O Se Lesona mai le Tusi a Mamona
I le avea ai ma augatupulaga muamua o tagata o le ekalesia, o outou ia ua amatalia le taamilosaga o le aoaoina ma le faamalolosia o le isi augatupulaga e sosoo ai.
Ou te fiafia tele i le Tusi a Mamona. O loo i ai ni tala mananaia mo tamaiti o soo se matutua, ae o le mea e sili atu le taua, o loo aoaoina ai lesona faalauaitele lea e masani ona toe faamatalaina i pese a le Peraimeri.
Mo se faataitaiga, e mafai ona maua mai se lesona maoae i le pese e uiga i le autau a Helamana. Tatou te usuina: “Pei i matou o le autau a Helamana. Na aoao a o talavou.”1 E toatele i tatou e lagona foi, “ua fanauina i tatou, e pei o Nifae, i ni matua lelei.”2
O lau savali i le aso, e mo outou le augatupulaga muamua o tagata o le ekalesia, o e atonu ua fananau mai i ni matua lelei, ae peitai sa le’i aoaoina le talalelei i totonu o o outou aiga. Nai lo le avea e pei o le autau a Helamana, o e “na aoaoina i latou e o latou tina [e faapea] e laveaiina i latou e le Atua” (Alema 56:47), atonu ua pei outou o o latou matua, o le nuu o Amona, o e na ola ae o ni tagata e le talitonu.
Atonu o le a aoga le toe faamanatu o le tala i le nuu o Amona. O i latou o tagata Sa Lamana o e na aoaoina i le talalelei e Amona, Arona ma isi (tagai Alema 23:1–4). Ina ua latou taliaina le talalelei, na taua nei tagata Sa Lamana o Aneti-Nifae-Liae ma na taua mulimuli ane o le nuu o Amona (tagai Alema 23:16–17; 27:23–26). O atalii o lenei nuu o Amona o le autau lea a Helamana, o e na fesoasoani e tau ma tagata Sa Lamana o e na le’i liliu (tagai Alema 56:3–6).
Ma o le malosiaga la o le autau a Helamana na amata tonu lava i o latou matua, o le nuu o Amona. O i latou ia na muamua aoaoina le talalelei mai tusitusiga paia. O i latou ia na aoao e uiga i le mana o le tatalo. Ma o i latou ia na muamua osia ma tausia feagaiga ma le Alii. Ma e pei lava ona amatalia ia i latou, ua amataina foi ia te outou. I le avea ai ma augatupulaga muamua o tagata o le ekalesia, o outou ia ua amatalia le taamilosaga o le aoaoina ma le faamalolosia o le isi augatupulaga e sosoo ai.
Tusitusiga Paia
O Arona, o le sa avea ma faifeautalai maoae, sa faaaogaina tusitusiga paia e aoao ai le tupu o Sa Lamana ma le nuu o Amona e uiga i le faatuatua ma le salamo ma e uiga ia Iesu Keriso ma le fuafuaga o le fiafia (tagai Alema 22:12–14; 23:4–5). O aso nei, o le faitauina ma le suesueina o tusitusiga paia, e faaauau pea ona fausia ai lo tatou faatuatua, fesoasoani ia i tatou i le teteeina o faaosoosoga, ma mafai ai ona tatou ola latalata atu i le Tama Faalelagi ma Lona Alo o Iesu Keriso.
Ae ui i lea, o le faitauina o tusitusiga paia e mafai ona tulai mai ai se luitau mo tagata uma. Ua faasoa mai e Peresitene Boyd K. Packer ana taumafaiga muamua a o talavou i le faitauina o le Tusi a Mamona. Fai mai a ia: “Sa ou susu’eina, ma faitau, ‘O au o Nifae, na fanaua e matua lelei’ (1 Nifae 1:1)… . Sa manaia, ma sa mafai ona ou malamalama ai seia oo ina ou tau atu i mataupu o le Isaia… . I ni nai masina la mulimuli ane, sa tonu ia te au ou te toe taumafai e faitau le Tusi a Mamona. Sa ou faitauina, ‘O au o Nifae, na fanaua e matua lelei,’ ae o taimi uma lava ou te faia ai, e faafeto’ai lava au e na mataupu o le Isaia… . Na iu lava ina tonu ia te au o le a ou faitauina foi.”3
Ma o lea lava na faitauina lava e Peresitene Packer. O le finafinau lava o le ki lea. Soo se faitauga lava o tusitusiga paia, o le a iloa ai uiga o upu e le masani ai. E mafai ona e faitau ai e uiga i toa ma galuega e tele o le lototoa. E mafai ona e aoao ai e uiga i le alofa mutimutivale o le Alii. Ae o le mea sili, e mafai ona e lagonaina ai le alofa o le Atua ma iloa ai o Iesu Keriso o lo tatou Faaola.
Tatalo
O le tatalo o le isi auala lea e fausia ai le faatuatua. Ina ua fia iloa e le tupu o Sa Lamana le mea e ao ona ia faia ina ia maua ai le fiafia o le talalelei, sa tatalo o ia i le Alii (tagai Alema 22:16–17). O i tatou foi, ua folafola mai i ai, afai tatou te ole atu, o le a foaiina mai ia i tatou.
O Stanley o se tagata sailiili e 19 tausaga i Hong Kong. Sa fiafia lava o ia e uiga i le talalelei ma manao ina ia papatiso seia oo ina faitioina e ana uo le Ekalesia. Na feiloai atu o ia i faifeautalai. Sa la molimau atu e manatu popole tele le Atua ia te ia, o lea e tali mai ai i lana tatalo. Sa la valaauliaina o ia e tootuli ma ole atu i le Tama Faalelagi pe moni ia aoaoga. Sa fai muamua se tatalo puupuu a se tasi o le soa, ona sosoo ai lea ma le isi. Ona tatalo ai lea o Stanley. Ina ua uma lana tatalo faamaulalo, sa la fesili atu ia te ia, “Stanley, o le a sau faalogona?” Na ea malie ae lona ulu ma toetoe lava o se musumusu na ia tali atu ai, “Papatisoga, papatisoga.”4
Feagaiga
Ma le vaega mulimuli, o le osia ma le tausia o feagaiga e faateleina ai le faatuatua. Na osi feagaiga le nuu o Amona “e sili ia te i latou ona avatu o latou lava ola, ai le faamaligiina o le toto o latou uso” (Alema 24:18).
Tatou te osi feagaiga pe a tatou papatiso ma tauave i o tatou luga le suafa o Keriso. E faamanatu mai ia i tatou na feagaiga pe a tatou taumamafa i le faamanatuga. Ma a tatou tausia na feagaiga, e mafai ona tatou maua le mafutaga faifaipea a le Agaga Paia. O le Agaga Paia, o le Fesoasoani foi lea, o lē aoaoina i tatou “i mea uma lava” (Ioane 14:26).
O se uso i le Aai o Mekisiko, e 16 ona tausaga i le taimi na oo atu ai faifeautalai i lona faitotoa. Fai mai o ia, a o la aoao atu ma le Agaga, “na pei lava na la aveeseina mai ni fusi mai ou mata ma faamalamalamaina ai e le Alii lou mafaufau… . O le afioga a le Atua ma au tatalo na faamalosia ai [au] e faatoilaloina lo’u tofotofoga na sosoo ai, o le ta’u atu i lo’u tama. Ina ua teena a’u e lo’u aiga ona o lo’u papatisoga, na faamalosia au e le Agaga o le Alii e ala i le musumusu mai: ‘Faaauau pea. Alu pea. O le a avea nisi o lou aiga ma tagata o le Ekalesia.’”5
O tusitusiga paia, tatalo, ma le osia ma tausia o feagaiga, e le gata ina sa fesoasoani i le nuu o Amona, ae faapea foi i le augatupulaga muamua o tagata o le ekalesia i soo se mea—e aofia ai ma au. Tou te silafia, e ui ina sa ou fanau i ni matua lelei, ae sa le’i aoaoina au i le talalelei i le fale. Ae peitai, sa aoaoina au e ou matua i uiga lelei ma amioga tausaafia. Ou te manatuaina lou tama sa le o se tagata o le ekalesia, ae sa fesoasoani i le tusiaina o lau tautalaga muamua na fai i le lotu. O le autu na aumai o le faamaoni, ma nai lo le faitauina o le mataupu faavae o le faatuatua lona 13, sa ma faaaogaina se faataitaiga o se alii o lona igoa tauvalaau o Ape Faamaoni.
Sa tuu atu i faiaoga o le Peraimeri, taitai o Tamaitai Talavou, ma taitai perisitua e tuuina mai ia te au aoaoga o le talalelei. Ina ua fitu ou tausaga, na aoaoina i matou e lou faiaoga o le Aoga Sa laiti, e uiga i le tatalo, ma na ou manao ai ou te tatalo. Sa ia aoaoina i matou e uiga i le sefuluai, ma na ou manao e totogi le sefuluai. Sa ia aoaoina i matou e uiga i le anapogi, ma ia, sa na o le fitu ou tausaga o lea ou te le’i manao ai ou te anapogi. Ae ina ua ia aoaoina i matou e uiga i le papatisoga, sa ou manao ou te papatiso. Ou te faafetai mo ou matua lelei o e na lagolagoina au i lau filifiliga, ma na mulimuli ane avea foi i laua ma ni tagata o le Ekalesia.
E Amata ia i Tatou
Na ola le nuu o Amona i le talalelei, ma “ua tumau [i latou] i le faatuatua ia Keriso e oo lava i le iuga” (Alema 2:27). Na amataina ia i latou. Ma e amataina ia i tatou. I le avea ai ma augatupulaga muamua o ni tagata o le ekalesia o e ua maua ni molimau, ua i ai nei sa tatou matafaioi ia aoao atu le fanau o aso nei. E tatau ona tatou aoaoina i latou i o tatou fale ma totonu o a tatou vasega. E tatau ona tatou aoaoina i latou i le afioga a le Atua mai tusitusiga paia. E tatau ona tatou aoaoina i latou i le mana o le tatalo ma e ao ona tatou aoaoina i latou i faamanuiaga e oo mai mai le osia ma le tausia o feagaiga. Ma afai tatou te aoaoina i latou, o le a mafai ona latou faapea mai:
Pei i matou o le autau a Helamana.
Na aoao a o talavou.
Ma avea matou ma faifeau
E talai le upumoni.6
I le suafa o Iesu Keriso, amene.