O Le Agaga o le Tapeneko
O le Tapeneko … o loo tu e pei o se tagavai o le Toefuataiga o le talalelei a Iesu Keriso.
I le fasefuluono tausaga talu ai na valaauina ai au o se Fesoasoani i le Korama a le Toasefululua, ma mo le uluai taimi, na ou oo mai ai i le pulelaa lenei. Ua 37 lena o o’u tausaga. Na ou iloaina ai lo’u tulai i luma o perofeta ma aposetolo taualoa ma atamamai, “o o latou suafa,” e pei ona fai mai le pese, “tatou te faaaloalogia” (“Oh, Holy Words of Truth and Love,” Hymns, no. 271). Sa ou lagona lo’u faatauvaa sa i ai.
Pe tusa o le taimi lena iinei i totonu o le Tapeneko na ou maua ai se aafiaga taua lava. Na ou maua ai le faamautinoaga ma le lototele.
O aso na sa faia muamua ai le konafesi a le Peraimeri a o lei oo i le konafesi ia Aperila. Na ou ulu mai i totonu i se faitotoa i le itu i saute ae faatoa usuina lava le pese amata e le aufaipese toatele a tamaiti o le Peraimeri. O Tuafafine Lue S. Groesbeck, o se sui o le Au Ofisa Aoao o le Peraimeri sa taitaia i latou. Sa latou usuina:
Ia migao, filemu, ma manatu ia Iesu;
Ia migao, filemu, vivii ma faamanu.
Ia migao, filemu, tatalo lemu,
Ia i ai lou Agaga Sa, ia i matou uma.
(“Ia Migao, Filemu,” Tusipese a Tamaiti, nu. 14.)
A o pepese malie tamaiti, o le ta okeni, o le sa malamalama lelei o le lelei atoatoa e le maua i le fiailoa, e tau le iloa lona taina o le okeni a o latou pepese. Sa ia faafefiloia e toetoe lava a le iloa e se isi ia leo laiti i se fatuga o musumusuga, ma faaaliga. O le taimi sili lena ona taua. O lena aafiaga na aoaoina ai au i se mataupu faavae mamana, lea na moomia ona ou matuai malamalama ai i tausaga na sosoo ai.
Atonu na ou lagonaina le mea na lagona e Elia le perofeta. Na ia faamaufaailogaina le lagi ona o le amioleaga o le tupu o Aapo ma sola atu ai i se ana e saili ia Ieova:
“O le matagi tetele foi ma le malosi ua lepetia ai mauga, ma momomo ai papa … ; e lei i ai Ieova i le matagi: ua mulimuli i le matagi o le mafuie; e lei i ai Ieova i le mafuie:
“E mulimuli i le mafuie o le afi; e lei i ai Ieova i le afi: e mulimuli i le afi ona [oo] mai ai lea o le leo filemu ma le itiiti.
“Ma ua faapea lava,” o loo fai mai ai le faamaumauga, “ua faalogo ai Elia, ona ufiufi ai lea e ia ona mata i lona ofu tele, ma alu i fafo, ma tu i le gutu o le ana” e talanoa i a Ieova (1 Tupu 19:11–13).
Na ou lagonaina le mea atonu na lagona e sa Nifae ina ua faaali atu le Alii ia i latou: “Ua latou faalogo i le leo e peiseai ua sau mai le lagi; ma ua latou fevaavaaiai, aua ua le malamalama ia te i latou le leo na latou faalogoina; e le o se leo saua, e le o se leo tele; e ui lava ina itiiti le leo, ua ati ai i totonu o i latou o e na faalogo i ai, ua iu ina leai se itu o latou tino ua le faagateteina, ioe, ua ati lava i o latou agaga, ma ua mu ai o latou loto” (3 Nifae 11:3).
O le leo itiiti lenei ma le filemu na faalogoina e Elia ma sa Nifae lea na malamalama i ai le Perofeta o Iosefa Samita ina ua ia tusia, “Ua faapea mai le leo itiiti ma le filemu, o loo musumusu atu ma ati i mea uma” (MFF 85:6).
I lena taimi taua, na ou malamalama ai o le leo malu ma le itiiti e mafai ona sili atu ona lagonaina nai lo le faalogoina. Afai sa ou gauai i ai, o le a ou lelei i la’u galuega.
Ina ua mavae lena sa ou maua le faamautinoaga faapea o le Fesoasoani, le Agaga Paia, o loo i ai iina mo tagata uma o e o le a tali atu i le valaaulia e ole atu, saili, ma tuitui atu (tagai Mataio 7:7–8; Luka 11: 9–10; 3 Nifae 14:7–8; MFF 88:63). Na ou iloa o le a ou manuia. Ua faapena ai lava a o gasolosolo mai tausaga.
Na ou aoaoina ai foi le mana e mafai ona i ai i musika. Afai e migao ona tuuina atu ia musika, e mafai ona o gatusa ma faaaliga. Ou te manatu e i ai taimi e le mafai ona tuueseina ai mai le siufofoga o le Alii, le leo malu ma filemu o le Agaga.
O musika tauaogaina o ituaiga uma e i ai lona aoga. Ma e anoanoai nofoaga e mafai ona faalogoina ai. Ae o le Tapeneko i le Lotoa o le Malumalu e ese mai isi nofoaga uma lava.
O le tele o augatupulaga e tatalaina ai e le Aufaipese a le Tapeneko a latou faasalalauga faalevaiaso i le usuina o upu nei na tusia e William W. Phelps:
Sii malie viiga paia,
Ua oo mai le Sapati fiafia
E malolo ai o le tagata ia, …
Ma ia faafetai ai i le Atua
Mo ona manuia.
(“Sii Malie Viiga Paia,” Viiga, nu. 81)
I le silia ma le 100 tausaga talu ai, na fofogaina ai e Peresitene Uilifoti Uitilafi, i le 91 ai o ona tausaga, atonu o lana lauga mulimuli lena mai lenei pulelaa. Sa i ai i le aofia le alii e 12 tausaga o LeGrand Richards. O lona tama, o George F. Richards (na faauuina mulimuli ane o se Aposetolo), na aumaia lana fanau tama i le Tapeneko ina ia faalogo ai i le Usoga. E le galo ia LeGrand lena aafiaga.
Mo le silia i le 20 tausaga, sa ma vavalalata ai ma Elder LeGrand Richards. Sa ia manatua pea lena savali i lona loto ina ua 96 ona tausaga. Na le mafai ona ia manatuaina upu na saunoa i ai Peresitene Uitilafi, ae sa le mafai ona galo ia te ia le faalogona na ia lagonaina ina ua fofogaina.
E i ai taimi, ou te lagonaina ai le faatasi mai o i latou o e na fausia ma tausia lenei Tapeneko. E ala i musika ma afioga tulei, a i latou o e na muamua ia i tatou na tausisia ai le faigofie o le talalelei ma le molimau ia Iesu Keriso. O lena molimau sa avea ma sulu taiala i o latou olaga.
O mea maoae na tutupu lea na fatuina ai le taunuuga o le Ekalesia na tutupu i totonu o lenei Tapeneko i le Lotoa o le Malumalu.
O Peresitene uma lava o le Ekalesia, sei vagana ai Iosefa Samita ma Polika Iaga, sa lagolagoina i se potopotoga paia i totonu o lenei Tapeneko. Ma i le tulaga lava lena, e toe faia ai faaletausaga le faiga lea o le lagolagoina i konafesi aoao ma toe faia foi i siteki ma uarota, ma paranesi uma e pei ona moomia ai e le faaaliga.
Ua fetalai mai le Alii, “O le a le tuuina atu se tasi e alu atu e tu e talai la’u talalelei, pe atiina ae la’u ekalesia, vagana ua faauuina o ia e se tasi o i ai le pule, ma e lauiloa e le ekalesia o ia te ia le pule ma ua uma ona faauuina i le ala e masani ai e i latou o e taitai i le ekalesia” (MFF 42:11).
O le auala lenei, e le mafai ai e se tagata ese ona sau ma fai mai ia i tatou ua ia te ia le pule ma taumafai e taitai sese le Ekalesia.
O iinei i le 1880 na taliaina ai le Penina Tau Tele e avea o se tasi o galuega faatulagaina a le Ekalesia.
O iinei foi na faaopoopoina ai faaaliga e lua i tusitusiga faavae, lea ua lauiloa nei o le Mataupu Faavae ma Feagaiga vaega e 137 ma le 138. O le vaega e 137 o loo tusia ai se faaaliga na tuuina atu i le Perofeta o Iosefa Samita i le Malumalu o Katelani, ma le vaega e 138 o se faaaliga na tuuina atu ia Peresitene Iosefa F. Samita e faatatau i le asiasiga a le Faaola i agaga o e ua maliliu.
O iinei i le 1979, ina ua mavae tausaga o sauniuniga, na faailoaina atu ai i le Ekalesia le lomiga a le Au Paia o Aso e Gata Ai o le Tusi Paia o le King James.
O lomiga fou o le Tusi a Mamona, o le Mataupu Faavae ma Feagaiga, ma le Penina Tau Tele na faasilasilaina atu iinei.
I le konafesi aoao i le 1908, na faitau ai e Peresitene Iosefa F. Samita le vaega e 89 o le Mataupu Faavae ma Feagaiga—o le Upu o le Poto. Ona tofu saunoa ai lea o ia ma ona fesoasoani, ma le Peresitene o le Toasefululua i le mataupu lava e tasi, o le Upu o le Poto. Ona pasiaina lea i se palota na aufaatasi ina ia taliaina e avea ma se poloaiga i tagata o le Ekalesia.
O lena faaaliga e amataina, “Ona o mea leaga atoa ma togafiti ua faia ma o le a tupu pea i loto o tagata faatuputupu leaga i aso e gata ai, ua ou lapataiina outou, ma muai lapataiina outou, i le tuuina atu ia te outou o lenei upu o le poto i le faaaliga”(MFF 89:4).
O se talita ma se puipuiga i o tatou tagata, aemaise lava i o tatou talavou. E avea ma se vaega o lena “ofutau atoatoa” o le Atua na folafola mai ina ia puipuia ai i latou mai “u fanafana mu” a le tiapolo (tagai MFF 27:15–18).
Sa osofaia, ma o loo osofaia, ma o le a osofaia pea lava le Ekalesia ma tagata taitoatasi e le tiapolo. O le a ia ufiufia, pe tapeese le leo itiiti ma le filemu e ala i musika leotetele ma le malomaloa ma ona upu e le mafai ona malamalama i ai—po o le sili atu ona leaga, e ala i upu e mafai ona malamalama i ai. O le a ia taitaieseina ma le faaeteete i tatou i faaosoosoga uma e mafai ona ia fafauina.
O iinei foi e ala i le faaaliga na faamanino mai ai e le Alii le faatulagaga o le perisitua, ma na tatalaina ai faitotoa i le faataunuuga o le poloaiga a le Faaola ina ia talaiina atu foi lenei talalelei i “atunuu uma, ma ituaiga, ma gagana uma” (MFF 133:37) ma ia faatuina ai le Ekalesia ia i latou.
O iinei na tuuina atu ai i le Tusi a Mamona le soa ulutala “O Se Tasi Molimau ia Iesu Keriso.” Ina ua mavae lena, soo se tasi e susueina le tusi o le a iloa ai mai lona lava ulutala le mea o loo ofoina mai ai i totonu.
O aoaoga, lauga, o musika, ma faalogona ma le Agaga i totonu o le fale paia na siitia atu e aunoa ma le aveeseina i le Maota Autu maoae o Konafesi o loo i talaatu, lea o loo lagonaina ai e le fiasefulu afe, ma faaliliuina i le tele o gagana, ma auina atu i faapotopotoga i le salafa o le lalolagi.
Ae sili atu, o lena Agaga e ulufale atu i fale o le fia miliona ma miliona o le Au Paia o Aso e Gata Ai. I totonu o fale, e tatalo ai matua mo le ola lelei o a latou fanau. E mafai e alii ma tamaitai, ma e pei ona folafola mai e le Tusi a Mamona, e oo lava i fanau iti ona mauaina le molimau ia Iesu Keriso (tagai Mosaea 24:22; Alema 32:23; 3 Nifae 17:25) ma le Toefuataiga o Lana talalelei.
O lenei Tapeneko i le Lotoa o le Malumalu o se “fale o le tatalo, o se fale o le anapogi, o se fale o le faatuatua, o se fale o le mamalu ma le Atua, o [Lona] lava fale” (MFF 109:16). O i latou na tofia e lauga pe faia ni saunoaga, musika ma aganuu e ao ona tuuina atu mea e aoga.
Ina ia saili i viiga a tagata, ua lapataiina i tatou e tusitusiga paia, o le a taitai ese ai mai le ala saogalemu e tasi e mulimuli ai i le olaga (tagai Ioane 12:43; 1 Nifae 13:9; 2 Nifae 26:29; Helamana 7:21; Mamona 8:38; MFF 58:39). Ma ua manino ona lapataiina i tatou e tusitusiga paia i le mea e mulimuli mai pe a tatou “mananao i viiga mai tagata” (MFF 121:35).
E le o le tele o mea e faalogo i ai i lauga ae o le mea e lagonaina. E mafai e le Agaga Paia ona faamautuina ia i latou uma o e oo i ai lena aafiaga faapea e moni ia savali, ma o le Ekalesia lenei a Iesu Keriso o le Au Paia o Aso e Gata Ai.
Ua tu iinei le Tapeneko e sosoo atu i le malumalu e avea ma se taula ma ua avea ma se faailoga o le Toefuataiga. Sa fausia e ni tagata e matua matitiva ma sili ona le taualoa. Ua lauiloa nei i le lalolagi.
O le Aufaipese a le Tapeneko, ua iloa i le igoa o lenei fale, ua avea ma fofoga o le Ekalesia mo le tele o tausaga. Ia aua nei alu ese pe faatagaina i la’ua e o ese mai le misiona tutotonu lea sa avea ma o la aoga i augatupulaga.
Mai lea augatupulaga i lea augatupulaga e amataina ma faaiuina ia faasalalauga taitasi i se savali musuia, e tumu i mataupu faavae ma e taula i aoaoga faavae o le Toefuataiga, e amata i le “Sii Malie Viiga Paia” (Viiga, nu. 81) ae faaiuina i le “E Pei o le Sau To Mai i le Lagi” (Viiga, nu. 86).
Ua tu le Tapeneko i le lalolagi o se tasi o nofoaga autu o musika ma aganuu tauaogaina. Ae o le mea silisili, o loo tu e pei o se tagavai o le Toefuataiga o le talalelei a Iesu Keriso. O lena molimau faamaulalo na totoina ma mauaa ai i totonu ia te au i lenei fale, e na tamaiti o le Peraimeri sa pepese i ni fati migao ma pei o ni faaaliga.
Ia faamanuia e le Atua lenei fale paia ma mea uma e alu atu mai totonu o ona puipui. E maeu lo tatou faafetai ona ua toe faafouina ma toe faaleleia e aunoa ma le aveeseina o lona uiga paia.
Na faitau e Elder Parley P. Pratt o le Korama a Aposetolo e Toasefululua ia upu nei mai le vaega e 121 o le Mataupu Faavae ma Feagaiga: “Ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua; ma toto ifo i lou agaga le mataupu faavae o le perisitua e pei o le sau mai le lagi.
“E avea le Agaga Paia mau aumea tumau, a o lou tootoo ma tootoo le feliuliuai o le amiotonu ma le upu moni; o lou malo foi o le a faia ma malo faavavau, e aunoa foi ma faiga faamalosi o le a tafe ia te oe e faavavau faavavau lava” (MFF 121:45–46).
O le ootia tele, na mafaufau ai Parley P. Pratt i se viiga, o se tatalo moni lava. Sa filifilia e le Aufaipese mo le tele o tausaga e faaiuina ai ana faasalalauga faalevaiaso:
E pei o le sau to mai i le lagi
To malie ifo i luga o laau
E faaola ai e tusa ai
Ma lou finagalo poto mai luga,
Le Alii e, ia faapea,
Ona e to mai au afioga mai luga,
Ua e faamanuia ma e faapaia,
Mo lau galuega alofa.
Le Atua e, silasila mai ia;
I lau au paia ma feagaiga ua osia.
Mai lou afioaga to mai le sau ola
Mo lo latou manuia mai luga.
Faafofoga mai ia i la matou tagi.
To mai lou Agaga ia i matou nei,
Matou te viia ai Oe lo matou Matai
Ma avae ai le leo faafetai.
(“E Pei o le Sau To Mai i le Lagi,” Viiga, nu. 86)
E faaopoopo atu la’u molimau o Iesu o le Keriso, ma o Lona maota lenei, i lenei aso paia o le faapaiaga, i le suafa o Iesu Keriso, amene.