu o lena laina po o le isi foi itu. Ma o lea ou te tuuina atu ai le luitau i talavou uma o loo lagona mai lo’u leo i talavou o le tofi mamalu i le lalolagi atoa: ola i lou olaga i se auala afai e te feagai ma se filifiliga i le va o le lelei ma le leaga, ma pe afai e mafai ona e lagonaina loloto i totonu ia te oe le fesili “O Ai o i le itu a le Alii?”—o le a e saunia e tali atu ma lou malosi atoa, “O a’u!” I le suafa o Iesu Keriso, amene.