“Tina, O Tatou O Ni Kerisiano?”

Elder Gary J. Coleman

O Le Au Fitugafulu

O au o se Kerisiano faamaoni o le ua matuai manuia lava i le mauaina o le malamalama sili atu i le “aoaoga faavae [moni] a Iesu Keriso” talu ona ou liliu mai i le Ekalesia toefuataiina.

Ata

O le faaKerisiano e faamanatuina le soifuaga ma le galuega a Iesu Keriso, le Alo Pele e Toatasi o le Atua le Tama Faavavau. Ua i ai i le lalolagi atoa lotu Kerisiano ma le tele o aoaoga eseese. Ina ua ulufale atu Cortnee e 14 tausaga, o se afafine o se peresitene o le misiona, i se aoga maualuga o se tausaga muamua, sa fesiligia o ia e tamaiti o lana vasega pe o ia o se Kerisiano. Na latou tauemu i lana tali o ia o se Mamona, o se ta’uga masani O Le Ekalesia a Iesu Keriso o le Au Paia o Aso e Gata Ai. I lona taunuu atu i le fale, sa ia fesili ai i lona tina, “Tina, o tatou ea o ni Kerisiano?”

O le tuputupu ae i lou aiga, sa matou ola ai o ni tagata faamaoni o se isi faatuatuaga Kerisiano. Na papatisoina au o se tagata o lena lotu ao le’i leva ona ou fanau. Na o lo matou aiga i le lotu i vaiaso taitasi. Mo le tele o tausaga na matou fesoasoani ai ma ou uso i faifeau na taitaia a matou sauniga i Aso Sa. Na aoaoina au i le taua o tatalo faaleaiga a o tatalo faatasi lo matou aiga i aso taitasi. Sa ou mafaufau faapea, e i ai se aso o le a ou ulufale ai i le galuega faafaifeau a lau ekalesia. Na leai se fesili i o matou mafaufau e mafai ona matou faamatalaina i matou lava o ni Kerisiano faamaoni.

Ae peitai, ina ua avea au ma se tagata aoga i le iunivesite, na ou masani ai i tagata ma aoaoga a Le Ekalesia a Iesu Keriso o le Au Paia o Aso e Gata Ai, o se faatuatuaga Kerisiano e autu i le Faaola. Na amata ona ou aoao e uiga i aoaoga o le Toefuataiga o le talalelei a Iesu Keriso i nei aso e gata ai. Na ou aoaoina upumoni ou te le’i iloaina muamua na faapea ona suia ai lo’u olaga ma la’u vaaiga i le talalelei. I le maea ai o le tele o suesuega, tatalo, ma le faatuatua, na ou filifili loa e talia upumoni matagofie toefuataiina lea na o lenei lava Ekalesia ua maua ai.

O le upumoni toefuataiina muamua na ou aoaoina o le natura o le aigaAtua. O le aoaoga moni a Kerisiano e faapea o le aigaAtua e i ai ni tagata mavaevae se toatolu na iloa i taimi o le tusi paia. Na molimau le Atua ia Iesu Keriso, o Lona Alo Pele e Toatasi, i le tele o taimi. Na fetalai mai o Ia i le papatisoga o Iesu: “O lou Atalii pele lena, ua Ou fiafia ia te Ia.”¹ Na molimau Iesu lava Ia i le Atua, o Lona Tama, ina ua Ia fetalai mai, “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.”² Ina ua mavae le maliu ma le Toetu o Iesu, ua tatou iloa o Setefano, “ua tumu o ia i le Agaga Paia, ua pulatoa i le lagi, ua iloa atu le pupula o le Atua, ma Iesu o loo tu i le itu taumatau o le Atua, ona fai atu lea, Faauta, ua ou iloa le lagi ua avanoa, ma le Atalii o le tagata o loo tu i le itu taumatau o le Atua.”³ Matuai mataina le molimau e uiga i le aigaAtua mai lena soo o Keriso.

O le malamalama e uiga i le Atua ma Lona mavaevae faaletino mai Lona Alo ma le Agaga Paia, na aveesea ina ua mavae le maliu o Keriso ma Ona Aposetolo. O aoaoga fenumiai ma le sese e uiga i le aigaAtua na mafua mai i le Talitonuga Faavae Naisene (Nicene Creed) ma aufono a Konesetatino, lea na tautino ai e tagata, nai lo ni tagata mavaevae se toatolu, o le aigaAtua o ni tagata se toatolu i totonu o se Atua e toatasi, po o le Tasi Tolu Paia. E pei foi o le taumafaiga a tagata vavae Porotesano Kerisiano i nei tautinoga a tagata, na faapena foi au. O aoaoga e uiga i le Tolu Tasi Paia na ou aoaoina i lo’u talavou, e le fetaui ia te au.

Ae ui i lea, ina ua folasia mai ia te au upumoni matagofie e uiga i le Uluai Faaaliga lea na oo i le Perofeta o Iosefa Samita, na avea o se fafagu mataina mo au le iu ina [ou] malamalama i le upumoni e uiga i le natura o le Atua le Tama Faavavau ma Lona Alo Pele e Toatasi. Na tautino mai e Iosefa: “Sa ou vaaia ni Tagata se toalua e le mafaamatalaina lo laua mamalu ma lo laua pupula, o loo tutu mai i ou luga ae i le ea. Sa fetalai mai le tasi o i laua ia te au, ma sa ia tau lou igoa ma fetalai mai a o tusi ane lona aao i le tasi—O Lou Atalii Pele lenei. Faalogo ia te Ia!”⁴ O lenei faaaliga faalelagi ua toefuataiina ai le malamalama ofoofogia ae mama ma faapelepele e uiga i le Atua ma Lona Alo i le lalolagi, ua tafiesea ai i le taimi lava lena aoaoga na ou aoaoina e uiga i le Tolu Tasi Paia.

Ou te iloa o faaaliga na auina mai le lagi ua suia ai mea sese iloga o aoaoga na faia e tagata e faatatau i le aigaAtua. Ou te iloa o le Atua o lo tatou Tama Faalelagi. O Lona Alo, o Iesu Keriso, o lo’u Faaola. O le Agaga Paia e molimau i le Tama ma le Alo. E faailoa atu lou agaga faafetai tele i le Atua mo le faaalia mai o le Alii toetu o Iesu Keriso i tagata i nei aso e gata ai. O loo soifua le Faaola; na vaaia o Ia; na fetalai mai o Ia; Na te taitaiina le galuega a Lana Ekalesia e ala i aposetolo ma perofeta i aso nei. O ni upumoni mataina tele ua Ia aoaoina mai i le avea ai o se Leoleo Mamoe Lelei o lē o loo faaauau pea ona tausia Ana mamoe.

O le upumoni toefuataiina lona lua na ou aoaoina a o avea ma se tagata sailiili o lenei Ekalesia, o le moni o tusitusiga paia faaopoopo ma faaaliga. Na vaai le perofeta o Isaia i le faaaliga i se tusi lea na ia tautino mai o se vaega “o le vavega lava o le mea foi e ofo ai.”⁵ Ou te molimau atu o le Tusi a Mamona: O Se Tasi Molimau Ia Iesu Keriso, o le tusi lena. O se faamaumauga paia na tusia e perofeta a le Atua e faatauanau ai tagata uma ina ia o mai ia Keriso, ma e fesoasoani e faaali mai le talalelei a Iesu Keriso i lona atoatoa. O le Tusi a Mamona o loo taua ai perofeta ma isi tagata faamaoni o le Ekalesia, o e na tauaveina i o latou luga le suafa o Keriso, a o le’i soifua mai le Faaola.⁶ O lenei tusi o loo taua ai e uiga i le Keriso toetu na aoaoina tagata i le mea e ao ona latou faia e maua ai le filemu i lenei olaga ma le faaolataga e faavavau i le lalolagi a sau. O le a se isi mea e sili atu ona Kerisiano nai lo le saili e tauave Lona suafa i o tatou luga ma mulimuli i Ana fautuaga ina ia avea faapei o Ia?

Ua saunoa mai Persitene Gordon B. Hinckley, “E le mafai ona ou malamalama pe aisea e le talia ai e le lalolagi Kerisiano lenei tusi.”⁷ Na ou faitauina muamua le Tusi a Mamona i le 21 o o’u tausaga. Ona ou fesili lea i le Atua pe moni. O lona moni na faaalia mai ia te au e ala i le mana fesoasoani o le Agaga Paia.⁸ Ou te iloa o le Tusi a Mamona o se molimau lona lua ia Iesu Keriso. E au faatasi la’u molimau ma perofeta o lenei tusi paia i le folafola atu e faapea “ua matou tautalatala ia Keriso, ua matou olioli ia Keriso, ua matou talai atu Keriso, ua matou vavalo atu foi ia Keriso.”⁹ Ou te matuai faafetai tele mo upu uma na Ia fetalaia, ma upu uma o loo faaauau ona Ia fetalai mai ai a o Ia faamalieina lo tatou galala i le vai ola.

O le isi upumoni toefuataiina o le talalelei ua ou iloaina o le toefuataiina mai lea o le pule o le perisitua, po o le mana e galue ai i le suafa o le Atua. O perofeta ma aposetolo o anamua, e pei o Elia, Mose, ma Ioane le Papatiso, Peteru, Iakopo, ma Ioane, na auina mai e le Atua ma Keriso i o tatou aso e toefuatai mai le perisitua paia a le Atua. O i latou uma ua umia le perisitua i lenei Ekalesia, e mafai ona saili atu lana pule o le perisitua e tau ia Iesu Keriso. Ua umia nei e alii ia ki e faatuina ai le Ekalesia, ina ia mafai ona tatou o mai ia Keriso ma auai i Ana sauniga e faavavau o le faaolataga.¹⁰ Ou te molimau atu o le Ekalesia lenei a Iesu Keriso—o le ekalesia e tasi ua faatagaina i le pule tonu o le perisitua e faaaogaina ki o le faaolataga e ala i sauniga paia.

Na fesili Cortnee, “Tina, o tatou o ni Kerisiano?” I le avea ai ma se tagata O Le Ekalesia a Iesu Keriso o le Au Paia o Aso e Gata Ai, o oe o se Kerisiano, e faapena foi au. O au o se Kerisiano faamaoni o le ua matuai manuia lava i le mauaina o le malamalama sili atu i le “aoaoga faavae [moni] a Iesu Keriso”¹¹ talu ona ou liliu mai i le Ekalesia toefuataiina. O nei upumoni ua faamanino ai, o lenei Ekalesia ua i ai le atoatoaga o le talalelei a Iesu Keriso. E pei foi o isi tagata o le Ekalesia, ua ou malamalama nei i le natura moni o le aigaAtua, ma ua ou maua foi tusitusiga paia faaopoopo ma faaaliga, ma e mafai ona ou tofo i faamanuiaga o le pule o le perisitua. Ioe, Cortnee, o i tatou o Kerisiano, ma ou te molimau atu i nei upumoni, i le suafa o Iesu Keriso, amene.