Lotofaafetai: O Se Ala i le Fiafia
O le lotofaafetai o se mataupu faavae e tumu i le Agaga. E tatalaina ai o tatou mafaufau i se lalolagi e tumu i le tamaoaiga o se Atua soifua.
O le afiafi nei, ua faamamaluina lava au e avea ma sui o na taitai o le Aualofa, o e na latou faasoa maia, i lenei lava Tapeneko, ia aoaoga faavae o le malo, ma faamamafa maia le taua o matafaioi a tamaitai i le fale ma le aiga, ma taufai valaau atu e le tasi le isi i galuega alofa, ma faamanatu atu i o latou uso le olioli e maua mai i le ola amiotonu.
Mai i le pulelaa lenei i le 1870, sa fai atu ai e Eliza R. Snow i le fiaafe o tamaitai se fesili lea ou te toe fia fai atua i le aso: “Tou te iloa se nofoaga i luga o le fogaeleele, e maua ai e [se] tamaitai se saolotoga sili atu, ma na te fiafia ai i na avanoa maualuluga ma le mamalu e pei ona ia maua iinei i le Au Paia o Aso e Gata Ai?”1 Ou te molimau atu o tamaitai O Le Ekalesia a Iesu Keriso o le Au Paia o Aso e Gata Ai, o loo sapi i avanoa manaomia maoae ma le mamalu.
Ato Faamanuiaga
Sei ou faasoa atu se tala matagofie lava ia te outou. Sa feagai se aiga ma se taimi faigata. Sa faigata ia i latou ona faagalo o latou luitau. Sa tusia e le tina: “Sa matua malepelepe lo matou lalolagi, o lea na matou liliu atu ai i le Tama Faalelagi mo se taitaiga. Na toetoe o le taimi lava lena na matou iloaina ai sa siomia i matou i le agalelei ma o loo taufai faamalosiau mai i matou i soo se itu. Sa amata o se aiga ona faaali atu lo matou lotofaafetai o le tasi i le isi faapea foi i le Alii i aso taitasi. Sa faasino mai e se uo mamae ia te au ua taumasuasua le matou ‘ato faamanuiaga’. Mai i lena talanoaga, sa oo mai se taaloga, na amata ona matou fiafia i ai ma la’u fanau. Ao lei faia le matou lotu faaleaiga i po taitasi, matou te talanoa i aluga o lo matou aso ona matou fefaasoaai ai lea o o matou mau faamanuiaga sa faaopoopo mai i le matou ‘ato faamanuiaga’. O le tele o lo matou faailoa atu o lo matou lotofaafetai, o le tele foi na o mea e tatau ona matou faafetai ai. Sa matou lagonaina le alofa o le Alii i se auala taua a o tula’i mai avanoa lava latou e tuputupu a’e ai.”2
O le a se mea e faaopoopo atu i lou aiga e se “ato faamanuiaga”?
O se Mataupu Faavae e Tumu i le Agaga
O le lotofaafetai e manaomia ai le iloatino ma taumafaiga, e le gata ia lagonaina ae ia faailoa atu foi. E tele taimi tatou te le iloa ai le aao o le Alii. Tatou te muimui, faitio, tetee, faipona; e tele taimi tatou te le lotofaafetai ai. I le Tusi a Mamona, ua tatou aoao ai, o i latou o e muimui latou te le iloa “galuega a le Atua … o Le na faia i latou.”3 Ua fautuaina i tatou e le Alii ina ia aua le muimui aua o iina e faigata ai i le Agaga ona galue faatasi ma i tatou.
O le lotofaafetai o se mataupu faavae e tumu i le Agaga. E tatalaina ai o tatou mafaufau i se lalolagi e tumu i le tamaoaiga o se Atua soifua. O le lotofaafetai, tatou te iloa ai faaleagaga le matagofie o mea aupito iti, o mea ia e faafiafia ai o tatou loto ia latou savali e uiga i le alofa o le Atua. O lenei iloa o le lotofaafetai, e matua faateleina ai le vave ona tatou lagona ia taitaiga faalelagi. Pe a tatou faailoa atu le lotofaafetai, e mafai ona faatumuina i tatou i le Agaga ma fesootai ai ma i latou o loo siomia ai i tatou faapea foi ma le Alii. O le lotofaafetai e musuia ai le fiafia ma tauaveina upu “Ia outou nonofo ma le faafetai i aso faisoo,” na fai mai ai Amoleka, “ona o le alofa ma manuia e tele ua foaiina mai e ia ia te outou.”4
E eseese ituaiga auala e oo mai ai le alofa ma manuia—o nisi taimi o ni mea faigata. Peitai, ua fetalai mai le Alii, “Ia e faafetai i le Alii lou Atua i mea uma.”5 O mea uma o lona uiga lena: o mea uma, mea faigata—ae le na o ni nai mea. Ua Ia poloaiina i tatou ina ia lotofaafetai aua ua Ia silafia, o le lotofaafetai o le a tatou fiafia ai. O se tasi lea mau e faamaonia ai Lona alofa.
O le a sou lagona pe a faaali atu e se tasi le lotofaafetai ia te oe? I se tasi Aso Sa sa ou nofo ai i talaane o se uso i le Aualofa ma sa ou masani teisi ai ia te ia. I ni nai aso mulimuli ane, sa ou maua ai se i-meli: “Faafetai atu i lou nofo ai i tafatafa o la’u tama i le Aualofa. Sa e opoina o ia. O le a e le iloaina lava le tele o le uiga o lena mea mo ia faapea foi a’u.”6 Sa ou ofo i upu a lenei tina ma sa aumaia ai le fiafia ia te au.
O le a sou lagona pe a e faaali atu lou lotofaafetai i se tasi? Ou te fia faaali atu lo’u lotofaafetai i se tasi e popole alofa mo fanau a la’u fanau. I ni nai masina talu ai, a o ou asiasi atu i Texas, sa ou fesili ia Tomasi e ono tausaga e faamatala mai e uiga i lana epikopo. Sa ia fai mai, “Oi, Tinamatua, o le a e iloa o ia. E fai lona suti paauli, ofutino paepae e pei o Papa, ma ona seevae iila ma se fusiua lanumumu. E fai lana matatioata ma e matafiafia lava i taimi uma.” Sa ou iloa le epikopo o Tomasi i le taimi lava na ou vaai ai ia te ia. Sa faatumulia lo’u loto i le lotofaafetai mo ia. Faafetai lava, Epikopo Goodman, faafetai foi, ia te outou epikopo lelei uma.
O se Faailoaga o le Faatuatua
O loo tusia i le Luka mataupu e 17 le tala i le Faaola ina ua Ia faamaloloina lepela e toa 10. E pei ona outou manatua, e na o le toatasi o lepela uma na faamamaina, sa toe foi e faailoa atu lona agaga talisapaia. Pe le maeu ea ona e lei faapea atu le Alii, “O lou lotofaafetai ua e malolo ai?” Ae na Ia fetalai atu, “Ua e ola i lou faatuatua.”7
O le faailoaga atu e le lepela o le lotofaafetai na silasila i ai le Faaola o se faailoaga o lona faatuatua. A tatou tatalo ma faailoa atu le lotofaafetai i se Tama Faalelagi alofa, ae e le o vaaia, o lo tatou faailoa atu foi lena o lo tatou faatuatua ia te Ia. O le lotofaafetai o la tatou auala aloaia matagofie lea e faailoaina ai le aao o le Alii i o tatou olaga; o se faailoaga o lo tatou faatuatua.
Lotofaafetai i Faigata ma Puapuaga: O Faamanuiaga Natia
I le 1832 sa silafia e le Alii le tulaga manaomia e sauniuni le Ekalesia mo faigata ma puapuaga o le a oo mai. O faigata ma puapuaga e taufaafefe. Ae peitai, na fetalai mai le Alii: “Ia fiafia pea, aua o le a ou taitaiina outou. O le malo e o outou lava ma faamanuiaga o i ai e o outou ia, o oa foi o le faavavau e a outou ia.
“O lē talia foi mea uma ma le faafetai o le a faamamaluina.”8
O le ituaiga o lotofaafetai e taliaina ma le faafetai e oo lava i puapuaga ma faigata, e manaomia ai le loto salamo ma se loto momomo, lotomaulalo e talia ai mea e le mafai ona tatou suia, naunau e tuu atu mea uma i le Alii— e tusa lava foi pe tatou te le malamalama, faafetai mo avanoa natia e lei faaalia mai. Ona oo mai ai lea o se lagona o le toafilemu.
O le a le taimi mulimuli na e faafetai ai i le Alii mo tofotofoga po o puapuaga ma faigata? O mafatiaga e faamalosia ai i tatou tatou te o i o tatou tulivae; pe faia ea foi e le lotofaafetai mo mafatiaga lena mea?
Sa matauina e Peresitene Tavita O. MaKei, “Tatou te maua i le matuitui o mafatiaga le tofotofoga moni lava o lo tatou lotofaafetai … , lea … e i lalo ifo o le laualuga o le olaga, po o le faanoanoa po o le fiafia.”9
Faaiuga
Mo o’u uso maoae, ma faamaoni o le Ekalesia, ou te faafetai atu ia te outou mo auala o loo outou avatu ai le alofa o le Alii e ala i la outou auaunaga: o la outou tausiga o aiga i se maliu o sē e pele, o la outou tausiga a o outou asiasi ma aoao; o lo outou naunautai e atiina ae molimau a tamaiti ao outou auauna ai i le Peraimeri, o lo outou taimi e saunia ai tamaitai talavou mo le tulaga faatamaitai. Faafetai atu i lo outou naunautai. Ua ou iloaina le alofa o le Alii e ala i lo outou faamaoni. Ua faamanuiaina au ou te auauna atu ia te outou; ua matua tumu a’u i le lotofaafetai ma le alofa ia te outou. Ua ia te au le lotofaafetai o’oo’o mo tamalii o le au perisitua sa matou galulue faatasi.
O lo’u lotofaafetai aupito silisili e mo lo’u Faaola—o se Alo usiusitai, o lē sa ia faia mea uma sa poloaiina ai e Lona Tama, ma togiolaina i tatou uma taitoatasi. A ou manatuaina o Ia ma faailoa Lona agalelei, ou te naunau ai lava ina ia faapei o Ia. Ia faamanuiaina i tatou ina ia tatou lagonaina Lona alofa i o tatou olaga i aso taitasi. “Faafetai i le Atua i lana mea foai fua e le mafaamatalaina.”10 I le suafa paia, o Iesu Keriso, amene.